Génesis 46 - Biblia Yanowamö

Ejido jamö, Jacobonö cama ebä ca̦i lä ayono wei tä a̦

¹ Inaja tä fa cublalunö, Isaelinö cama ebä ca̦i bluca shu̦lucua fa showadalonö, bä ca̦i aa showalayoma. Bä ca̦i fa alufälönö, Beeseba jamö bä ca̦i waloa balöquema. Ö̦jamö bä ca̦i fa waloicunö, Yai Bada nija, Jacobonö yalo bä ö̦shö dodobofälöma. Bä fö̦ö Isaacö e lä cuinö a bufliblaö lä balöono wei a lä cui nija.

² Ö̦jamö Yai Badanö Isaeli a wa̦ majali wayomama. —Jacobo, Jacobo. —Aö.

³ Ö̦jö däjä, ö̦jamö lä Yai Bada a wa̦fa wämoquema. —Camiyä Yai Bada cä ya. Faafänö wale bufiblaö lä balöono wei, ö̦jö lä ya e. Ejido jamö a dömöö quili dijä. Ö̦jamö bäfä bayeliblaö ja, wamacö fa balalönö, ijilufä nodiwä ebä nia bälöo lojodoo yaiblamou cuaaö.

⁴ Camiyänö, Ejido jamö bäfä ca̦i nia dömöfälöö. Ö̦jamö lä ijilufä nodiwä ya ebä ca̦i dolequea fa co̦bonö, ya bä bälaö co̦o wä. Cafä wa lä cui, ijilufä José nijamö, wa bufi nia wa̦lobada mlao —a majali cuma.

⁵ Ö̦jö däjä, Beeseba jamö a shu̦lucua fa co̦lonö, Jacobo a aa co̦layofälöma. Ejidoteli bada a lä cuinö, Jacobo bä befi lä shömöleno wei bä läläamodima ja, Jacobo bei ijilubö ebänö, bä bluca fa döcäamalalöjenö, bä befi ca̦i bluca läläjäoquema. ¿Ö̦jö tawä? Bä fö̦ö e ma cui, bei suwäbö bä ma cui, bei ijilubö bä ma cui, ö̦jö bä bluca fa döcämalöfälöjenö, bä befi ca̦i bluca lälälayomaje.

⁶ Bä yalobö ma cui, bä madofibö ma cui, Canaana jamö bä bluca lä däalaleno wejei bä ma cui, ö̦jö bä befi ca̦i bluca fa alujenö, Ejido jamö bä ca̦i bluca waloquemaje. Inaja lä tä fa cuonö, Jacobonö cama ebä ca̦i bluca waloa showaquema.

⁷ Bei ijilubö ebä ma cui, bei fääshä ebä ma cui, bä tääbö ebä ma cui, bä yaö ebä ma cui, cama ebä bluca lä cui, Ejido jamö bä ca̦i waloa showaquema.

Jacobonö bä ijilubö e möö co̦o fe lä yadiono wei tä a̦

²⁹ Bä fö̦ö e a̦fa juu fa ji̦lilänö, Josénö läläamodima cäcö blacämaö fa bufinö, Cosena jamö a befi ca̦i läläaö yamou mö baafälöma. Bä fö̦ö nijamö a fa icuicunö, a fa fa̦locoblaicunö, a nomöa bou nö dedeama.

³⁰ A wa̦ waicolanö, abinaja Jacobo a cuma, José nija. —U̦asi. Bäfä wäyäcu dablaö co̦a ja, bufi yanöcöwä ya bufi wa̦lobada nia mlao. Bäfä demi dablaö malä co̦le —a cuma.

³¹ Cama mashi ebä ma cui, bä fö̦ö enö ebä ca̦i lä bälöono wei bä ca̦i bluca ma cui, abinaja Josénö bä nowa tama. —Camiyänö, fei däjä bada nija bämacö a̦fa nia wäyäö. Abinaja ya nia cuu. “Canaana jamö bä fa shu̦luculonö, iba mashi bä lä cule, fayänö cama bä ca̦i bluca lä cule, camiyä wale fe walouje ja, bä bluca co̦blaliyou lä cufe”, ya nia cuu.

³² “Showadi ji̦ima bä ca̦i oweja juuje. Yalo bluca bä ca̦i shino malä tabou wejei. Cama oweja ebä ma cui, shibo ebä ma cui, baca ebä ma cui, bluca ebä lä tabolajei, bä ca̦i jödödöwä waloquei lä cufajei”, ya nia cuu.

³³ ’Ö̦jö däjä, bada a lä cuinö wamacö nacaö däjä, wamacö nia wa̦lii. “¿Wedi tä dodijiwä ja wamacö ojodamobä, bei wamacö daanö?” a cuu däjä,

³⁴ abinaja wama ecö cubä. “Cafä wa nosie juabä yamacö lä cuinö, showadi yalo yama bä ca̦i lä juu wei yamacö. Yamacö fiyao däjä, yamacö jaba lä cuaano weinaja, yamacö cuaaö showawä. Camiyä yamacö ma cui, iba bada bä jaba lä cuono wei bä ma cui, showadi inaja yamacö lä cuaaö wei yamacö”, wama ecö cubä —Josénö bä nowa tama—. Inaja wama ecö cuu ja, Cosena tä ulifi jamö wamacö nia bälömabou yaio. Ejidoteli bänö, oweja bä ca̦i lä juu wejei, showadi bä coyocomabou nofi malä wa̦libou wejei —a cuma.