Jueces 13 - Biblia Yanowamö

Sasono a oshe lä cublaliyono wei tä a̦

¹ Isaeli ebä lä cuinö, Jeobaanö tä tamaö nofi lä wa̦libou wei tä taö co̦o dicoomaje. Ö̦jö cudeenö, filideo bä lija bä noshi ö̦jödaboma, bä nö bleaamabeje. ¿Ö̦jö tawä? Filideo bänö bä nö bleaamaö showaoje däjä, lasha 40 a famalemaje.

² Bei. Solateli a wa̦fa Manoa cuoma. Dani nodiwä e cuoma. Bä suwäbö e shibönabödalou fa mlacunö, moli ma cui a ijilubö cuonomi.

³ Ö̦jö a suwä lija Jeobaa etä a̦jele fa wawälönö, abenaja a nowa suwä tama. —Bei. Wa shibönabödalou fa mlacunö, wa ijilubö cua ma mlai, wa nia shibönabölayou. Ijilufä wa nia tabou.

⁴ Ö̦jö cudeenö, a da moyaweicu. Nashiwä toubä coa dijä. Täbä shi lä wa̦limamou wei ai toubä ma cui, toubä coa dijä. Jeobaanö täbä a̦fa shami lä taö wei täbä ca̦i wa dijä.

⁵ ¿Ö̦jö tawä? Wa fa shibönabölönö, ijilufä wa nia tablaö. Möcö bäblamou mlai ja, möcö noshi nia umlao.* A oshe lä wawäblou wei däjä ma cui, Jeobaa ya lija a nia yaio malä cui. Iba a nia oshe cuo showadao. Filideo bä lija, Isaeli ya ebä nia lä bayeliblaö wei jamö, ijilufä a nia jaba läo —a nowa tama.

⁶ Ö̦jö däjä, bä fe̦yalobö a yömöladayoma. Abenaja e cuma. —Yai Bada tänö a fa shimölönö, camiyä lija a wa̦lo wawälayou culoi. Jeobaa etä a̦jele buficö mömou lä culenaja, buficö mömou nö quilijio cuoma. “¿Wediteli bei wa li?”, ya e cunomi. A wa̦fa ca̦i wäamonomi.

⁷ Ö̦jö ma cui, wale yömölama. Ya nia jo̦wa shibönaböö. Ijiluyä wa̦lo ya nia jo̦wa tablaö. Yai Bada lija a yaiobä, a nia jo̦wa cudio fa tai. A oshe wawäblou däjä, a yaio fa waiquionö, a demi cuo showao däjä, Yai Bada lija a nia jo̦wa yaio. ’Ö̦jö cudeenö, nashiwä toubä ja wale wasöma, täbä shi lä wa̦limamou wei ai toubä ca̦i ja —a cuma—. Jeobaanö täbä a̦fa shami lä taö wei täbä ja, wale ca̦i iyaö wasöö showaoma —a cuma.

⁸ Ö̦jö däjä, Jeobaa lija Manoa a wa̦ fe blacäjoma. Abenaja a cuma. —Jeobaa wa tä. Cafä Yai Bada wa lä cuinö, wa wa̦lo shimaö lä balöleno wei a shimöa da co̦lu, ¿ö̦jö tawä? Yafälecö moyawämayolubä. Ijilu a nia lä cublou wei, ¿wedinaja yafä a yai taamabä? —a cuma.

⁹ Yai Bada tänö Manoa a wa̦ fa ji̦lilänö, ficali ca jamö a suwä cuo däjä, Jeobaa etä a̦jele wawäa co̦layodayoma. Ö̦jö ma cui, bä fe̦yalobö e cuonomi.

¹⁰ Bä fe̦yalobö e lija, lobe a suwä läläa fa showadalonö, abenaja e cuma. —Weyajada ja camiyä lija a wa̦lo da waloiquiyoi, a wawäa co̦layou lä cufe —e cuma.

¹¹ Manoa a jocädou fa showadalonö, bä suwäbö e lijamö a yaua showadaliyofälöma. A wa̦lo lä wawälayono wei lija a fa icuicunö, abenaja e cuma. —Fei wa wa̦ suwä jo̦wa lä wayomano wei, ¿ö̦jö cafä wa waiquiwä tawä? —e cuma. —Ö̦jö ya —a cuma.

¹² Abenaja Manoa e cuu nomöjöoma. —Wa tä a̦ jo̦wa lä wäyäno wei tä bejedi cublou däjä, ¿wedinaja a yai ijilu cuaabä? ¿Wedi tä nia taö? —e cuma.

¹³ Manoa lija abenaja Jeobaa etä a̦jele cuma. —Ya suwä yömölaa lä waiquileno wei tä ja, a moyawäobä, ö̦jö lä.

¹⁴ Uba bei totobä ja, a nia iyaimi. Uba nashiwä toubä ma cui ja, täbä shi lä wa̦limamou wei ai toubä ma cui ja, a nia wasöo. Jeobaanö täbä a̦fa shami lä wäyäö wei täbä nia waimi. ¿Ö̦jö tawä? Cama lija ya tä nabä bluca lä shimano wei tä ja, a cadidobä —a cuma.

¹⁵ Ö̦jö däjä, Jeobaa etä a̦jele lija, abenaja Manoa a cuma. —Camiyä yafäcö a̦ ja, wa nia yanöcöblao balöo, ¿ö̦jö tawä? A loa da balöicu, bä iyamaö balöobä. Shibo yafä a oshe fa shälönö, afä yafä a nia löböblaö —a cuma.

¹⁶ Manoa lija abenaja Jeobaa etä a̦jele cuma. —Ya yanöcöquei ma cui, afä nii bä ja, afä yalo bä ja, ya nia iyaimi. Ö̦jö ma cui, yalo wa shäö bufi doblao ja, Jeobaa lija wa nia yai dodobou —a cuma. “Jeobaa etä a̦jele”, Manoanö a nofi tabono malä mlai.

¹⁷ Jeobaa etä a̦jele lija, abenaja Manoa a cuu nomöjöoma. —¿Cafä wedi bei wa wa̦fa cua cule? Wa wa̦ bejedi cublou däjä, bä nofi dobobä —a cuma.

¹⁸ Ö̦jö ma cui, abenaja Jeobaa etä a̦jele cuma. —¿Wedi tabä bei wale a̦fa li wa̦lii dicowä? Ya wa̦fa doblaa nö malä quilile —a cuma.

¹⁹ Inaja a cuma yalo, Manoa a lä cuinö, maa ma ja shibo a maquequema, lo̦shi mobä nia dodobou lä yädäono wei mobä ca̦i. Ö̦jö däjä, Jeobaa a nö shi̦lo lä quiliaö wei a lija bä ö̦shö dodobou showaoma.

²⁰ ¿Ö̦jö tawä? Maa ma ja bä yalo lä maquebono wei jamö culanö, wacä bada yäblou lä ösöno wei däjä, ö̦jö wacä showawä ja, Jeobaa etä a̦jele befi ca̦i ösöa co̦layoma. Ö̦jö däjä, Manoa, bä suwäbö e sho cäcöbä mamo showao däjä, cowa wacä jamö a̦jele a befi ca̦i ösölayoma. A befi ca̦i fa ösöludunö, mashita jamö cäcöbä möfe boblaa showadaquema.

²¹ Ö̦jö däjä, Manoa a bufi yai jaducäblaliyoma. “¡Ö̦jö Jeobaa etä a̦jele nofi cuo dodijioma!”, a bufi cuu majöoma. Manoa a ma cui lija, bä suwäbö e ma cui lija, Jeobaa etä a̦jele wawäblou co̦daanomi.

²² Bä suwäbö e lija abenaja Manoa a cuma. —Fei däjä bäfäcö nia demi cuomi. Yai Bada bäfä tä malä dalalöfe —a cuma.

²³ Inaja a ma cuno wei ma cui, bä suwäbö bei e a̦ lämoma. —Ma. Jeobaanö bäfälecö nia shäö showadao fa cunoja, yalo bäfä bä ö̦shö lä dodobofe, lo̦shi bäfä mobä ca̦i lä dodobofe, ö̦jö bä nö däabö mlai. Bäfä tä lä dalalöfe tä ma cui, tä nö dablamabö mlai. Tä nia lä cublou wei tä ja, bäfälecö nö yömölabö mlai —bä suwäbö a cuma.

²⁴ A̦jele a lä cuno weinaja tä bejedi cublaliyoma. Ö̦jö a suwänö bä ijilubö e tablalema. Sasono e a̦fa jilaquema. ¿Ö̦jö tawä? A ijilu fa yawälönö, Jeobaanö a bayelibou dodijioma.

²⁵ Dani nodiwä ebä lä bälöjöi jamö a cuoma. Sola tä ulufi jamö a bälöoma, Edaoloteli bä lä bälöle tä möamo jamö. Ö̦jamö a cuo däjä, cama lija Jeobaa a Bufi fa yanöcöblaicönö, a jaba lofotomaboma.