Jueces 12 - Biblia Yanowamö

Jedei ebä sho Eflaini ebä lä shäyono wei tä a̦

¹ Eflaini ebä fa toujublalunö, Safono jamö bä wayu bucadubaliyoma. Bä jushuolanö, abenaja Jedei a nowa tamaje. —Amonoteli wa bä nabä lä bucadubaliyono wei däjä, ¿wedi tabä camiyä wamalecö ca̦i li nacanomi, bämacö bluca fuu showadaobä? Inaja wamacö cuaaö dicooma yalo, cowa wacänö bä befi ca̦i nia ö̦shömaö.

² Abenaja Jedeinö bä nowa tama. —Amonoteli bä sho, camiyänö ya bä ca̦i lä cule yamacö sho, yamacö a̦fa tayou dodijioma. Cafä ö̦jö däjä bämacö ma nacano wei ma cui, wamale bayeliblanomi.

³ ¿Ö̦jö tawä? Wamale bayeliblaö lä mlai ya tä dablaö ja, ya shämobä tä ma cuono wei ma cui, yami ya wabäo fe yadioma. Amonoteli yama bä nabä bucadubaliyoma. Yama bä nabä fa bucadubalunö, Jeobaanö camiyä lija bä noshi ö̦jödaboma. Inaja tä ma cuono wei ma cui, ¿wedi tabä fei däjä camiyä bei wamale nabä li queo bufi doblaa cule? —bä nowa tama.

⁴ Ö̦jö däjä, Jedeinö Calaadateli bä bluca fa toujublamalönö, Eflaini ebä sho bä shäyoma. Calaadateli bä nö shi̦lo wa̦lojaö fa ayaonö, Eflaini ebä nö blemalalemaje. ¿Ö̦jö tawä? Bä ishobä, Eflaini ebä lä cuinö, abenaja Calaadateli bä nowa taö balöomaje. —Eflaini yama ecö lä bälöblai jamö ma cui, Manasesi ebä ca̦i lä bälöblai jamö ma cui, Calaadateli wamacö lä bälöjöi, ¿wedi tabä jai shomi wamacö nofi li taamamou bufi doblao? Eflaini bäma ecö bluca ma cui, wamalecö nofi fa wa̦libonö wamacö li yaio bufi doblao dicoo —bä nowa tamaje.

⁵ Eflaini ebä docuu bucaduo mlaobä, Jodana u jamö bä bucadumou lä cuaaö wei jamö, Calaadateli bä lämou cuaama. ¿Ö̦jö tawä? Eflaini ai ebä lä docuno wei, bä bucadublaö bufio däjä bä wa̦limaje. Abenaja bä cuma. —¿Cafä Eflaini bei wa e? —bä cuma. —Ma. Ö̦jö ya emi —bä cuu ja,

⁶ abenaja bä taamaö nomöjöomaje. —Ja̦o. Ö̦jö wa emi ja, bä a̦ da ji̦lia. “Shibole”, e da cu —bä cuma. Ö̦jö ma cui, Eflaini ebä caficö a̦ ijede shomio mö feduoma cudeenö, ö̦jö tä a̦ ja bä a̦ shomioma. “Shibole” bä cuu mlai ja, “Sibole”, bä shi̦lo cublaloma. ¿Ö̦jö tawä? Bä a̦ jiliaö fa balöojenö, bä a̦ faö lä shomi wei bä fuwäa fa showadaojenö bä shämaje, Jodana u jamö bä bucadumou lä cuaano wei jamö. Inaja bä fa cuaanö, Eflaini 42.000 ebä bluca shäalalemaje.

⁷ ¿Ö̦jö tawä? Isaeli ebä lulubou showalanö, Jedeinö lasha 6 a lalomalema. Ö̦jö däjä, Calaadateli a Jedei lä cui, a bufi mlaquema. Cama a lä bälöono wei a shabono jamö, a didiquemaje.

Bada 3 bä läo lä nomöjöono wei tä a̦

⁸ Jedei a fa nomalönö, Belenateli Ibisana a bada läo nomöjöoma, Isaeli ebä lulubobä.

⁹ Ibisana bä ijilubö 30 ebä cuoma. Ö̦jö ebä lija suwä bä dämabobä, shomi täbä lija bä nacama. Bä tää ebä ca̦i 30 cuo mö feduoma. Shomi bä lija bä jibäaö mö feduoma. Isaeli ebä lulubou showao däjä, lasha 7 a famalema.

¹⁰ Ö̦jö däjä, Ibisana a bufi fa mlaicunö, Belena jamö a didiquemaje.

¹¹ Ö̦jö tä nodi jamö, Sabulono nodiwä ai a wa̦fa Elono lä cuinö, ö̦jönö Isaeli ebä lulubou nomöjöoma. Bä lulubou showao däjä, lasha 10 a famalema.

¹² Ö̦jö däjä, Sabulono nodiwä Elono a lä cui, a bufi fa mlaicunö, Aiyalono jamö a didiquemaje, Sabulono ebä ulufibö jamö.

¹³ Elono a nodi jamö, Biladonoteli Ileli bä ijilubö enö Isaeli ebä lulubou nomöjöoma. Adono e a̦fa cuoma.

¹⁴ Adono bä ijilubö 40 ebä cuoma, bä fääshä 30 ebä mö feduwä. Ö̦jö bä bluca 70 lä cui, bulo bä jamö bä befi ca̦i fuaadima. Adononö Isaeli ebä lulubou showao däjä, lasha 8 a famalema.

¹⁵ Ö̦jö däjä, Biladonoteli Ileli bä ijilubö e bufi mlaquema, Adono e lä cui. A bufi fa mlaicunö, Biladono jamö a didiquemaje, Eflaini ebä ulufibö jamö, amalecoteli bä lä bälöbladayou wei tä jefu jamö.