Isaías 9 - Biblia Yanowamö

² Didi tä jamö bä mojodili lä bälöano wei bä lä cuinö tä shi̦i bada dalalemaje. Tä mö didi sublaobä jamö bä lä bälöadino wei bä lija, tä shi̦i bada bädalioma.

³ Jeobaa wa tä. Afä bä lä bälöblai wa bä balamaö co̦oma. Wa bä bufi ca̦i doblamabou, bä bufi yai doblalobä. Nii bä tamobä däjä bä bufi doblalou lä culenaja, cafä lija bä bufi doblalou cuo. Wayu bänö täbä madofi shelelaöje däjä, bä bufi doblalou lä culenaja, afä bä bufi doblao cuo.

⁴ Yedu jamö, Madianateli wa bä nö jaba lä bleaamano weinaja, fei däjä afä bä nosiemaö fe lä blacäjou wejei, wa bä ca̦i taamaö mö feduoma. Bä nö lä bleaamano wejei wa etä joyalema. Bä nosiemou fe lä yadiono wei, wa etä wa̦lialema.

⁵ Bä shäyobä jamö täbä mamicö busi bada lä caösano wei bä nia bluca ö̦shölayou. Sibä i̦yä lä cofemano wei, inaja showawä sibä nia bluca yaaöje.

⁶ Ijilu a ja bämalecö nia dobäö. Bämacö ijilubö nia jibäaö. Camiyä bämacö lija a nia Bada läo. A wa̦fa jilaöje ja, abenaja bä nia cuu. —Bä bufi yai shalilamaö lä daö wei a. Yai Bada tä nö shi̦lo wa̦lojaö lä ayai a. Bämacö Fö̦ömou shi lä wa̦lile a. Bämacö yai lä yanöcömabou wei a Bada —bä nia cuu.

⁷ A lofote lä bälöo wei etä nia yai balafälöö. Bä nia yanöcöwä ca̦i lä cudio wei etä nia mladoimi. Bada tä David a jaba nosiemou blaucou lä cuaano weinaja, a nia yai cuaaö nodio. Dodijidawä bä ca̦i fa cuonö, tä nia ulufi lofotomabou. Cama ebä bejedimobä bä nia taamaö. Bä nia dodijamaö. Inaja bä nia taamaö shi wa̦lii. ¿Ö̦jö tawä? Jeobaa a shi̦lo lofote lä ayai a lä cuinö tä nia taö. Cama ebä nofimaö fe balojoo yalo, inaja bä nia taamaö.