Jueces 7 - Biblia Yanowamö

Madianateli bä nö lä bleaamano wei tä a̦

¹ Ö̦jö däjä, Jedeoninö cama ebä ca̦i jocäa fenalayoma, Jelobaala a wa̦fa ca̦i lä jilano wejei a lä cuinö. Camanö bä ca̦i lä cuono wei, bä bluca jocäa fa fenalönö, Alodo jamö u fe lä jojole jamö, bä wayu miblaquema. Mole a jefu a̦fa lä cule a jefu däjämö, Madianateli bä bälöblao mö feduoma, tä lä yalöbe jamö.

² Ö̦jö däjä, abenaja Jeobaa a cuma, Jedeoni lija. —Wa bä ca̦i wayu lä cule bä bluca dicowä ja, ö̦jö bä lija Madianateli ya bä noshi nia ö̦jödaboimi. Camiyä wale lofote dablaö mlajei, cama bä nofi shi̦lo doablamou dicoicu. “Camiyä yamacö lofotenö yamacö nö wa̦lojama”, bä cuu dicoicu.

³ ¿Ö̦jö tawä? Bä bluca da yömöla, ö̦jö lä. Abenaja wa bä nowa tabä. “Wamacö lä quilii wei, wamacö shi̦lo cu̦jamöbä”, wa bä nowa ta —a Jeobaa cuma. Jedeoninö bä quilii wabaö fa showadaonö, 22,000 bä co̦layoma. Cama lija 10,000 bä cuo showao fe yadioma.

⁴ Ö̦jö däjä, Jedeoni lija Jeobaa a wa̦ faö co̦oma. —Ma. Bä bluca showawä dicowä —a cuma—. Bei. Mau u jamö bä cai̦ fuu da nomöjöo, ö̦jamö ya bä wabaö co̦obä. Cafä lijamö, “Ei a yauobä”, ya cuu ja, ö̦jö wa nia shi̦lo yaumabou. Ai ya wa̦fa wäyäö ja, “Ei a nia nocaomi”, ya cuu ja, ö̦jö wa nia yaumaboimi —a Jeobaa cuma.

⁵ Ö̦jö cudeenö, mau u jamö Jedeoninö bä ca̦i wayu fudayoma. Ö̦jamö, abenaja Jeobaanö a nowa taö nomöjöodayoma. —Ji̦ima bänö ubä naco nacomaö lä culajeinaja bä lä cuaaö wei bä lä cui, bä nia yaio. Bä jo̦tolanö ubä lä coaö wejei, ö̦jö bä ca̦i nia yaio mö feduo —a nowa tama.

⁶ Bei. Bei imicönö ubä fa ji̦quejenö ubä lä naco nacomano wejei, 300 bä cuoma. Ai bä bluca lä cuinö, bä jo̦tolanö ubä coamaje.

⁷ Jedeoni lija abenaja Jeobaa a cuu nomöjöoma. —Ubä lä naco nacomano wejei wa bä 300 fa nocamalänö, bämacö nia bayeliblaö. Cafä wamacö lija Madianateli ya bä noshi nia ö̦jödabou. Ai bä lä cui, cama bä yanobö jamö bä bluca co̦oblobä —a cuma.

⁸ Inaja Jeobaa a cuma cudeenö, jai oshoboli bä wai cuwä, ebä wai co̦alalema, bä yalobö yo̦la ca̦i. Ö̦jö däjä, cama bä yanobö jamö, bä shimöa co̦abodayoma. Ai bä 300 lä cui, ö̦jö bä ca̦i shi̦lo cuo showaodayoma. Tä lä yalöbe jamö, Madianateli bä lä bälöblale bä yanobö bebiblaoma.

⁹ Ö̦jö tä didi showawä ja, Jedeoni lija abenaja Jeobaa a cuma. —Bei. A da jocädalu. Bä bälöa lä bebiblabe, bä nabä quea da showadabalucölö. Cafä lija ya bä noshi ö̦jödabou malä cule.

¹⁰ Ö̦jö ma cui, ö̦jamö wa dimöö quilii ja, cafä wa wa̦ fuamobä a Fula lä cui, ö̦jö a ca̦i dimöö da balöofälö.

¹¹ Bä wayu bälöa lä bebiblabe bä a̦ lä wayou wei, wa tä a̦ ji̦liabä. Ö̦jö däjä, quilii mlai ja, wa bufi lofotolanö wa bä nabä nia queo showadao—a cuma. Ö̦jö däjä, bä wayu bälöa lä bebiblabe tä casö jamö, Jedeoni a wa̦ fuamobä a Fula lä cui sho, cäcöbä dimöbaliyoma.

¹² ¿Ö̦jö tawä? Madianateli bä ma cui, Amalecoteli bä ma cui, motoca a lä cuaaimaö wei tä mashi jamö bä lä bälöblaono wei bä ma cui, tä lä yalöbe jamö bä bälöjou fa cuaanö, jai söcö söcöma bä bluca shuliloma. Cameyo ebä ca̦i blucao fe balojooma. Modu u casö jamö, bä mlaca mlaca lä jilablai bä nö wabamobimi lä culenaja bä cuoma.

¹³ Bei. Madianateli ai anö, tabi tabi ecö a̦fa wäyäö däjä, Jedeoni a waloa ja̦tobaliyoma. Ai e lija ecö a̦fa tabi wäyäö däjä, abenaja a cuma. —Shädayai. Ya fa tabimolunö, Madianateli bämacö lä bälöle jamö, nii a bada fa bluluimanö a majali yafilayoma, bei ji̦bä ja bä nii lä tablamou wei. Ai bämacö yanobö ja a fa queicunö, a majali wäcämalei culoi. A fa wäcämalönö, a mö majali jadublamalema. A yano majali blaa showadaaliyoma —a cuma.

¹⁴ Ö̦jö däjä, abenaja ai e lä cui e cuma. —¡Shädayai! ¡Joasa bä ijilubö Jedeoni e tabi li sibala cuo dodijioma, a sibala wayu ca̦i lä fuu wei! Isaeli nodiwä ö̦jö a. Ö̦jö lija, Yai Bada tänö Madianateli bämalecö noshi bluca lä ö̦jödabole, etä tabi li yafilayoma! —e cuma.

¹⁵ Jedeoninö tabi tabi cäcö a̦fa lä wäyämono wei tä a̦ fa ji̦lilänö, tä a̦fa tabi lä wawämano wei tä a̦ ca̦i ji̦lia fa showadalönö, ö̦jö däjä mashita jamö, Jeobaa lija a möfe boaliyoma, a wa̦fa Bada doblao tabä. Ö̦jö däjä, Isaeli ebä ca̦i wayu lä bälöblaono wei jamö, cäcöbä dolequea fa co̦bofälönö, abenaja Jedeoninö bä nowa taö co̦joloma. —Bei. Fei däjä bä da jocäblalu. Cafä wamacö lija, Jeobaanö Madianateli bä noshi malä ö̦jödabole —bä nowa tama.

¹⁶ Cama 300 ebä wayu lä cui, 3 bei bä sheleleblamalema. Bluca bä wayu lija, yalo yo̦labä jibäabodayoma. Jai oshoboli bä wai cuwä bä ca̦i. Ö̦jö bä wai jamö, wacä lä itelibono wejei wacä bä befi ca̦i didibomaje.

¹⁷ Ö̦jö däjä, abenaja bä nowa tama. —Camiyä wamale nia möö. Madianateli bä bälöa lä bebiblabe tä casö jamö ya waloo däjä, camiyä lija wamacö mamo fa showaonö, ya lä cuaaö weinaja, wamacö cuaaö mö feduo showadaobä.

¹⁸ Yalo ya yo̦la folaö däjä, ya bä ca̦i lä läle bänö yo̦labä ca̦i folaöje däjä, ö̦jö däjä Madianateli wama bä fe lä fa̦yobole wamacönö, wama yo̦labä nia ca̦i folaö mö feduo. Ö̦jö däjä, wamacö a̦ shi dolanö, abenaja wamacö nia cudou. “¡Bei, bei, bei! ¡Jeobaa a nofi doablamobä! ¡Jedeoni a nofi ca̦i doablamou mö feduobä!” wamacö nia cudou —bä nowa tama.

¹⁹ Bei. Tä bäshäcuaaö däjä, Madianateli bä bälöa lä bebiblabe tä casö jamö, Jedeoninö 100 ebä ca̦i wayu didi walobaledayoma, bä wayu lämou nomöjobä bä waloo dudou däjä. Yalo yo̦labä folamaje. Jai oshoboli bä wai lä bono wejei bä ca̦i shäblamaje.

²⁰ Wayu 3 bä lä shedequeblaleno wei, inaja showawä bä bluca cuaaö fe fa̦yoaö mö feduo showaoma. Acasi boconö, cowa wacä befi ca̦i bolajenö, jayu boconö, täbä lä folaö wejei täbä bou mö feduomaje. ¿Ö̦jö tawä? Yalo yo̦labä folamaje. Jai oshoboli bä wai lä cui, bä ca̦i shäblamaje. Inaja bä cuaaö däjä, bä a̦ nacli faa showadaaliyoma. —¡Bei, bei, bei! ¡Jeobaa a nofi waiteli doablamobä! ¡Jedeoni a nofi ca̦i waiteli doablamou mö feduobä, bäma bä nabä queo da showadao! —bä shi jaliwä cublaloma.

²¹ Madianateli bä lä bälöblaano wei tä fe lä fa̦yoi jamö, Jedeoni ebä bluca yanöcöa showalanö, Madianateli bä wayu bluca läläablaloma. Bä si̦lalamolanö bä bluca docublaloma.

²² ¿Ö̦jö tawä? Yalo 300 yo̦labä lä folano wejei däjä, Jeobaanö Madianateli bä bufi bluca wedinajamomaö ja, cama ai e ma cui sho, sibala bänö cäcöbö bluca shäyolayoma. Cama ebä mashi wayu ma cui, bä nabä bluca queayolayoma. Madianateli bä wayu docublou ja, Selelateli bä nö mayo jamö bä läläa fa showalöfälönö, Besidateli bä lä bälöle jamö bä waloquema. Abemeola tä fe ulufi lä wädöle jamö bä ca̦i waloquema, Dabada tä ajede jamö.

²³ Isaeli ebä bluca nacaalalemaje. Nefitali ebä ma cui, Aselo ebä ma cui, Manasesi ebä bluca ma cui, ö̦jö bä bluca fa nacaalalöjenö, Madianateli bä nosi däa showalefälömaje.

²⁴ Jefu bä jamö, Eflaini ebä lä bälöblaono wei jamö, Jedeoni a wa̦no wäyäbeje bä ca̦i shimölema. Madianateli bä nosi bofälöbeje, bä nacamalema. Boco ubä jamö bä nia lä bucadublaaö wei jamö, bä lämomaö cuaaö fa bufinö, Bebalateli bä lä bälöle jamö bä nia läo fe wädöoma. Jodana u ma cui jamö, bä nia ca̦i läoma. ¿Ö̦jö tawä? Eflainiteli bä bluca fa nacalalöjenö, boco ubä jamö bä showadi lä bucadublaano wei jamö, bä lämou cuaaö showadaoma. Bebalateli bä lä bälöono wei jamö, bä läo fe wädöoma. Jodana u ma cui jamö, ö̦jamö bä ca̦i läoma.

²⁵ Madianateli bä nosi lä bofälöno wejei jamö, bada cäcöbä fa fuwälöjenö, cäcöbä shäa showadalefälömaje. Ai a bada lä cui, Olebe a wa̦fa cuoma. Cama a wa̦fa lä cuono wei cäcö jamö, ö̦jö bei a shälemaje. Ai a mö feduwä lä cui, Sebe a wa̦fa bada cuoma. Cama a wa̦fa lä cuono wei tä ulufi jamö, ö̦jö a li shäa mö fedulemaje, uba ubä showadi lä tamou wei jamö. ¿Ö̦jö tawä? Olebe, Sebe cäcöbä fa shälöfälöjenö, Jedeoni lija cäcöbä fe dodobofälömaje, Jodana u mashi bucadu jamö.