Josué 5 - Biblia Yanowamö

¹ Isaeli ebä bucaduobä, Jeobaanö Jodana u lä wejemabono wei etä a̦ fa ji̦liläjenö, amoleo bä bada lä cui, bä bluca quilia fe balojolaliyoma. Jodana u sibo jamö, ö̦jö bä bälöjömoma, motoca a lä queo wei tä mashi jamö. Modu u bada sibo jamö, bä Canaanateli lä bälöblamono wei bä bada ca̦i bluca quilia mö fedulaliyoma. Isaeli ebä lija bä fa quilinö, bä bufi nö beblalou dodijioma.

Jicala jamö Isaeli ebä mosi sicö joyamaö lä co̦ono wei tä a̦

² Ö̦jö däjä, Jeobaanö abenaja Josué a nowa tama. —Maa namo wa mabä fa tablamalönö, Isaeli ebä mosi sicö joyamaö da co̦o —a nowa tama.

³ Ö̦jö cudeenö, maa namo mabä fa tablamalönö, Alalodo cäcö däjämö bä bälöblaolanö, Isaeli ebä mosi sicö joyaa co̦malema, Ablaamö lija Jeobaa a jaba lä cuno weinaja showawä.

⁴ Abenaja tä cuoma. Ejido jamö Isaeli ebä co̦aö däjä, bä ishobä bä wa̦lo lä cuono wei bä bluca mladou cuaafälöma. Ejido jamö bä fa falönö, tä ulufi lä wa̦lidiono wei jamö bä fuu showai ja bä nomalaliyoma.

⁵ Ö̦jö cudeenö, bä lä co̦leno wei bä mosi sicö bluca joyamou ma waiquiono wei ma cui, Ejido jamö bä fa falönö, tä ulufi lä wa̦lidiono wei jamö bä fuu showai ja, bä oshe lä cublono wei bä lä cui, ö̦jö bei bä mosi sicö shi̦lo joyamonomi.

⁶ Tä ulufi lä wa̦lidiono wei jamö, Isaeli ebä fuu showai ja, lasha 40 a famalemaje cudeenö, Ejido jamö bä lä docuano wei bä malä nomalaliyono wei, bä ishobä bä bluca lä cuono wei. Bä nö badabö lija tä a̦fa ulufi wäa lä balöqueno wei, cama bä lija tä ulufi nia jibäama. Tä nö ulufi jo̦wa nijioma. Tä nö ca̦i ofäonomi. Ö̦jö ma cui, a wa̦ ji̦liblaö fa mlacujenö, Jeobaa a wa̦ nö wäo co̦oma. Cama bä lija tä ulufi nia dablamanomi majöwä.

⁷ Ö̦jö cudeenö, cama bä ijilubö ebä balamaö fa nodionö, bä läblamalema. Josuénö ö̦jö bä mosi sicö shi̦lo joyamalema. Bä mosi sicö joyamafälöö fa mlacujenö, bä mosi sicö joyamonomi showawä.

⁸ Isaeli ebä mosi sicö bluca joyaö waiquiono wejei ja, bä yanöcöblao balöoma, bä jalou co̦obä.

⁹ Ö̦jö däjä, Josué lija abenaja Jeobaa a cuma. —Ejido jamö bä lä bälöono wei bänö, wamacö lä tabodino wejei tä ma wa̦lidiono wei ma cui, fei däjä ö̦jö ya tä wa̦lidiwä fa jilulafälönö ya tä joyalei lä cufe —a cuma. Ö̦jö cudeenö, Jicala ö̦jö tä a̦fa ulufi jilaa showadaquemaje. Tä a̦ fa jilacöjenö, tä a̦fa jilabou malä showajei.

¹⁰ Jicala jamö Isaeli ebä bälöblalanö, bä iyaö ca̦i co̦camolayoma, Jelico tä fe yalö ja. 14 tä mö didi cublou däjä bä weyade iyama, Jeobaa a waiteli lä jayuano wei a nofi co̦camoaö co̦oje ja.

¹¹ Ö̦jö tä fena showawä ja, manaa bä mlai ja, ö̦jamö lä bä nii lä cublamono wei bä ja, bä jaba iyama. Nii juluno mlai ji̦bä ja bä iyama, yaama mobä ca̦i ja.

¹² ¿Ö̦jö tawä? Ö̦jamö lä bä nii lä cublamono wei bä ja bä iyaö däjä, manaa bä bläläö mladaliyoma. Ö̦jö däjä, Isaeli ebä lä cuinö, manaa bä waö co̦daanomije. Lasha ai a yanöcö famaö co̦lajenö, Canaana tä ulufi jamö bä nii lä faö wei bä ja, bä shi̦lo iyaö nomöjöoma.

Jeobaa a̦jele etä lä wawälayono wei tä a̦

¹³ Jelico tä lä cule jamö Josué a cuo däjä, tä fa mödalönö, cama a mö lä yaiblole jamö, wa̦lo bei tä ublaoma. Sibala a bada showaboma. Ö̦jö lija Josué a fa ajedeblalunö, a wa̦lima. —¿Camiyä yamacö lija cafä wa yädäobä bei wa? Ma, ¿bä nö lä nabämou wei bä lija wa yädäblobä wa daanö? —a nowa tama.

¹⁴ Abenaja tä cuma. —Ma, inaja ya nia cuaanomi. Jeobaa ebä wayu lä fuu wei bä lija camiyä ya Bada lä läle ya fuu lä cufe —tä cuma. Ö̦jö däjä, a wa̦fa Bada doblao tabä, mashita jamö Josué a möfe deidaliyoma. Abenaja a cuma. —Cafä Bada bä a̦ fuabä ya waiquiwä. ¿Wedinaja wale li taamaö bufio cule? —a Josué cuma.

¹⁵ Ö̦jö däjä, Jeobaa ebä wayu ca̦i lä culenö, abenaja Josué a nowa tama. —Wa mamicö lä didile täcö da jayublalö. Eja camiyä ya li cua yalo, miji wa tä ulufi lä cabale, tä yaia —a nowa tama. A nowa lä tano weinaja, Josué a cuaaö showadaoma.