Jueces 6 - Biblia Yanowamö

Madianateli bänö Isaeli ebä nö lä bleaamano wejei tä a̦

¹ Ö̦jö däjä, Isaeli ebä lä cuinö, Jeobaanö tä tamaö nofi lä wa̦libou wei tä taöje ja, Madianateli bä lija bä noshi ö̦jödabou majöoma. Madianateli bä lija bä nö bleaamamou showao däjä, lasha 7 a famalemaje.

² Isaeli ebä nö bleaaö dodijioma. Madianateli bä nö shi̦lo yai wa̦lojama cudeenö, Isaeli ebä quilili jo̦yaomobodayoma. Maa maca cabä jamö ma cui, täcabä lä cublai jamö ma cui, täbä lucäö si ijejewä dao lä mlai jamö ma cui, bä jo̦yablamou cuaama.

³ Nii döano a cuo däjä, bä nabä shi̦lo malä funo wejei. Madianateli bä ma cuinö, Amalecoteli bä ma cuinö, motoca a lä cuaaimaö wei tä mashi jamö bä lä bälöblamono wei bä ma cuinö, nii a döano cuo däjä, bä nabä shi̦lo fublaamaje.

⁴ Isaeli ebä ulufibö jamö bä nabä fa bälöblaayojenö, bä niibö bluca wa̦liamaje. Bä niibö wa̦liaö lä cuaafälöno wejei, Casateli bä ulufibö ma cui jamö, bä fe wädöblaliyoma. Isaeli ebä iyaö juobä bä shee daanomije. Bä naiqui waobä ma cui, yalo ebä wa̦liamaje. Oweja ebä ma cui, baca ebä ma cui, bulo ebä ma cui, bä bluca wa̦lialalemaje.

⁵ Bä bacabö ca̦i fuu fa showaojenö, yalo sibä ja bä showadi wejejou lä cuaafälöno wei sibä ca̦i fa waloyolujenö, cama ebä ca̦i bluca bälöa malä showadablaqueyoluno wejei. Cama bä fa blucaonö, cameyo ebä ca̦i blucao mö fa feduonö, bä bluca wabamobä etä cuonomi. Jai söcö söcöma bä bluca lä shulilou wei bänö tä ulufi wa̦liaö lä culajeinaja tä wa̦liaö cuaayolumaje.

⁶ ¿Ö̦jö tawä? Inaja Madianateli bä cublaayoluma cudeenö, Isaeli ebä lä cui, bejedi lä bä nö bleaaö fe balojooma. Jeobaa lija bä nia fa bayeliblamonö, bä a̦ nacläama.

⁷ Madianateli bänö bä nö lä bleaamano wejei tä nowa ja, Jeobaa lija Isaeli ebä a̦ nacläaö däjä,

⁸ Jeobaa a wa̦no wäyälewä a shimölema, Isaeli ebä lija. Abenaja a cuma. —Jeobaa ya wa̦no taö lä cule, Isaeli bäma ecö lija a bufiblamobä a lä cui. Ejido jamö bämalecö co̦lema. Bämalecö nö lä bleaamano wejei jamö culanö, bämalecö luluboimama.

⁹ ¿Ö̦jö tawä? Ejidoteli bä lija bämalecö bayeliblaö läoma. Bämalecö nö lä bleaamano wejei ai bä ma cui lija, inaja showawä. Eja bä lä bälöjömono wei bä yashuu fa baläläonö, camiyä bämacö lija bä ulufibö jibäaö läquema.

¹⁰ Bämalecö nowa ca̦i taö showaoma. “Wamale bufiblabä ya Jeobaa”, a cuma. “Amoleo bä ulufibö jamö wamacö bälöjöwä ma cui, ö̦jö bänö täbä lä bufiblalajei bä nö quili ta dijejä”, a cuma. ¿Ö̦jö tawä? A cuma ma cui, wama a wa̦ ji̦liblanomi —Jeobaa a wa̦no wäyälewä a cuma.

Jedeoni lija Madianateli bä nabä lä shimöqueno wei tä a̦

¹¹ Abiesele nodiwä Joasa a wa̦fa lä cuono wei, Ofla jamö a bälöoma. Joasa bä ijilubö Jedeoni e ojodamou däjä, ö̦jamö Jeobaa etä a̦jele fa waloiquiyonö, Joasa e tefi bada cotä jamö a loquema. ¿Ö̦jö tawä? Jedeoninö nii sibä joyablaama, mobä feiblobä. Madianateli bänö mobä dablaö mlaobeje, uba ubä showadi lä tamou wei jamö sibä joyaö ja̦tooma.

¹² Jedeoni lija Jeobaa etä a̦jele fa wawäblalunö, abenaja e cuma. —Waiteli cätä. Wa nö lä wa̦lojale wa. Jeobaanö wa ca̦i cua lä cule —e cuma.

¹³ Abenaja Jedeoni a cuma. —Bada tä. Jeobaanö yamalecö ca̦i cua ja, ¿wedi tabä inaja yamacö taamamou dicoa cule? Bada bänö yamalecö yömölaöje. “Ejido jamö Jeobaanö yamalecö malä co̦leno wei”, bä ma cuu wei ma cui, a lofote dablamou nö lä quiliano wei tä a̦fa ca̦i wäyäö ma cujei, fei däjä ¿wedi tabä inaja a li cuaaimi, ö̦jö lä? Ma, fei däjä Jeobaanö yamalecö nofi daa yaiquema. Madianateli bä lija yamalecö noshi ö̦jödabou majöa lä cule—Jedeoni a cuma.

¹⁴ Ö̦jö däjä, Jeobaa a mamo showaa fa cadidiicunö, abenaja a nowa tama. —Wa lä lofotoaale, a da alufälö. Madianateli bä lija, Isaeli wa ebä bayeliblaö läobä. Camiyänö bä malä shimale —a nowa tama.

¹⁵ Abenaja Jedeoni a cuma. —Bada tä. ¿Wedi jamö tänö camiyänö ya bä nia li bayeliblaö läo? Manasesi ai yama ecö nö bleaaö fe balojoo ma mlai ma cui, camiyä yamacö lä cui yamacö yai dobloimi. Fayä yama ecö lija bä mölaimi ma waiquii ma cui, camiyä wale nia yai bufiblaimi fe balojooje —a cuma.

¹⁶ Ö̦jö däjä, abenaja Jeobaa e cuma. —Ö̦jö ma cui, camiyänö bä ca̦i malä cule. Madianateli bä ma bluca wei ma cui, moli wa shäö si ijejewä lä culenaja, wa bä nia bluca shäö showadao —e cuma.

¹⁷ Abenaja Jedeoni e cuma. —Bä bufi doblamabou waiquiwä ja, cafä bä nö ö̦jöböabä tä da wawämalö, ö̦jö lä. Ö̦jö däjä, “Cafä Jeobaa wanö wale a̦ wayomaö lä cule”, bä nofi nia tabou.

¹⁸ Cafä lija ya waloo co̦o showao mlao däjä, eja a cua da jeicu. ¿Ö̦jö tawä? Bä dobäbä, ya bä nia ca̦i fuu co̦imaö, cafä lija ya bä dodobobä —Jedeoni a cuma. —Bä nö dabou ja, eja ya nia yanöcöo balöo —a cuma.

¹⁹ Inaja a nowa tama yalo, Jedeoni a lobe cublaa balöquema. Shibo oshe a fa shälönö, a löbömalema. Talö ji̦bä bada ja, nii juluno mlai bä ca̦i tablalema. Ö̦jö däjä, shode bada fe ja, yalo bä tablalema. Jaboca a jamö, bei boubä löquema. Ö̦jö däjä, fii tefi bada cotä jamö, a̦jele a loo lä juono wei jamö, bä ca̦i bluca aa co̦layoma. A̦jele a lija bä dodobou showadaoma.

²⁰ Abenaja Yai Bada tä a̦jele cuma. —Yalo wa bä fa dälänö, nii juluno mlai wa ji̦bä ca̦i däa mö fa fedulänö, maa ma jamö bä bluca da maquecö. Ö̦jamö bei wa boubä ca̦i liyäyaabä —a cuma. Inaja showawä Jedeoni a cuaama.

²¹ Ö̦jö däjä, fii fi lä bono wei tefinö, Jeobaa etä a̦jelenö bä yalo fa bacämanö, nii juluno mlai bä ca̦i fa bacämalönö, maa ma ma cui ja, cowa wacä bada falayoma. Yalo bä ma cui, nii juluno mlai bä ma cui, cowa wacänö bä mö bluca watäa showadaquema. Ö̦jö däjä, Jeobaa etä a̦jele mlaa co̦layoma.

²² Ö̦jö däjä, “Bejedi lä, ö̦jö Jeobaa etä a̦jele yai cuo cadidioma”, Jedeoni a bufi cudaliyoma. Abenaja a cuma. —Jeobaa wa Bada lä ayai. Shädayai. Cafä Jeobaa bä lä bufiblale wa a̦jele lä cui sho, bäfäcö buficö möyou cadidio lä cufe. Ya demi cuobä tämi —a cuma ma cui,

²³ abenaja Jeobaa e cuma. —A bufi da yanöcöicu. Quili dijä. Wa nia nomaimi —e cuma.

²⁴ Ö̦jö däjä, Jeobaa lija bä yalo lä dodoblamou wei bä maqueblamobä täcö tablalema. Täcö lä tablaleno wei täcö a̦fa ca̦i jilaa showadaquema. Bufi yanöcöwä tä lä cui, ö̦jö Jeobaa cätä, täcö a̦fa jilaquema. Fei däjä ma cui, Ofla jamö täcö i̦taa showaa lä cule, Abiesele nodiwä bä ulufibö jamö.

Baala lija täbä dodoblamobä täcö lä wa̦lialeno wei tä a̦

²⁵ Ö̦jö tä didi däjä, Jedeoni lija abenaja Jeobaa a cuma. —Bei. Faafä baca e wa̦lo da dälä, lasha 7 a famaö lä waiquii e badaö lä nodile. Ö̦jö däjä, Baala lija, faafänö bä yalo lä dodoblamou wei bä maqueblamobä etäcö da wäcämalö. Asela lija a nö bayeli nacaobä, fi bada ublaa lä yädämabole, fi ca̦i da duyälö.

²⁶ ’Ö̦jö wa fi fa duyälönö, ei wama tä ulufi lofotobou lä ösöle jamö, Jeobaa wale lä bufiblale ya lä cui lija, yalo wa bä nia lä dodoblaö wei bä maqueblamobä, täcö yai da tablalö —a cuma—. Mabä nia yai lä jilablaamou wei wa mabä fa jilaacönö, wa täcö tablabä. Ö̦jö däjä, faafä baca e badaö lä nodile wa e nia shäö. Asela lija a nö bayeli nacaobä, wa fi nia lä duyäö wei fi ja, wa wacä fa tacönö, camiyä lija baca wa bä nia ö̦shö dodobou —Jeobaa e cuma.

²⁷ Ö̦jö cudeenö Jedeoni a wa̦ fuamobä 10 ebä ca̦i fa funö, Jeobaanö tä nabä shömöa lä taqueno weinaja, a cuaaö showadaoma. Ö̦jö ma cui, cama ebä nö quili fa tanö, ai bä lä bälöle bä nö quili ca̦i fa tanö, didi däjä tä taö ja̦tooma.

²⁸ Ö̦jamö bä lä bälöle bä jocäblou fa fenalonö, Baala lija bä yalo lä dodoblamou wei bä maqueblamobä, täcö wa̦liano daa fenalalemaje. Asela lija bä nö bayeli nacaobä, fi bada ublao lä yädäono wei fi ca̦i duyäno daa mö fedua showadaalalemaje. Jeobaa lija bä yalo dodoblamobä täcö lä tablaleno wei jamö, baca a bada lä nodiano wei bä ö̦shö maqueo showaoma.

²⁹ Ö̦jö däjä, abenaja bä nowa tayoma. —¿Wedinö ei bei tä li taö fe jalu cufe? —bä nowa tayoma. Bä wa̦liyou fa cuaanö, bä a̦ macocama. —Joasa bä ijilubö Jedeoninö tä li tama —bä cuma.

³⁰ Ö̦jö däjä, Joasa lija ö̦jamö bä lä bälöle abenaja bä cuma. —Ijilufä a da wawämalö, a shämobä. Baala lija bä yalo dodoblamobä täcö malä wa̦lialeno wei. Asela lija bä nö bayeli nacaobä, fi bada ublaa lä yädäono wei fi malä duyäleno wei —bä cuma.

³¹ Ö̦jö ma cui, Joasa a nabä lä icuqueno wejei bä lija, abenaja a cuma. —¿Baala bei wama a nia yai nowamöbou daanö? ¿Ö̦jö wama etä nofi ca̦i nia bäyäaö daanö? Ö̦jö etä yai lä nowamaö wei a yai nia shi̦lo shämou. Ei tä lä cui tä mö jalu co̦o däjä, a nia cuomi. Ö̦jö Baala lä cui, a bufiblamobä a li waiquiwä ja, cama a nö li yuobä, ö̦jö lä. Cama lija bä yalo dodoblamobä etäcö malä wa̦liano wejei —Joasa a cuma.

³² Ö̦jö cudeenö, Baala lija bä yalo lä dodoblamou wei täcö lä cui, Jedeoninö täcö wa̦lialema yalo, Jelobaala a wa̦fa jilaa majöquemaje. ¿Ö̦jö tawä? Jelobaala tä a̦ lä cui, jai “Ö̦jö lija Baala a nö yuobä”, etä a̦ ji̦limamou cuwä yalo, a wa̦fa jilaquemaje.

³³ Bei. Madianateli bä ma cui, Amalecoteli bä ma cui, motoca a lä cuaaimaö wei tä mashi jamö bä lä bälöblaono wei bä ma cui, ö̦jö däjä bä bluca fa co̦cablalunö, Jodana u jamö bä fa bucadubalunö, Jeselele tä lä yaläbe jamö, bä bälöaleyoluma.

³⁴ Ö̦jö ma cui, Jedeoni lija Jeobaa a Bufi fa lucälönö, a cadidiblamalema. Bä moyawämabä, Abiesele nodiwä bä lä bälöono wei jamö, yalo yo̦la jolamaö bufima. Ö̦jö tä a̦ fa ji̦liläjenö, cama lija bä wayu co̦cablou showadalayoma.

³⁵ Manasesi ebä bluca lä bälöblai jamö bä fa shimölönö, Jedeoni lija ö̦jö bä wayu ca̦i co̦cablamaö bufii showaomaje. Aselo ebä ma cui lijamö, Sabulono ebä ma cui lijamö, Nefitali ebä ma cui lijamö, ö̦jamö bä moyawämabeje bä fa shimölönö, Jedeoni lija bä co̦cao lä waiquiono wei bä mö baamadayobeje, bä ca̦i dolequebefälöma.

³⁶ Ö̦jö däjä, Jeobaa lija abenaja Jedeoni a cuma. —Camiyä lija Isaeli wa ebä nia bayeliblamaö läo ja, wa lä cuno wei wale nia taamaö dodijio ja,

³⁷ camiyä lija a lofote da damolalu. Bei. Nii sibä lä joyaö wejei jamö, oweja ya sicö ca̦i co̦i blaaö lä cule. Sicö lä blale jamö ulufi a jödödöwä wejediwä ma cui, jeu jeu bänö oweja co̦icö jäläaö ayao ja, ya bufi nia shaliliblou showadao. “Camiyä lija, bejedi lä Jeobaanö Isaeli ebä nia bayeliblamaö läo, a lä cuno weinaja showawä”, bä nofi nia tabou —Jedeoni a cuma.

³⁸ Inaja showawä tä cublaliyoma. ¿Ö̦jö tawä? A jocäblou fa fenalonö, sicö jele daa fenalalema. Sicö fa dälönö, sicö a̦fufama. Sicö co̦i fa a̦fufanö, caö fesi ja, sicö bou lajoblamalema.

³⁹ Ö̦jö däjä, Yai Bada lija abenaja Jedeoni a cuu co̦oma. —Shädayai. Moli ya wa̦ faö co̦o ja, a jushuo dicoo dijä. ¿Ö̦jö tawä? Ei oweja sicö showawä ja, moli ya nia wabäo co̦o, ¿ö̦jö tawä? Jeu jeu bänö, sicö lä blale jamö ulufi a jödödöwä jäläo ma cui, sicö shi̦lo wejedio ayao ja, ö̦jö däjä ya bufi nia shi̦lo yai cadidiblou showadao —a cuma.

⁴⁰ Ö̦jö tä didi ja, inaja showawä Yai Bada tänö a taamama. Jeu jeu bänö, sicö lä blale jamö ulufi a jödödöwä ma jäläono wei ma cui, oweja sicö shi̦lo yai wejedio ayaoma.