Josué 6 - Biblia Yanowamö

Jelicoteli bä nabä lä shimano wei tä a̦

¹ Bei. Isaeli ebä nö quili tamaje cudeenö, Jelicoteli bä beibö yoca jifubomaje. Bä siboobä tä ma cui, bä lucäbä tä ma cui, bä famanomije.

² Ö̦jö däjä, abenaja Jeobaa a cuma, Josué lija. —Bei. Jelicoteli bada a ma cui, cama ebä wayu ca̦i lä fuu wei bä ma cui, ö̦jö ya bä noshi bluca ö̦jödabou lä cule.

³ Ö̦jö bä shabonobö sibo jamö wamacö nia fuu shalilou shoqueaö. ¿Ö̦jö tawä? Wamacö bluca ishou lä dao wei wamacö lä cui, moli wamacö nia shoqueaö cuaaö. Ö̦jö tä fena ja, moli wamacö nia shoqueaö cuaaö co̦o. Ö̦jö tä fena ja co̦wä. Inaja wamacö cuaaö showao däjä, 6 wama tä mö nia didi tablamaö.

⁴ ’Nofi bäyäalewä 7 bänö, oweja yo̦labä lä folamou wei yo̦labä bolajenö, täbä nia ca̦i balöoje —a cuma—. Ya wa̦no oni lä didile tefi ca ca̦i nia nojaoje. Ö̦jö däjä, 7 tä mö jalu cublou däjä, Jelicoteli bä shabonobö sibo jamö, 7 wamacö nia shoqueblou. Nofi bäyäalewä bänö yalo yo̦labä folalajenö, bä ca̦i nia fuuje.

⁵ Yalo yo̦labä lä folaö wejei bä a̦ fe dicäblou däjä, ö̦jö wama bä a̦ yai ji̦liaö ja, wamacö a̦ shi nia bluca dou. Wamacö a̦ shi dou däjä, ala nabä nia bläläö showadao. Ö̦jö däjä, bluca wamacö fe lä fayole jamö culanö, wamacö nia fablou cuaaö showadao —a cuma.

⁶ Ö̦jö cudeenö, Nuni bä ijilubö Josué e lä cuinö, nofi bäyäalewä bä fa nacamalänö, bä nowa tama. —Jeobaa a wa̦no oni lä didile, wama tefi ca befi ca̦i fa yalucälönö, tefi ca ca̦i da cuaafälöje. Nofi bäyäalewä 7 bänö, oweja yo̦labä lä folaö wejei, yo̦labä ca̦i balöobeje —bä nowa tama.

⁷ Ai bä bluca lija abenaja a cuma. —Bei. Bä da fufälö. Jelicoteli bä shabonobö sibo jamö, bä fuu shalilou da shoqueafälö. Bä ishobä täbä lä showabou wejei bä fa balölöfälönö, Jeobaa a wa̦no oni lä didile tefi ca ca̦i lä fuu wejei, ö̦jö bä lijamö bä nojaobä—a Josué cuma.

⁸ Josuénö bä nowa lä tano weinaja, bä cuaaö cadidioma. Jeobaa e tefi ca balö jamö, nofi bäyäalewä 7 bänö, yalo yo̦labä ca̦i balöadalou cuaafälömaje. Bä yo̦labä folalajenö bä fuu balöafälöö däjä, Jeobaa e tefi ca ca̦i lä funo wejei bä nojaoma.

⁹ ¿Ö̦jö tawä? Bä ishobä täbä lä showabono wejei bä balöoma. Ö̦jö bä nojamö, yalo bä yo̦labä lä folaö wejei, nofi bäyäalewä bä fuu yauama. Colo jamö bä nofi nia lä bäyäaö wejei, Jeobaa e tefi ca nojamö bä colooma. Inaja bä cuaafälölanö, nofi bäyäalewä bänö yalo yo̦labä foladifälömaje.

¹⁰ Ö̦jö bänö yalo yo̦labä ma foladifälöno wejei ma cui, abenaja Josuénö ai ebä nowa tama. —Fei däjä wamacö a̦ shi nia doimi. Wamacö a̦ nia ji̦liomi waiquiwä. Bämacö a̦ shi domaö bufio mlao däjä, moli ma cui wamacö caficö nia calobloimi. Bämacö a̦ shi domaö lä bufile däjä, ö̦jö däjä wamacö a̦ shi nia shi̦lo dou —bä nowa tama.

Jelicoteli bä alabö na lä blälälaliyono wei tä a̦

¹¹ Inaja Josuénö bä taamaö fa bufinö, Jelicoteli bä shabonobö sibo ja, Jeobaa e tefi ca ca̦i shoqueaö cuaamaje. Moli tefi ca ca̦i fa shoqueblalujenö, bä lä bälöblaono wei jamö bä co̦a co̦layoma. Ö̦jamö bä cua fe jaluu co̦oma.

¹² Ö̦jö tä fena ja, Josuénö bä ca̦i jocädou fa fenalonö, nofi bäyäalewä bänö Jeobaa e tefi ca däa fenaa co̦lemaje.

¹³ Jeobaa e tefi ca balö jamö, nofi bäyäalewä 7 bänö, oweja yo̦labä ca̦i balöadalou cuaaö co̦ofälömaje. Cama bä balö jamö, bä ishobä täbä lä showabono wejei bä balöo mö feduo showaoma. Jeobaa e tefi ca nojamö, colo jamö bä nofi nia lä bäyäaö wejei, bä colooma. Inaja bä cuaafälölanö, nofi bäyäalewä bänö yalo yo̦labä foladifälömaje.

¹⁴ Ö̦jö 2 tä mö jalu ja, Jelicoteli bä shabonobö sibo jamö, moli bä shoqueblou fa co̦lufälönö, bä lä bälöblaono wei jamö, bä co̦a co̦layoma. Inaja bä cublaalanö, 6 tä mö didi tablamalemaje.

¹⁵ Ö̦jö däjä, 7 tä mö jalu lä cublole däjä, tä mö wacacaimaö däjä bä jocäa fa fenalönö, Jelicoteli bä shabonobö sibo jamö, bä fuu shalilou shoqueaö co̦ofälöma, bä jaba lä cuaano weinaja co̦wä. 7 bä shoqueblaliyoma. ¿Ö̦jö tawä? Ai däjä, 7 bä shoqueblou ma mlaono wei ma cui, ö̦jö lä däjä, 7 bä shi̦lo shoqueaö cuaaö majöoma.

¹⁶ Ö̦jö däjä, 7 bä lä shoqueblou wei däjä, nofi bäyäalewä bänö yalo yo̦labä folaö fa waiquiojenö, abenaja Josuénö bä nowa bluca taö showadaoma. —¡Bei. Bä a̦ shi da doo! Eja bä lä bälöle, Jeobaanö bä noshi bluca ö̦jödabou malä waiquii.

¹⁷ Cama bä yafibö ma cui, bä bluca lä tabolajei bä ma cui, Jeobaanö ö̦jö bä mö bluca watäblamaö lä bufii weinaja wama bä taamabä, wama bä nia yaibou, wama bä mö bluca watäblabä. Ö̦jö ma cui, Laaba a nia shi̦lo demi cuo fe yadio, showadi a lä dodoo wei a suwä lä cui. Tä ulufi bomaböbä bäma cäcöbä da shimölöi, cäcöbä jo̦yamaboma yalo, cama a ma cui, cama yafibö jamö bä nofi bluca lä yashuo wei bä ma cui, bäma bä nia demi tabou.

¹⁸ ’Ö̦jö ma cui, cafä wamacö lä cui, täbä mö watäblobä täbä lä yaile täbä ja, bä da wasöo —a cuma—. Täbä mö watäblobä wama täbä yaimabou ma waiquile ma cui, ö̦jö wama täbä doaö dicoo ja, Isaeli bäma ecö mö watäblou mö feduobä, bämacö nia cublou. Bämacö nia yabäcamou.

¹⁹ ’¿Ö̦jö tawä? —a cuma—. Ö̦jö ma cui, blada bä bluca lä cule, olo bä bluca ca̦i lä cule, Jeobaa lija bä jibäamobä, wama bä nia yaimabou showadao. Täbä didibobeje, duo shibä ja täbä lä tablamou wei täbä ma cui, ö̦jö wama täbä nia ca̦i yaimabou. Duo shibä lä fude wei shibä ma cui ja, jelejewä shibä ma cui ja, inaja showawä Jeobaa yafi jamö bä nia cuo. Täbä nowa lä bluca wei täbä lä nowamaö wejei jamö, ö̦jö täbä nia bluca didio coyocomou —a cuma.

²⁰ Josuénö bä nowa taö ja, täbä a̦ shi dolayoma, yalo yo̦labä ca̦i folamaje. ¿Ö̦jö tawä? Yo̦labä a̦ fa ji̦liläjenö, yedu bä a̦ shi bluca doa fa showalönö, ala nabä blälälaliyoma. Ala nabä bläläa fa showadaolalunö, shabono jamö bä bluca fablou cuaaö showadaoma. Cama bä nö wa̦lojaö fa ayaonö, bä shabonobö befi ca̦i bluca däalalemaje.

²¹ Bä mö jödödöwä watäblalemaje. Wa̦lo bä ma cui, suwä bä ma cui, bada bä ma cui, oshe bä ma cui, bä bluca shäa showadaalalemaje. Baca bä ma cui, oweja bä ma cui, bulo bä ma cui, sibala bänö bä bluca waicaö showadaomaje.

²² Ö̦jö däjä, tä ulufi lä bomaböno wei cäcöbä lija abenaja Josué a cuma. —Ö̦jö a suwä yafibö jamö cäcöbä da falö, showadi a lä dodoo wei a suwä lä cui. Cama a ma cui, cama ebä ca̦i bluca ma cui, bä da co̦bölä, wafäcö a̦ nö lä wäono weinaja showawä —a cuma.

²³ Ö̦jö a wa̦ ja, tä ulufi lä bomaböno wei cäcöbä fiya lucäa showalayoma. Laaba a ma cui, bä fö̦ö e ma cui, bä nöö e ma cui, cama ebä bluca ma cui, ö̦jö bä bluca co̦böa fa showadalänö, Isaeli ebä lä bälöblaono wei jamö bä sibomaboböma.

²⁴ Jelicoteli bä shabonobö befi ca̦i ö̦shöa showadaamalemaje. Ö̦jö ma cui, blada bä bluca lä cuono wei, olo bä bluca ca̦i lä cuono wei, Jeobaa yafi jamö bä ca̦i fumaje. Täbä didibobeje, duo shibä ja täbä madofi lä tablamono wei, ö̦jö bä ca̦i. Duo jelejewä shibä ma cui ja, shibä lä fude wei shibä ma cui ja, Jeobaa yafi jamö ö̦jö bä bluca ca̦i madofi fumaje. Täbä nowa lä bluca wei täbä lä nowamaö wejei jamö, ö̦jö täbä bluca didia coyocoaquemaje.

²⁵ Bä bluca ö̦shöa ma showadaamaleno wejei ma cui, showadi a lä dodoo wei a suwä lä cui, a shänomije, Laaba a wa̦fa suwä lä cui. Cama a ma cui, cama ebä bluca ma cui, bä fö̦ö enö bä ca̦i bluca lä cuono wei bä ma cui, Josuénö bä demi tamaboma. Jelico tä ulufi bomaböbä cäcöbä lä shimöleno wei cäcöbä jitäboma yalo, Isaeli ebä lijamö a coyocomabou majöoma. Fei däjä ma cui, cama nodiwä bä coyocowä showawä.

²⁶ Jelicoteli bä shabonobö lä wa̦liamaleno wei däjä, Josuénö bä wasöma, a shabono i̦tamaö co̦o mlaobeje. A wa̦ nö wäo ja, Jeobaa lija bä nabä shimöquema. Abenaja a cuma. —Ai a bädawänö, ei Jelicoteli bä shabonobö i̦tamaö co̦o fe yadio ja, Jeobaa lija a shämobä a. Ala nabä jaba lofotoamaö co̦o ja, bä ijilubö jaba e shämobä. Ala nacö jamö yoca lä joleo wei yoca taö majöo ja, bä ijilubö oshe e shämou majöobä —a Josué cuma.

²⁷ Inaja Jeobaanö Josué a ca̦i fa cuonö, jödödöwä tä ulufi ma cui jamö Josué a wa̦fa wayoaö blaucomaje.