Josué 3 - Biblia Yanowamö

Jodana u jamö bä lä bucadubaliono wei tä a̦

¹ Ö̦jö tä fena däjä, Sidimö jamö culanö Isaeli ebä ca̦i fa jocälöfälönö, Jodana u jamö Josuénö bä bluca ca̦i walobaliyoma. Bä bucaduo showao mlai ja, casö u jamö bä ca̦i bälöblaquema.

² Ö̦jamö 3 tä mö didi fa tablamalöjenö, bä lä bälöblaono wei jamö, bada bä jayuablalou fa cuaaimadunö,

³ abenaja bä nowa taö cuaamaje. —Nofi bäyäalewä bänö, Jeobaa bäma a lä bufiblaö wei a wa̦no oni lä didile tefi ca ca̦i nia balöoje. Ö̦jö wama tefi ca ca̦i fuu dablaö däjä, wamacö fa jocäfälönö, wamacö nia nocadou cuaafälöö,

⁴ wama yo dablabä. Ö̦jamö wamacö jaba funo malä mlai. Ö̦jö ma cui, wama tefi ca ca̦i balömabou fa blajaonö, tefi ca nia blajawä cuo balöoje —bä nowa tamaje.

⁵ Ö̦jö däjä, abenaja Josuénö bä nowa tama. —Jeobaa dodijidawä wama ecö cuobä, bä da yaimolo. Cafä wamacö lijamö, fena ja Jeobaa a nö nia malä quiliaö wei —bä nowa tama.

⁶ Nofi bäyäalewä bä lija abenaja Josué a cuma. —Bei. Jeobaa a wa̦no oni lä didile wama tefi ca fa cadömalöfälönö, wama tefi ca ca̦i balöo däjä, wamalecö nojamabobä —a cuma. Inaja a fa cunö, tefi ca fa cadömalöfälöjenö, Isaeli ebä fuu juo däjä, tefi ca ca̦i balölayomaje.

⁷ Ö̦jö däjä, abenaja Jeobaa a cuma, Josué lija. —Isaeli ebä lija, bada wa nö yai ö̦jöböamobä, fei däjä wawädowä bä nia jaba tablamaö. Moisesi ya ca̦i lä cuono weinaja, cafä bä nia ca̦i cuo lä nomöjöo wei tä dablabeje.

⁸ Nofi bäyäalewä bänö ya wa̦no oni lä didile tefi ca ca̦i lä fuu wejei bä lä cui, wa bä nowa nia taö. Jodana casö u jamö tefi ca ca̦i walooje däjä, mau u jamö tefi ca nia ca̦i yanöcöo balöoje —Bada a cuma.

⁹ Josuénö abenaja Isaeli ebä nowa tama. —Bä da jaboje, wama a Jeobaa lä bufiblaö wei wama a wa̦no ji̦libä —bä nowa tama.

¹⁰ Ö̦jö däjä, abenaja Josué a cuma. —Jeobaa a demi cua shi lä wa̦lilenö bämalecö ca̦i cua lä cule. Camiyä bämacö fubä jamö Canaanateli bä ma cui, idida bä ma cui, ebeo bä ma cui, feleseo bä ma cui, jejeseo bä ma cui, amoleo bä ma cui, jebuseo bä ma cui, ö̦jö bä nia bluca yashublaö baläläo. Tä taö dodijio wä. ¿Ö̦jö tawä? Ö̦jö wama tä a̦ nofi bejedi tabobä, abenaja a nia cuaaö.

¹¹ ’Jodana u jamö wamacö bucadumou ja, Bada eja tä shi̦lo Bada lä ayai a wa̦no oni lä didile tefi ca nia bälamou balöo —a cuma—.

¹² ¿Ö̦jö tawä? Ö̦jö cudeenö, Isaeli bä ijilubö 12 ebä lija wamacö yaiablalou lä nodiaö wei wamacö lija, moli bä nia yaiablamou cuaaö. Moli bä lä yaiamou wei, 12 bä nia cublou.

¹³ Nofi bäyäalewä bänö, Jeobaa eja tä shi̦lo Bada lä ayai e tefi ca ca̦i fuuje ja, Jodana u ja bä mamicö quedou däjä, u nia caläö mladou. Ola jamö u lä caläö wei u lä cui, ö̦jamö u fa co̦cablalujulunö u nia bada yododoojolayou —Josué a cuma.

¹⁴ Einaja a cuma cudeenö, abenaja bä jocäö cuaafälöma. Jodana u jamö Isaeli ebä jayuobä, tefi ca ca̦i lä funo wejei bä nofi bäyäalewä balömabomaje.

¹⁵ ¿Ö̦jö tawä? Nii bä tamou däjä, Jodana showadi u shi̦lo o̦comou. Casö jamö u jödödöblou. Ö̦jö casö u lä caläö wei jamö tefi ca ca̦i lä balöo wejei bä mamicö quedou däjä,

¹⁶ ola jamö u lä caläö wei u caläö mladaliyoma. Adamöteli bä bälöo lä olajaojolayono wei jamö, u bada fa co̦camolujulunö, ö̦jamö u shi̦lo bada yododoojolayoma, Saledateli bä bälöo lä ajedeono wei jamö. Ö̦jö däjä, Mojodi u jamö u caläö lä coloono wei u wejedou showalayofälöma. U fa wejedalufälönö, Jelicoteli bä lä bälöono wei jamö Isaeli ebä bucadua showadabaliyoma.

¹⁷ Jodana u wanoca jamö Isaeli ebä jayuaö showao däjä, Jeobaa e tefi ca ca̦i lä funo wejei bä nofi bäyäalewä yanöcöoma, Jodana u caläö lä cadidiono wei jamö. Isaeli jödödöwä ebä bluca jayuamaö showadaobeje, bä yanöcöblaa balöquema.