Jueces 3 - Biblia Yanowamö

Canaana tä ulufi jamö täbä shomi lä feibono wei tä a̦

¹ Canaana jamö ai bä shomi bälöjöwä yaiblamou lä showaono wei, Jeobaanö bä lä feibono wei fei bä li. Ö̦jö bä lija Isaeli ebä wabäobä bä feiboma. ¿Ö̦jö tawä? Canaana jamö Isaeli ebä ishou dao lä mlai, bä nia bluca wabäoma.

² Isaeli ebä wabäono lä mlai bä damaö fa bufinö, shomi bä lä bälöblaono wei, Jeobaanö bä daa majöquema.

³ Bä bälöjöwä yaiblamou lä daqueno wei, fei bä li. Filideo bada 5 bänö bä ca̦i lä cuono wejei, ö̦jö bä li. Canaanateli bä ca̦i bluca. Sidonoteli bä ca̦i. Libano cäcö jamö bä ebeo lä bälöono wei bä ca̦i. Ö̦jö bä lä cui, Baalemono cäcö jamö bä bälöblamou fa cuaanö, Amada yo lä bale jamö bä bälöo fe wädöoma.

⁴ ¿Ö̦jö tawä? Isaeli ebä wabamobä bä li cuoma. Cama bada ebä lija, Moisesinö Jeobaa a wa̦no jaba lä wäyäno wei tä a̦ ja, bä nia cadidou möma. Cama Jeobaa a ma cui, Isaeli ebä lija a wa̦ nia ca̦i fuamou möma.

⁵ Inaja tä fa cublalunö, shomi bä lä bälöono wei bä lija, Isaeli ebä bälöa co̦cablaliyoma. Canaanateli bä ma cui lija, idida bä ma cui lija, amoleo bä ma cui lija, feleseo bä ma cui lija, ebeo bä ma cui lija, jebuseo bä ma cui lija, ö̦jö bä lija Isaeli ebä bälöa fa coyocoblalunö,

⁶ ö̦jö bä sho, bä tääbö doayoma. Ö̦jö shomi bä lija bä tääbö fa jibäonö, bä tääbö doayou mö femöjoma. Ö̦jö bänö täbä lä bufiblano wejei täbä ma cui, etäbä a̦ ca̦i fuamaje.

Odonieli a nö bada lä wa̦lojano wei tä a̦

⁷ ¿Ö̦jö tawä? Jeobaa a bufiblabeje a ma cuono wei ma cui, a nofi mojodubou fa majöojenö, Baala a nö ijidubö bluca ja, bä nö bayeli nacaoma. Adadei a nö ca̦i ijidubö ja. Isaeli inaja ebä cuaalanö, Jeobaanö tä tamaö nofi lä wa̦libou wei tä tamaje.

⁸ Ö̦jö cudeenö, Isaeli ebä lija Jeobaa a jushudou fe fa balojolonö, Mesobodamia bada a lija bä noshi ö̦jödaboma, bä nö bleaamabä. Cusanisadai ö̦jö a wa̦fa bada cuoma. Ö̦jö a bada lija bä nosiemamou showao däjä, lasha 8 a famalemaje.

⁹ Ö̦jö ma cui, Jeobaa lija bä nofi nia ojode fa tablamonö, bä a̦ nacläama. Bä a̦ nacläaö däjä, Jeobaanö bä a̦ fa ji̦lilädunö, Isaeli ebä nia bayeliblaö lä läo wei, a läblaa co̦maquema. Senasa bä ijilubö Odonieli a bada läblamaquema. Calebi bä fääshä e cuoma. Ö̦jö Odonieli a fa läblamacönö, bä nö lä bleaamaö wejei bä lija, Isaeli ebä bayeliblaö lälayoma.

¹⁰ ¿Ö̦jö tawä? Ö̦jö lija Jeobaa a Bufi fa yanöcöblaicunö, Isaeli ebä luluboma. Odonielinö bä wayu ca̦i fa alunö, Jeobaanö a nö wa̦lojomaboma. Ö̦jö lija, Mesobodamia bada a lä cui a noshi ö̦jödaboma, Cusanisadai a wa̦fa lä cuono wei.

¹¹ Dodijidawä Odonielinö bä ca̦i fa cuonö, Isaeli ebä ulufibö yanöcöo majöoma. Lasha 40 a faö jaöo mlao däjä, tä ulufi yanöcöo showaoma. Ö̦jö däjä, Senasa bä ijilubö Odonieli e bufi mlaquema.

Aodo a nö bada lä wa̦lojano wei tä a̦

¹² Ö̦jö däjä, Isaeli ebä doblonomi co̦wä. Jeobaanö tä tamaö nofi lä wa̦libou wei tä tamaje yalo, Moabateli a bada lofotoblamalema, Eclono a bada lä cui. Ö̦jö lija, Isaeli ebä nabä shimöquema.

¹³ Eclono a lä cuinö, Amonoteli bä fa nacaalalönö, Amalecoteli bä ca̦i fa nacaalalönö, Isaeli ebä nabä ca̦i fumaje. Bä nö fa blemalalöjenö, tesibä bluca lä cublamono wei jamö, a shabono befi ca̦i däalalemaje.

¹⁴ ¿Ö̦jö tawä? Moabateli Eclono a bada lä cui lija, Isaeli ebä nosiemamou majöoma. Ö̦jö a lija bä nosiemamou showao däjä, lasha 18 a famalemaje.

¹⁵ Ö̦jö ma cui, Jeobaa lija bä nofi nia ojode fa tablamonö bä a̦ nacläaö co̦o däjä, bä a̦ ji̦lia co̦ledayoma. Isaeli ebä bayeliblaö läobä, Jela bä ijilubö Aodo e läblamaquema, boco lä acasiono wei. Ö̦jö Bejamino nodiwä e cuoma. Bei. Isaeli ebä lä cuinö, Moabateli Eclono a nia bada dobämaje. A dobäbeje, Aodo lija blada ebä jibäquemaje, bada a lija bä bäladayobä.

¹⁶ A fuu showao mlao däjä, Aodo a lä cuinö, sibala si namö mö lä fedudui si taa fa balölänö, a lä didio wei sicö u̦eshi jamö a besi ya̦bou ja̦tooma, jayu boco lä cui wacu ja.

¹⁷ Moabateli Eclono a bada lä cui lija a fa icuicunö, Isaeli ebä lä cuinö bä blada lä shimöleno wejei bä jibäquema. ¿Ö̦jö tawä? Ö̦jö Eclono a lä cui, a bada bleo dodijioma.

¹⁸ Bada a lija blada bä fa jibäcönö, bä ca̦i lä funo wei bä sho, bä co̦a balölayoma.

¹⁹ Ö̦jö ma cui, Jicala tä ajede jamö, maa mabänö bä nö ijidubö lä tamono wei mabä lä i̦tatale ja culanö, Aodo yami a mö yabaa co̦layoma. Bada a lija a waloa fa co̦icunö, abenaja a nowa tama. —Bada tä. Cafänö yami wa tä a̦ ji̦liabä, ya tä a̦ tabou lä cule —a cuma. Inaja Aodo a cuu ja, Eclono a wa̦ fuamobä bä lä ajedebono wei ebä lija a wa̦ fama. —Bei. Camiyä yami yafäcö a̦ nia wayou juo balöo. Wamicai bä bayäcäwä da cublaicudu —a fa cunö, bä sibolayoma.

²⁰ Ö̦jö däjä, yano a si lä ajiwä wei jamö, bada a yami loo däjä, Aodo a yai blacälayoyoluma. Abenaja e cuma. —Cafä lija Jeobaa ya wa̦no nia wäyäö—a cuma. A lä dicläono wei jamö culanö, bada a ubladou showadalayoma.

²¹ Ö̦jö däjä, Aodo acasi boco fa majöblalönö, jayu boco lä cui wacu ja, sibala si ya̦bou lä ja̦toono wei si fa ucälänö, bada bei busi diquibalema.

²² Bei si namo daloa fa showadaalunö, bei si fetocu ca̦i bada daloa showadaaliyoma. Si ucäaö co̦o mlai ja, bada a lä cui bei daböbönö si dalolayoma. Bei shibä falaliyoma.

²³ Ö̦jö däjä, shomi täca jamö Aodo a nia docuu fa ja̦toonö, bä lä fablaaö wei yoca fe laa fa balöcönö, yoca cofiböquema.

²⁴ Aodo a fuu waiquio däjä, bada a wa̦ fuamobä bä lä ajedebono wei bä nia faö fa co̦onö, bä lä fablaaö wei yoca jamö, bä waloa jäquema. Yoca lofote fa dalalöjenö, bä yanöcöa balöquema. “A shi fa ijeonö, tä si ajiobä yano jamö, a loa balöa fa cule”, a nofi tabomaje.

²⁵ Bä nö dao balöoma ma cui, ya̦cumö bä bufi yai wedinajamoma. Yano a si lä ajiwä wei jamö, bada anö yoca caloblaimi waiquiwä ja, madofi a fa dälöjenö, yoca caloblaö fe yadilayomaje. Ö̦jö däjä, cama bada e nomawä blaa dalalemaje.

²⁶ ¿Ö̦jö tawä? Cama bä nö yanöcöwä dadio däjä, Aodo a docua blajalayoma. Maa mabänö bä nö ijidubö lä tamono wei mabä lä i̦tatale mabä jayua fa co̦cufälönö, Seilada jamö a nofi yashulayodayoma.

²⁷ Ö̦jamö Aodo a fa co̦blalunö, Eflaini ebä ulufibö lä jefubö wei jamö, yalo yo̦lacö folamaö bufima, bä moyawämabä. Tä a̦ fa ji̦liläjenö, cama lija Isaeli ebä co̦cablou showadalayoyoluma. Tä ulufi lä jefubö wei jamö culanö, Aodo a lä cuinö bä ca̦i wayu dimöa showadabaliyofälöma.

²⁸ ¿Ö̦jö tawä? Abenaja bä nowa tama. —Camiyä lija bä da yauiquiyo. Cafä wamacö lija bä nö lä nabämou wei wama bä nö bleaamabä, Jeobaanö bä noshi ö̦jödabou waiquia lä cule —bä nowa tama. Ö̦jö cudeenö, cama lija bä yaua fa showalöfälönö, Jodana u jamö bä lä bucadublaaö wei tä ulufi lofotobou showadaomaje, Moaba ebä docuu bucaduo mlaobä. Inaja bä fa cuaanö, moli ma cui a bucaduamanomije.

²⁹ Ö̦jö lä däjä, Moaba jai 10,000 ebä shäalalemaje, bä ishou lä dano wei, bä nö wa̦lojabä bä lä cuono wei. Moli ma cui a documanomije.

³⁰ Inaja tä fa cublalunö, Isaeli ebä lä cuinö Moaba ebä nö bleaamaö ayaomaje. Ö̦jö däjä, tä ulufi nö wayuböo co̦o jaöonomi. Tä ulufi dodijidawä yanöcöbolajenö, lasha 80 a famalemaje.

Sacala a nö bada lä wa̦lojano wei tä a̦

³¹ Aodo a nojamö, Anada bä ijilubö Sacala e bada läo nomöjöoma. Ö̦jönö Isaeli ebä ca̦i bayeliblaö läoma. Ai däjä, baca bei nafitanocunö, filideo 600 bä shäa showadalalema.