Levítico 23 - Biblia Yanowamö

Jeobaa nija bä nia showadi iyaö ca̦i lä co̦camono wei tä a̦

¹ Moisesi nija abinaja Jeobaa a cuma.

² —Isaeli ebä da yömöla. Camiyä Jeobaa ya nija wamacö nia iyaö ca̦i lä co̦camou wei wama tä nofi jaducubobä, ei ya wa̦. ¿Ö̦jö tawä? Wamacö nia iyaö ca̦i lä co̦camou wei wama tä a̦fa ayao wäyäbä.

³ Wamacö ojodamou showao däjä, 6 wama tä mö nia didi tablamaö. Ö̦jö däjä, 7 tä mö jalu jamö wamacö nia yanöcöo. Jeobaa ya nija wamacö iyaö ca̦i co̦camobä tä mö li jalu. Wamacö nia juimi. Bluca wamacö yanobö lä cublai jamö ma cui, inaja showawä. “Jeobaanö bämalecö yanöcömabobä, ei tä mö li jalu”, wama tä nofi nia jalu tabou.

⁴ ’Jeobaa ya nija wamacö nia iyaö ca̦i lä co̦camou wei, ei ya wa̦ —a cuma—. Wama tä a̦fa nia wäyäö, wamale nofi nia lä co̦camoaö wei tä mö nofi jalu yaibobeje.

⁵ ’Bei —a cuma—. Jaba a belibo ja, 14 tä jamö, Jeobaa ya waiteli lä jayuano wei wama tä nofi jaducubobä, ö̦jö tä.

⁶ Ö̦jö tä belibo showawä ja, 15 tä jamö, nii juluno mlai bä ja, wamacö nia jaba iyaö. Ö̦jö bä ja, wamacö iyaö showao däjä, 7 wama tä mö nia didi tablamaö.

⁷ ¿Ö̦jö tawä? Wamacö jaba iyaö däjä, wamale nofi nia co̦camoaö. Wamacö showadi lä juu weinaja wamacö nia cuaaimi.

⁸ Abinaja wamacö nia shino cuaaö. Cowa wacö ja yalo wama a fa ö̦shömanö, camiyä Jeobaa ya nija wama a nia shino ö̦shö dodobou cuaaö. Inaja wamacö cuaaö däjä, 7 wama tä mö nia didi tablamaö. Wamacö showadi lä juu weinaja wamacö nia cuaaimi —a Jeobaa cuma.

Nii bä jaba lalou däjä, bä nia lä co̦camono wei tä a̦

⁹ Abinaja Moisesi nija Jeobaa a cuu co̦oma.

¹⁰ —Isaeli ebä da yömöla. Afä ya tä ulifi lä jöböaö wei jamö wamacö waloo däjä, nii bä jaba lä lalou wei wama bä nii manöö däjä, wama bä jaba bäshäcu lä o̦cablaö wei, nofi bäyäalewä nija wama bä ca̦i nia o̦cama talö juu.

¹¹ Ö̦jö a lä cuinö, Jeobaa ya nija bä nia o̦cama dodoablalaö, bämacö dodijidawä tabobä. ¿Ö̦jö tawä? Jaba tä jalu däjä, ö̦jö bä nia o̦cama dodoablalaö.

¹² Wama bä dodoablalamaö däjä, ö̦jö däjä showawä oweja wa̦lo wama a nia ocalo dodobou, lasha moli a lä famaleno wei a lä cui. Jeobaa ya nija, a lä dodijidai wama a nia dodobou, etä wai jalili yädäa lä mlai.

¹³ ’Dodijidawä wama ji̦bä dodobou yädämobä, lo̦shi wama mobä fa washishanö, wama ji̦bä nia jushishaö —a cuma—. Jaboca blowäjäwä a ja, ö̦jö wama ji̦bä fe fa lajoblalönö, dabö dabö wama ubä fa coyocoblalönö, camiyä Jeobaa ya nija wama ji̦bä nia dodobou. Cowa wacö ja wama ji̦bä fa ö̦shömanö, ya tä nö wa̦queshi u̦cucaö däjä, “Tä dodijidawä”, ya tä nofi nia tabou. Uba nashiwä wama toubä ca̦i dodobou yädämou showaobä, yalo blowäjäwä si wai ja, nashiwä wama toubä fe fa lajoblalönö wama toubä nia dodobou.

¹⁴ ’¿Ö̦jö tawä? —a cuma—. Camiyä Yai Bada ya bufiblamobä ya nija, ö̦jö wama bä dodobou mlao showao däjä, afä nii wama ji̦bä nia waö balöomi. Yaama mobä ma cui, liyä mobä ma cui afä wama mobä nia waö balöomi. Ei ya wa̦ lä cui, wamale a̦ nofi jaducubou shi wa̦libä ya wa̦. Wamacö bälöaö lä bädao wei jamö ma cui, inaja wamacö nodiwä nia ca̦i cuaaö nodiablalou shi wa̦lii.

¹⁵ ’Ö̦jö jaba tä jalu lä cui däjä, niifä wama bä bäshäcu o̦cama dodobou däjä, ö̦jö däjä showawä, tä no nia lä cublou wei wama tä mö nia didi wabadii cuaaö —a cuma—. Jaba tä jalu cublou co̦o däjä, ö̦jö moli a semana waiquiwä. ¿Ö̦jö tawä? Inaja wama tä mö didi wabadii cuaalanö, semana 7 wama bä nia tablamaö.

¹⁶ ¿Ö̦jö tawä? 50 wama tä mö didi tablamaö däjä, täbä yanöcöobä 7 wama tä jalu tablaö fa co̦lonö, jaba tä nia jalu cuo co̦o. Ö̦jö däjä, lo̦shi dude mobä ja wamale dobäbä, wama mobä nia dodobou.

¹⁷ ’Cafä wamacö yanobö jamö nii wama ji̦bä fa löbömanö, bolacabö wama ji̦bä nia ca̦i judou cuaaö, camiyä nija ji̦bä dodoablalabä —a cuma—. Ö̦jö ji̦bä lä cui, jaboca umojolo a ja, si cobejewä ji̦bä yai lä dodijidai wama ji̦bä fe fa lajoblalönö, wama ji̦bä nia löbömaö. Nii bä lä julumaö wei wama täbä fa coyocoblalönö wama ji̦bä nia löbömaö. Jeobaa ya nija, nii bä jaba lä lalou wei wama bä dodobobä, ö̦jö ji̦bä nia cuo.

¹⁸ ’Ö̦jö wama ji̦bä dodobou däjä, yalo wama bä nia ca̦i dodobou yädämou —a cuma—. Oweja 7 wama bä nia ocalo dodobou, lasha moli a lä famano wejei bä lä cui. Bä lä dodijidai, etä wai jalili yädäa lä mlai. Baca wa̦lo wama a nia ca̦i ocalo dodobou, oweja cäcöbö wa̦lo sho. Jeobaa ya nija bä nia ö̦shö dodomamou. Lo̦shi mobä ma cui, uba nashiwä toubä ma cui, ö̦jö wama bä dodobou däjä wama bä nia yalo dodobou yädämou showao. Cowa wacö ja wama bä fa ö̦shömanö, ya tä nö wa̦queshi u̦cucaö däjä, “Tä dodijidawä” ya tä nofi nia tabou.

¹⁹ ’Wa̦lidiwä tä nowa mladobä, shibo moli wama a nia ca̦i wa̦lo dodobou —a cuma—. Wamale a̦ oquemabobä, oweja bolacabö wama cäcöbö nia wa̦lo ca̦i dodobou mö feduo, lasha moli a lä famaböleno wei cäcöbö lä cui.

²⁰ Jeobaa wale dobäbä, nofi bäyäalewänö bä nia dodoablalaö. Nii bä jaba lä lalou wei bä ja, wama ji̦bä lä tablaö wei ji̦bä dodoablalaö cuaaö däjä, oweja bolacabö cäcöbö ocalo lä cui, ö̦jö cäcöbö nia dodoablalaö yädämou. Iba bä cuobä bä nia yaio, nofi bäyäalewänö cama ebä cadidiwä däabä.

²¹ ’Ö̦jö tä jalu showawä ja, wamacö nia yododaö —a cuma—. Wamale nofi nia co̦camoaö. Wamacö showadi lä juu weinaja wamacö nia cuaaimi. ¿Ö̦jö tawä? Ei ya wa̦ lä cui, wamale a̦ nofi jaducubou shi wa̦libä ya wa̦. Cafä wamacö ma cuinö, wamacö nodiwä nia bälöaö lä nodiaö wei bä ma cuinö, inaja showawä. Wamacö bälöaö lä bädao wei jamö ma cui, inaja showadi wamacö nia cuaaö shi wa̦lii.

²² ’Abinaja ca̦i. Afä nii wama bä taö ja, ö̦jö täca casö jamö wamacö nia dayäomi. Wama mobä daaö lä waiquile wama mobä nia dayäaö mö yabaaö co̦omi. Bä lä jo̦li wei bä ma cui, shomi wama bä lä bälömabou wei bä ma cui, ö̦jö bä iyabä mobä li cuobä. Cafä wamacö nija ya bufiblamobä ya Jeobaa.

Yalo yo̦labä folaö ca̦i lä juno wejei tä a̦

²³ Jeobaa abinaja Moisesi nija a cuma.

²⁴ —Isaeli ebä da yömöla. Belibo 7 a cublou däjä, jaba tä jalu ja, wamacö yai yanöcöo dodijiobä ö̦jö tä mö nia jalu cuo, wamale nofi co̦camoabä. Camiyä nija wamacö showadi lä bayeliblamou wei wama tä nofi jaducubobä, yalo yo̦labä nia ca̦i folaöje.

²⁵ Wamacö showadi lä juu weinaja ö̦jö däjä wamacö nia cuaaimi. Jeobaa ya nija wama tä dodobobä wama tä nia ca̦i juimaö, cowa wacö ja wama tä ö̦shömabä—a cuma.

Tä nowa bluca co̦amamou showadaobä tä a̦

²⁶ Jeobaa Moisesi nija abinaja a cuma.

²⁷ —Bei. 7 a belibo ja, 10 tä jalu däjä, wamacö doblou lä mlai ya tä nowa mladamabä ö̦jö tä mö nia jalu cuo. Wamale nofi nia co̦camoaö. Wamacö doblou lä mlai tä ja wamacö nofi fa jalujumobonö, iyaö mlai ja, wamacö bufi nia ca̦i wa̦lidiwä jilao. Jeobaa ya nija wama tä dodobobä wama tä nia ca̦i juimaö, cowa wacö ja wama tä ö̦shömabä.

²⁸ ’Ö̦jö tä jamö, wamacö doblou lä mlai ya tä nowa nia mladamaö —a cuma—. Cafä wamacö nija ya bufiblamobä Jeobaa ya lä cuinö, ya tä nowa mladamabä tä mö nia jalu cuo. Ö̦jö cudeenö, wamacö showadi lä juu weinaja wamacö nia juimi.

²⁹ Ö̦jö tä jamö, iyaö mlai ja, a bufi ca̦i wa̦lidiwä jilao lä mlai, cama ebä nija ya nia coyocomaboimi.

³⁰ ’Ö̦jö tä jamö a juu fe lä yadio wei ya mö nia watäblaö, cama ebä nija a cuo mladobä —a cuma—.

³¹ Wamacö nia juimi dodijiwä. Ei ya wa̦ lä cui, wamale a̦ nofi jaducubou shi wa̦libä ya wa̦. Wamacö bälöaö lä bädao wei jamö ma cui, inaja wamacö nodiwä nia ca̦i cuaaö nodiablalou showao.

³² Wamacö yai yanöcöo dodijiobä ö̦jö tä mö nia jalu cuo. Iyaö mlai ja, wamacö bufi nia ca̦i wa̦lidiwä jilao. ¿Ö̦jö tawä? 9 tä mö jalu lä cui däjä, tä mö jaba sublablou däjä, wamacö inaja nia jaba cuaaö. Inaja wamacö cuaaö fe fa jalunö, wamacö cuaaö fe fa weyalönö, tä mö nia sublablou co̦o —a Jeobaa cuma.

Yano bä jamö bä cublaalanö bä nia iyaö ca̦i lä co̦camono wei tä a̦

³³ Moisesi nija abinaja Jeobaa a cuu co̦oma.

³⁴ —Isaeli ebä da yömöla. Ö̦jö 7 tä belibo showawä ja, 15 tä jamö, wamacö nia jaba iyaö ca̦i co̦camou co̦o. Yano bä jamö wamacö cublamou showao däjä, 7 wama tä no nia tablamaö. Yano bä jamö bä cublaalanö, Jeobaa ya nija bä iyaö ca̦i lä co̦camou wei cätä.

³⁵ ¿Ö̦jö tawä? 15 tä jamö, wamacö inaja jaba cuaaö däjä, wamale nofi nia co̦camoaö. Wamacö showadi lä juu weinaja wamacö nia juimi.

³⁶ Camiyä Jeobaa ya nija wama tä dodobobä wama tä nia ca̦i juimadii, wama tä ö̦shömabä. Inaja wamacö cuaalanö, 7 wama tä mö nia didi tablamaö. 8 tä jamö, wamale nofi nia co̦camoaö co̦o. Camiyä Jeobaa ya nija wama tä dodobobä wama tä nia ca̦i juu co̦o, wama tä ö̦shömabä. Wamacö iyaö ca̦i co̦camobä cätä. Wamacö showadi lä juu weinaja wamacö nia juimi.

³⁷ ’¿Ö̦jö tawä? —a cuma—. Inaja wamacö nia showadi cuaaö, camiyä Jeobaa ya nija wamacö iyaö ca̦i co̦camobä. Inaja wamale nofi nia co̦camoaö lä cuaaö wei wama tä a̦fa nia ayao wäyäö. Camiyä Jeobaa ya nija wama tä nia ö̦shö lä dodobou wei tä yai cublou däjä, wama tä nia ö̦shö dodobou. Lo̦shi wama mobä nia lä dodobou wei tä yai cublou däjä, wama mobä nia dodobou. Yalo wama bä nia lä dodobou wei tä yai cublou däjä, inaja showawä. Uba nashiwä wama toubä nia lä dodobou wei tä cublou däjä, inaja wamacö cuaaö fe usucuo showadaobä.

³⁸ ’Täbä yanöcöobä, showadi wama tä mö jalu nofi lä jaducubou wei, ö̦jö wama tä nia ca̦i taö showao, Jeobaa wamale nofi jaducubobä —a cuma—. Wamale dobäbä wama tä a̦fa lä wäyäö wei tä ma cui, ö̦jö wama tä nia ca̦i jöböaö showao. Wamale dobäö bufi ca̦i lä doblao wei tä ma cui, ö̦jö wama tä nia ca̦i jöböaö yädämou showao.

³⁹ ’¿Ö̦jö tawä? —a cuma—. 7 tä belibo ja, 15 tä mö jaluu däjä, nii bä lä lalou wei wama bä nii taö waiquio däjä, Jeobaa ya nija wamacö iyaö ca̦i co̦camolanö 7 wama tä mö nia didi tablamaö. Wamacö jaba co̦camou däjä, wamacö yai yanöcöo dodijiobä ö̦jö tä mö nia jalu cuo. Ö̦jö däjä, 7 wama tä mö didi fa tablamalönö, 8 tä mö jalu fa cublalunö, inaja co̦dawä. Wamacö yai yanöcöo dodijiobä tä mö nia jalu cuo co̦o.

⁴⁰ ’Wamacö jaba co̦camou däjä, fii fibä yai lä dodijidai fibä ja, fimo fimo wama bä nia jucaö —a cuma—. Dodijidawä wama si jenabä nia ca̦i doaö. Ai fibä boco lä tetei wama jenabä befi ca̦i nia bou. Ö̦jö wama bä fa däalalönö, camiyä Jeobaa nija wamacö bufi doblalolanö wama bä bobä. Cafä wamacö nija ya bufiblamobä ya. Inaja wamacö cuaalanö 7 wama tä mö nia didi tablamaö.

⁴¹ ¿Ö̦jö tawä? Lasha ai a faö lä co̦le däjä ma cui, ai a faö lä co̦le jamö ma cui, ai a ja ma cui, inaja wamacö cuaaö co̦obä tä cublou däjä, camiyä Jeobaa ya nija wamacö iyaö ca̦i co̦camolanö, 7 wama tä mö nia didi tablamaö. Ei ya wa̦ lä cui, wamale a̦ nofi jaducubou shi wa̦libä ya wa̦. 7 tä belibo ja showadi wamacö nia inaja cuaaö.

⁴² ’¿Ö̦jö tawä? —a cuma—. Yano bä jamö wamacö cublamou däjä, 7 wama tä mö nia didi tablamaö. Isaeli bluca wama ecö yai cadidiwä lä cui, ö̦jö yano bä jamö wamacö nia cublamou cuaaö.

⁴³ Inaja wamacö lä cuaaö wei tänö, afä wama bä bufi nia jaducublamaö. Ejido jamö Isaeli ya ebä lä co̦leno wei däjä, yano bä jamö ya bä bälödamaö lä cuaafälöno wei tä nofi jaducubobeje wamacö nia inaja cuaaö. Cafä wamacö nija ya bufiblamobä, Jeobaa ya —a cuma.

⁴⁴ Inaja Jeobaa a fa cunö, Moisesinö bä yömölalema. Jeobaa nija bä nia showadi iyaö ca̦i lä co̦camou wei tä a̦fa bluca wäyäö showaoma.