Isaías 53 - Biblia Yanowamö

¹ Yama tä a̦ lä ji̦libole, ¡tä a̦ nö bejedi bufibobö mlajei! Jeobaa a nö lofote ö̦jöböamobä tä ma cule ma cui, bä bufi jaducäbloimi.

² Jeobaa a nosie fuamobä e yai lä cui, jai tefi cauu fe lä yadio weinaja e tamaboma, mashita jifuwä jamö tefi nasöcö fuu fe lä yadio weinaja showawä. “Fei a liyäjäwä dao”, bäma a nofi ca̦i tabonomi. Bäma a möbä etä cuonomi. Bäma a nofi mölabobä tä ca̦i cuonomi.

³ A nö waiblamaje. A wailemaje. ¿Ö̦jö tawä? Bufi nö bleaaö tä lä cui tä daö dodijioma. Täbä nö ninili lä bleaaö wei tä ca̦i. Bä cua lä bädaa wei bä möö lä mlajeinaja, cama a ma cui bäma a mönomi. “Ei lija bämacö mölabä”, bämacö bufi cunomi.

⁴ Camiyä bämacö bufi nö yai bleaabä tä ma cuono wei ma cui, ö̦jönö tä fa dälönö, cama a bufi nö bleaaö läoma. Camiyä bämacö nö ninili bleaabä tä ma cuono wei ma cui, ö̦jönö tä fa dälönö, cama a nö ninili bleaaö läo dodijioma. Inaja tä ma cuono wei ma cui, “Yai Bada tänö a nö bleaamaö”, bäma a nofi tabou dicooma. “Ö̦jönö a li inaja taamaö”, bämacö bufi jole cuu dicoblaoma.

⁵ Ö̦jö ma cui, camiyä bämacö nofi lä jushuaö wei tä nowa ja, a li diquiamaje. Camiyä bämacö doblou lä mlai tä nowa ja, a famia dodijilayoma. ¿Ö̦jö tawä? Cama a nö lä bleaano wei tänö, bämacö demöo co̦olaliyoma. A si lä yoano wejei tänö, bämacö jaloa co̦laliyoma.

⁶ Oweja bä mojoluu si ijejewä lä cuaaö weinaja bämacö bluca cuaaö fa dicoonö, bämacö mojoluolaliyoma. Camiyä bämacö cuaaö bufi lä doblao weinaja bämacö li cuaaö dicooma. Ö̦jö tä nowa ja, Jeobaanö bämalecö nö bleaamabä tä ma cuono wei ma cui, ö̦jö lija tä nowa fa majöcönö, tä li yädämaquema.

⁷ A nö ma bleaamano wejei ma cui, a ma shäno wejei ma cui, a wa̦ fuonomi. Oweja a ocalo shäbeje, a öböaö lä culajeinaja, a öbölefälömaje. Bä co̦icu jasöbeje bä wamicai däläcou lä culenaja a wa̦ ca̦i faimi cuoma.

⁸ A nö bleaamabeje etä cuono ma mlai ma cui, a jimabeje etä cuo ma mlaono wei ma cui, a nomamabeje a öböa fe yadilefälömaje. Bä bufi jaducäa mlalanö a shämalemaje. Camiyäteli bämacö doblou lä mlai tä nowanö, a shämou läoma.

⁹ A waitelimono ma mlai ma cui, a caficö jolemono ma mlai ma cui, bä doblou lä mlai bä nomawä didiobä täca jamö, a nia didiamaje. Inaja a nia ma taamano wejei ma cui, a madofibö lä dodijiono wei a didiobä täca jamö, a nomawä yai tamoquema.

¹⁰ Inaja a ma taamano wejei ma cui, cama Jeobaanö a famimaö bufio fa waiquionö, a li famimamaje. Camanö a nö ninili blemalalema. Ö̦jö ma cui, wa̦lidiwä tä nowa mladobä a fa dodomoicunö, fei däjä a nia yai cudio dodijio. Cama ebä nia lä nodiblou wei ebä nia dablaö. Jeobaanö tä taamaö lä bufii wei, ö̦jönö tä bluca fa fulinö, tä nia bluca cadejaö cuquei.

¹¹ A bufi nö ma bleaano wei ma cui, ö̦jö tä dodijidawä fa dalalönö, a bufi nia doblao fe yadio. Jeobaa a nosie fuamobä a lä cui, a lä bejedimou wei ö̦jö a. Ö̦jö a lä daö wejei bä lä cui, a daöje yalo, jai bä bejedimou waiquiwä Jeobaanö bä nofi nia bluca tabou. Bä doblou lä mlai, cama lija etä nowa nia bluca yädäo.

¹² Wa̦lidiwä talewä bä lija a fa yädämacöjenö, bä doblou lä mlai tä nowa däa lälema. A shämobä tä ma cui ja, a ojodao fe yadioma. Wa̦lidiwä talewä bä nö bleaamaö mlaobä, Jeobaa lija a wa̦ läblaliyoma. Ö̦jö cudeenö, bada bä yai lä cui, bä nofi dodijidawä tamabou däjä, Jeobaanö wawädowä ö̦jö a nofi nia yai tamabou. Bä nö wa̦lojaö lä ayao wei bä a̦ shi dou däjä, ö̦jö a wa̦ shi nia yai dolayou.