Josué 1 - Biblia Yanowamö

Canaana tä ulufi nabä lä shimöqueno wei tä a̦

¹ Jeobaa a wa̦ fuamobä a Moisesi lä cui, ö̦jö a fa nomalönö, Nuni bä ijilubö Josué e lija, Jeobaa a wa̦ faö nomöjöoma. Moisesi a showadi lä bayeliblano wei a li Josué cuoma. Abenaja Jeobaa a cuma, ö̦jö lija.

² —Iba ya wa̦ fuamobä a Moisesi lä cui, a mladaliyoma. ¿Ö̦jö tawä? Bei. Cafänö, fei wa bä ca̦i bluca lä cule, Jodana u jamö bä ca̦i da bucadublalu. Isaeli wama ecö lija ya tä ulufi lä jibäale jamö, wa bä ca̦i waloo showadaobä.

³ Wama tä ulufi nia lä cabäablalaö wei jamö, cafä wamacö lija ya tä ulufi jibäaö waiquia lä cule, Moisesi lija ya wa̦ nö wäo ja, ya lä cuno weinaja showawä.

⁴ ’¿Ö̦jö tawä? —a cuma—. Libano mabä däjämö tä ulufi fe bloque lä wädöle, ya tä nia bluca jibäaö. Euflade bada u sibo jamö tä fe nia casö wädöo. Idida bä lä bälöaö wei ya tä ulufi ca̦i fa jibäanö, modu bada u ja wamacö ulufibö fe nia wädöo, motoca a lä queo wei tä mashi jamö.

⁵ Wa demöo showao däjä, wa nö nia lä bleaamaö wei moli ma cui, a nö nia wa̦lojaimi. Moisesi ya ca̦i lä cuono weinaja, inaja showawä cafä bä ca̦i nia cuo nomöjöo. Bä nia mölamaimi. Bä nia daafälömi.

⁶ A nö da wa̦lojoicu. A bufi da lofotoicu. Wamacö nö badabö lija ya tä a̦fa ulufi lä wäqueno wei jamö, cafänö wa bä ca̦i bälöo majöobä, wa bä nia malä lulubou wei.

⁷ A nö da wa̦lojoicu, ö̦jö lä. A bufi lofotoa da dodijiicu. ’Ya wa̦ fuamobä a Moisesi lä cuinö, cafä lija wale wa̦no lä wäyäno wei tä a̦ nofi bluca jaducäa da dodijile, wa yai cadidiablalobä —a cuma—. Bei yo shalilibou lä culajeinaja, wa tä a̦ shalilibou cuobä. Dodijidawä wa boco ma cui ja, acasi wa boco ma cui ja, wa baablalou mlai ja, wa tä a̦ nofi yai cadidibou cuaafälöbä. Inaja wa cuaaö ja, wa fuu lä bädao wei jamö ma cui, wa nö nia shi̦lo wa̦lojaö.

⁸ ’Ei ya wa̦no oni lä cui, wawädowä wa tä a̦ nia doadii —a cuma—. Ya tä tamaö lä bufii wei wa tä a̦ nia wäyäö mladoimi. Jalu däjä ma cui, didi däjä ma cui, ö̦jö tä a̦ ja wa bufi nia daeodii, wa bufi moyawäobä. Wa tä a̦ nofi bluca jaducäbolanö, wa cadidou cuaafälöbä. Inaja wa cuaaö ja, dodijidawä wa nia cuo. Showadi wa nö nia wa̦lojaö.

⁹ ¿Ö̦jö tawä? Bä nowa taö malä waiquiofe. A nö da wa̦lojoicu. A bufi da lofotoicu. A quili dijä. A bufi ca̦i mla dijä. Wa fuu lä bädao wei jamö ma cui, cafä lija Jeobaa ya lä bufiblamou wei yanö, bä ca̦i malä cule —a cuma.

Bä bucaduobä bä lä yömölano wejei tä a̦

¹⁰ Ö̦jö däjä, Isaeli ebä ca̦i lä cuono wejei bä bada lija Josué a wa̦ fama. Abenaja bä nowa tama.

¹¹ —Bämacö yafibö lä cublai jamö wamacö fuu fa cuaanö, wama bä nowa nia taö cuaaö. Bämacö shu̦lucou showadaobä, nii bä tamaö bufii da showadaoje. Bolacabö bämacö fe fa cublalunö, bämacö nia fublou, Jodana u jamö bämacö bucaduobä. Jeobaa bäma a lä bufiblalenö, camiyä bämacö lija tä ulufi lä jibäale bäma tä nia ulufi däaö läo, bäma tä lofotobou showadaobä. Einaja wama bä nowa nia taö cuaaö —Josuénö bä nowa tama.

¹² Ö̦jö däjä, ö̦jö tä mashi bucadu jamö, Moisesinö Isaeli ai ebä mashi bälöa mö lä fedumaqueno wei bä lija Josué a wa̦ fama. Lubeni ebä ma cui lija, Cadö ebä ma cui lija, Manasesi ebä mashi ma cui lija, ö̦jö bä lija abenaja Josué a cuma.

¹³ —Jeobaa a wa̦ fuamobä a Moisesi lä cuinö wamacö da yömölablei, ¿wama tä a̦ nofi jaducäbou showaa culawä? Wamacö nowa taö ja, abenaja a cuma. “Wamacö bälöaö yanöcöobä, wama a Jeobaa lä bufiblalenö, wamacö dobäö lä cule. Cafä wamacö lija ei tä ulufi nia jibäaö”, Moisesi a cuma. ¿Ö̦jö tawä?

¹⁴ ’Bei —a cuma—. Moisesinö ei tä ulufi lä jibäano wei tä jamö, afä bä cuo juo däjä, wamacö ishou lä dao wei, Jodana u jamö wamacö nia bucadubaliyou. ¿Ö̦jö tawä? Wamacö suwäbö ma cui, wamacö ijilubö ma cui, afä yalofä bä ma cui, eja ö̦jö bä cuo juo däjä, wamacö ishobä wama täbä fa showaacönö, aifä wama bä bayeliblabä, wamacö nia balöfälöö.

¹⁵ Jeobaanö cafä wamacö bälöa yanöcömabou lä culenaja, ö̦jö bä bälöa yanöcömabou cuo showao mlao däjä, wama bä nia bayeliblaö showao balöodayou —a cuma—. Jeobaa wama a lä bufiblalenö, cama bä lija tä ulufi lä jibäaö wei tä ulufi ca̦i lofotoleije ja, Jodana ei u mashi jamö wamacö nia shi̦lo co̦o co̦imaö, afä tä ulufi jamö wamacö bälöo yai lofotoobä. ¿Ö̦jö tawä? Jeobaa a wa̦ fuamobä a Moisesi lä cuinö, cafä wamacö lija tä ulufi jibäquema, motoca a faö lä cuaaö wei u mashi jamö —a Josué cuma.

¹⁶ Ö̦jö däjä, Lubeni ebä ma cui, Cadö ebä ma cui, Manasesi ebä mashi ma cui, abenaja bä a̦ fuo ja bä cuma, Josué lija. —Yamalecö nowa bluca lä tafe, yama tä taö wä. Yamalecö lä shimaö wei jamö, yamacö fuu wä.

¹⁷ Moisesi yama a wa̦ fuadii lä cuaano weinaja, inaja showawä cafä bä a̦ fuaö wä. ’¿Ö̦jö tawä? —bä cuma—. Jeobaa wa lä bufiblalenö wa ca̦i cudiobä, ö̦jö lä, Moisesi a ca̦i lä cudiono weinaja showawä.

¹⁸ Wa tä nabä shimaö lä bädale tä ma cui ja, wa wa̦ waii dicoo ja, wa wa̦ ji̦liblaimi ja, a nia shämou. ¿Ö̦jö tawä? A nö da wa̦lojoicu, ö̦jö lä. A bufi lofotoa da dodijiicu —bä cuma.