Jueces 15 - Biblia Yanowamö

¹ Tä nö fa dedejedalunö, bei bä ficalibö ca jamö, nii esibä badalayoma. Sibä janöbeje sibä cublou waiquio däjä, bä suwäbö e lija Sasononö shibo a oshe ca̦i alayofälöma. A waloo däjä, abenaja a cuma. —Iba suwä a lä cule jamö ya nia falayou —a cuma. Ö̦jö ma cui, bä shö̦ö e a̦ läoma.

² Abenaja a cuma, Sasono lija. —“A nofi wa̦libou waiquiwä”, ya bufi cuma cudeenö, limöfä lija ya jibäquema. Ö̦jö ma cui, oshe a lä cui, a shi̦lo yai liyäjäwä. Ö̦jö a shi̦lo yai da däliyo, ¿ö̦jö tawä? —a cuma.

³ Abenaja Sasononö bä nowa tama. —Ja̦o. ¡Fei däjä yai! Filideo bämacö nö bleaamaö däjä, “¿Wedi bei tä nö bäshölö li taö cule?”, wamacö nia cuimi —a cuma.

⁴ Ö̦jö cudeenö, Sasono a jushuo ca̦i aa fa showadalunö, jai yalushe bä cuwä 300 bä yalo fa fuwäalalönö, bei bä shina jamö bä o̦caa bolacadama. Cowa wacä ömöobä, ö̦jamö lä täbä befi ca̦i o̦cadaö showaoma.

⁵ ¿Ö̦jö tawä? Filideo bä ficalibö ca jamö bä yalo o̦cama taabodayoma, nii si diano lä cuono wei jamö. Ai a nii befi ca̦i bäa lä waiquilaleno wejei, a befi ca̦i yododooma. Ai a nii cublamou showaoma. Ö̦jö däjä, yalo bä shina jamö fii fibä lä o̦caabodayono wei, fibä wacä ömöamaquema. Tefi wacä ömöo däjä, bä yalo fujeblalema. Ö̦jö wacä befi ca̦i lä läläblalou wejei wacänö, filideo bä niibö ö̦shöblou cuaama. Nii sibä ma cui, oliba fibä bluca ca̦i lä ublamabono wejei fibä ma cui, fibä bluca ö̦shölaliyoma.

⁶ Inaja tä cublou ja, filideo bä a̦ fama. —¿Wedinö ö̦jö tä wacä li ömömaquei cufe? —bä cuma. —Wedinö mlai —ai bä cuma—. Sasono a cuoma. Dinadateli bä fecamabö e lä cui. Cama nofi e lija bä suwäbö e jibäa jäquemaje cudeenö, ö̦jö a nö bäshälö taö lä cule —bä cuma. Ö̦jö cudeenö, Dinada jamö filideo bä dolequea fa showadabofälönö, cowa wacä ja Sasono bä shö̦ö e ma cui, bä suwäbö e ma cui, cäcöbä yaa showadabemaje.

⁷ Abenaja Sasononö bä nowa taö showaoma. —Bei. Cafä wamacö lija ya wa̦ nö wäo lä cule. Inaja wamacö cuaaö dicooma ja, cafä wamacö lija ya nö nia yuo dodijio. Ya nö yuo jödödölayou ja, ö̦jö däjä ya nia shi̦lo yanöcöblou —bä nowa tama.

⁸ Bä nabä quea fa showadaicunö, bä bluca wa̦liabodayoma. Bluca bä shäa fa showadabodunö, Etamö macö ca lä wacocoono wei jamö a fa cubofälönö, ö̦jamö lä a didialejelayoma.

Sasononö bä bluca lä shäalaleno wei tä a̦

⁹ Ö̦jö däjä, Isaeli ebä ulufibö jamö, filideo bä nabä blacälayoma. Judawä ebä ulufibö jamö bä nabä fa bälöblaicönö, Leiteli bä nabä quequemaje.

¹⁰ Abenaja Judawä ebä cuma. —¿Wedi tä nowa ja, wamalecö nabä li blacälayou cufe? —bä cuma. —Wedi tä nowa ja mlai, Sasono a nowa ja —bä cuma—. Camiyä yamalecö nö lä bleaamano weinaja, yama a fa o̦cablalönö, inaja yama a nia taamaö nomöjöo —bä cuma.

¹¹ Ö̦jö däjä, Judawä 3.000 ai ebä mö feduwänö, Sasono a co̦aö mö fumaje. Etamö macö jamö bä fa alufälönö, Sasono a lä cuono wei macö ca lä wacocoono wei jamö, bä waloquema. Abenaja a nowa tamaje. —Camiyä bämacö lija filideo bä bada lä läo wei, ¿wa tä daimi tawä? “Iba ya bä nofi bluca nacaa dicolu”, ¿bei wa bufi cunomi? —a nowa tamaje. Abenaja Sasono a cuma. —Camiyä wale nö lä bleaamano wejeinaja, inaja showawä camiyänö ya bä nö bleaamaö mö feduo showaoma —a cuma.

¹² —Bei —bä cuu nomöjöoma—. Filideo bä lija bä jibäabä, bä o̦cablaö mö fuu lä cufe —bä cuma. —Cafä wamacö showawänö wamale nabä nia queo lä mlai, tä a̦fa wäa da balöbaje —Sasono a cuma.

¹³ —Bä shäö mlaicätä —bä cuu showadaoma—. Bä nia shi̦lo o̦cablaö, cama bä lija o̦cama bä jibäabä —bä cuma. Ö̦jö cudeenö, tocuta bolacabö cäcöbä dudenö a fa o̦cablalöjenö, maa macö ca lä wacocoono wei jamö a öböa co̦lemaje.

¹⁴ Lei jamö Sasono a ca̦i lä waloqueno wejei däjä, filideo bä a̦ shi dolayoma. Bä a̦ shi dolanö a nabä läläaö mö baaimamaje. Ö̦jö däjä, Jeobaa a Bufinö Sasono a nö fa wa̦loblamalönö, a lä o̦caono wei, lobe tocuta cäcö jädömalema. Tocuta cäcönö bei bococu, bei imicö ma o̦caono wei ma cui, mai cocobä äbäjäwä lä cublou weinaja cäcö nofi fa tadalönö, si ijejewä, lobe a fujeblamolayoma.

¹⁵ Ö̦jamö lä, bulo bei nafitanocu blaa fa dalalönö, bei nacö befi ca̦i jocäa showadalema. Ö̦jö nafitanocu dudenö, filideo 1.000 bä shäa showadaalema.

¹⁶ A wa̦ faö showadaoma. —Bulo bei nafitanocunö ya bä nomawä yododomaquei lä cufe. Ö̦jö lä tänö filideo 1.000 ya bä shälema —a cuma.

¹⁷ A wa̦ waicou däjä, yalo bei nafitanocu joyalema. Nafitanocu lä joyaleno wei jamö, Lamalei tä a̦fa ulufi jilaquemaje.

¹⁸ Ö̦jö däjä, Sasono a amishaa fe fa balojolönö, Jeobaa lija a nö bayeli nacaoma. Abenaja e cuma. —Wale nö wa̦loblamaö fe balojolayoma cudeenö, camiyä lija wa bä noshi bluca ö̦jödabou ma waiquiono wei ma cui, ¿amishi tänö bei wale nia nomamaö majöa cule? Wa daö lä mlalajei bä lija, ¿bei wale nabä li shimaö nomöjöblaa cule? —a cuma.

¹⁹ Ö̦jö däjä, Lei jamö uca lä cule uca yacläblamalema, Yai Bada tänö. Täca fa yacläblalunö, mau u bläshäblaliyoma. Ö̦jö mau ubä ja Sasono a amishi fa co̦onö, a bufi jaducäblou co̦layoma. Inaja a cuaama yalo, ö̦jö uca lä cui, Enacole uca a̦fa jilaquemaje. Lei jamö uca cua showaa.

²⁰ ¿Ö̦jö tawä? Filideo bä bada läo showao däjä, lasha 20 a famaö showaoje däjä, Sasononö Isaeli ebä lulubou cuaaö showaoma.