Génesis 41 - Biblia Yanowamö

Ejidoteli bada a lä cui a tabimoa lä nomöjölayono wei tä a̦

¹ Bolacabö lasha a fa falönö, bada a lä cui a tabimolayoma. Nilo u casö jamö a majali fa ublaicunö,

² baca 7 bä majali washölöblou dalalema. Bä majali liyäjäoma. Bä bleoma. Nilo u ja bä fa washölöblalunö, dulucama acasibä ja, bä majali iyaö showadaoma.

³ ¿Ö̦jö tawä? Ö̦jö bä nodiböcö jamö, baca 7 wa̦lidiwä bä majali washölöblou nodilayoma. Bä lomioma. Nilo u ja bä washölöblou fa nodilonö, bä jaba lä washölöblaliyono wei bä nija, Nilo u casö ja, bä däläcäo ajedeoma.

⁴ Ö̦jö däjä, bä baca lä lomi wei bä lä cuinö, bä bada lä blei bä bluca majali waalalemaje. Ö̦jö däjä, bada a lä cui a la̦layoma.

⁵ A mia fa co̦alunö, a tabimoa co̦layoma. Nii moli si majali daa nomöjölalema. Nii ö̦jö si ja, 7 sibä majali boco cuoma. Ö̦jö sibä boco ja, mobä bada liyäjäo dodijioma.

⁶ Ö̦jö däjä, ö̦jö si ja, 7 ai sibä boco majali yädäblou fa showadalonö, wa̦lidiwä mobä wai wa̦blädäwä majali cuoma. Tä fa yoblaonö, wadoli a ca̦i yobli ja, mobä fa shi̦liquilalunö, mobä wa̦blädälaliyoma.

⁷ Ö̦jö wa̦lidiwä mobä lä cuinö, mobä nö lä niji wei mobä majali sufaaquemaje. Ö̦jö däjä, “¡Shädayai! ¡Ya nofi lä tabimolufe!”, a bufi cuu ca̦i la̦layoma.

⁸ Ö̦jö cudeenö, bada a bufi wa̦lidiwä ca̦i jocäa fenalayoma. A bufi fa wa̦lidionö, Ejidoteli bä jäo lä mlai bä fecula bluca nacamalema. Bä bufi lä dao wei bä ca̦i bluca nacaa mö fedua showamalalema. Ö̦jö bä nija, bada a lä cuinö, tabi tabi cäcö a̦fa wäyäö ma showadaono wei ma cui, bä bufi bluca wedinajamoma. Moli ma cui, etä a̦ tabi wawämabä a cuonomi.

⁹ Ö̦jö däjä, bada nashiwä e toubä tabeje jamö a lä läono wei a lä cui, a bufi möblaliyoma. Bada a yömölaö showadaoma. —Ya tä a̦ wäabä ya ma cuono wei ma cui, ya bufi mojodulaliyoma. Fei däjä ya bufi möblou co̦layou lä cufe.

¹⁰ Camiyä yafäcö nija, cafä bada wa lä cui, wa fa jushudalunö, yafälecö fe laquema. Camiyä ma cui, afä nii bä tabeje jamö a läo mö lä feduono wei a ma cui, yafälecö fe laa bolacaquema. Wa nowamabeje bä sodado ca̦i lä cule e yafi ja, yafälecö taamaquema. ¿Ö̦jö tawä?

¹¹ Moli tä didi ja, ö̦jö sho, yafäcö tabimoa bolacaa showadaaliyoma. Tabi täcöbö a̦ wawämamobä, täcöbö a̦ bolacaoma.

¹² ’¿Ö̦jö tawä? —a cuu co̦oma—. Yafäcö fe lä laono wei jamö, ebleo a fiya ca̦i cuo mö feduoma. Sodado bä ca̦i lä cule e fiya cuoma, a nosie juamobä. Yafäcö tabi lä cuaano wei, ö̦jö nija yafä tä a̦ fa wäcönö, yafälecö a̦ tabi wawämalema. Camiyä nija ma cui, cama nija ma cui, bolacabö yafälecö yömölaö cadidio showaoma.

¹³ Yafälecö a̦ tabi wawämaö ja, a lä cuno weinaja, tä bejedi cublou showalayoma. Camiyä ya lä cui, eja wale läa malä co̦maqueno wei. Ö̦jö a mö feduwä lä cui, fii fi jamö wa malä yaumaqueno wei —a cuma.

José nija, bada tänö a wa̦ tabi lä wäyäno wei tä a̦

¹⁴ Ö̦jö däjä, bada a lä cuinö, José a nabä shömöa fa showadacönö, bä fe lä laono wei jamö, lobe a co̦a showalemaje. A möcö bäblamaö fa balölojenö, camishi ecö fa jayublamalöjenö, dodijidawä cäcö ja a lucäa nomöjömalemaje. Ö̦jö däjä, bada a lä cui nija a icua showadamaquemaje.

¹⁵ Bada a lä cuinö, abinaja José a nowa taö mö baoma. —Ya lä tabimolayono wei, ya tä a̦fa tabi ma wäyäö wei ma cui, yale a̦ tabi lä wawämaö wei a cuami. Cafänö täbä lä tabimou wei wa tä jo̦wa shino tabi daö. Tabi tabi wa täbä a̦fa ji̦liaö ja, wa wa̦ jo̦wa shino cadidou talei —José a nowa tama.

¹⁶ Bada a lä cui nija, abinaja José e cuma. —Camiyänö mlai, Yai Bada tänö, ö̦jö täbä li tabi daö. Cafä bada wa lä cui, dodijidawä wa cuobä, Yai Bada tänö tä wawäblamaö wä —a cuma.

¹⁷ Ö̦jö däjä, José nija, abinaja bada a cuma. —Bei. Nilo u casö jamö ya majali ublao däjä,

¹⁸ baca 7 bä majali washölöblaliyoma. Bä majali bleoma, bä liyäjäoma. Nilo u ja, bä majali fa washölöblalunö, dulucama acasi bä ja, bä majali iyaö showadaoma.

¹⁹ Ö̦jö bä nodi jamö, baca 7 ai wa̦lidiwä bä majali washölöblou nomöjölayoma. Bä lomioma. Ejidoteli bä lä bälöjöi jamö, bä baca lomi lä culenaja mlai, ö̦jö bä baca majali yai lomio fe balojooma.

²⁰ Ö̦jö bä yalo wa̦lidiwä, lomi bä lä cuinö, ai bä bada lä blei, 7 bä jaba lä washölöblaliyono wei bä lä cui, bä bluca majali waalalemaje.

²¹ Bä ma waalaleno wejei ma cui, jai bä wanomije bä majali mömou cuo fe yadio showaoma. Bä jaba lomi lä cuono weinaja, inaja bä majali cuo showao fe yadioma. Ö̦jö däjä, ya la̦layoma.

²² ’Ö̦jö däjä, ya mia fa co̦icunö, nii ya si ca̦i majali dalalema. Nii moli si ja, 7 sibä boco majali fa cuicunö, mobä majali bada blewä liyäjäoma.

²³ Ö̦jö bä nodi jamö, 7 ai sibä boco majali fa yädäblalunö, wa̦lidiwä mobä wai wa̦blädäwä majali cuoma. Tä fa yoblaonö, wadoli a ca̦i yobli ja, ö̦jö mobä majali wa̦blädäoma.

²⁴ Ö̦jö wa̦lidiwä mobä lä cuinö, mobä nö lä niji wei mobä bluca majali sufaaquemaje. ¿Ö̦jö tawä? Täbä fecula jäo lä mlai täbä nija, tabi tabi ya tä a̦fa ma wäyäno wei ma cui, tä a̦ ca̦i wawämanomije. Moli ma cui, yale a̦ tabi wawämabä a ca̦i cuonomi —bada a cuma.

²⁵ Ö̦jö däjä, abinaja Josénö bada a nowa tama. —Bada wa lä cui, wa tabimou ma bolacaono wei ma cui, tabi tä a̦ nia lä wawämamou wei, moli tä li waiquiwä. Yai Bada tä nia lä cuaaö wei, cafä bada wa nija, tä wawäa cadidia balömalema.

²⁶ ’Baca 7 dodijidawä wa bä majali lä dalaleno wei, tä nö ulifi nia lä nijiblou wei, ö̦jö lasha 7 a nia lä cublou wei wa tä tabi dalalema. Nii 7 dodijidawä wa sibä boco ca̦i majali lä dalaleno wei, ö̦jö lasha 7 a nia lä cublou wei tä co̦dawä. Wa majalimou ma bolacaono wei ma cui, ö̦jö moli tä waiquiwä cuoma.

²⁷ ’Ö̦jö tä nodi jamö, lasha 7 a faö jaöo mlao däjä, tä nö ulifi nia ofäblou lä nomöjöo wei, tä ca̦i wawäa showamalema —José a cuu co̦oma—. Baca dodijidawä bä nodi ja, 7 lomi, wa̦lidiwä wa bä majali washölöblou malä dalaleno wei. 7 ai sibä boco majali faa fa nodilönö, wa̦lidiwä mobä wai majali wa̦blädäwä cuo malä nodiono wei. ¿Ö̦jö tawä? Tä fa yoblaonö, wadoli a ca̦i yobli ja, mobä shi̦liquilayoma mobä majali malä cuono wei.

²⁸ ’Yai Bada tä nia lä cuaaö wei, cafä bada wa nija tä wawäa cadidia balömalema. Cafä bada wa nija, ya lä cufenaja showawä.

²⁹ Ejido tä ulifi jödödöwä jamö ma cui, tä nö ulifi nia nijiaö nö dedeaö. Lasha 7 a faö jaöo mlao däjä, tä nö nia nijio showao.

³⁰ Ö̦jö ma cui, tä nö nijiaö nö dedea fa balöonö, ofi a nia yafii. Lasha 7 a ma faö wei ma cui, tä nö ulifi nia ofäo showao. Ö̦jö däjä, “¡Tä nö ulifi da nijioblei!”, täbä bufi nia cuimi. Tä nö ulifi nia ofäaö nö fa dedelönö, tä ulifi nia wa̦lidiblou jödödöo nomöjöo.

³¹ Tä nö ulifi ofäblou lä yaublole däjä, täbä nö nia ofili bleaaö dodijio. Tä nö ulifi jaba lä nijiblaliyono wei tä lä cui, wiisibö tä ca̦i nia cuo co̦daaimi.

³² ’Tä nia lä cublou wei, cafä bada wa nija tä wawäa bolacamalema —José e cuu co̦oma—. Yai Bada tänö, ö̦jö tä nofi cadidibou waiquia cudeenö, tä wawäa bolacaa showamalema. Bä tä taö bufi doblaa waiquia lä cule.

³³ ¿Ö̦jö tawä? Cafä bada wa lä cuinö, ai wa bada yädämabobä, a da dayä, ö̦jö lä. A bufi lä moyawe wei, a bufi lä dao wei, wa fa dalalönö, Ejido tä ulifi jödödöwä jamö, a nosiemou blaucobä.

³⁴ Cafä bada wa lä cuinö, ai wa bä bada tablamaö mö fa fedulonö, jödödöwä tä ulifi ma cui jamö, bä lämou jödödobä. Lasha 7 a faö jaöo mlao däjä, tä nö ulifi nijiblou däjä, ai bä nii mö feduwä lä cui, bä nii doabeje. ¿Ö̦jö tawä? ’Bä nii lä taö wejei jamö, 5 bä nii jilablaö fa cuaajenö, ai moli bä ja, bä doaö cuaabeje —a cuu co̦oma—.

³⁵ Inaja tä nö ulifi nijiaö showao däjä, ö̦jö bä nii lä cui, bä nii doaö fa cuaajenö, bä shömomaö cuaabeje. Bä shabonobö jamö bä fa shömomajenö, bä talö tabobeje. Cafä bada wa lä cui wa wa̦ ja, tä tamobä.

³⁶ Obi, tä nö ulifi nia lä ofäblou wei däjä, ö̦jö bä nii lä shömomaö wejei bä ja, Ejidoteli bä bluca iyaö fe yadiobä. Ejido tä nö ulifi ofäo däjä, lasha 7 a ma faö däjä ma cui, bä caijou fe yadio showaobä —José a cuma.

José bada a lä tablamolayono wei tä a̦

³⁷ Bada a ma cuinö, ai ebä lä yädämabono wei ebä bada ma cuinö, José a wa̦ ji̦lilemaje. “A lä cufenaja lä”, a nofi tabomaje.

³⁸ A wa̦ fa ji̦liläjenö, cama ai ebä nija, a wa̦ bada falayoma. —Josénö bufi moyawe tä nacaamaö lä bufife, ö̦jö lä ya bufii lä cufe. Yai Bada tä Bufinö a bayeliblamou. Ö̦jö cama a lä culenaja, ai bäma a nia dablaö majöomi. Fei a li waiquiwä —a cuma.

³⁹ Einaja a fa cunö, José nija, bada a wa̦ cadidia showaquema. —Cafä wa bufi moyawe lä culenaja, wa bufi dao lä culenaja, ai a cuami. Tä nia lä cublou wei, cafä wa yai nija, Yai Bada tänö tä malä wawämaleno wei.

⁴⁰ Wa wa̦ ji̦liabeje, iba yafi jamö bäfä nia lämabou. Iba bä blucanö, cafä wa nosie nia juaöje. Inaja cafä wa ma cuo däjä ma cui, camiyä nija, “Bada cätä”, showadi bä nia cuu yaimou.

⁴¹ Abinaja bada a ca̦i cuma, José nija. —Bei. Ejido tä ulifi blaucuwä jamö wa lämobä, bäfä bada tablamaö lä cule —a cuma.

⁴² Ö̦jö däjä, bada a lä cuinö, bei imi ja olo modolewä a lä ya̦bono wei a fa jayublalönö, José imi ja, a ya̦a majöquema. Camishi dodijidawä lä dodijii cäcö ja, a ca̦i lucämalema. Baushi olo cäcö ca̦i jalemaquema.

⁴³ Bada a befi ca̦i läläabä, ai etä mashi tabou mö lä feduono wei etä ja, José a döcämaquema. A befi ca̦i lä läläano wei jamö, ai bä fa balöafälönö, i̦cali bä comöö cuaafälöma. —¡Bada yama a ca̦i juu lä cuimi! Wamacö fa dijoafälönö, ¡bä möfe bluca da boolalu! Einaja bä cuu fa cuaanö, Ejido tä ulifi jödödöwä jamö a lämobä, bluca täbä nija a nö bada ö̦jöböamalalemaje.

⁴⁴ Inaja bädawä mlai, José nija, abinaja bada a lä cui a ca̦i cuma. —Camiyä bada ya yai cua ma cule, cafä wa wa̦ faö showao mlao däjä, täbä nia qui̦bloimi. Ejido tä jamö, wa nia bada läo blaucou mö feduo —a cuma.

⁴⁵ Bada a lä cuinö, Safabanea José a wa̦fa ca̦i jilaa nomöjöquema. José a suwäbö tamabobä, Bodifela bä tää e ca̦i jöbäquema, Asenada a wa̦fa suwä lä cuono wei. Ö̦jö a Bodifela lä cui, Ono jamö täbä nofi lä bäyäbono wei, a fecula cuoma. Inaja tä fa cublalunö, Ejido tä jödödöwä jamö, José a nö bada ö̦jöböamou blaucou cuaama.

⁴⁶ José a bada lä tablamolayono wei däjä, fiya a cuo showaoma. Lasha 30 a fa famalönö, Ejidoteli bä ca̦i lä bälöono wei a bada lä cui nija a fa icuicunö, bada bei a tablamalema. A bada fa tablamalönö, Ejido tä ulifi daö jödödou showadaobä, a ayofälöma.

Josénö nii bä shömomaö cuaaö lä bufino wei tä a̦

⁴⁷ Lasha 7 a nia lä fano wei a cublou no mlai ja, showadi tä nö nia lä nijiono wei, tä nö nijiblou fe balojolayoma.

⁴⁸ Lasha 7 a faö showao mlao däjä, Ejido jamö nii a bluca fe balojowä ja, Josénö bä nii doamaö cuaaö bufima. Shabono bä jamö bä shömomaö bufima. ¿Ö̦jö tawä? Cama bä shabonobö lä cublamono wei jamö, bä jilablamaö cuaaö bufima.

⁴⁹ Josénö nii bä bluca shömomaö fa cuaanö, bä blucaamaö fe balojoomaje. Modu u casö jamö mlaca mlaca bä bluca jilaa lä culenaja, nii bä bluca shömomamou cuo mö feduo fa showaonö, ya̦cumö bä wabamou mladaliyoma. Bä nii wabamaö ja, bä nö jödödöblobimije ja, bä wabamaö co̦daanomi.

⁵⁰ Ofi tä cublou showao mlao däjä, bei suwäbö Asenada nija, José bei ijilubö bolacabö ecöbö cublaliyoma. Ö̦jö Asenada a lä cui, Bodifela bä tää e cuoma, Ono jamö täbä nofi lä bäyäbono wei a fecula lä cuono wei.

⁵¹ José bei ijilubö jaba e lä cublaliyono wei, Manasesi e a̦fa jilaquema. —Ya nö lä bleaano wei ya tä bufiblaö mlaobä, fayänö bä ca̦i lä cuono wei bä nija ya wajäaö mlaobä, Yai Bada tänö yale bayeliblalema —a fa cunö, Manasesi e a̦fa cadidiquema.

⁵² Bei ijilubö ai e cublou lä co̦layono wei e lä cui, Eflaini a wa̦fa jilaa nomöjöquema. —Ya nö lä bleaano wei jamö, Yai Bada tänö wale fa bayeliblalönö, ya balaö fe yadia —a fa cunö, Eflaini e a̦fa cadidiquema.

⁵³ Ejido jamö, lasha 7 a lalou jaöo mlao däjä, showadi tä nö ulifi lä nijiano wei, tä ya̦cumö mladaliyoma.

⁵⁴ Ö̦jö däjä, ofi tä lä cui, Josénö tä a̦fa ofi wäyäö lä balöono wei, tä jaba yafilayoma. Lasha 7 a faö jaöo mlao däjä, tä ofi nia lä cudiono wei, tä waloquema. Jödödöwä bä ulifibö jamö tä nö ma ofäono wei ma cui, Ejidoteli bä shino iyaö ayao fe yadioma.

⁵⁵ Ejidoteli bä lä ofäno wei, bada a nija, nii bä wa̦limaje. Ö̦jö a lä cuinö, José nija, Ejidoteli bä bluca shömaö ja, abinaja bä nowa tama. —José nija wamacö fa icuicunö, wamacö yömölaö weicätä. Ö̦jö a wa̦ yai da ji̦liläje —bä nowa tama.

⁵⁶ Inaja tä fa cublalunö, Ejido tä jödödöwä jamö, ofi a fa blaucublalunö, Josénö bä bayeliblalema, Ejidoteli bä nö ofili bleaama yalo. Nii bä shömomaö lä cuaano wejei jamö, yocabä calolalema. Blada bä ja, Ejidoteli bä nija, nii bä däamalalema.

⁵⁷ Ö̦jö Ejidoteli bä shino bayeliblamou ayao mlai, jödödöwä bä lä bälöblai bä ma cui, bä bluca ofili waloblaama. Nii a lulabeje, José nija bä bluca jublaama. Jödödöwä bä ulifibö ofäö nö quiliaö fe malä balojoono wei.