Josué 2 - Biblia Yanowamö

Jelico tä ulufi bomaböö lä balöono wei tä a̦

¹ Ö̦jö däjä, Sidimö jamö culanö, Nuni bä ijilubö e Josué lä cuinö, 2 cäcöbä shimöa ja̦tolema, tä ulufi bomaböbä. Abenaja cäcöbä nowa tama. —Cäcöbä da alufälö, wafä tä ulufi bomaö balöobä. Jelico wafä tä ulufi yai möö dodijobä, ö̦jö lä —cäcöbä nowa tama. Ö̦jö cudeenö, cäcöbä aa fa showadalufälönö, Jelicoteliyoma e yafi jamö cäcöbä fa co̦blalunö cäcöbä bälöblaoma. Laaba a wa̦fa suwä cuoma. A showadi lä dodoo wei a suwä cuoma.

² Jelicoteli bä lija a bada lä cuono wei anö, cäcöbä a̦fa ji̦lia showadalema. Abenaja a nowa tamaje. —Bei, bei, bei. Tä ulufi bomaböbä, Isaeli ecöbä dödöjöwä waloquei lä cufe —a nowa tamaje.

³ Ö̦jö däjä, Laaba lija bada a wa̦no wäyämou showadaobä, bä shimölema. Abenaja a nowa tamaje. —Cafä lija cäcöbä jo̦wa lä waloicufe cäcöbä da wawäblamalö, afä yafi jamö cäcöbä jo̦wa lä cule. Bämacö ulufibö bluca bomaböbä, cäcöbä malä waloqueno wei —a nowa tamaje.

⁴ Ö̦jö ma cui, cäcöbä jo̦yamabou waiquilanö, abenaja a suwä cuma. —Bejedi lä wamacö a̦. Camiyä lija cäcöbä ma waloqueno wei ma cui, “Ö̦jöteli cäcöbä daanö”, ya bufi cunomi.

⁵ Tä mö sublao däjä, ala nacö jamö yoca lä jolele yoca fe nia laaöje ja, cäcöbä siboa showalayofälöma. “Ö̦jamö cäcöbä fulayoma daanö”, ya bufi ca̦i cuimi. Cäcöbä nosi däa da showadalöfälöje, ö̦jö lä. Wama cöbä nosi fuliaö wä —a suwä cuma.

⁶ Cäcöbä ma jo̦yamabole ma cui a wa̦ li jole cuoma. Nii sibä lä jilablaano wei sibä jamö cäcöbä jo̦yaamabä, cama yafi e feyaca jamö cäcöbä lulua waiquibefälöma.

⁷ Inaja a jole cuu ja, cäcöbä dayäö aa fa showadaalujenö, Jodana u jamö bä lä bucadublaaö wei jamö bä läläama. ¿Ö̦jö tawä? Cäcöbä dayäabeje bä lä falayono wei jamö yoca laa jequemaje.

Laaba a nofi ojode lä tablamono wei tä a̦

⁸ Cäcöbä mio showao mlao däjä, yafi feyaca jamö Laaba a dubefälöma.

⁹ Ö̦jamö a fa dubofälönö, abenaja cäcöbä nowa tama. —Cafä wamacö lija Jeobaanö ei tä ulufi jibäa läa lä waiquiqueno wei ya tä daö. ¿Ö̦jö tawä? Cafä bämacö nö quili lä taö wei ya tä ca̦i daö, eja bä bluca lä bälöblai bä bufi nö lä beblalodi tä ca̦i.

¹⁰ ’Wamacö fuimabä jamö Jeobaanö modu Wacä u bada jo̦wa lä wejeamano wei, yama tä a̦ malä ji̦libole, Ejido jamö wamacö lä doculayono wei däjä —a cuma—. Jodana u bucadu jamö, amoleo bä lija wamacö ishou däjä, bada wama ecöbä waicaö lä showadaono wei, yama tä a̦ ca̦i ji̦lilema, Seono, Oco cäcöbä a̦fa bada lä cuono wei.

¹¹ Ö̦jö yama tä a̦ lä ji̦lileno wei däjä, yamacö bufi nö bleaaö showadaoma. Bämacö a̦fa ji̦liaö ja, yamacö nö quilili beblalou fe balojooma. Jeobaa wama a lä bufiblale, fedu jamö ma cui, ulufi ajamö ma cui, ö̦jö a shi̦lo Bada bufiblamou ayaobä a malä cui.

^12-13 ’¿Ö̦jö tawä? —a cuma—. Bei. Cafä wafäcö lija ya bufi lä cudalufenaja, inaja showawä fayänö yamalecö ca̦i bluca lä cule yamalecö nofi bluca da tadabölö. Fayä a ma cui, nayä a ma cui, iba mashi bä ma cui, cama ebä ca̦i bluca mö feduwä ma cui, demi yamacö cuobä. Yamacö nomaö mlaobä. ¿Ö̦jö tawä? Jolemou mlai ja, cäcöbä a̦ nö da wäbo. Jeobaa a malä cule. Ya mölaö showalanö ya cuobä —Laaba a cuma.

¹⁴ Abenaja a nowa tabölema. —Ja̦o. Cafä lija yafäcö a̦ wawädoo da showadao. Yamacö fuimaö däjä, bämacö nowamaö weicätä. Yamacö jolemou bädao ja, Jeobaa a malä cule, yafäcö shämou showadaobä. Eja yafäcö lä cuaale wa tä a̦ wäaimi ja, camiyä yamacö lija Jeobaanö ei tä ulufi yai lä däamaö wei däjä, dodijidawä cafä bämacö tamabou mö feduo weicätä. Yafäcö lä cuolenaja, yafäcö cadidou weicätä —a nowa tabölema.

¹⁵ Laaba a lä bälöono wei e yafi ösöoma. Ala nabä lä i̦tao wei jamö e yafi boaoma. ¿Ö̦jö tawä? Sibo jamö tä möbä etäca cuoma. Ö̦jö cudeenö, ö̦jö täca jamö cäcöbä documabä, tocuta cäcö ja, cäcöbä fa itomalöfälönö, cäcöbä documalema.

Shinalu wacä ubä yauböamaö lä bufino wei tä a̦

¹⁶ Cäcöbä documaö showao mlao däjä, abenaja Laabanö cäcöbä nowa taö balöoma. —Jefu bä jamö cäcöbä docua cua da showalöfälö, wafäcö lä dayälajei bänö wafäcö mö baamaö dicoo mlaobeje. Ö̦jamö wafäcö jo̦yaa showao däjä, 3 wafäcö fe nia cublou. Ö̦jö däjä, wafäcö lä dayälajei bä co̦a co̦layono wei ja, wafäcö nia lä cuaafälöö wei jamö, wafäcö cuaaö co̦ofälöbä —cäcöbä nowa tama.

¹⁷ Laaba lija abenaja cäcöbä cuma. —Yafälecö a̦ lä wäamafe, yafä tä nofi jaducäbou weicätä. Yafäcö nia jolemoimi.

¹⁸ ¿Ö̦jö tawä? Ei yama tä ulufi nabä fuimaö däjä, abenaja wa nia cuaaö. Yafälecö nia lä documaö wei täca jamö, ei shinalu wa ubä nia wacä yauamaö, wa yafibö nö ö̦jöböabeje. Eja faafä a ma cui, naafä a ma cui, afä mashi bä ma cui, wa bä nia bluca tabou. Faafänö bä bluca ca̦i lä cule bä ma cui, ö̦jö bä ca̦i.

¹⁹ ’Ai a lä cui, afä yafi jamö a ma cule ma cui, bä lä fuu wei jamö a faö mö yabao co̦o dicoo ja, cama a nofi nia nacalayou —cäcöbä cuma—. Camiyä yafäcö lija ö̦jö wa tä nowa nia taboimi. ¿Ö̦jö tawä? Ö̦jö ma cui, afä yafi jamö wa bä ca̦i lä cule, ai a famii bädao ja, camiyä yafäcö lija ö̦jö wa tä nowa nia shi̦lo tabou.

²⁰ Ö̦jö ma cui, eja yafäcö lä fuole wa tä a̦ wäaö dicoo ja, yafälecö a̦ lä wäamafe wa tä wa̦liaö waiquiwä. Camiyä yafäcö lija wa tä nowa tabou fe yadiobä, tä nia cuo majöomi —cäcöbä cuma.

²¹ Abenaja a suwä cuma. —Ja̦o. Wafäcö lä cufenaja tä cuobä, ö̦jö lä —a cuma. Ö̦jö däjä, cäcöbä shimöa showadaalema. Cäcöbä aa fa showalöfälönö, cäcöbä lä i̦tomaleno wei täca jamö, shinalu ubä wacä yaua showadamaquema.

²² Cäcöbä fa alufälönö, jefu bä jamö cäcöbä aa showadalayofälöma. Cäcöbä lä dayäano wejei bä co̦o showao mlao däjä, 3 tä mö didi ma tablamaböleno wei ma cui, ö̦jamö cäcöbä bälödalou showaoma. Ö̦jö däjä, cäcöbä lä dayäano wejei bä co̦a co̦layoma. Cäcöbä ma dayäafälöno wejei ma cui, cäcöbä dablano malä mlajei.

²³ Ö̦jö däjä, jefu a jamö cäcöbä lä cuono wei cäcöbä dimöa fa co̦lufälönö, cäcöbä bucadua co̦quefälöma. Cäcöbä fa co̦blalunö, Nuni bä ijilubö Josué e lija cäcöbä fa icuicunö, cäcöbä lä cuaano wei tä a̦ bluca wäyäböö co̦joloma.

²⁴ Josué lija abenaja cäcöbä cuma. —Bäma tä ulufi tabou läobä, bejedi lä Jeobaanö bämalecö dobäö waiquia lä cule. Bluca bä lä bälöblai bänö bämalecö nö quili taöje ja, bä bufi nö beblalou lä cudulei —cäcöbä cuma.