Isaías 50 - Biblia Yanowamö

⁴ Yai Bada tä Bada lä ayainö wale a̦ damaö, bä lä modaö wei camiyä ya wa̦nö ya bä bufi lofotomabou fe yadiobä. Fena däjä showadi wale la̦maö fenao talei, ya wa̦ ji̦libä. Bä damamou bufi lä doblao wei bä yömöca dao lä cuo weinaja, ya yömöca dao cuobä.

⁵ Ya wa̦ ji̦liaö walalaobä, Yai Bada tä Bada lä ayainö wale fa tablamalönö, “Ja̦o. Inaja lä waiquiwä”, ya e cudalioma. Ya wa̦ ca̦i shominajablou majöonomi.

⁶ Wale lä shäno wejei bä lija ya mabucabö dodooma. Wale caweicö lä fucucaö wejei bä lija ya calemocu ca̦i dododou mö fedua showadalayoma. Wale nö lä waiblano wejei bä ma cui lija, wale lä cläshano wejei bä ma cui lija, ya wäyäcu jo̦yaonomi.

⁷ Yai Bada tä Bada lä ayainö wale bayelibou yalo, ya möfe quilili boomi. Iba tä jamö ya li shalilou. Ya tä daö waiquiwä cudeenö, “Shädayai”, ya nia cuimi.

⁸ Wale nofi lä bäyäbou wei a lä cuinö wale ca̦i cua lä cule. ¿Wedinö wale a̦fa nia li taö, ö̦jö lä? Camiyä lija wa wa̦ nia lä läo wei, eja a da ajedeiquiyo.

⁹ ¿Ö̦jö tawä? Wale lä bayeliblaö wei, Yai Bada tä Bada ayawä. ¿Wedinö wale nia li dobloimi jimaö bashio? Camiyä lija bä nö lä nabämou wei bä nia cudiomi. Täbä lä didio wei sibä joleböö lä cuaaö weinaja, bä nia cuaaö. Jo̦la fesibänö sibä fa wädölalöjenö sibä wa̦lidiblou lä culenaja showawä.

¹⁰ Jeobaa wama a nö quili lä taö wei wamacö lija ya wa̦ faö lä cule, ö̦jö a nosie fuamobä e lä cui, wama e a̦ lä fuaö wei wamacö lija. Wamale a̦ da ji̦li. Tä mö didi sublao däjä, cowa wacä bou mlajei ja, bä fuu dobloimi lä culenaja wamacö cuaaö dicoo ja, Jeobaa a nofi mölabou fe da yadioje. Yai Bada wama a lä bufiblaö wei, ö̦jö lija bä yai da bayeliblamo.

¹¹ Ö̦jö ma cui, wama tä möö fe yadiobä, cowa wama wacä bä lä yäbou wei wamacö lija, abenaja ya cuu, fii fi jamö wama wacä bä befi ca̦i lä ji̦ibou wei wamacö lija. Afä wama wacä bä shi̦i lä bou wei ja wamacö mölaö dicoo ja, camiyänö bämacö nö bleaamaö cuquei. Wamacö nö bleaabä jamö bämacö nia blabou.