Jueces 5 - Biblia Yanowamö

Debola, Balaco sho cäcöbä lä amowamono wei tä a̦

¹ Ö̦jö lä däjä, Debola sho, Abinoama bä ijilubö Balaco a lä cui sho, amowa tä a̦ taböma. Abenaja cäcöbä amowabö a̦ cuma.

² Bada bänö Isaeli ebä ca̦i wayu fuu bufi doblaomaje yalo, Isaeli ebä ca̦i yauo bufi doblaoma yalo, ¡Jeobaa a nofi da doboje!

³ Bada wamacö, wamale a̦ da ji̦lilä. Wama bä ca̦i lä cule bä yömöca da daicu. Jeobaa lija ya wa̦ ji̦liamobä, ya tä a̦ amowa taö. Jeobaa lija ya wa̦ nia dodijaö, Isaeli bäma ecönö Jeobaa bäma a lä bufiblaö wei a lä cui lija.

⁴ Jeobaa wa tä. Seili jamö culanö wa lä fuimano wei däjä, Edomö tä ulufi jamö culanö wa wayu fuu lä shaliloimano wei däjä, ulufi a bada löda lödamoma. Maa a bada comi quei ja, ölajashi bänö tä mö bada dödöoma.

⁵ Jeobaa wa fuu lä cuaaimano wei jamö, bei mabä ca̦i qui̦da qui̦damoma. Sinai cäcö ma cui, wa fuu lä cuaaimano wei jamö, cäcö bada löda lödamou dodijiodayoma. Isaeli yama ecö lija wa lä bufiblamou wei wa dodijiwä.

⁶ Anada bä ijilubö Sacala e bada läo däjä, Jaele a lä cuono wei däjä, bämacö doblonomi. Bä lä fublaano wei, wawädowä bä funomi. Baimi yo jamö bä quilili fublaama.

⁷ Camiyä Debola ya bada läo showao mlao däjä, Isaeli ebä bälöjöwä lä siboblai, bä nö bleaaö fe balojoo balöoma. Ö̦jö däjä, bä nöö ebä nofi lä tabolajeinaja, Isaeli ebä lä cuinö camiyä wale nofi talemaje.

⁸ Täbä bufiblamobä, shomi täbä lä lämabono wejei däjä, bämacö beibö yo lä bale jamö bämalecö nabä queo waiquiomaje. ¿Ö̦jö tawä? Isaeli 40.000 ebä ma cui lija, bä ishobä etäbä madofi tabonomije. Bä famii mlaobä etäbä läbonomije. Täbä blajawä niyablamobä, etäbä ca̦i madofi funomije.

⁹ Isaeli ebä ca̦i lä culajei bä lija, ya bufi yai cua shalilia. Cama bä ma cui, bä lä lulubono wejei bä ma cui, bä noshi ö̦jödao dodijioma. ¡Jeobaa a nofi yai da doboje!

¹⁰ Bulo au bä jamö, wamacö befi ca̦i lä fuu wei wamacö bada lä cuinö, ¡tä a̦ da wäyäje! Cafä dodijidawä sibä lä diyämono wei sibä ja, wamacö showadi lä loo wei wamacö ma cuinö, ¡tä a̦ ca̦i wäyäö mö da feduoje! Cafä mamicö ja wamacö lä fublaaö wei wamacö ma cuinö, inaja showawä.

¹¹ Mau uca jamö bä lä yododaö wei bänö tä a̦ amowa tabeje jamö, ¡tä a̦ da wäyäje! Ö̦jamö Jeobaa a nö wa̦lojaö lä ayao wei tä a̦ bluca wäyäö nocamouje. Isaeli ebä bälöjöwä lä siboblai bä nö wa̦lojaö fe lä yadiono wei, tä a̦ bluca wäyäöje. ¿Ö̦jö tawä? Bämacö beibö yo lä bale jamö, Jeobaa bäma ecö fuu shalilou showaofälöma.

¹² “¡Bei, Debola!”, bä cuma. “¡A da jocäblalu! ¡Amowa tä a̦ da ta!” “¡Bei, Balaco! Abinoama bä ijilubö wa e lä cuinö, wa bä wayu däa lä läleno wei, ¡bä bococu o̦cama öböa da showadaläfälö!”

¹³ Ö̦jö däjä, bä lä lofote wei bä lija bä ishobä, Isaeli ebä fuu shalilofälöma. Bä nö lä wa̦lojaö wei bä nabä queobeje, camiyä lijamö Jeobaa ebä dimöa cadidibaleyoluma.

¹⁴ ¿Ö̦jö tawä? Bejamino wama ecö lijamö, Eflaini ebä yaulayofälöma. Cama bä ulufibö jamö culanö, tä yalö lä möamobe jamö bä dimöbaliyofälöma. Maquili jamö culanö, wayu bä ca̦i lä culajei bä dimöa mö fedubaliyoma. Sabulono ebä lä bälöle jamö culanö, ai bä dimöa mö fedua showadabaliyoma, fii fibä showadi lä showabou wejei bä bada lä cui.

¹⁵ Isacala ebä bada lä cui, camiyä Debola ya lija bä yauafälöma. ¿Ö̦jö tawä? Balaco a bayeliblaö cadidiomaje, Isacala ebänö. Tä yaläwä lä möamobe jamö, Balaco lijamö lobe bä nosi blacäaö showaofälöma. Lubeni ebä lä bälöblai bä bufi cadidiblou mlai, bä bufi li wedinajamoblalodii feyaö dicooma.

¹⁶ ¿Wedi tä tabä, oweja bä lä ji̦colobolajei jamö bä li cudio feyaö buoma? ¿Oweja bä lija bä lä fusifeamou wei tä a̦ ji̦liaö bufi fa doblaojenö, bä li funomi daanö? Lubeni ebä lä bälöblai, bejedi lä bä bufi bluca li wedinajamoblalodima.

¹⁷ Calaadateli bä ma cui, Jodana u mashi jamö bä cudio showao dicooma. Dani ebä lä cui, ¿wedi tabä canawä ebä bada ca̦i mojodili cudio feyadimaje? Aselo ebä lä cui, modu u casö jamö bä loblalodii feyaö showaoma, canawä ebä bada lä ca̦bou wejei jamö.

¹⁸ Ö̦jö ma cui, Sabulono ebä ma cui, Nefitali ebä ma cui, ö̦jö bä bluca waiteliaö fe balojooma. Bä yai lä shäyono wei jamö, bä lucäö fe yadio showadaoma. Bä shämobä tä ma cuono wei ma cui, bä noshi ö̦jödao fe yadio showaoma.

¹⁹ Danaca jamö, Canaanateli bä bada wayu waloqueyoluma, Mequido u ajede jamö. Bä nia fa ishonö, bä ma waloqueyoluno wei ma cui, bä doblonomi. Yamalecö shänomije. Yamacö bladabö doaö läo doblonomije.

²⁰ Fedu jamö culanö, ¡a̦jele bänö wamalecö bayeliblalemaje! Sisala a doblou mlaobä, ö̦jamö culanö bä ishoma.

²¹ Sisono u ma cuinö, bä joyaa mö wäläaquema, u caläö lä lofote wei unö. Ya bufi lofotolanö, ¡ya fuu shalilou da showadaofälö!

²² Ö̦jö däjä, cabayo ebä läläaö yudu yudumou ja, bä mamicö a̦ ji̦limamou mashicoma.

²³ Abenaja Jeobaa etä a̦jele cuu. “¡Melosoteli bä lä cui bä wajäblamobä! Jeobaanö täbä shämaö bufii däjä, bä waloonomi. Bä nö lä wa̦lojaö wei bä nabä ma shimano wei ma cui, Jeobaa ebä lija bä yädäobä, bä waloonomi”, tä a̦jele cuu.

²⁴ ¡Yai Bada lija, Jaele a bufi yai doblalobä, Queniteli Ebelo bä suwäbö e lä cui! Suwä bluca yamacö cua ma cule, ¡ö̦jö a bufi yai doblalobä a! Awei, yalo sibä ja yamacö suwä bluca wejejou lä cuaafälöö wei yamacö bluca ma cule, ¡ö̦jö a bufi yai doblalobä!

²⁵ Mau ubä nacaö ja, Sisala lija baca esifu ubä jibäquema. Caö dodijidawä fesi ja, baca esifu ubä wejediwä jibäqueyoluma.

²⁶ Yano feyaca jamö sicö lä yojoono wei sicö casö lofotomabä shi duo fa dälänö, jayu boconö, fe basudabä tä ca̦i däa fa showadaalönö, Sisala a shälema. Fe shäblamaö showadalayoma. Bei nacötäcö fa wa̦lialönö, nacötäcö basudaö showadalayoma.

²⁷ A jaba fa wäcäimadunö, a wäcäblaquema. Jaele a cotä jamö a blaaliyoma. Jaele cotä jamö a wäcäö fa cuaafälönö, a fa bladaicunö, a lä wäcälayono wei jamö, nomawä a blaaliyoma.

²⁸ Cama e yano jamö culanö, Sisala bä nöö enö bä ijilubö e waloo möö ja, a mö yejebladima. “¿Wedi tabä läläamodima ebä nö dedeadii cule?”, a bufi cuma. “¿Wedi tabä cabayo ya ebä mamicö a̦ li ji̦lidalaö mlaa cule?”

²⁹ Cama ai ebä suwä bufi yai lä walalai ebä a̦ fuoma. Cama a ma cui, a wa̦ nocalayoma.

³⁰ “Awei”, a cuma. “Isaeli ebä madofibö jocaö cuaaö showao malä cujei. Bä lä doaö wejei bä shelelaö showawä nö sijei. Suwä moco bä ma cui, bä ca̦i jibäö shelelaö showaweje. Ai bä lija moli, ai bä lija bolacabö bä taamaöje. Didiodima liyäjäwä sibä doaö lä läono wejei, Sisala esibä li tablamaöje. Sibä dodijidawä lä diyäno wejei sibä ja, iba bolacabö ya sicöbä ca̦i jalebou mö feduobä sicöbä yaiaöje”, a li cama cuma.

³¹ Jeobaa wa tä. Cama bä mö lä watäblamono weinaja, inaja showawä cafä wa nofi lä wa̦libou wejei bä bluca cublobä. Wa lä nofimaö wejei, motoca a yobli yo̦loloblou lä culenaja, bä nö shi̦lo yai wa̦lojaö cuobä. ¿Ö̦jö tawä? Amowa tä a̦ lä taböno wei, einaja etä a̦ cuma. Ö̦jö däjä, Isaeli ebä ulufibö yanöcöwä showalanö, lasha 40 a famalemaje.