Jueces 8 - Biblia Yanowamö

Jedeoninö Madianateli cäcöbä bada lä shäleno wei tä a̦

¹ Eflaini ebä nacaö showadao fa mlacunö, Jedeoni lija bä jushudou fe balojooma. Bä a̦ lafujaö ja, abenaja bä cuma. —¿Wedi tabä inaja yamalecö li taamaö dicooma? Madianateli wama bä nabä yai fuu däjä, wamalecö nacanomi —bä cuma.

² Abenaja Jedeoninö bä nowa tama. —Ma, camiyä ya lä cuaale tä nowa cuami. ¡Cafä wamacö shi̦lo yai! ¿Ö̦jö tawä? Abiesele nodiwä yamacö ma cuaablalou wei ma cui, yamacö cuaaö si ijejewämi. Eflaini wama ecö moli lä icudou wei däjä, wamacö dodijaö showadao malä cui.

³ ’Yai Bada tänö ¿cafä wamacö lija Madianateli cäcöbä noshi bada ö̦jödabonomi tawä, Olebe, Sebe cäcöbä a̦fa lä cule? Camiyänö moli ya lä shälufe tä nowa cuami, cafä wamacö nö shi̦lo yai wa̦lojama —bä nowa tama. Inaja bä nowa taö ja, bä a̦ oquelayoma.

⁴ Bei. Jodana u jamö bä fa waloicunö, Jedeoninö 300 bä ca̦i lä funo wei bä ca̦i bucadubaliyofälöma. Madianateli bä nosi bofälööje ja, bä ma ujuduno wei ma cui, bä nosi bou fe yadiomaje.

⁵ Ö̦jö cudeenö, Sucodoteli bä lija Jedeoni a wa̦ faö jayuama. —Iba ya bä lä yaumabole bä da iyamaje, ¿ö̦jö tawä? Bä malä ujuduaimadi. Madianateli cäcöbä yai bälöo lä dodijio wei, yama cäcöbä nosi bou lä cule, Seba, Saluna cäcöbä a̦fa lä cui —a cuma.

⁶ Abenaja Sucodoteli bada bä cuma. —¿Seba, Saluna wama cäcöbä tabou waiquia da culanö, afä yama bä wayu iyamabä? —bä cuma.

⁷ Abenaja Jedeoni a cuu nomöjöoma. —Ja̦o. Inaja wamacö cuu dicoo ja, Jeobaa a lä cuinö, camiyä lija Seba, Saluna cäcöbä noshi yai ö̦jödadaö däjä, cafä bämacö si nia yowaö co̦oyoluu. Tä ulufi lä wa̦lidio wei jamö, mösöcölö sibä lä cublajai sibänö, ai sibä ca̦i lä cublai sibä mösöcönö, bämacö ya̦jicö nia blälämaö co̦oyoluu —bei a cuma.

⁸ Ö̦jamö culanö, Benueli jamö a dolequea majöbefälöma. Ö̦jöteli bä ja, a nacou nomöjöoma ma cui, Sucodoteli bä a̦ faö lä balöono weinaja, Benueliteli bä ma cui, inaja cama bä cuu nomöjöoma.

⁹ Benueliteli bä lija abenaja Jedeoni a cuma. —Ja̦o. Inaja wamacö cuu dicoo ja, Madianateli bä lija ya nö yua fa balölonö, dodijidawä ya co̦o co̦imabä jamö, ei wama a yano lä ösöbole, ya yano nia wa̦liaö jayuaö co̦jolou —a cuma.

¹⁰ Bei. Seba, Saluna cäcöbä lä cuinö, Calacolo jamö bä ca̦i wayu bluca cuböoma. Bluca ebä wayu cuo ma balöono wei ma cui, Isaeli ebä lä cuinö 120.000 bä fa shäalalöjenö, jai 15.000 ebä feiblou majölayoma. Motoca a lä cuaaimaö wei tä mashi jamö bä bluca lä bälöjömono wei ebä ca̦i ma coyocoono wei ma cui, inaja bä cuwä, bä bolacadabö cuo majöo bädaoma.

¹¹ Noba ai tä mashi jamö, showadi bä lä fublaadino wei yo cuoma, Jobea ai tä mashi jamö showawä, motoca a lä cuaaimaö wei tä mashi jamö. Ö̦jö yo jamö, Jedeoninö bä ca̦i culayofälöma. Ö̦jamö bä ca̦i fa culofälönö, bä nabä quealiyoma. Bä moyawäono malä mlai.

¹² Ö̦jö däjä, Seba, Saluna cäcöbä docua showalayofälöma. Cäcöbä ma doculayofälöno wei ma cui, Jedeoninö Madianateli bada cäcöbä nosi bou fa showadaläfälönö cäcöbä fuwälema. Seba, Saluna cäcöbä fuwäaö tä nowa ja, bä wayu bluca fa quililalunö, bä bufi wedinajamou nö bleaama.

¹³ Bei. Bei macö jamö yo lä yacläono wei yo jamö, Joasa bä ijilubö Jedeoni e wayu co̦o co̦imama, Elesi yo a̦fa lä cule jamö.

¹⁴ A co̦o lä co̦imano wei jamö, Sucodoteli a fiya fuwälema. Camateli bada bä fa wa̦liinö, bei bä a̦fa bluca oniblamalema. Sucodoteli bada bä ma cui, bä yai lä nosiemou wei bä ma cui, ö̦jö 77 bä a̦fa bada oniblamalema.

¹⁵ Ö̦jö däjä, Sucodoteli bä lija, Jedeoni a waloa co̦queyoluma. —Bei —a cuma—. Seba, Saluna ya cöbä ca̦i waloo co̦a lä cule, wamale nö waiblalanö, wama cäcöbä a̦fa jayumaö da yädämoblei. Abenaja wamacö cuma. “¿Seba, Saluna wama cäcöbä tabou waiquia da culanö, afä bä wayu lä ujudule yama bä iyamabä?”, wamacö cuma. ¿Ö̦jö tawä? —a cuma.

¹⁶ Inaja a fa cunö, ö̦jöteli bä bada fa fuwämalönö, bä nö blemalalema. Tä ulufi lä wa̦lidiono wei jamö, mösöcölö sibä fa däamalalönö, ai sibä ca̦i mösöcöbö däa fa showadaamalalönö, bä si yowamalalema, bä bufi jaducäblobä.

¹⁷ Benueliteli bä yafibö bada lä ösöi bä yafibö ca̦i wa̦liamalema. Ö̦jamö lä bä ca̦i bluca wa̦lo shäa showadaamalalema.

¹⁸ Ö̦jö däjä, Jedeoni a lä cuinö, Seba, Saluna cäcöbä wa̦lima. —Dabolo jamö wama bä jo̦wa lä shäleno wei, tä a̦ da wäböba —a cuma. Bä a̦ fuo ja, abenaja cäcöbä cuma. —Cafä wa lä culenaja bä cuoma. Inaja showawä bä bluca cuwä mö feduoma. Bä bälöo lä dodijii bä bada mömou lä culenaja, bä mömou cuo mö feduoma —cäcöbä cuma.

¹⁹ Abenaja Jedeoni a cuma. —¡Camiyä yamacö mashi dodijiwä, ö̦jö bä cuoma! ¡Nayä a cadidiwänö yamalecö ca̦i lä cuono wei! Ya wa̦ wawädoo da showadao. Jeobaa a malä cule, a demi cua shi lä wa̦lile a lä cui. Ö̦jö wama bä demi tamabou fa cunoja, bäfäcö nö shäbö ma mlai ma cui, fei däjä bäfäcö nia yai shäö cadidio —a cuma.

²⁰ Ö̦jö däjä, bä ijilubö bada e lä cui, Jedele e a̦fa lä cui lija a wa̦ fama. —Bei. Cäcöbä shäa da showadaalö —a cuma ma cui, sibala e fulinomi. A fiya oshedaoma yalo a malä quilino wei.

²¹ Ö̦jö däjä, Seba, Saluna cäcöbä a̦ läblaliyoma. —Bei. Ijilu a lija yafälecö shäma dijä. Cafä wa dodijiwänö yafälecö da shälö. Bä nö lä wa̦lojaö wei bä quilii malä mlai —cäcöbä cuma. Jedeoni a fa ubladalunö, Seba, Saluna cäcöbä shäa showadalema. Ö̦jö däjä, cameyo ebä lija bä baushi lä jalemaböbono wei ebä ca̦i jayua showaalalema.

²² Ö̦jö däjä, Isaeli ebä lä cuinö, abenaja Jedeoni a nowa tamaje. —Camiyä yamacö lija, cafä wa nia yai bada läo, yamalecö nosiemabä. Ijilufä ma cui, fääshäfä bä ma cui, bä bada läablalou nodio showaobä. Madianateli bä lija yamalecö bayeliblaö malä lälofe —a nowa tamaje.

²³ Ö̦jö ma cui, abenaja Jedeoni a cuu nomöjöoma. —Ma, camiyä ya ma cui, ijiluyä a ma cui, cafä wamacö lija yafäcö bada nia läomi, bämacö nia nosiemaimi. A nia Bada lä läo wei, ö̦jö Jeobaa a waiquiwä, wamacö nosiemabä —a cuma.

²⁴ Abenaja a ca̦i cuma, cama bä lija. —Ö̦jö ma cui, bämacö wa̦lii ojode, ¿ö̦jö tawä? Madianateli wama bä madofibö lä doano wei täbä ja, wale da dobälöje. Bä baushi lä fubono wejei, ö̦jö iba ya bä shi̦lo bufii, ¿ö̦jö tawä? —a cuma. Madianateli bä lä cui, Isimali nodiwä bä li cuoma yalo, olo bä shi̦lo malä fubono wejei.

²⁵ Abenaja ö̦jö bä cuu mö feduoma. —Ja̦o. Awei. Yamacö bufi doblalolanö, yama bä nia jibäö —bä cuma. Ö̦jö däjä, acadafu sicö bada fa blacöjenö, Madianateli bä madofibö lä doano wejei, bä lä fubono wejei bä jilablaamaje.

²⁶ ¿Ö̦jö tawä? Jedeoninö olo bä baushi lä nacano wei bä fa blucaonö, bä fude dodijioma. Madianateli bä madofibö ai bä ca̦i bluca tabou mö feduo showaoma, baushi bä ca̦i, maa liyäjäwä mabä wai nowa lä bluca wei mabä ca̦i, didiodima shi de̦lelewä sibä ca̦i, Madianateli bä bada lä didiono wei sibä. Cameyo ebä lija bä baushi lä jalemabono wejei bä ca̦i.

²⁷ Ö̦jö bä olo ja, Jedeoninö nö ijidubö a tablamalema. Nö ijidubö a fa tablamalönö, Oflateli bä shabonobö jamö a i̦tamaboma, cama a lä bälöono wei jamö. Ö̦jö a ja, Isaeli ebä bufi bluca yabäcäo fa dicoonö, ö̦jö tä cotä ja, bä möfe boblaama. Jedeoni a ma cui, cama ebä ma cui, ö̦jö nö ijidubö ja bä bufi fa wabamonö, bä bufi shomiafälöma.

²⁸ ¿Ö̦jö tawä? Inaja tä fa cuonö, Isaeli ebä lä cuinö, Madianateli bä yanöcöbomaje. Bä a̦ faö co̦daanomi. Jedeoni a cuo showao däjä, tä ulufi yanöcöbou showalajenö, lasha 40 a famalemaje.

Jedeoni a bufi lä mlaqueno wei tä a̦

²⁹ Joasa bä ijilubö Jelobaala e a̦fa ca̦i lä cuono wei, cama yano jamö a co̦a fa co̦lunö, a yanöcöwä bälödioma.

³⁰ Bei. Jedeoni bä ijilubö 70 ebä cuoma, cama ebä cadidiwä lä cui. A suwäbö malä blucaono wei.

³¹ Siquemöteliyoma a ca̦i lä tabono wei lija ai a ijilu taquema. Abimeleco e a̦fa jilaquema.

³² ¿Ö̦jö tawä? Joasa bä ijilubö Jedeoni e wa̦lobadao waiquio däjä e bufi mlaquema. Ofla jamö, bä fö̦ö Joasa e lä didiqueno wei jamö, ö̦jamö Jedeoni a didia nomöjöquemaje, Abiesele nodiwä bä ulufibö jamö.

³³ Jedeoni a bufi lä mlaqueno wei däjä, Baala lija Isaeli ebä bufi mö yabablou fa co̦lonö, ö̦jö a nö ijidubö bluca ja, bä nö bayeli nacaoma. A yai bufibobeje, Baabelidi a tablamalemaje.

³⁴ Isaeli ebä lä cuinö, Jeobaa a lä bufiblano wejei a nofi mojodublaö co̦layomaje. Bä nö nabämou fe lä fa̦yoblai bä bluca lija bä bayeliblaö ma läono wei ma cui, jai a danomije, bä cublou majölayoma.

³⁵ Jelobaala ebä lä nodiblaliyono wei, Jedeoni a wa̦fa ca̦i lä cuono wei ebä lä cui, ö̦jö bä ma cui bä ca̦i dodijidawä cuonomije. Jedeoninö Isaeli ebä bluca ma bayeliblano wei ma cui, cama ebä nofimaö juonomije.