Jueces 16 - Biblia Yanowamö

Casa jamö Sasono a lofote lä dablamono wei tä a̦

¹ Casa jamö Sasono a aa fa majölönö, ö̦jamö lä ai suwä a daa co̦lalema. Showadi a lä dodoo wei a suwä cuoma. Ö̦jö lijamö a fa lucälönö, cäcöbä yacaoma.

² Casateli bä bluca yömölayoa showadaaliyoma. —Quiji yano jamö Sasono a cua lä cule —bä nowa fa tayolunö, a shabono fe bada fa̦yoblalemaje. A nö dabolajenö, ala nacö jamö yoca lä joleono wei jamö, bä lämou fe jaluma. ¿Ö̦jö tawä? Didi däjä bä a̦ fanomi. Abenaja bä nowa shi̦lo tayolayoma. —Bämacö nö dao da balöo. Bä tä mö jaluimaö däjä, ö̦jö däjä bäma a nabä yai queobä —bä nowa tayolayoma.

³ Ö̦jö ma cui, Sasono a yanöcöblaa fa balöicunö, a bäshäcuoladi jocälayoma. Yoca laa fa dalalönö, yoca fuwäa showadaalema. Teficö lä i̦tao wei teficö ma cui, tefi maquea lä blilile tefi ma cui, ö̦jö tä befi ca̦i bluca ucäa fa showadalönö, teficö befi ca̦i maolefälöma. Eblono tä mashi jamö tä balöcö ösöwä lä ublale jamö, ö̦jamö teficö befi ca̦i fa dolequebofälönö, teficö befi ca̦i bälaquedayoma.

Dalilanö Sasono a lä joleblano wei tä a̦

⁴ Ö̦jö tä cublou fa waiquilonö, Soleco tä lä yalöbe jamö a suwä lä bälöono wei a suwä lija, a bufi cua majöquema. A wa̦fa Dalila cuoma.

⁵ Ö̦jö a suwä lija filideo bada bä fa icuicunö, abenaja a nowa suwä tamaje. —Wafäcö lä nofimayole a lä cui, ¿wedi tä dodijiwänö a li lofote? ¿Wedinaja bämacö yai fa cuaanö, bäma a yai li fuwäabä? A lä lofote wei tä a̦ wäa fe da yadimacö, bäma a fa o̦cablalönö bäma a yanöcöwä tamabou fe yadiobä. Wa wa̦ nö wämaquema ja, bluca yamacö lä culenaja yamacö cuwänö, afä blada 1.100 yama bä nia jibädayoluu —a nowa suwä tamaje.

⁶ Ö̦jö däjä, a wa̦ doblalanö, abenaja Sasono lija Dalila a cuma. —¿Wedi tä dodijiwänö bei wa li lofote? Wale da yömöla, ¿ö̦jö tawä? ¿Wedi tänö wa yai fa o̦cablamolunö, bei wa nia yanöcömabou cuqueije? —a cuma.

⁷ Abenaja Sasono e cuma. —Fa̦do 7 nafitabä juducano dudenö, wale o̦cablaö fa cunoje ja, ya nö shi̦lo yai ujudulayobö wei. Ö̦jö däjä, ai bä wa̦lo lä culenaja, ya nö cublou mö fedulayobö wei —a cuma.

⁸ Inaja a fa cunö, Dalila lija fa̦do 7 nafitabä juducano dude ca̦i fumaje, filideo bada bänö. Ö̦jö nafitabänö, Dalilanö a o̦cablalema.

⁹ ¿Ö̦jö tawä? Cama e yano u̦eshi jamö, filideo ai bä läa ajedea ja̦tomaquema. Inaja a fa tablalönö, Sasono lija a wa̦ shi jaliwä fama. —¡Sasono! ¡Filideo bänö wa nabä fuu lä cuimajei! —e cuma. Ö̦jö ma cui, cowa wacänö mai cocobä äbäjäwä lä cublou weinaja, nafitabö nofi fa tadalönö, nafitabä blöcömodaliyoma. Inaja a fa cuaanö, a yai lä lofoteono wei tä danomi showaweje.

¹⁰ Sasono lija Dalila abenaja a cuu nomöjöoma. —Uo. Wale nö waiblaö bädaa lä cule. Wale joleblalema. Wale yömölaö da cadidio, ¿ö̦jö tawä? ¿Wedinaja bä yai fa cuaanö, wa nia o̦cabouje? —a cuma.

¹¹ Dalila lija abenaja a cuu nomöjöoma. —Tocuta dude cäcönö, wale o̦caö fa cunoje ja, cäcö o̦cabou balöono lä mlajei cäcönö, ö̦jö däjä ya nö shi̦lo yai ujudi cuobö wei. Ai bä wa̦lo lä culenaja, ya nö cublou mö fedulayobö wei —e cuma.

¹² Inaja a cuu ja, tocuta dude cäcö fa dälänö, Dalilanö a o̦cablaö co̦oma. Ö̦jö däjä, Sasono lija a wa̦ shi jaliwä faö co̦oma. —¡Sasono! ¡Filideo bänö wa nabä fuu co̦a lä cuimajei! ¿Ö̦jö tawä? Cama e yano ue̦shi jamö, filideo ai bä läa ajedea ja̦toa co̦maquema. Inaja Dalila a ma cuno wei ma cui, cowa wacänö mai cocobä äbäjäwä lä cublou weinaja, ecö nofi fa tadalönö, tocuta ecö ma cui, ecö blöcömodou co̦layoma. Bocucu shi̦locoblou co̦layoma.

¹³ Sasono lija Dalila abenaja a cuu nomöjöoma. —Uo. Wale nö waiblaö co̦o a lä cufe. Wale joleblaö co̦o dicooma. Fei däjä wa nia yai lä o̦cabou wejei, tä a̦ wäa da cadidiba —a cuma. Abenaja Sasono a cuma. —Ei 7 ya fe̦ta ucu lä o̦cale, sibä lä diyäö wejei jamö, ö̦jamö lä wale fe̦ta ucu befi ca̦i diyäblaöje ja, fii fi jamö wale fe̦ta ucu befi ca̦i ya̦icoloaö showadaoje ja, ö̦jö däjä ya nia shi̦lo yai ujudulayou. Ai bä wa̦lo lä culenaja, ya nia shi̦lo cublaliyo —a cuma.

¹⁴ Ö̦jö cudeenö, Sasono a mio däjä, sibä lä diyäö wejei jamö, cama 7 fe̦ta ucu lä o̦cale fe̦ta ucu befi ca̦i fa diyäacönö, fii fi jamö fe̦ta ucu befi ca̦i yai̦coloaö fa showadaacönö, ö̦jö däjä a wa̦ shi jaliwä faö co̦oma. —¡Sasono! ¡Filideo bänö wa nabä fuu co̦a lä cuimajei! Ö̦jö ma cui, Sasono a fa la̦lönö, a fe fa jocäimadunö, fe̦ta ucu befi ca̦i lä diyäaqueno wei teficö befi ca̦i ucäofälöma. ¿Ö̦jö tawä? Fii fi jamö fe̦ta ucu befi ca̦i lä ya̦icoloono wei teficö befi ca̦i ucäa showadaalema.

¹⁵ Ö̦jö däjä, abenaja Dalila e cuu co̦oma. —¡Uo! “Bä nofimaö”, wa ma cuu wei ma cui, camiyä lija wa bufi cuo malä mlai. Fei däjä 3 wale nö waiblaö co̦a lä cufe. Afä tä yai lä lofote wei, wa tä bejedi wawämaö mlao lä cufe —e cuma.

¹⁶ Showadi inaja a cudii ja, a wa̦ fe blacäjou ja, ya̦cumö Sasono a bufi wa̦lidia cadidilayoma. “Uo. Ya nomaö buo”, a bufi cudaliyoma.

¹⁷ Ö̦jö däjä, etä bejedi yai wawämalema. Abenaja e cuma. —Nayänö wale didibou däjä, Yai Bada lija ya oshe yaio showadaoma cudeenö, moli ma cui ya möcö bäamoimi showaa lä cule. ¿Ö̦jö tawä? Ya möcö bäblamou ja, iba tä nia lofote mladou. Ya nia ujudulayou. Ai bä wa̦lo lä culenaja, ya nia cublou majöo —e cuma.

¹⁸ Sasononö etä bejedi yai lä wawämaleno wei tä fa dalalönö, Dalilanö filideo bada bä nacamaö bufima. —Fei däjä bä waloo showadaobä —a cuma—. Fei däjä etä yai bejedi wawämaö lä cufe —a cuma. Ö̦jö däjä, filideo bada bänö, Dalila a lija bä ca̦i blada waloa showadaqueyolumaje.

¹⁹ Bei. Dalila wacucu jamö Sasono a fe maquemabolanö, a mimaboma. Ö̦jö däjä, filideo ai a nacaa fa ja̦tolänö, Sasono 7 fe̦ta ucu lä o̦caono wei fe̦ta ucu janöblamaö bufima. Ö̦jö däjä, etä lofote mladou fa majölonö, a nö bleaamama.

²⁰ Abenaja e shi jaliwä cuu co̦oma. —¡Sasono! ¡Filideo bänö wa nabä fuu co̦a lä cuimajei! —a cuu co̦oma. A fa jocädalunö, abenaja a bufi mojodili cuma. “Showadi ya fucäblou si ijejewä lä culenaja, ya nia fucäblou cuo co̦o”, a bufi cuma. Jeobaanö a lä daqueno wei tä danomi.

²¹ Ö̦jö däjä, filideo bänö a fuwäa fa showadalöjenö, bei mamocu ucälemaje. Ö̦jö däjä, Casa jamö a ca̦i co̦a showadalayofälömaje. Ö̦jamö lä, duo shibä bada fudenö, a o̦cablalemaje. Wa̦lidiwä talewä bä fe lä labou wejei jamö, a ojodamomamaje, nii bä washishamabä.

²² Ö̦jö ma cui, ö̦jö däjä fe̦ta ucu joyamoa fa waicölönö, fe̦ta ucu badaö co̦fälöma.

Sasono a lä nomalayono wei tä a̦

²³ Bei. A lä bufiblaö wejei lija, filideo bada bä bufi doblaloma, Dacono a wa̦fa fecula lä cule lija. Ö̦jö lija yalo bluca bä nia fa dodobojenö, bä co̦camoma, bä bufi doblalou ca̦i fuablalobä. Abenaja bä shi̦lo cuma. —Bäma a lä bufiblaö wei a lä cuinö, camiyä bämacö lija Sasono a noshi ö̦jödaboma, a nö showadi lä näbämou wei —bä shi̦lo cuma.

²⁴ ¿Ö̦jö tawä? Sasono a dablaöje däjä, Dacono a nofi doblaamaje, a lä bufiblano wejei a lä cui. Bä bufi doblaloma yalo, abenaja bä cuma. —Bäma a lä bufiblaö wei a lä cuinö, a nö lä nabämou wei a noshi ö̦jödaboma, bämacö ulufibö da wa̦liablei a lä cui, bämalecö bluca da shäblei —bä cuma.

²⁵ Bä bufi bluca yai lä doblalono wei däjä, a noca flecabeje a nacamaje. —¡Sasono a da wawäblamaliyoje! ¡Yama a möbä!—bä cuma. Inaja bä cuu ja, bä fe lä labou wejei jamö a nacamaö bufimaje. A nö lä dabono wejei jamö a ca̦i fa waloicujenö, ¡bejedi lä a nö waiblamaje! Je̦fa cäcöbä bada i̦tabou lä ajedeono wejei jamö, a ublaa möamomabalemaje.

²⁶ A lä öböbono wei a fiyä lija abenaja Sasono a cuma. —¿Wedi jamö je̦fa bei cäcö i̦tataa cule? Ö̦jamö lä, wale imicö da waliamacö, ö̦jö cäcö ja ya lacöobä —a cuma.

²⁷ ¿Ö̦jö tawä? Ö̦jö a yafi lä cui, filideo wa̦lo bä ma cuinö, suwä bä ma cuinö, a yafi nö bada mlaoma. Filideo bä lija bä bada lä läono wei, bä bada jödödöwä cuoma. Ösö jamö, a yafi lä feyacaono wei jamö, ai bä bluca 3.000 cuo feyacao mö feduoma. Sasono a nö waiblaöje däjä, ösö jamö bä lä cui bä mö wädädoma.

²⁸ Inaja bä cuo däjä, Jeobaa lija Sasono a nö bayeli nacaoma. Abenaja a cuma. —Jeobaa wa Bada lä ayai. Wale nofi da jaducäle, ¿ö̦jö tawä? Fei däjä moli wale lofoteblamaö co̦a da balöliyo. ¿Ö̦jö tawä? Wa lä bufiblamou wei wa. Ö̦jö däjä, wale mamocu da wa̦liablejei ya nö bäshölö nia tamou —a cuma.

²⁹ Inaja a fa cunö, je̦fa cäcö ja imicö walioquema, a yafi bada baijio lä jifuono wei cäcö ja. Ai a ja, acasi boco lä cui imicö walioma. Ai a mö feduwä ja, jayu boco lä cui imicö walia mö feduquema. Inaja imico fa cuoicunö, a ca̦lelou wabäoma.

³⁰ Ö̦jö däjä, a wa̦ falayoma. —Filideo bä sho, ¡bämacö bluca nomaö showadaobä! —a fa cunö, i̦cali a ca̦leledou showalayoma. A fa ca̦leledalunö, a yafi bada quemalema. Ö̦jö yafi jamö bä bada lä cuono wei bä ma cui lija, ai bä bluca lä cuono wei bä ma cui lija, a yafi bada fa quelunö bä bluca shäbalema. ¿Ö̦jö tawä? Sasono a demöo däjä, filideo bluca bä ma shäabodayono wei ma cui, cama a ca̦i lä shämolayono wei däjä, ö̦jö däjä bä lä shämono wei bä shi̦lo yai blucao fe balojoo dodijioma.

³¹ Tä a̦ fa ji̦liläjenö, cama mashi bä ma cuinö, cama ai ebä mö feduwä ma cuinö, a co̦abeje bä bluca alayoma. A fa co̦löfälöjenö, Sola jamö, Edaoloteli bä lä bälöle tä möamo jamö, a nomawä didiquemaje. Bä fö̦ö Manoa e lä didiqueno wejei jamö showawä. ¿Ö̦jö tawä? Inaja tä cuoma. Sasononö Isaeli ebä lulubou showalanö, lasha 20 a famalema.