Levítico 16 - Biblia Yanowamö

Tä nowa nia bluca co̦amamou lä showadaono wei tä jalu

¹ Jeobaa a lä cule jamö Aaloni bei ijilubö ai ecöbö ajedou fe yadio fa showaonö, cäcöbö nomaa lä waiquilayono wei däjä, Moisesi nija Jeobaa a wa̦ fama.

² Abinaja a cuma. —A̦iyofä Aaloni a da yömöla, acadafu cäcö lä läle jamö, a yano yai nowamaö lä dodijio wejei jamö a juu bädao mlaobä. Ya wa̦no oni didiobä defi ca fe laobä tä feyaca lä cule jamö, cama a bufi cuu bädao däjä a nia juimi. A nia nomalayou. ¿Ö̦jö tawä? Ö̦jö defi ca fe laobä tä feyaca fedu jamö, ya nia malä dablamou wei, ölajashi a jamö.

³ ’Abinaja Aaloni a cuaalanö, iba yano lä nowamaö wejei jamö a nia shino juu —a cuma—. Camiyä Jeobaa ya nija, yalo cäcöbö dodobobä cäcöbö nia ca̦i lucäö. Wa̦lidiwä etä nowa mladobä, baca wa̦lo a ocalo ca̦i nia juu. A ö̦shömabä, oweja wa̦lo a ca̦i nia juu showao.

⁴ A fa ya̦lömolunö, nofi bäyäalewä bä didiobä ebä lä yaile bä ja a nia didio, shuducaje au ubä yai lä dodijidai ubä ja bä lä diyäblamono wei bä ja. Labe cäcö ja colocu nia lucäö balöo. Cäcö labajami feyacabobä cäcö lä yaio wei cäcö ja, a nia lucäö nomöjöo. Ö̦jö däjä, ö̦jö cäcö o̦cabobä, bei bäshäcu ja ai cäcö nia o̦caö showadao. Cäcö nia lä yojobou wei cäcö nia ca̦i acadafu yojoaö showadao.

⁵ ’Wa̦lidiwä etä nowa mladobä, cama Isaeli ebä blucanö, Aaloni nija shibo 2 cäcöbö wa̦lo nia jöbäaöje —a cuma—. A ö̦shö dodobobä, oweja moli a nia wa̦lo ca̦i jöbäaöje.

⁶ Ö̦jö däjä, cama Aaloni a doblono lä mlai etä nowa mladobä, baca wa̦lo a nia dodobou. Cama ma cui, bä ca̦i lä cule ebä ma cui, ö̦jö bä nija ya tä nowa mladamabä, a nia taö.

⁷ Ö̦jö däjä, shibo cäcöbö fa dälänö, Jeobaa ya lä cule jamö cäcöbö ca̦i fa juimanö, iba yano jamö yoca lä cui jamö cäcöbö ca̦i nia icuo.

⁸ ’Ö̦jö däjä, madofi a ja tä a̦ fa oniblalönö, yalo cäcöbö jamö, cäcöbö a̦ nia oni yädäo —a cuma—. A nia lä yaio wei Aaloninö tä a̦ nia oni möö. ¿Ö̦jö tawä? Ai tä oni lä cui, Jeobaa ya wa̦fa nia oni cuo. Ai tä oni mö feduwä lä cui, *Asaselo e a̦fa nia oni cuo mö feduo.

⁹ Aaloninö a wa̦ oni lä möö wei däjä, iba a yalo yai lä cui, wa̦lidiwä tä nowa mladobä a nia shämou.

¹⁰ Ö̦jö ma cui, fecula Asaselo e yalo lä cui, täbä yanowamö doblou lä mlai bä nija ya tä nowa mladamabä, Jeobaa ya lä cule jamö wa nia demi dodobou, ulifi bloque jamö a yalo shömamobä, Asaselo nija.

¹¹ ’¿Ö̦jö tawä? —a cuma—. Aaloni cama a doblou lä mlai tä nowa wa̦lidiwä mladobä, baca wa̦lo a nia dodobou. A nia shäö. Cama a ma cui, bä ca̦i lä cule ebä ma cui, ö̦jö bä nija ya tä nowa mladamabä, tä nia taö.

¹² Ö̦jö däjä, Jeobaa ya lä cule jamö, yalo bä lä dodoblamou wei bä maqueblamobä täcö jamö, ai tä madofi fa dälänö, amanafu wacöbä nia tablamaö. Täbä wa̦queshi nö li̦yoli u̦cucamobä täbä wai möcashi täbä ja, 2 täbä nia ca̦i maoaö. Ö̦jö däjä, cäcö lä läle tä u̦eshi jamö, bä nia ca̦i juu.

¹³ Ö̦jö bä ca̦i fa junö, Jeobaa ya lä cule jamö, amanafu wacöbä jamö täbä wa̦queshi nö li̦yoli u̦cucamobä täbä nia wai möcashi tablamaö. Ö̦jö täbä wa̦queshinö, ya wa̦no oni didiobä defi ca fe laobä a feyaca nia dablamou mladou showadao. A nomaö showadao mlaobä.

¹⁴ ’Ö̦jö däjä, baca wa̦lo lä cui, ö̦jö i̦yäbö mashi fa dälänö, defi ca mashi sibo jamö, bei iminö i̦yäbö nia yomösaö—a cuma—. Defi ca däjämö ma cui, 7 i̦yäbö nia yomösaö cuo.

¹⁵ Ö̦jö däjä, yanowamö täbä bluca lä cui, etä nowa wa̦lidiwä mladobä, a shibo shämobä a lä cui, a nia shäö showadao. Acadafu cäcö lä läle tä u̦eshi jamö, shibo i̦yäbö nia ca̦i faö. Baca i̦yäbö lä taamano weinaja, inaja showawä shibo i̦yäbö nia taamaö nomöjöo mö feduo. Ya wa̦no oni didiobä defi ca fe laobä tä feyaca jamö ca̦i, bei defi ca däjämö ca̦i.

¹⁶ ’¿Ö̦jö tawä? —a cuma—. Isaeli ebä nofi lä jushuaö wei tä shaminö, iba yano a yai nowamaö lä dodijio wejei a yano jamö tä shami yädäa. Bluca tä lä cublai tä ja bä doblou fa mlacunö a yano shami majöwä. Ö̦jö cudeenö, ya tä shami joyabä Aaloninö tä nia taö. Iba yano mashi ma cui, inaja showawä a ca̦i nia dodijidawä cublou. Shami tänö iba yano a fe fa̦yobouje yalo, a shami.

¹⁷ ¿Ö̦jö tawä? Ya tä shami joyabä, iba yano a yai nowamaö lä dodijio wejei jamö Aaloni a lucäö däjä, ai bä nia yanowamö ajedoimi. Cama a ma cui, bä ca̦i lä cule ebä ma cui, cama Isaeli ebä bluca ma cui, ö̦jö bä bluca nija, bä doblou lä mlai ya etä nowa mladamabä tä lä taö wei jamö, a faö co̦o mlao showao däjä, iba yano ja ai bä nia juimi dodijiwä.

¹⁸ ’Ö̦jö däjä, a faa fa co̦lunö, Jeobaa ya nija, yalo bä lä dodoblamou wei bä maqueblamobä täcö jamö a nia icuo —a cuma—. Ö̦jö tä ja tä shami lä yädäo wei, ya tä shami joyabä tä nia taö. Baca a ma cui, shibo a ma cui, ö̦jö cäcöbö i̦yäbö mashi fa dälänö, yalo bä maqueblamobä täcö jamö i̦yäbö nia taaö. Ö̦jö ola tä jamö, tä lä sha̦clodole jamö, jai yalo yo̦labä cuwä täbä nia i̦yäamaö fe fayoaö.

¹⁹ Yalo bä lä dodoblamou wei bä maqueblamobä täcö jamö, bei iminö 7 bä i̦yäbö nia yomösödaö cuo. Inaja a cuaalanö, Isaeli ebä doblou lä mlai tä shaminö tä shami lä yädäo wei tä nia shami mladamaö. Täcö nia yaibou.

²⁰ ’Iba yano a yai nowamaö lä dodijio wejei a ma cui, ai a yano mashi ma cui, yalo bä maqueblamobä täcö ma cui, ö̦jö bä ja tä shami lä yädäo wei tä nowa co̦amaö cuo fa balöonö, shibo a mö feduwä lä cui a nia dodobou —a cuma—.

²¹ Ö̦jö a shibo lä demi wei fe ja, bolacabö imicö maquelanö, a wa̦ nö nia wäo. Isaeli ebä cadidou lä mlai tä a̦ nia bluca wäaö. Bä nofi lä jushuaö wei tä a̦ nia bluca wäyäö. ¿Ö̦jö tawä? Bä doblou lä mlai tä a̦ nia bluca wäaö showadao. Inaja a cuaalanö, shibo a jamö ö̦jö tä wa̦lidiwä bluca fa yädämacönö, ulifi bloque tä jamö a nia shömaö. A ca̦i jubä a lä cui nija a fa jöböcönö a nia ca̦i sibou.

²² ¿Ö̦jö tawä? Bä cadidou lä mlai, shibo a nija täbä wa̦lidiwä fa yädäicunö, ulifi bloque tä jamö täbä nia ca̦i juu. A ca̦i lä juu wei anö, ulifi wa̦lidiwä jamö a nia jujeblaö.

²³ ’Ö̦jö däjä, iba yano jamö Aaloni a lucäa fa co̦lunö, camishi bä nia jayublaö co̦o, shuducaje au ubä yai lä dodijidai ubä ja bä lä diyäblamono wei bä lä cui —a cuma—. Iba yano a yai nowamaö lä dodijio wejei jamö a lucäö däjä a lä didiono wei bä camishi lä cui, ojö bä jayublaö fa co̦lonö, ö̦jamö bä nia daaö co̦o.

²⁴ Ö̦jö däjä, tä ulifi lä yaile jamö nofi bäyäalewä a fa ya̦lömolunö, cama camishibö yai ja a nia didio co̦o. Ö̦jö bä ja a didio fa co̦icunö, a nia wawäblou. Ö̦jö däjä, yalo cäcöbö ö̦shö dodomamobä, bolacabö cäcöbö yalo nia ca̦i juu. ’¿Ö̦jö tawä? —a cuma—. Cama a doblou lä mlai ya etä nowa mladamabä, ai a nia yalo dodobou. Isaeli ebä bluca doblou lä mlai ya etä nowa mladamaö mö feduo showadaobä, ai a nia mashi dodobou.

²⁵ Yalo bä lä dodoblamou wei bä maqueblamobä täcö jamö, wa̦lidiwä tä nowa mladobä a yalo nia lä shämou wei bei daböbö nia ö̦shömaö.

²⁶ Asaselo nija shibo a jubä a lä jujeblaö wei a lä cuinö, cama esibä nia ca̦i yaluu. Mau u jamö a nia ca̦i ya̦lömou. Inaja a cuaaö waiquio däjä, bä lä bälöle jamö dodijidawä a waloo co̦o dao.

²⁷ ’Ö̦jö däjä, wa̦lidiwä tä nowa mladobä a baca lä shäleno wei, sibo jamö a nia bälaöje, iba yano a nowamaö lä dodijio wejei jamö a i̦yäbö ca̦i lä lucäno wei a baca lä cui —a cuma—. Ö̦jö befi shibo a ca̦i shäö mö lä feduono wei, inaja showawä. Wa̦lidiwä ya tä mladamabä ö̦jö bä li yalo cuoma. Bei sicö ma cui, bei ya̦jicö ma cui, bei shiji bä ma cui, yanowamö täbä lä bälöle tä sibo jamö cäcöbö fa bälajenö, cowa wacö ja cäcöbö nia ö̦shömaöje.

²⁸ Cäcöbö yai lä ö̦shömaö wei anö, cama esibä nia ca̦i yaluu. Mau ujamö a nia ca̦i ya̦lömou. Inaja a cuaaö waiquio däjä, bä lä bälöle jamö dodijidawä a waloo co̦o dao.

²⁹ ’Ei ya wa̦ lä cui, wamale a̦ nofi jaducubou shi wa̦libä ya wa̦ —a cuma—. Inaja wamacö nia cuaaö shi wa̦lii showao. Belibo 7 a jamö, 10 tä mö jalu lä cui däjä, wamacö doblou lä mlai tä ja wamacö nofi fa jalujumamonö, iyaö mlai ja, wamacö bufi nia ca̦i wa̦lidiwä jilao. Wamacö nia juimi. Cafä wamacö ma cui, wama bä shomi lä bälömabou wei bä ma cui, inaja wamacö nia bluca cuaaö.

³⁰ ¿Ö̦jö tawä? Ö̦jö tä mö jalu ja, wamacö doblou lä mlai wamacö nija ya tä nowa mladamabä, nofi bäyäalewänö tä nia malä taö wei, dodijidawä wamacö cuobä. Bluca tä lä cublai tä ja wamacö doblou ma mlai ma cui ja, Jeobaa yanö dodijiwä bämacö nia taamabou.

³¹ ’Wamacö yai yanöcöo dodijiobä ö̦jö tä nia jalu cuo —a cuma—. Wamacö doblou lä mlai tä ja wamacö nofi fa jalumamonö, iyaö mlai ja, wamacö bufi nia ca̦i wa̦lidiwä jilao. ¿Ö̦jö tawä? Ei ya wa̦ lä cui, wamale a̦ nofi jaducubou shi wa̦libä ya wa̦. Inaja wamacö cuaaö nodiablalobä cätä.

³² Wamacö doblou lä mlai wamacö nija ya tä nowa mladamabä, nofi bäyäalewänö tä nia taö, täbä lä jölöcamou wei toubä dabönö, iba a lä yaile a lä cuinö. Bä fö̦ö enö bä nofi jaba lä bäyäbono weinaja a cuaaö lä nodiaö wei. Nofi bäyäalewä bä didiobä bä camishi lä yaile bä ja a nia didio, shuducaje au ubä yai lä dodijidai ubä ja bä lä diyäblamono wei bä ja.

³³ ’¿Ö̦jö tawä? —a cuma—. Iba yano a yai lä nowamalajei jamö tä wa̦lidiwä lä yädäo wei ya tä mladamaö co̦obä tä nia taö. Ai a yano mashi ma cui, inaja showawä. Yalo bä lä dodoblamou wei bä maqueblamobä täcö ma cui, inaja showawä. Nofi bäyäalewä bä ma cui, cama Isaeli ebä bluca ma cui, ö̦jö bä doblou lä mlai ya etä nowa mladamabä tä nia taö.

³⁴ Ei ya wa̦ lä cui, wamale a̦ nofi jaducubou shi wa̦libä ya wa̦. Inaja wamacö nia cuaaö shi wa̦lii. Lasha ai a lalou co̦o ma cui, ai a co̦o ma cui, belibo 7 ajamö, 10 tä mö jalu lä cui däjä, wa̦lidiwä tä bluca jamö Isaeli wama ecö doblou lä mlai ya tä nowa mladamabä, nofi bäyäalewänö showadi tä nia taö —a Jeobaa cuma. Inaja Moisesi a cuaama, Jeobaanö a nowa lä tano weinaja showawä.