Levítico 2 - Biblia Yanowamö

Lo̦shi mobä nia lä dodoboyoluno wejei tä a̦

¹ Moisesi a yömölaö showalanö, abinaja Jeobaa a cuu co̦oma. —Ai anö lo̦shi mobä ja wale dobäö däjä, mobä fa cobejeblalönö, si cobejewä ji̦bä yai lä dodijidai ji̦bä nia ca̦i juimaö. Dabö dabö ubänö ji̦bä fe nia liyäyaö. Ö̦jamö täbä wa̦queshi nö cle̦deli lä u̦cucamou wei täbä shuu möcashi nia ca̦i jushishaö.

² Nofi bäyäalewä bä nija si cobejewä ji̦bä yai lä dodijidai ji̦bä nia ca̦i juu, Aaloni nodiwä ebä nija. ’Ö̦jö däjä, dabö dabö ubänö ji̦bä fe lä liyäyano wei ji̦bä ja, nofi bäyäalewä anö moli ji̦bä nia maoaö, täbä wa̦queshi nö cle̦deli lä u̦cucamou wei täbä shuu befi ca̦i —a cuma—. Wale dobäö bufi lä doblao wei ya tä nofi tabobä, ö̦jö moli ji̦bä lä maoamou wei, yalo bä lä dodoblamou wei bä maqueblamobä täcö jamö, ji̦bä nia ö̦shömaö. Cowa wacö ja ji̦bä nia ö̦shömaö. Ji̦bä ö̦shö dodobobeje ji̦bä. Camiyä Jeobaa yanö, ö̦jö ya tä nö fa u̦cucalänö, “Tä dodijidawä”, ya tä nofi nia tabou.

³ ’Lo̦shi mobä ja wale dobäöje däjä, ji̦bä lä jäblou wei, nofi bäyäalewä Aaloni nija ji̦bä nia jöböamou, bä ijilubö ebä ca̦i nija —a cuma—. Camiyä Jeobaa ya nija ji̦bä ö̦shö dodobobeje ji̦bä mashi lä jäblono wei ji̦bä cudeenö, ji̦bä nia yaio.

⁴ ¿Ö̦jö tawä? —a cuma—. Lo̦shi mobä ja wale dobäbä, nii wa ji̦bä dodobou däjä, madofi a u̦eshi jamö ji̦bä lä löbömaö wejei ji̦bä ja wale dobäö dao. Ö̦jö wa ji̦bä ca̦i juimaö ja, si cobejewä ji̦bä yai lä dodijidai ji̦bä jamö, dabö dabö ubä lä coyocoblamou wei wa ji̦bä nia ca̦i juimaö, ji̦bä juluno lä mlai. Clemole ji̦bä bada lä tablaö wejei ji̦bä ma cui, dabö dabö ubänö jenasiwä ji̦bä fe lä liyäyaö wejei ji̦bä ma cui, ö̦jö wa ji̦bä ca̦i juu dao.

⁵ Lo̦shi mobä ja wale dobäbä, nii wa ji̦bä dodobou ja, ji̦bä lä la̦maö wejei ji̦bä ja wale ca̦i dobäö dao. Ö̦jö wa ji̦bä ca̦i juu ja, si cobejewä ji̦bä ja, dabö dabö ubä lä coyocoblamou wei wa ji̦bä nia ca̦i juu, ji̦bä juluno lä mlai.

⁶ ’Wa ji̦bä fa joyolalunö, dabö dabö ubänö wa ji̦bä fe nia liyäyaö —a cuma—. Lo̦shi mobä dodobobeje mobä.

⁷ Lo̦shi mobä ja wale dobäö ja, nii wa ji̦bä dodobou ja, ji̦bä lä ja̦löcaö wejei ji̦bä ja wale ca̦i dobäö dao. Ö̦jö wa ji̦bä ca̦i juimaö ja, si cobejewä ji̦bä jamö, dabö dabö ubä lä coyocoblamou wei wa ji̦bä nia ca̦i juu.

⁸ Lo̦shi mobä ja wale dobäö däjä, inaja nii ji̦bä lä tablamou wei Jeobaa ya nija wa ji̦bä nia ca̦i juimaö. Nofi bäyäalewä nija wa ji̦bä jöböäö fa balöonö, yalo bä lä dodoblamou wei bä maqueblamobä täcö jamö, ji̦bä nia ca̦i juu nomöjöo.

⁹ ’Ö̦jö däjä, lo̦shi mobä ja, nii wa ji̦bä lä dodobou wei ji̦bä ja, nofi bäyäalewä anö ai ji̦bä mashi nia däaö —a cuma—. Wale dobäö bufi lä doblao wei ya tä nofi tabobä, ö̦jö ji̦bä mashi lä däamou wei, yalo bä maqueblamobä täcö jamö ji̦bä nia ö̦shömaö. Cowa wacö ja ji̦bä nia ö̦shömaö. Ji̦bä dodobobeje ji̦bä. Camiyä Jeobaa yanö ö̦jö ya tä nö u̦cucaö däjä, “Tä dodijidawä”, ya tä nofi nia tabou.

¹⁰ ’Lo̦shi mobä ja, nii wa ji̦bä lä dodobou wei ji̦bä mashi lä jäblou wei, nofi bäyäalewä bä nija ji̦bä nia jöböamou, Aaloni nodiwä bä lä cui bä nija —a cuma—. Camiyä Jeobaa ya nija ji̦bä ö̦shö dodobobeje ji̦bä mashi lä jäblono wei ji̦bä cudeenö, ji̦bä nia yaio.

¹¹ Camiyä Jeobaa ya nija lo̦shi mobä ja, nii ji̦bä lä tamou wei wama ji̦bä dodobou däjä, ji̦bä juluno mlai wama ji̦bä nia dodobou. ¿Ö̦jö tawä? Täbä lä juluu wei täbä ma cui, buu ubä ma cui, camiyä Jeobaa ya nija ö̦jö bä ö̦shö dodobobeje bämi. Cowa wacö ja ö̦jö wama bä nia ö̦shömaimi.

¹² Ö̦jö wama bä dodobou bufi doblao ja, nii bä jaba lä lalou wei wama bä dodobobä jamö, ö̦jamö bä shino jöböamou dao. Ö̦jö ma cui, yalo bä lä dodoblamou wei bä maqueblamobä täcö jamö wama bä nia ö̦shömaimi. Bä nö cle̦deli u̦cucamobä bämi.

¹³ ’¿Ö̦jö tawä? —Jeobaa a cuma—. Lo̦shi mobä ja, nii wama ji̦bä lä dodobou wei, sayu bä ja wa ji̦bä nia odoblaö. “Sayu mlai ja”, bä bufi cu dijä. Obi ma cui, sayu bänö bä nii dodijidawä cudio lä showao weinaja, cafä wamacö nija Yai Bada ya wa̦ nö lä wäqueno wei, obi ma cui ya wa̦ nia shominajablou majöomi. Ö̦jö cudeenö, jödödöwä wama tä lä dodobou wei tä ma cui, sayu bä ja wama tä nia odoblaö balöo.

¹⁴ ’Nii bä jaba lä lalou wei wa ji̦bä dodobou däjä, Jeobaa ya nija lo̦shi wa mobä jöböaö ja, mobä jaba lä lalou wei mobä nia jöböamou —a cuma—. Cowa wacö jamö, dude wa mobä yaaö fa balöonö, wa mobä nia dicaö.

¹⁵ Dabö dabö ubänö wa mobä fe nia liyäyaö. Ö̦jamö, täbä nö wa̦queshi cle̦deli lä u̦cucamou wei wa täbä shuu nia möcashi ca̦i jushishaö. Lo̦shi mobä dodobobeje mobä.

¹⁶ Ö̦jö däjä, wale dobäö bufi lä doblao wei ya tä nofi tabobä, wa mobä lä dodobou wei mobä ja, nofi bäyäalewänö ai mobä nia mashi ö̦shömaö. ¿Ö̦jö tawä? Dabö dabö ubänö, dicama mobä fe lä liyäyano wei mobä nia ö̦shömaö, täbä wa̦queshi nö cle̦deli lä u̦cucamou wei täbä shuu befi ca̦i. Cowa wacö ja mobä nia ö̦shömaö. Camiyä Jeobaa ya nija mobä ö̦shö dodobobeje mobä.