Levítico 1 - Biblia Yanowamö

Jeobaa nija yalo bä nia comi ö̦shö lä dodobono wejei tä a̦

¹ Cama e yano jamö culanö, Jeobaanö Moisesi a fa nacalänö, abinaja e cuma.

² —Camiyänö bäfä nowa lä talenaja, Isaeli ebä da yömöla. Cafä wamacö ai a lä cuinö, camiyä Jeobaa ya nija a dodobobä a yalo ca̦i juu däjä, baca a ma cui ja wale dobäö dao. Oweja a ma cui ja, shibo a ma cui ja, wale dobäö dao.

³ ’Baca wa̦lo a nia comi ö̦shö dodobou ja, a lä dodijidai a ca̦i nia icuo, etä wai jalili yädäa lä mlai —a cuma—. Iba yano ja täbä lä fablaaö wei yoca lä cui jamö a ca̦i nia icuo, camiyä Jeobaa yanö dodijidawä ya tabobä.

⁴ A ö̦shö nia lä dodobou wei fe yalo ja, imicö nia maqueo. “Tä dodijidawä”, ya etä nofi nia tabou, cama ya etä nowa mladamabä.

⁵ ’Ö̦jamö camiyä Jeobaa ya lä cule jamö, baca wa̦lo a lä cui, a nia shäö. Aaloni nodiwä bänö camiyä nija i̦yäbö mashi nia dodobouje, nofi bäyäalewä bä lä cuinö. I̦yä i̦yä ai bä mashi lä cui, yalo bä lä dodoblamou wei bä maqueblamobä täcö cotä jamö, i̦yäbö nia yomösaöje. ¿Ö̦jö tawä? Iba yano ja täbä lä fablaaö wei yoca lä cui jamö, yalo bä maqueblamobä täcö lä i̦tale jamö, ö̦jamö i̦yäbö nia yomösaö fe fa̦yoaöje.

⁶ Yalo a ca̦i lä juu weinö, a si fa yoblalönö a nia cobemaö.

⁷ ’Yalo bä lä dodoblamou wei bä maqueblamobä täcö jamö, nofi bäyäalewä Aaloni nodiwä ebänö wacö fa yäcöjenö, dodijidawä a̦yobä nia maqueblaö feyacaoje —a cuma—.

⁸ Ö̦jamö yalo bä nia maquecaö nomöjöoje. Yalo bei fe ma cui, bei daböbö ma cui, cowa wacöbä jamö a̦sho bä lä maqueo wei bä ja, yalo bä nia bluca maqueblaö feyacaoje.

⁹ ’Ö̦jö ma cui, yalo a ca̦i lä juu wei a lä cuinö, bei shicö nia yaluu, bei matabä ca̦i —a cuma—. Ö̦jö däjä, yalo bä lä dodoblamou wei bä maqueblamobä täcö jamö, nofi bäyäalewä anö yalo comi bä nia ö̦shömaö. Cowa wacö ja bä nia ö̦shömaö. Bä ö̦shö dodobobeje cäbä. Camiyä Jeobaa yanö ö̦jö ya tä nö u̦cucaö däjä, “Tä dodijidawä”, ya tä nofi nia tabou.

¹⁰ ’Oweja wa̦lo a ma cui, shibo wa̦lo a ma cui, ö̦jö a nia comi ö̦shö dodobou ja, a lä dodijidai a nia ca̦i icuo, etä wai jalili yädäa lä mlai —a cuma—.

¹¹ Ö̦jamö, Jeobaa ya lä cule jamö a nia shäö, yalo bä lä dodoblamou wei bä maqueblamobä täcö lu̦locu jamö, motoca a faö lä mlai jamö. Ö̦jö däjä, yalo bä maqueblamobä täcö cotä jamö, nofi bäyäalewä Aaloni nodiwä ebä lä cuinö, i̦yäbö nia yomösaö fe fa̦yoaöje.

¹² ’Yalo a ca̦i lä juu wei a lä cuinö a nia cobemaö —a cuma—. Bei fe ma cui, bei daböbö ma cui, comi a yalo fa cobelalönö, yalo bä lä dodoblamou wei bä maqueblamobä täcö jamö, nofi bäyäalewänö dodijidawä bä nia maquecaö. Cowa wacöbä jamö a̦shobä lä maqueo wei a̦shobä ja, yalo bä nia bluca maqueblaö feyacao.

¹³ Ö̦jö ma cui, yalo a ca̦i lä juu wei a lä cuinö, bei shicö nia yaluu, bei matabä ca̦i. Ö̦jö däjä, camiyä nija nofi bäyäalewänö yalo comi bä nia dodobou. Yalo bä maqueblamobä täcö jamö a nia ö̦shömaö. Cowa wacö ja bä nia ö̦shömaö. Bä ö̦shö dodobobeje cäbä. Camiyä Jeobaa yanö ö̦jö ya tä nö u̦cucaö däjä, “Tä dodijidawä”, ya tä nofi nia tabou.

¹⁴ ’Ö̦jö ai tänö, bä yalo lä yäö wei bä nia ö̦shö dodobou ja, joledo bä ma cui ja, wacocoa bä ma cui ja, Jeobaa wale dobäö dao.

¹⁵ Yalo bä lä dodoblamou wei bä maqueblamobä täcö jamö, nofi bäyälewänö yalo a ca̦i fa icuicunö, a fe nia dölöblaö. Ö̦jö tä casö ja a fa jö̦cölalänö, i̦yäbö fa famalönö, fe nia ö̦shömaö —a cuma—.

¹⁶ A nia jucucaö, bei nijibä nia ca̦i joyaö. Yalo bä maqueblamobä täcö lu̦locu jamö bä nia joyaö, motoca a lä faö wei jamö, yubu ushibö shino lä joyamou wei jamö showawä.

¹⁷ ’Bei falolabö juwäbolanö, a nia yalo cacablaö ma cui a nia cacablaö showadaomi —a cuma—. Ö̦jö däjä, yalo bä lä dodoblamou wei bä maqueblamobä täcö jamö, nofi bäyäalewä anö yalo a nia ö̦shömaö. Cowa wacöbä jamö a̦shobä lä maqueo wei a̦shobä ja, yalo a nia maqueaö feyacao. Cowa wacö ja a nia ö̦shömaö. A ö̦shö dodobobeje a. Camiyä Jeobaa yanö ö̦jö ya tä nö u̦cucaö däjä, “Tä dodijidawä”, ya tä nofi nia tabou.