Jueces 14 - Biblia Yanowamö

Sasononö suwä a lä däleno wei tä a̦

¹ Dinada jamö Sasono a fa dimöbalöfälönö, filideo suwä a moco dalalema.

² Ö̦jö däjä, bä fö̦ö e lijamö, bä nöö e lijamö a dolequea fa co̦bofälönö, cäcöbä yömölaö co̦joloma. —Dinada jamö filideo ya suwä moco dalalema. Iba ya däabä cäcöbä a̦ da facölö —a cuma.

³ Inaja a cuma ma cui, abenaja bä fö̦ö, bä nöö sho ecöbä cuma. —Uo. Camiyäteli bämacö lija wa suwä däabä, ¿a cuami daanö? ¿Isaeli bäma ecö bluca lä bälöblai jamö a cuami daanö, Jeobaa a daö lä mlajei bä filideo lä cui lija wa suwä däaö dicoblaobä? —cäcöbä cuma. Ö̦jö ma cui, abenaja Sasononö bä fö̦ö e nowa tama. —Ma. Ö̦jönö wale bufi shi̦lo yai doblamabou waiquia lä cule. Iba wafä a wa̦fa nia bou —e nowa tama.

⁴ ¿Ö̦jö tawä? Jeobaanö filideo bä nia jushuo luluboma yalo, inaja Sasono a taamama ma cui, “Jeobaanö tä taamaö da culanö”, bä fö̦ö e bufi cunomi. Etä danomi. Bä nöö e ma cui, inaja showawä. ¿Ö̦jö tawä? Filideo bä nö bleaamaö bufio waiquia yalo, bä nia jushuo luluboma. Isaeli ebä lija filideo bä bada nosiemoma, ö̦jö däjä.

⁵ Ö̦jö däjä, Sasononö Dinada jamö bä fö̦ö, bä nöö ecöbä ca̦i dimöbaliyofälöma. Dinadateli bä ficalibö ca ja a waloquema, uba too tobä lä cule jamö. Ö̦jamö lä, Sasono a nabä nia queo mö fa baonö, öla a wa̦ nö bada quiliama.

⁶ Yedu, Jeobaa a Bufinö Sasono a fa lofoteblamalönö, öla a nabä quea showadaquema. Bei imicönö a fa fuwälönö, a cacablalema, shibo oshe bä wai cacablamou si lä ijejeinaja. Ö̦jö ma cui, a lä cuaano wei tä ja, bä fö̦ö, bä nöö ecöbä yömölanomi.

⁷ Ö̦jö däjä, a dimöa fa co̦balufälönö, filideo suwä a wa̦ moco wayomama. A bufi doblamabou fe balojooma.

⁸ ¿Ö̦jö tawä? A fe fa weyablalunö, cama suwä e däaö cadidio showadaobä, a aa co̦layofälöma. A lä funo wei jamö, öla a lä shäleno wei a blaa möbä, a baquema. Tä fa mödalönö, buu nabä bluca shulilou dalalema, öla a u̦eshi jamö. Buu ubä ca̦i tablaö waiquiomaje.

⁹ Ö̦jö däjä, öla fishomi jode jamö, buu ubä jo̦lelama. Ubä lä jo̦lelano wei ubä wafälöma. Bä fö̦ö, bä nöö cäcöbä nosi fa fulilänö, buu ubä ja, cäcöbä ca̦i dobälalema. Cama cäcöbä ma cui, cäcöbä fufälölanö, cäcöbä ca̦i iyaö cuaafälöma. Ö̦jö ma cui, öla fishomi ja ubä lä däleno wei ubä ja, cäcöbö mojodumaboma.

¹⁰ Bei. Sasononö a suwä däaö lä bufiono wei däjä, ö̦jamö lä bä fö̦ö e dimöa co̦baliyofälöma. Ö̦jö däjä, bä iyaö ca̦i bluca co̦cablobä, Sasononö bä bluca nacaalalema.Inaja showadi bä fiya cuablaadima.

¹¹ Filideo bänö Sasono a dablaöje däjä, cama lija bä cuobä, fiya 30 ebä shimölemaje.

¹² Ö̦jö bä lija abenaja Sasono a cuma. —Bämacö bufi jaducäwä möbä, bämacö nia wabaö, ¿ö̦jö tawä? Ya tä a̦ nia wayoaö lä yacläo wei wama tä a̦ wawämaö cadidou ja, wamacö didiobä ya sibä nia jibäaö. ¿Ö̦jö tawä? Bämacö iyaö ca̦i lä co̦cablole, 7 bämacö fe nia didi cublou. Bämacö iyaö waicou mlao showao däjä, wama tä a̦ wawämaö cadidou ja, bämacö nia dobäö. Wama sibä jalebobä, shuducaje au sibä yai lä dodijidai ya sibä nia jibäö. Wamacö yododabä jamö dodijidawä sibä ja wamacö didiobä, ya sibä nia ca̦i yädädamaö cuaaö.

¹³ ’Ö̦jö ma cui, wama tä a̦ wawämaö cadidoimi ja, camiyä wamale nia shi̦lo dobäö ayao —a cuma—. Ya sibä jalebobä, camiyä lija dodijidawä, shuducaje 30 wama sibä nia jibäaö. Yamacö yododabä jamö dodijidawä sicö ja ya didiobä, 30 wama sibä nia ca̦i yädämaö. ¿Ö̦jö tawä? —a cuma. Abenaja bä cuma. —Wa lä cufenaja, inaja lä waiquiwä. Yamalecö wababä lä. Wa tä a̦ nia wayoaö lä yacläo wei tä a̦ da jayuma. Yama tä a̦ ji̦liabä —bä cuma.

¹⁴ Ö̦jö däjä, öla a fishomi jamö buu ubä lä jo̦lelano wei tä a̦fa wayoaö ja, abenaja Sasono a cuu ja̦looma. —Bei. Ei tä a̦ ja, bä bufi da daeo. Täbä lä waö wei lija, wamodima bei a dämolayoma. A yai lä lofote wei lija, tä lä clededii bei tä dämolayoma —a cuma. Einaja a cuma. ¿Ö̦jö tawä? Bä bufi nia fa wedinajamomanö, etä a̦fa wayoaö ja̦looma. Bä bufi daeo showai ja, 3 tä mö didi ma cublaliyono wei ma cui, bä bufi wedinajamou showaoma.

¹⁵ Ö̦jö däjä, 4 tä mö jalu cublou co̦a ja, Sasono bä suwäbö lija bä a̦ fama. —¿Wamalecö nö fo̦lili bleaamabä, bei wamalecö nacaa bäalalema daanö? Fe̦yalofä a wa̦ nö wäamaö fe da yadio, yamalecö yömölaö co̦obä. Wa tä a̦ wäaimi ja, cafä ma cui, faafä ebä bluca ma cui, cowa wacänö bämacö nia bluca ö̦shömaö—bä cuma.

¹⁶ Suwänö bä fe̦yalobö e a̦ nö nia wäamaö fa juonö, a ö̦cöblalodima. Sasono lija abenaja a cuma. —Wale nofimaimi waiquiwä, wale nofi wa̦libou. Iba wa bä wababä, wa tä a̦ wäyäö da yacläoblei, camiyä ma cui lija wa tä a̦ ca̦i wäanomi dicowä —a cuma. Abenaja Sasono a cuma. —Uo. Nayä ma cui, fayä ma cui, ö̦jö ya cöbä yömölano lä mlai tä ja, cafä lija ¿wedi tabä ö̦jö bei ya tä a̦ li wäa ayaquei? —a cuma.

¹⁷ Bä iyaö ca̦i lä co̦camono wei, 7 tä mö didi cublou showaa mlai ja, bä fe̦yalobö e sho cäcöbä lä cuono wei jamö, showadi a ö̦cödima. ¿Ö̦jö tawä? Showadi a wa̦ fe ca̦i blacäjoma yalo, 7 tä mö didi cublou däjä a yömölalema. Ö̦jö däjä, cama ebä lija tä a̦ wäyäö fe dolemou showadaoma.

¹⁸ Ö̦jö cudeenö, motoca a queo showao mlao däjä, Sasono lija filideo bä a̦ fama. Abenaja bä cuma. —Täbä lä clededii, ¿buu ubä shi̦lo besi cledediwämi daanö? Täbä lä lofote wei, ¿öla bei bä shi̦lo lofotemi daanö? —bä cuma. Abenaja Sasono e cuma. —Iba wama a wa̦lii mlao fa cunoja, ya tä a̦ wäyäö da yacläoblei wama tä a̦ nö ji̦liaö shaliliobö mlai —a cuma.

¹⁹ Ö̦jö däjä, Jeobaa a Bufinö Sasono a fa lofoteblamalönö, Asicalono jamö a dimöa showadabaliyofälöma. Asicalonoteli 30 bä filideo fa shäalalönö, bä lä didiono wei sibä bluca dolalema. Tä a̦ lä wawämano wejei bä 30 lä cui lija, ö̦jö sibä ja bä dobäa co̦lalejeloma. Ö̦jö däjä, bä fö̦ö e lijamö a jushuo ca̦i co̦a co̦layoma.

²⁰ A fa co̦lunö, Sasono cama bei nofi e lija bä suwäbö e jibäa jäquemaje.