Génesis 9 - Biblia Yanowamö

Jeobaa a wa̦ nö lä wäono wei tä a̦

¹ Ö̦jö däjä, Yai Bada tänö Noewä ebä balamaö bufima. Abinaja bä nowa tama. —Bei. Wamacö ijilubö fa lalonö, bä da balalö. Jödödöwä tä jamö wamacö bälöjou cuaabä.

² Yalo bä bluca lä cuinö, showadi wamacö nö quili tabeje, ya bä tablamaö a lä cule. Mashita jamö bä yalo lä juu wei bä ma cui, bä lä yäö wei bä ma cui, bä wajaquemi wai lä joleaö wei bä ma cui, modu u jamö bä bluca lä juu wei bä ma cui, cafä wamacö nija, ya bä nabä shömöaö a lä cule.

³ Bä bluca lä juu wei bä ja, bämacö dobäö lä cule, wamacö naiqui waobä. ’Bä bluca lä cauu wei ya sibä jaba jöbäö lä cuaano weinaja, fei däjä yalo bä ma cui, ya bä jöbäö nomöjöa lä cule. Afä bä bluca cuobä.

⁴ Ö̦jö ma cui, yalo wama i̦yäbö faa fa balömalönö, wama a nia shino waö. Bei bä i̦yäbönö bä demi cuo yalo, ya bä i̦yä i̦yä waö wasöö.

⁵ Ai tänö wamacö shäö ja, bämacö nö i̦yäbö yuaö wä. Yanowamö a ma cui nija, yalo a ma cui nija, bämacö i̦yäbö nö yumalei.

⁶ Yanowamö anö ai a shäö dicoo ja, yanowamö täbä nija cama a nia shämou nomöjöo. Camiyä Yai Bada ya lä culenaja a cuwä, ya yanowamö malä tablaleno wei.

⁷ ’Cafä wamacö lä cui, wamacö ijilubö fa lalonö, bä da balalö. Wamacö balaö fa nodiablalofälönö, jödödöwä tä jamö wamacö bälöjou cuaabä —a cuma.

⁸ Ö̦jö däjä, abinaja Yai Bada tänö Noewä, bei ijilubö ebä sho, bä nowa bluca tama.

⁹ —Bei. Wamale a̦ da ji̦lilä. Cafä bämacö nia lä bayelibou wei, ijilufä ya bä nodiwä ca̦i nia lä bayelibou wei, ya tä a̦ wäaö da cadidio.

¹⁰ Yalo bä ma cui, ya bä nia lä bayelibou wei ya wa̦ nö wäo. Bä lä yäö wei bä ma cui, bä yalo lä tabou wejei bä ma cui, ulifi jamö bä lä juu wei bä ma cui, canawä a jamö wama bä bluca ca̦i faa lä co̦layono wei, ya bä bayelibobä.

¹¹ ¿Ö̦jö tawä? Ya wa̦ nö wäo cadidia lä cule. Modu u bada o̦quinö, jödödöwä ya bä nia bluca mladamaö co̦daaimi. Mashita a wa̦liaö jödödöblobä, modu ya u nia bada o̦coblamaö co̦daaimi —bä nowa tama.

¹² Abinaja Yai Bada a cuu co̦oma. —Bei. Cafä wamacö ma cui, yalo wama bä ca̦i lä cule bä ma cui, bämacö nia bluca lä bayelibou wei, ya wa̦ nö wäo lä cufe. Ya wa̦ nö lä wäicufe, showadi tä nia cuo shi wa̦lii. Wamale a̦ nofi jaducubobä,

¹³ ölajashi a jamö ya täcö shi̦i nia taaö. Ei bämacö nowa lä tafe wama tä a̦ nofi jaducubobä, ya täcö shi̦i shadiamaö wä.

¹⁴ ’Showadi ölajashi ya bä lä taamaö wei däjä, ö̦jamö täcö shi̦i fa wawälönö,

¹⁵ ya wa̦ nö lä wäono wei, ya tä nofi nia jaducubou showao —a cuma—. Showadi bämacö nia lä bayelibou wei, jödödöwä bä demi lä cublai, ya bä nia lä bayelibou wei, ya tä nofi nia jaducubou. ¿Ö̦jö tawä? Modu unö ya bä bluca mladamaö lä culofenaja, inaja tä nia cublou co̦daaimi.

¹⁶ Ölajashi a jamö, täcö shi̦i wawäblou däjä, ya täcö shi̦i nia möö. Ö̦jö däjä, ya wa̦ nö lä wäicufe tä ja, ya bufi nia jaducuo, bämacö nia lä bayelibou wei tä ja. Bita jamö wamacö bluca lä cublai, bämacö nia bayelibou shi wa̦lii —a cuma.

¹⁷ Noewä nija abinaja Yai Bada a cuu nomöjöoma. —Iba wama täcö shi̦i nofi tabobä ya wa̦. Bita jamö wamacö lä cublai, bämacö bluca nia lä bayelibou wei, bei ya tä a̦fa wäyäö cadidio lä cufe. Inaja lä waiquiwä —a cuma.

Noewänö bei ijilubö ebä ca̦i lä cuaano wei tä a̦

¹⁸ Canawä a jamö, Noewä bei ijilubö ebä faa lä co̦laliyono wei, einaja ebä a̦fa li cuoma. Semö, Camö, Jafede bä a̦fa cuoma. Camö a lä cui, Canaana bä fö̦ö e cuoma.

¹⁹ Ö̦jö Noewä bei ijilubö 3 ebä nija, täbä balaa fa co̦lunö, jödödöwä tä ulifi jamö yanowamö täbä bälöjou cuaaö co̦oma.

²⁰ Bei. Noewä bei a ficalimou co̦oma. Ai bänö uba shitobö döaö balöa mlajei ja, Noewänö totobä jaba döaö balöblaoma.

²¹ Ö̦jö totobä ja, bä fa lalolunö, Noewänö uba nashiwä toubä coama. Toubä nashiwä fa coalalönö, a shi wa̦lima. A shi fa wa̦lilönö, a bufi dao mlalanö, cama e yano jamö a shinoco quelayoma.

²² Bä fö̦ö e nano jamö, Camö a fa falönö, bä fö̦ö a shinoco blaa fa dalalönö, a möma. Sibo jamö a faa fa co̦lunö, bä a̦iyäbö ecöbö nija a wa̦fa wäyäma.

²³ Bä a̦iyäbö ecöbönö, a wa̦ fa ji̦libölänö, a shinoco nofi jo̦lijiblabölema. A fe yojoböa co̦obä, camishi cäcö fa däbölönö, bei cäcöbö facocu ja, cäcö lucäbölema. Bä fö̦ö a shinoco möböö fa quilinö, bei cäcöbö mabucabö jamö, cäcöbö fa diluloimadunö, a fe yojoböa co̦quefälöma.

²⁴ A shi lä wa̦lino wei a jaloa fa co̦lunö, Noewä a jocädou co̦layoma. Bei ijilubö oshe e lä cuinö, a shinoco lä möno wei a wa̦ fa ji̦lilänö,

²⁵ a nö a̦fa bleaaö wäyäma. Abinaja a cuma. —Ijiluyä Canaana a lä cui, a nö bayeli cua mlai ja, cama ebä mashi nosie juamobä, a li tabou buobeje a nia cuo. A shömamamou nö bleaaö bädaobä.

²⁶ Jeobaa ya lä bufiblaö wei nija, ijiluyä Semö a lä cui, showadi ö̦jö a nia shino bayeliblamamou ayao. A nosie juamobä, Canaana a nia tabou.

²⁷ Ijiluyä Jafede a ma cui, inaja a ca̦i bayeliblamamou fa cuonö, cama a balaa fa dodijilönö, bä nia bälöjou cuaaö. Semö nija a fa co̦calunö, showadi Yai Bada tänö bä bluca bälömabou yanöcöobä. Jafede a nosie juamobä, Canaana a li tabobä —Noewä a cuma.

²⁸ Tä ulifi fe baoblou waiquilayono wei ja, Noewä a bälöaö nö dedeaö co̦oma. Lasha 350 a faa co̦malema.

²⁹ ¿Ö̦jö tawä? Noewä a demi bälöo showao däjä, lasha 950 a fa famalönö, a bufi ya̦cumö mlaquema.