Jueces 11 - Biblia Yanowamö

Bada a läo nomöjöobä Jedei a lä tablamaleno wejei tä a̦

¹ Calaadateli a wa̦fa Jedei cuoma. Bä lä shäyou wei jamö, showadi a shi̦lo waitelimoma. Bä fö̦ö Calaada e lä cuinö, suwä shomi a ja a taquema, a showadi suwä lä dodoono wei a ja.

² Calaada bä suwäbö e yai lä cui lija ai bä ijilubö ebä ca̦i taö mö feduoma. Ö̦jö bä fa badalalunö, Jedei a yashubeje a nofi wa̦libomaje. Abenaja a nowa tamaje. —Fayä yama ecö yai lä cui lija wa nia co̦caomi, naafä a shomi. Fayä yama etäbä tabou lä juo wei däjä, afä ai wa tä nia däaimi. Shomi suwä a ja, wa malä cublaliyono wei —a nowa tamaje.

³ Inaja bä fa cunö, cama mashi ebä a̦nö Jedei a doculayoma. Dobo tä ulufi jamö a docua fa culufälönö, ö̦jamö lä bä doblou lä mlai, cama lija bä bluca co̦cablaliyoma. Jedeinö shomi täbä madofibö doaö mö lä fuu wei jamö, bä wayu yauoma.

⁴ Tä nö fa dedelönö, Amonoteli bänö Isaeli ebä nabä quequemaje.

⁵ Täbä shäyobä tä cublou däjä, Calaadateli bä badanö Jedei a bufiblamaje, a shi̦lo waitelimou daoma cudeenö. A bufiblamaje cudeenö, Dobo jamö a nabä alayomaje.

⁶ Bä fa co̦blalunö, abenaja a nowa tamaje. —A da jabo. Camiyä yamacö lija wa bada cuobä, bä co̦aö mö fuu co̦o lä cufe, Amonoteli bä sho bämacö shäyobä —a nowa tamaje.

⁷ Ö̦jö ma cui, Jedeinö abenaja bada bä nowa tama. —Wamale nofi fa wa̦libonö, fayä e yafi jamö wamale nofi da joyalii. Fei däjä wamacö nö bleaaö yalo, ¿wamale jole li bufiblaö majöa cule? —bä nowa tama.

⁸ Jedei lija abenaja Calaadateli bada bä cuu nomöjöoma. —Awei —bä cuma—. Cafänö yamalecö ca̦i fubä, bä bufiblaö jäa lä cule. Cafä sho Amonoteli bäma bä nabä fuu showadaobä. Calaadateli bluca yamacö lija wa bada cuobä —bä cuma.

⁹ Calaadateli bada bä lija abenaja Jedei a cuma. —Amonoteli bäma bä nabä fubä wamale co̦aö ja, camiyä lija Jeobaanö bä noshi ö̦jödabou ja, cafä wamacö lija ya bada nia cuo —a cuma.

¹⁰ —Ja̦o —Calaadateli bada bä cuma, Jedei lija—. Bämacö nowa lä tayole bämalecö wa̦no tabä, Jeobaa a yömöca daa waiquia lä cule. Wa lä cufenaja, yamacö nia cuaaö shalilio —bä cuma.

¹¹ Inaja bä nowa fa tayolunö, Calaadateli bada bä lija Jedei a yaua showalayofälöma. Ö̦jönö bä yai nosiemabä, a bada tablamalemaje. Wawädowä a wa̦ ji̦liamobä, Misiba jamö Jedei a wa̦ nö wäo co̦oma, Jeobaa a lä cule jamö.

¹² Ö̦jö däjä, Amonoteli bada a lija Jedei a wa̦no wäamobä, bä shimöa showadalema. A wa̦no wäyäöje ja, bada a lija abenaja bä cuma. —Bada Jedei yama a wa̦no wäyäö lä cule. ¿Wedinaja bada wama a nofi li tabou? ¿Wedi wama tä nö bäshälö tabou dodijio ja, camiyä yamacö ulufibö jamö, bei wamacö wayuu li fuu dicoo? —bä cuma.

¹³ —Wedi tabä mlai —Amonoteli bada a cuma, Jedeinö bä lä shimöleno wei bä lija—. Isaeli wama ecö lä cuinö, Ejido wama tä ulufi lä daqueno wei däjä, camiyä wamalecö ulufibö däa lä läleno wei, ö̦jö tä nowa showawä ja. ¿Ö̦jö tawä? Anono cou, Jaboco cou, Jodana cou ca̦i, ö̦jö ubä jamö tä ulufi lä möamobe, ishou mlai ja, tä co̦a da co̦maba, ö̦jö lä —a cuma.

¹⁴ Jedei lija Amonoteli bada a wa̦no wäyäö co̦jolomaje. A wa̦no ji̦lia fa co̦läjälonö, cama a wa̦no wäyämobä bä shimöa mö yabaa co̦lema.

¹⁵ Abenaja bä cuma. —Jedei yama a wa̦no wäyäö co̦a lä cule. Moaba ebä ulufibö ma cui, Amonoteli wamacö ulufibö ma cui, Isaeli yama ecö lä cuinö, yama tä däaö läo bädaonomi.

¹⁶ Ejido yama tä ulufi lä daqueno wei däjä, tä ulufi bloque jamö Isaeli yama ecö jayuaö fa cuaaimadunö, modu Wacä u jamö yamacö fuu fa cuaaimadunö, Cadesi jamö yamacö waloa bucaduquema.

¹⁷ Ö̦jamö yamacö culanö, Edomöteli bada a lija Isaeli yamalecö wa̦no tabeje, yama bä shimöa balölema. Abenaja a nowa tamaje. “Cafä wamacö ulufibö jamö yamacö nia jayuo buo, ¿ö̦jö daanö?”, bä cuma. Inaja bä cuma ma cui, Edomöteli bada anö bä a̦ ji̦lianomi. Moabateli bada a lija yamalecö wa̦no wäyäbeje, yama bä ca̦i shimölema ma cui, a wa̦ läoma. Inaja bä cuaama cudeenö, Cadesi jamö Isaeli yama ecö yanöcöa showadaquema.

¹⁸ ’Ö̦jö däjä, ulufi bloque jamö yamacö fua fa co̦lufälönö, Edomöteli bä ulufibö jamö yamacö a̦yoquefälöma —bä cuu co̦oma—. Moaba ebä ulufibö ma cui ja, ö̦jamö yamacö ca̦i a̦yoa showaquefälöma. Inaja yamacö fa cuaaimadunö, Moaba ebä ulufibö casö ajede jamö yamacö waloaliyoma, motoca a lä cuaaimaö wei tä mashi jamö. Anono u bucadu mashi ja, yamacö bälöblaquema. Ö̦jö ma cui, Moabateli yama bä ulufibö ca̦i möö bädaonomi. Moaba ebä bälöo fe lä wädöono wei, ö̦jö u Anono malä cuono wei.

¹⁹ ’¿Ö̦jö tawä? —bä cuma—. Ö̦jö däjä, amoleo a bada lija yamalecö wa̦no tabeje, yama bä shimöa nomöjölema, Seono lija. Ebono jamö, Seono a bada bälöoma. Ö̦jö lija abenaja bä cuma. “Cafä wamacö ulufibö jamö yamacö nia jayuo, ¿ö̦jö tawä?”, bä cuma.

²⁰ Inaja bä cuma ma cui, Isaeli yama ecö lija Seono a mölaö fa mlacunö, yamalecö nia jayuamanomi. Cama ebä yai toujublamaö fa showadalonö, Jaasa jamö bä wayu fa bälöblaicunö, Isaeli yama ecö nabä queo mö baomaje.

²¹ ’Ö̦jö däjä, yamalecö yabäcaöje ja, Isaeli yama ecö lä cuinö yama a Jeobaa lä bufiblaö wei anö, Seono ebä ca̦i noshi ö̦jödaboma —bä cuma—. Isaeli yama ecö nö shi̦lo wa̦lojaö fa ayaonö, yama bä nö blemalalema. Yama bä nö fa blemalalönö, cama amoleo bä lä bälöjono wei, yama tä ulufi bluca lofotoa showadalema.

²² ¿Ö̦jö tawä? Amoleo yama bä ulufibö lofotobou lä läono wei, Anono u lä cui, Jaboco u mö feduwä lä cui, ö̦jö tä ulufi lä möamobe yama tä dälema, Jodana u jamö tä ulufi bloque fe lä wädöle tä ca̦i.

²³ ’¿Ö̦jö tawä? —bä cuma—. Jeobaa a mayo li waiquiwä. Yai Bada yama tä lä bufiblalenö amoleo bä li yashublaö fa baläläonö, Isaeli yamalecö bälömabou nomöjöoma. Ö̦jönö yamalecö ma bälömabole ma cui, ¿cafänö ö̦jö wa tä nia ulufi co̦aö co̦o daanö?

²⁴ Afä tä lä cuinö, Quemosi wama tä nofi lä mölabolenö wamacö dobäö ja, ¿wama a nofi nia taboimi daanö? Inaja showawä, Jeobaa yama tä lä bufiblalenö yamalecö dobäö ja, yama tä nofi nia tabou lä. Yamalecö bälömabou nomöjöobä bä yashublaö ja, yamacö nia yai bälöo.

²⁵ ’¿Ö̦jö tawä? —bä cuu co̦oma—. Moabateli a bada cuo lä balöono wei, Sibolo bä ijilubö Balaco a lä cui, ö̦jö a nö wa̦lojano ma mlai ma cui, ¿cafä bei wa nö nia shi̦lo yai wa̦lojaö daanö? Ö̦jö a lä cui, Isaeli yamalecö wabaö mlai ja, yamalecö naba queo mö bao mlai ja, a yanöcöoma.

²⁶ Ebono jamö Isaeli yama ecö lä bälöjou wei, Aloele jamö yamacö bälöjou mö lä fedule, Anono u sibo jamö yamacö ca̦i bälöjou cuaaö mö lä feduo wei, yamacö bälöo nö dedei waiquia. ¿Ö̦jö tawä? Lasha 300 yama a famaö waiquia. ¿Wedi tabä yedu ja ö̦jö wama tä ulufi nabä li waloaö co̦onomi, ö̦jö lä?

²⁷ ’Ma. Ö̦jö cudeenö, yamalecö dobloimi jimabä tä cuami —bä cuma—. Yamalecö nabä lä queo wei tä ja, cafä wa yai dobloimi. ¿Ö̦jö tawä? A doblou lä mlai, fei däjä Jeobaanö a li jimöabä, ö̦jö lä. Täbä cadidiwä lä jimöaö wei, ö̦jö a waiquiwä. Cafä Amonoteli wamacö lä cuaale tä fa mönö, Isaeli yama ecö ca̦i lä cuaale tä ca̦i fa mönö, ö̦jönö a jimöaö cadidiobä. Inaja bada tänö wa taamaö bufima —a nowa taöje ja bä cuma.

²⁸ Inaja Jedeinö a taamaö ma bufino wei ma cui, Amonoteli bada a lä cuinö, bä lä shimöleno wei bä a̦ ji̦lianomi.

Jeobaa lija Jedei a wa̦ nö wäo lä dicoono wei tä a̦

²⁹ Ö̦jö däjä, Jedei lija Jeobaa a Bufi fa yanöcöblaicunö, Calaadateli bä bluca lä bälöjono wei jamö a jayuaö cuaama, bä moyawämabä. Manasesi ebä bluca bälöjou mö lä feduono wei jamö showawä. Ö̦jö däjä, Misiba jamö a waloa co̦quema, Calaadateli bä lä bälöjono wei jamö. Ö̦jamö culanö, Amonoteli bä lä bälöjöi jamö, bä nabä wayu cadidiblou nomöjölayofälöma.

³⁰ ¿Ö̦jö tawä? Jeobaa lija Jedei a wa̦ nö wäo ja, abenaja a cuma. —Camiyä lija Amonoteli wa bä noshi ö̦jödabou ja,

³¹ cafä Jeobaa bä nia dobäö. Ö̦jamö Amonoteli bä lija ya nö fa wa̦lojoicunö, iba yafi jamö dodijidawä ya co̦o co̦imaö däjä, a läläaö mö lä baimi, afä a nia cuo. Cafä lija ö̦jö ya ö̦shö nia dodobou —a cuma.

³² Inaja tä fa cublalunö, Amonoteli bä lä bälöjono wei jamö, Jedeinö cama ebä ca̦i bucadubaliyoma, a ishobä. A lä ishono wei däjä, cama lija Jeobaanö bä noshi bluca ö̦jödaboma.

³³ Aloele jamö bä nabä jaba fa quealujenö, bä shäö showaoje däjä, Minidi jamö bä wayu waloquema. Ö̦jamö bä lä bälöjono wei bä ma cui, Abequelamiteli bä bälöa lä blajaono wei bä ma cui, ö̦jö bä mö bluca watäa showalefälömaje. ¿Ö̦jö tawä? Shabono 20 bä lä cule, bä nabä quequemaje. Inaja bä fa cuaanö, Isaeli ebä lä cuinö, Amonoteli bä yanöcömabomaje.

³⁴ Ö̦jö däjä, Misiba jamö Jedei dodijidawä a co̦a co̦bema. Cama yafi jamö a ajedou däjä, bä tää enö a nabä läläquema. Bä fö̦ö e mö baamabä, amowa efi shälanö, e a̦ blaö blaömofälöma. ¿Ö̦jö tawä? Bä tää ai e cuonomi, bä ijilubö e ma cui e ca̦i cuo bädaonomi. Bä tää moli e shi̦lo cuoma.

³⁵ A fa dalalönö, a bufi nö bledaliyoma. A nö nia wajäwä fa ö̦jöböamonö, a lä didio wei si cacablalema. Abenaja e cuma. —¡Shädayai, U̦asi! Fei däja, cafä wanö, bejedi lä ya bufi nö bleaaö lä cule. Cafä lija ya bufi jalujou cudeenö, ya bufi wa̦lidiwä cadidiwä. Jeobaa lija ya wa̦ nö wäa waiquiquema yalo, ya wa̦ shominajaaö majöobä tä cuami —a cuma.

³⁶ Bä fö̦ö e lija abenaja a cuma. —Fabe. Jeobaa lija wa wa̦ nö wäo waiquioma ja lä, wa lä cuno weinaja, inaja showawä wale nia taamaö. Amonoteli bä nö lä nabämono wei bä lija, Jeobaanö wa nö yuaö malä waiquile —a cuma.

³⁷ Abenaja bä fö̦ö e lija a ca̦i cuu co̦oma. —Fabe, inaja wale taamaö showadao mlai, belibo bolacabö cäcö lublou balöobä, tä ulufi lä jefubö wei jamö, iba nofi ya bä ca̦i fuadalou balöobä, ¿ö̦jö tawä? Ö̦jamö culanö yamacö ö̦cöbä. Iba wa̦lo a cuo showao mlao däjä ya nia lä nomaö wei, wale nomöa yubou balöobeje —a cuma.

³⁸ —Jö̦ö —bä fö̦ö e cuma—, wa fubä lä. Ö̦jö däjä, bolacabö cäcöbä belibo lublamadayobä, bä fö̦ö enö a shimöa showadaalema. Cama nofi ebä sho bä aa fa showadalunö, tä lä jefubö wei jamö bä ö̦cölanö bä a̦ ca̦i fuma. Bä fe̦yalobö e cuo showao mlao däjä a nia lä nomano wei, a nofi ojode taö balöomaje.

³⁹ Bolacabö belibo cäcö fa lublamalönö, bä fö̦ö lijamö a waloa co̦quema. Ö̦jö däjä, Jeobaa lija a wa̦ nö wäo ja, a lä cuno weinaja, a taamama. A fubaö daö showaono lä mlajei, a nomalayoma. Ö̦jö däjä, Isaeli ebä suwä showadi lä cuaaö wei bä jaba cuaama.

⁴⁰ Lasha a faö lä co̦le däjä ma cui, ai a faö lä co̦le jamö ma cui, ai a ja ma cui, Jedei bä tää e nomöa bou juobeje, Isaeli ebä suwä showadi fuaaö. Bä ö̦cöö showao däjä, 4 tä mö didi tablamaöje.