Levítico 4 - Biblia Yanowamö

Bä yacläö lä ja̦too wei tä a̦

¹ Moisesi nija abinaja Jeobaa a cuma.

² —Camiyänö bäfä nowa lä talenaja, Isaeli ebä da yömöla. Jeobaa yanö ya tä bluca taö lä wasöö wei tä ja, ai anö tä nofi wa̦lidiwä mojodubolanö, moli tä ma cui ja, a yacläö ja̦too däjä, tä wa̦lidiwä. Tä taö fe lä yadio wei a nija, ei ya tä nabä shömabä ya wa̦.

Nofi bäyäalewä a bada yacläö lä ja̦too wei tä a̦

³ Abinaja Jeobaa a cuma. —Nofi bäyäalewä a bada ma cuinö, ya tä taö lä wasöö wei tä ja a yacläö dicoo ja, bä nofi nia bluca nacaaö. Ö̦jö bluca bä nija ya tä nowa tabou mladobä, baca ocalo a nia wa̦lo dodobou, a lä dodijidai. Etä wai jalili yädäa lä mlai a yalo ca̦i fa juimanö, camiyä Jeobaa ya nija a nia dodobou, etä nowa mladobä.

⁴ ’Iba yano jamö yoca lä cui jamö, camiyä Jeobaa ya nija baca a ca̦i fa juimanö, ö̦jö fe yalo ja, imicö maquelanö a nia shäö —a cuma—.

⁵ Ö̦jö däjä, ö̦jö nofi bäyäalewä bada anö, baca i̦yäbö mashi fa dälänö, iba yano jamö i̦yäbö ca̦i nia faö.

⁶ Bei i̦yäbö lä babou wei jamö, bei imi fa cadonö, camiyä Jeobaa ya lä cule jamö i̦yäbö nia yomösaö cuaaö, acadafu cäcö lä läle jamö. I̦yäbö lä yomösaö wei, 7 i̦yäbö nia yomösaö cuo.

⁷ ’Ö̦jamö, täbä wa̦queshi ni cle̦deli lä u̦cucamou wei täbä nia lä dodoblamou wei bä maqueblamobä täcö jamö, i̦yäbö nia ca̦i taaö, camiyä Jeobaa ya lä cule jamö —a cuma—. Ö̦jö ola tä jamö, tä lä sha̦clodole jamö, jai yalo yo̦labä cuwä täbä nia i̦yäamaö. ¿Ö̦jö tawä? Iba yano jamö yoca lä cui jamö, yalo bä lä dodoblamou wei bä maqueblamobä täcö cotä ja, i̦yä i̦yä bä lä jäblou wei bä nia shee löaö.

⁸ Ya tä nowa tabou mladobä a baca nia wa̦lo lä shäö wei a lä cui, bei dabö bä nia comi däaö, bei shicö jamö bä bluca lä cublai.

⁹ Bei jumoto jamö, bei wa̦cle mabö befi ca̦i dabö dabö lä cui, ö̦jö bä nia ca̦i däaö. ¿Ö̦jö tawä? Bei wa̦cle maböcö däaö däjä, bei amocu dabö nia ca̦i icocoaö showadao.

¹⁰ ’¿Ö̦jö tawä? —a cuma—. Jeobaa wale a̦ oquemabobeje, baca a shäöje däjä, bä dabö dabö comi däaö lä cuaaö wejeinaja, ö̦jö nofi bäyäalewä bada a lä cui, inaja a nia cuaaö mö feduo showao. Dabö dabö bä bluca fa dälänö, yalo bä lä dodoblamou wei bä maqueblamobä täcö jamö, bä nia ö̦shömaö.

¹¹ Ö̦jö däjä, yalo bei sicö lä cui, bei ya̦jicö lä cui, bei fe lä cui, bei matabä lä cui, bei shicö lä cui, bei shiji bä lä cui,

¹² bä lä bälöle tä sibo jamö baca comi a nia bälaö, tä ulifi au lä yaibolajei jamö. Yubu ushibö showadi lä joyaö wejei jamö. Ö̦jamö, yubu ushibö lä yododole jamö a̦yobä fa jilacönö, yalo a fa maqueicönö a nia ö̦shömaö—Jeobaa a cuma.

Bluca täbä yacläö lä ja̦too wei tä a̦

¹³ Abinaja Jeobaa a cuma. —Jeobaa yanö ya tä bluca taö lä wasöö wei tä ja, tä nofi wa̦lidiwä mojodubolajenö, moli tä ma cui ja, Isaeli ebä bluca yacläö ja̦too däjä, tä taö fe yadioje ja, tä wa̦lidiwä. Ö̦jö bä nija ya tä nowa tabobä tä cua ja, abinaja bä nia cuaaö.

¹⁴ Bä doblou lä mlaono wei tä wawäblou däjä, cama bä blucanö baca ocalo a nia wa̦lo dodobouje. Wa̦lidiwä tä nowa mladobä a dodobobeje cä a. Iba yano tä je̦fa jamö a nia ca̦i juuje.

¹⁵ Ö̦jö däjä, ö̦jö fe yalo ja, bada bä imicö maquelanö, camiyä Jeobaa ya lä cule jamö a nia shäöje.

¹⁶ ’Ö̦jö däjä, nofi bäyäalewä bada anö baca i̦yäbö mashi fa dälänö, iba yano jamö i̦yäbö ca̦i nia faö —a cuma—.

¹⁷ Bei i̦yäbö lä babou wei jamö, bei imi fa cadonö, camiyä Jeobaa ya lä cule jamö i̦yäbö nia yomösaö cuaaö, acadafu cäcö lä läle jamö. I̦yabö lä yomösaö wei, 7 i̦yäbö nia yomösaö cuo.

¹⁸ Ö̦jamö, täbä wa̦queshi ni cle̦deli lä u̦cucamou wei täbä nia lä dodoblamou wei bä maqueblamobä täcö jamö, i̦yäbö nia ca̦i taaö, camiyä Jeobaa ya lä cule jamö. Ö̦jö ola tä jamö, tä lä sha̦clodole jamö, jai yalo yo̦labä cuwä täbä nia i̦yäamaö. ¿Ö̦jö tawä? Iba yano jamö yoca lä cui jamö, yalo bä lä dodoblamou wei bä maqueblamobä täcö cotä ja, i̦yä i̦yä bä lä jäblou wei bä nia shee löaö.

¹⁹ ’Ö̦jö däjä, baca dabö dabö bluca fa dälänö, yalo bä maqueblamobä täcö jamö bä nia ö̦shömaö —a cuma—.

²⁰ ¿Ö̦jö tawä? Wa̦lidiwä tä nowa mladobä a baca taamaö lä balöono weinaja, inaja showawä. Isaeli ebä nija ya tä nowa mladamabä, inaja nofi bäyäalewä a nia cuaaö. Ö̦jö däjä, ya etä nowa nia mladamaö.

²¹ Ö̦jö däjä, bä lä bälöle tä sibo jamö baca a fa bälanö, ai a baca ö̦shömaö lä cuaano weinaja, inaja showawä a nia ö̦shömaö cuo. Cama bä bluca nija, wa̦lidiwä tä nowa mladobä cätä —a Jeobaa cuma.

Bada a yacläö lä ja̦too wei tä a̦

²² Jeobaa abinaja a cuma. —Jeobaa yanö ya tä bluca taö lä wasöö wei tä ja, bada anö tä nofi wa̦lidiwä mojodubolanö, moli tä ma cui ja, a yacläö ja̦too däjä, tä taö fe yadio ja, tä wa̦lidiwä —a cuma—. Ö̦jö nija ya tä nowa tabobä tä cua ja,

²³ a doblono lä mlai etä wawäblamaöje däjä, shibo a dodobobä, bada anö a nia ca̦i juimaö. Shibo a lä dodijidai a nia wa̦lo ca̦i juimaö, etä wai jalili yädäa lä mlai.

²⁴ ’Ö̦jö fe yalo ja, imicö maquelanö a nia shäö —a cuma—. Yalo a ö̦shö dodobobeje, bä shäö lä yaimou wejei jamö a nia shäö, camiyä Jeobaa ya lä cule jamö. ¿Ö̦jö tawä? Wa̦lidiwä tä nowa mladobä a dodobobeje a.

²⁵ Ö̦jö däjä, wa̦lidiwä tä nowa mladobä a dodobobeje a shibo lä cui, nofi bäyäalewä anö, bei i̦yäbö mashi lä babou wei jamö bei imi nia cadou. Imi fa cadonö, yalo bä lä dodoblamou wei bä maqueblamobä täcö jamö, i̦yäbö nia taaö. Ö̦jö ola tä jamö, tä lä sha̦clodole jamö, jai yalo yo̦labä cuwä täbä nia i̦yäamaö. Ö̦jö däjä, yalo bä maqueblamobä täcö cotä ja, i̦yä i̦yä bä lä jäblou wei bä nia shee löaö.

²⁶ ’Ö̦jö däjä, yalo bä maqueblamobä täcö jamö, shibo dabö dabö bluca bä nia ö̦shömaö —a cuma—. Jeobaa wale a̦ oquemabobeje, bä dabö dabö lä taamaö wejeinaja showawä. Bada ya etä nowa mladamabä, inaja nofi bäyäalewä a nia cuaaö. Ö̦jö däjä, ya etä nowa nia mladamaö —Jeobaa a cuma.

Ai a bädawä lä cui a yacläö lä ja̦too wei tä a̦

²⁷ Abinaja Jeobaa a cu̦u co̦oma. —Jeobaa yanö ya tä bluca taö lä wasöö wei tä ja, ai a bädawä ma cuinö, tä nofi wa̦lidiwä mojodubolanö, moli tä ma cui ja a yacläö ja̦too däjä, tä wa̦lidiwä. Tä taö fe yadio ja, ö̦jö nija ya tä nowa tabobä tä cua ja, abinaja a nia cuaaö.

²⁸ A doblono lä mlai etä wawäblamaöje däjä, shibo a dodobobä a nia ca̦i juimaö. A doblono lä mlai tä nowa ja, shibo a lä dodijidai a ca̦i nia suwä juimaö, etä wai jalili yädäa lä mlai.

²⁹ ’Wa̦lidiwä tä nowa mladobä a nia lä shämou wei a fe yalo ja, imicö maquelanö a nia shäö —a cuma—. Yalo a ö̦shö dodobobeje bä shäö lä yaimou wejei jamö a nia shäö.

³⁰ Ö̦jö däjä, nofi bäyäalewä anö, bei i̦yäbö mashi lä babou wei jamö bei imi fa cadonö, yalo bä lä dodoblamou wei bä maqueblamobä täcö jamö i̦yäbö nia taaö. Ö̦jö ola tä jamö, tä lä sha̦clodole jamö, jai yalo yo̦labä cuwä täbä nia i̦yäamaö. Ö̦jö däjä, yalo bä maqueblamobä tä cotä ja, i̦yä i̦yä bä lä jäblou wei bä nia shee löaö.

³¹ ’¿Ö̦jö tawä? —a cuma—. Ö̦jö däjä, bei dabö bä nia comi däaö, Jeobaa wale a̦ oquemabobeje bä yalo lä shämou wei bei dabö bä comi lä däaö wejeinaja showawä. Yalo bä maqueblamobä täcö jamö, nofi bäyäalewänö bä nia dabö dabö ö̦shömaö. Camiyä Jeobaa yanö ö̦jö ya tä nö u̦cucaö däjä, “Tä dodijidawä”, ya nofi tabobä. Ö̦jö ya etä nowa mladamabä, inaja nofi bäyäalewä a nia cuaaö. Ö̦jö däjä, ya etä nowa nia mladamaö.

³² ’Ö̦jö a lä cuinö, a doblono lä mlai etä nowa mladobä, oweja a ocalo ca̦i juu ja, suwä a nia ca̦i juu, a lä liyäjäi, etä wai jalili yädäa lä mlai —a cuma—.

³³ Wa̦lidiwä etä nowa mladobä a fe yalo ja, imicö maquelanö a nia shäö. Yalo a ö̦shö dodobobeje, bä shäö lä yaimou wejei jamö a nia shäö.

³⁴ Ö̦jö däjä, wa̦lidiwä tä nowa mladobä a dodobobeje a oweja lä cui, nofi bäyäalewä anö, bei i̦yäbö mashi lä babou wei jamö bei imi nia cadou. Imi fa cadonö, yalo bä lä dodoblamou wei bä maqueblamobä täcö jamö i̦yäbö nia taaö. Ö̦jö ola tä jamö, tä lä sha̦clodole jamö, jai yalo yo̦labä cuwä täbä nia i̦yäamaö. Ö̦jö däjä, yalo bä maqueblamobä täcö cotä ja, i̦yä i̦yä bä lä jäblou wei bä nia shee löaö.

³⁵ ’Ö̦jö däjä, bei dabö bä nia comi däaö, Jeobaa wale a̦ oquemabobeje bä oweja lä shämou wei bei dabö bä comi lä däaö wejeinaja showawä —a cuma—. Yalo bä lä dodoblamou wei bä maqueblamobä täcö jamö, nofi bäyäalewänö bä nia dabö dabö ö̦shömaö. ¿Ö̦jö tawä? Cowa wacö ja bä yalo fa ö̦shömajenö, camiyä Jeobaa ya nija bä ö̦shö dodobobeje jamö, bä nia yablaö yädämou. A doblono lä mlai ya etä nowa mladamabä, inaja nofi bäyäalewä a nia cuaaö. Ö̦jö däjä, ya etä nowa nia mladamaö —Jeobaa a cuma.