Levítico 3 - Biblia Yanowamö

Jeobaa a wa̦ oquemabobeje täbä nia lä dodobono wejei tä a̦

¹ Moisesi a yömölaö showalanö, abinaja Jeobaa a cuu co̦oma. —Jeobaa wale a̦ oquemabobä, ai anö cama yalo e ca̦i juu däjä, cama baca ebä nijamö a lä dodijidai a nia yaiaö. Suwä a ma cui, wa̦lo a ma cui, Jeobaa ya nija etä wai jalili yädäa lä mlai a nia dodobou.

² ’A ö̦shö nia lä dodobou wei fe yalo ja, imicö maquelanö, iba yano jamö yoca lä cui jamö a nia shäö —a cuma—. Ö̦jö däjä, yalo bä lä dodoblamou wei bä maqueblamobä täcö jamö, nofi bäyäalewä bä lä cuinö, i̦yäbö nia yomösaö fe fa̦yoaöje.

³ Ö̦jö däjä, wale a̦ oquemabobä, a yalo lä dodobou wei a lä cuinö, ai a nia mashi yalo jöböäö. Camiyä Jeobaa ya nija bä ö̦shö dodobobeje. Bei shicö jamö bä dabö dabö lä cublai bä nia jöböäö.

⁴ ’Bei jumoto jamö, bei wa̦cle mabö dabö dabö a befi ca̦i lä cui, ö̦jö bä nia ca̦i jöböäö —a cuma—. Bei wa̦cle maböcö bolacabö lä delei wei däjä, bei amocu dabö nia ca̦i icocoaö showadao.

⁵ Ö̦jö däjä, yalo bä lä dodoblamou wei bä maqueblamobä täcö jamö, nofi bäyäalewä bänö bä nia ö̦shömaöje. Co̦wa a̦yobä yaobä jamö, yalo bä showadi lä ö̦shömaö wejei däjä, bä nia yablaö yädämou. Cowa wacö ja bä ö̦shömabeje cätä. Camiyä Jeobaa yanö ö̦jö ya tä nö u̦cucaö däjä, “Tä dodijidawä”, ya tä nofi nia tabou.

⁶ ’Jeobaa wale a̦ oquemabobä, ai anö oweja e ma cui, shibo e ma cui, e ca̦i juu däjä, cama yalo ebä nija a lä dodijidai a nia yaiaö —a cuma—. Suwä a ma cui, wa̦lo a ma cui, Jeobaa ya nija etä wai jalili yädäa lä mlai a nia dodobou.

⁷ Wale a̦ oquemabobä, oweja ocalo a dodobou ja, camiyä Jeobaa ya nija a ca̦i fa junö,

⁸ ö̦jö fe yalo ja, imicö maquelanö, iba yano je̦fa jamö a nia shäö. Ö̦jö däjä, yalo bä lä dodoblamou wei bä maqueblamobä täcö cotä jamö, nofi bäyäalewä bänö i̦yäbö nia yomösaö fe fa̦yoaöje.

⁹ ’Wale a̦ oquemabobä a yalo lä dodobou wei a lä cuinö, ai a nia mashi yalo jöböäö, camiyä Jeobaa ya nija bä ö̦shö dodobobeje —a cuma—. Bei shicö jamö bä dabö dabö lä yädäblai bä nia jöböäö. Comi bei shina ca̦i. Shina colo döa lä dodijile ja, shina fa janöblalönö shina nia jöböäö, dabö dabö bä befi ca̦i. Bei shicö jamö bä dabö dabö lä cublai bä ca̦i.

¹⁰ ’Bei jumoto jamö, bei wa̦cle maböcö bolacabö fa jocälönö, täcöbö nia ca̦i jöböäö, dabö dabö a befi ca̦i —a cuma—. Bei wa̦cle maböcö bolacabö lä delei wei däjä, bei amocu dabö nia ca̦i icocoaö showadao.

¹¹ Ö̦jö däjä, yalo bä lä dodoblamou wei bä maqueblamobä täcö jamö, nofi bäyäalewä bänö bä nia yaaöje. Cowa wacö ja bä nia ö̦shömaöje. Jeobaa ya nija bä ö̦shö dodobobeje cäbä.

¹² ’Wale a̦ oquemabobä, shibo a dodobou ja, camiyä Jeobaa ya nija a ca̦i fa juimanö,

¹³ ö̦jö fe yalo ja imicö maquelanö, iba yano je̦fa jamö a nia shäö —a cuma—. Ö̦jö däjä, yalo bä maqueblamobä täcö jamö, nofi bäyäalewä bänö i̦yäbö nia yomösaö fe fa̦yoaöje.

¹⁴ Ö̦jö däjä, Jeobaa wale a̦ oquemabobä, a yalo lä shäö wei a lä cuinö, nofi bäyäalewä bä nija ai a yalo nia mashi jöböäö. Camiyä Jeobaa ya nija bä ö̦shö dodobobeje. ’¿Ö̦jö tawä? —a cuma—. Bei shicö jamö bä dabö dabö lä cublai bä nia jöböäö.

¹⁵ Bei jumoto jamö, bei wa̦cle maböcö bolacabö fa dälönö, täcöbö nia ca̦i jöböäö, dabö dabö a befi ca̦i. ¿Ö̦jö tawä? Bei wa̦cle maböcö bolacabö lä delei wei däjä, bei amocu dabö nia ca̦i icocoaö showadao.

¹⁶ Ö̦jö däjä, yalo bä lä dodoblamou wei bä maqueblamobä täcö jamö, nofi bäyäalewä bänö bä nia yaaöje. Cowa wacö ja bä nia ö̦shömaöje. Bä ö̦shö dodobobeje cäbä, tä nö u̦cucamou dodijidaobä. ’Dabö dabö bä jödödöwä lä cublai bä ja, camiyä Jeobaa wale dobäbeje cäbä —a cuma—.

¹⁷ Ei ya wa̦ lä cui, wamale a̦ nofi jaducubou shi wa̦libä ya wa̦. Inaja wamacö nia cuaaö shi wa̦lii. Dabö dabö bä ma cui, i̦yä i̦yä bä ma cui, wama bä wabä bämi. Cafä wamacö ma cuinö, wamacö nodiwä nia bälöaö lä nodiaö wei bä ma cuinö, wama bä nia waimi. Wamacö bälöa lä bädale ma cui jamö, inaja showawä.