Josué 4 - Biblia Yanowamö

Josuénö maa mabä lä i̦tamaqueno wei tä a̦

¹ Jodana u wanoca jamö, Isaeli ebä bluca bucadua jödödöqueno wei ja, abenaja Jeobaa a cuma, Josué lija.

² —Isaeli bä ijilubö 12 ebä yaiablalou lä nodiaö wei bä lija, moli wama bä yaiablaö fa cuaanö, ö̦jö bä 12 lä cui,

³ bä shimaö mö yabaö da co̦o, maa 12 mabä däabeje. Jodana u caläö lä cadidiono wei jamö mabä nia doaöje, nofi bäyäalewä bä lä ublaono wei jamö showadawä. Mabä ca̦i co̦o fa co̦imajenö, didi däjä wamacö nia lä cublao wei jamö, ö̦jö 12 mabä lä cui mabä nia yododoamaöje —a cuma.

⁴ Ö̦jö däjä, 12 bä lä yaimano wei bä nacamalema, Isaeli bä ijilubö 12 ebä nodiwä lija bä moli yaiablaö lä cuaano wei. Ö̦jö bä fa nacamalänö,

⁵ abenaja Josuénö bä nowa tama. —Bei. Jeobaa wama a lä bufiblaö wei a wa̦no oni lä didile tefi ca ca̦i lä yanöcöblalajei bä lija wamacö fa jayudonö, bä aa da co̦lufälö. Jodana u caläö lä cadidiono wei jamö culanö, maa moli wama mabä jocaö fa cuaanö, wama mabä yaläcäbou co̦imabä. ¿Ö̦jö tawä? Isaeli bä ijilubö 12 wama ecö nodiwä yaiablalou nodiaö lä cudalenaja, mabä nia cudou.

⁶ ’Ö̦jö mabä ja, afä wama bä ca̦i lä cuo wei bä bufi jaducäablalou nodiablalou showaobä, mabä nia cuo —a cuma—. Obi ma cui, afä bänö ö̦jö mabä wa̦liije däjä, “Fei maa mabä lä cui, ¿wedinaja wama mabä nofi tabou dodijia cule?”, bä cuu ja,

⁷ wama bä yömölabä. Jeobaa a wa̦no oni lä didile tefi ca ca̦i lä funo wejei jamö, Jodana u bada wejea lä showadaqueno wei wama tä a̦fa wäyäbä. ¿Ö̦jö tawä? Jodana u jamö, tefi ca ca̦i lä bucadubaliyono wejei däjä, u wejea showadaquema. Isaeli bäma ecönö, ö̦jö bäma tä nofi jaducäbou shi wa̦libä, ei mabä —a cuma.

⁸ Ö̦jö Isaeli 12 ebä lä cuinö, Josuénö bä nowa lä tano weinaja, inaja showawä bä cuaaö cadidioma. Jodana u wanoca jamö, maa 12 mabä jocälemaje. Isaeli bä ijilubö 12 ebä nodiwä yaiablalou nodiaö lä cudalenaja, mabä jocäa talemaje, Jeobaanö Josué a nowa lä tano weinaja showawä. Bä nia lä cublaono wei jamö, mabä fa yalucualalöfälöjenö, mabä blaaquemaje.

⁹ Ai mabä ma cui, Jodana u wanoca jamö, Josuénö 12 ai mabä i̦tamaö bufima, Jeobaa a wa̦no oni lä didile tefi ca ca̦i lä funo wejei bä yai lä ublaono wei jamö. Ö̦jamö nofi bäyäalewä bänö tefi ca ca̦i lä yanöcöono wejei jamö, mabä i̦tataa showaa.

¹⁰ ¿Ö̦jö tawä? Jeobaanö bä taamaö lä bufino wei tä ja bä yömölabä, Josué lija tä a̦ wäyäö balöoma, Moisesi a nowa jaba taö lä balöono weinaja showawä. Josuénö bä yömölaö fe dolemou ja, inaja bä cuaaö showama. Tä taö jödödöblou showao mlaoje däjä, Jodana u wanoca jamö, nofi bäyäalewä bänö tefi ca ca̦i yanöcöo balöomaje. ¿Ö̦jö tawä? Lobe bä bucadubaliyoma.

¹¹ Bä jayua fa balöamabalöjenö, nofi bäyäalewä bä bucadua showaquefälöma. Jeobaa a wa̦no oni lä didile tefi ca ca̦i fa bucaduicöfälöjenö, tefi ca ca̦i balöa co̦layomaje.

¹² Lubeni ebä ma cui, Cadö ebä ma cui, Manasesi ebä mashi ma cui, bä ishobä täbä showabolajenö, Isaeli ai ebä fuu juo däjä bä balölayoma, Moisesinö bä nowa jaba lä tano weinaja showawä.

¹³ Ö̦jö bä lä cui, jai 40.000 bä bucaduoma, Jeobaa a wa̦no oni lä didile tefi ca balö ja. Bä ishobä täbä showabolajenö, Jelico tä fe yalö jamö bä wayu bucaduquefälöma.

¹⁴ ¿Ö̦jö tawä? Inaja bä cuaaö däjä, Josué lija Isaeli ebä bluca quilibä, Jeobaanö wawädowä a tablamalema. “Bada tä dodijiwä”, a nofi tabomaje. Moisesi a cuo showao däjä a nofi showadi tabodii lä cuono wejeinaja showawä.

¹⁵ Josué lija Jeobaa a wa̦ faö fa balöonö,

¹⁶ nofi bäyäalewä bä yömölaö bufima, Jodana u wanoca jamö, a wa̦no oni lä didile tefi ca ca̦i lä ublaono wejei bä washölöblobä.

¹⁷ Inaja Jeobaa a cuma yalo, Josué a wa̦ fama. Jodana u jamö nofi bäyäalewä bä lä ublaono wei, bä washölöblamaö bufii showadaoma.

¹⁸ Ö̦jö däjä nofi bäyäalewä bänö, Jodana u wanoca jamö Jeobaa a wa̦no oni lä didile tefi ca ca̦i lä ublaono wejei, bä fa washölöblalunö, mashita ajamö bä mamicö quedou co̦o däjä, u lä caläno wei jamö u co̦cablou co̦layoma. Jödödöwä u fe bada dibäblou co̦layoma, jaba u lä cuono weinaja showawä.

¹⁹ ¿Ö̦jö tawä? Jaba a belibo ja, 10 tä mö jalu lä cui jamö, Jodana u mashi jamö bä bucadubaliyoma. Jicala tä ulufi ja bä bälöblaquema, Jelicoteli bä ulufibö casö jamö.

²⁰ Ö̦jamö Jodana u wanoca jamö, maa 12 mabä lä jocäleno wejei, Josuénö mabä i̦tamaquema, Jicala tä ulufi jamö.

²¹ Mabä fa i̦tamacönö, Isaeli ebä lija abenaja a cuma. —Afä bä nia lä nodiblou wei bänö, bä fö̦ö ebä wa̦liije däjä, “Fei maa mabä lä cui, ¿wedinaja wama mabä nofi tabou dodijio?”, bä cuu däjä,

²² wama bä nia yömölaö. Ei Jodana u jamö, wejediwä Isaeli ebä lä bucadubaliyono wei, wama tä a̦ nia wäyäö.

²³ Wamacö jayuo showao mlao däjä, wama a Jeobaa lä bufiblaö wei anö, Jodana u malä wejemabono wei. Modu Wacä u jamö yamacö bucadublou showao mlao däjä, ö̦jö u jaba wejemabou lä balöono weinaja showawä.

²⁴ Jödödöwä bä lä bälöblai bänö Jeobaa a lofote dablabeje, öjö tä li cuoma, wama a Jeobaa lä bufiblaö wei, showadi wama a nö quili tabä —a Josué cuma.