Jueces 2 - Biblia Yanowamö

Boquimi jamö Jeobaa etä a̦jele lä wawälayono wei tä a̦

¹ Jicala jamö Jeobaa etä a̦jele culanö, Boquimi jamö a damoa majölaledayoma. Isaeli ebä lija abenaja a cuma. —Ejido jamö bämacö fa co̦länö, eja bämacö bälöa lämaqueyoluma. Wamacö nö badabö lija ya wa̦ nö wäo ja, ya tä a̦fa ulufi wäyäö lä balöono wei jamö showadawä. Ya bä nowa taö ja, abenaja ya e cuma. “Ei ya wa̦ nö lä wäole, obi ma cui, ya wa̦ nia shomiblou majöomi”, ya e cuma.

² Abenaja ca̦i. “Ö̦jamö bä lä bälöblai bä sho, wamacö nofi nia tamayoimi”, ya e cuma. “Ö̦jö bä lija wamacö a̦ nö wäobä bämi. Cama etäbä lija, bä yalo lä dodoblamou wei bä maqueblamobä täbä lä cui, wama etäbä nia wa̦liaö showadao”, bämacö nowa tama ma cui, yamale a̦ ji̦liblanomi. ¿Wedi wama tä li taö dicooma?

³ ’Ö̦jö cudeenö, fei däjä abenaja ya cuu majöo —a cuma—. Wamacö nia lä fuu wei jamö camiyänö ya bä nia yashuu baläläomi. Wamacö yabäcabeje ö̦jö bä nia yai cuo. Täbä lä bufiblaö wejei täbä lija wamacö fa yabäcäonö wamacö nia dobloimi —Jeobaa etä a̦jele cuma.

⁴ Jeobaa etä a̦jele lä cuinö, Isaeli ebä bluca lija ö̦jö tä a̦ wäyäö ja, bä ö̦cöö ja bä a̦ nacläama.

⁵ Bä ö̦cöblaama cudeenö, Boquimi tä ulufi a̦fa jilaquemaje. Jeobaa lija ö̦jamö yalo bä dodobomaje.

Josué a bufi lä mlaqueno wei tä a̦

⁶ Josuénö bä shimöa fa co̦lufälönö, tä ulufi nia lofotobou mö lä feduo wejei jamö, bä bluca sheleleo co̦omobodayoma.

⁷ Josué a demi cuo showao däjä, Isaeli ebä lä cuinö, dodijidawä Jeobaa a wa̦ showadi fuamaje. Bada bä bälöo lä juono wei bä demi cuo juo showao däjä, inaja showawä. ¿Ö̦jö tawä? Jeobaanö Isaeli ebä bayeliblaö fe lä balojoono wei tä lä dano wejei bä lä cui, ö̦jö bä cuo juo däjä, bä dodijaö juo showaoma.

⁸ Lasha 110 a fa famalönö, Nuni bä ijilubö Josué e bufi mlaquema, Jeobaa a wa̦ fuamobä e lä cuono wei.

⁹ Cama ebä ca̦i bälöobä tä ulufi däa lä läleno wei jamö, a nomawä didiquemaje, Dinasela jamö. Tä ulufi lä jefubö wei jamö, Eflaini ebä lä bälöblai jamö tä ulufi blaa, Caasa cäcö lu̦locu jamö, motoca a faö lä mlai cäcö mashi jamö.

¹⁰ Ai bä bälöblamou mö lä feduono wei bä ma cui, bä bluca yanöcö nomaa mö fedulaliyoma, cama bä nö badabö lä culaliyono weinaja showawä. Ö̦jö däjä, cama bä ijilubö ebä balaa fa majölönö, bä läo nomöjöoma. Ö̦jö bä lä cuinö Jeobaa a danomije. Isaeli ebä lä bayelibono wei tä ca̦i danomije.

Baala a nö ijidubö lä cublai ja Isaeli bä nö bayeli lä nacaono wei tä a̦

¹¹ Isaeli ebä lä cuinö, Jeobaanö tä tamaö nofi lä wa̦libou wei tä taö dicoomaje. Baala a lä cui lija bä bufi shedecou fa dicoonö, ö̦jö a nö ijidubö bluca ja, bä nö bayeli nacaoma.

¹² Cama bä nö badabö lija Jeobaa a lä bufiblamono wei a lä cui, a daquemaje, Ejido jamö bä lä co̦leno wei a lä cui. Ö̦jö a fa dacöjenö, bä shomi lä bälöblai bänö bä lä bufiblano wejei bä lija, bä bufi shedecou dicooma. Ö̦jö bä nö ijidubö cotä jamö bä möfe booma. Inaja bä cuaalanö, Jeobaa a jushuo lulubomaje.

¹³ Jeobaa a fa dacöjenö, Baala a ma cui, Adadei a ma cui, ö̦jö cäcöbä nö ijidubö lä cublai ja, bä nö bayeli nacaoma.

¹⁴ Ö̦jö cudeenö, Jeobaa a jushudou fe balojolayoma. Shomi bä madofibö lämaö lä cuaano wejei bä lija bä noshi fa ö̦jödabonö, Isaeli ebä lä cui, etäbä bluca läalalemaje. Bä nö lä nabämou wei bä bälöa fe lä fa̦yoblai bä lija ma cui, bä noshi ca̦i ö̦jödaboma. Ö̦jö däjä, bä nö wa̦lojaö mlai ja, bä nö shi̦lo bleaaö dicooma.

¹⁵ Bä wayu fuu lä bädao wei jamö ma cui, Jeobaa a fa läonö bä doblamanomi. Bä wasöö ja, a lä cuno weinaja showawä. Bä nö bleaaö fe balojooma.

¹⁶ Ö̦jö däjä, Isaeli ebä lulubobeje, Jeobaanö bada ebä lämabou nodiablaloma. Ö̦jö bä bada lä cuinö, bä madofibö doaö lä lämono wejei bä nabä ca̦i fa fujenö, Isaeli ebä bayeliblaö läomaje.

¹⁷ Ö̦jö ma cui, bä lä lulubono wejei ebä a̦ bada jiliblanomije. Ai täbä lä bufiblano wejei täbä lija, bä bufi waiyou fa dicoonö, ö̦jö täbä nö ijidubö cotä jamö, bä möfe boblaadima. Cama bä nö badabö lä cuinö, Jeobaa a wa̦ ji̦liaö lä cuaano wejeinaja bä cuaanomi. Ö̦jö bä owämanomije. Ö̦jö bä lä cuaano wei tä ja bä cadidou mlai ja, bä shominajaama.

¹⁸ ¿Ö̦jö tawä? Isaeli ebä lulubobeje, Jeobaanö showadi ebä bada läa nodiablalamama. A bada lä lämabono wei a ca̦i fa cuonö, ö̦jö a bada demi cuo showao däjä, bä nö lä nabämou wei bä lija, showadi bä nowamama. Bä nö lä nabämou wei bänö, bä doblamaö fa mlacujenö, bä nö malä bleaano wei. Ö̦jö ma cui, Jeobaanö bä a̦ la̦wä ji̦liama yalo, bä nofi showadi ojodadaö co̦layoma.

¹⁹ Ö̦jö ma cui, bä lulubobeje ebä bada lä läono wei bä bufi fa mlaolalunö, wa̦lidiwä tä jamö, Isaeli ebä bufi mö showadi yabajaö co̦oma. Cama bada ebä doblonomi ma waiquii ma cui, bä lä nodiblono wei bä showadi yai balaa jäa nodilayoma. Shomi täbä lä bufiblaö wejei täbä ja, bä bufi fa shedequeblalunö, ö̦jö tä a̦ shi̦lo yai fua nomöjölemaje. Ö̦jö bä nö ijidubö cotä ja bä möfe boblaadima. Bä showadi lä cuaano wei tä ja, bä bufi shijilodonomi. Bä bufi lofotoblalou fe yadio dicooma.

²⁰ Ö̦jö cudeenö, Isaeli ebä lija Jeobaa bei a jushudou fe balojolayoma. Abenaja a cuma. —Ei bä nö badabö lija ya wa̦ nö wäoma. Ya bä nowa lä tano wei, ö̦jö bä lija ya tä nabä shimaö cadidioma ma cui, wale a̦ ji̦liblaimi dicoweje ja,

²¹ shomi bä bälöjöwä lä yaiblai, ya bä nia yashuu baläläo co̦daaimi. Josué a demi showao däjä bä yashublaö lä mlaono wejei, ya bä nia daaö,

²² Isaeli ya ebä bejedimou wababä. Cama bä nö badabö lä cuinö, Jeobaa wale a̦ ji̦liaö lä cuaano wejeinaja, wale a̦ nia yai ji̦liaö juoje ja, ya tä nia möö. Bä mojiaö si lä ijejei, ö̦jö ya tä nia ca̦i möö —a cuma.

²³ ¿Ö̦jö tawä? Ö̦jö bä shomi bälöjöwä lä yaiblai bä daquema. Josué lija bä noshi jaba ö̦jödabono lä mlai, bä feiblamalema.