Génesis 29 - Biblia Yanowamö

Bä shö̦ö nija, Jacobo a lä co̦blaliyono wei tä a̦

¹ Jacobo a aa fa co̦lunö, motoca a faö lä cuaaimaö wei jamö täbä lä bälöle täbä ulifibö ja, a waloquema.

² Tä möö fa cuaanö, tä lä wawädole jamö, mau u lä cule täca dalalema. Ö̦jö täca sibo jamö, oweja 3 bä yododoblamou lä cuaano wei, bä ca̦i daa showadaalalema. Ö̦jamö lä, showadi yalo ebä amishi coamamaje yalo, bä yododobomaje. Ö̦jö uca lä cui, maa blewä manö, u fe laoma.

³ Ö̦jamö bä lä bälöle, abinaja bä cuaama. Yalo bä bluca ca̦i jödödöwä waloqueno wejei ja, ma fa jilulamajenö, bä amishi yalo coamamaje. Bä amishi coamaö jödödöblou fa balöojenö, maa ma lä cui, ma jilulaö fa co̦ojenö, u fe laaö co̦omaje. Inaja bä cuaama.

⁴ Yalo bä comi ca̦i lä yododoboyojei bä lä cui, Jacobonö bä wa̦lima. —Iba wamacö. Cafä ¿wediteli bei wamacö dodijiwä? —Alanateli yamacö —bä cuma.

⁵ —¿Showayä Labano wama a daö cule, Nacolo bei ijilubö e lä cui? —a cuma. —Jö̦ö, yama a daö a lä cule —bä cuma.

⁶ —¿Dodijidawä a cua cule? —Jacobo a fa cunö, —Awei, dodijidawä a cua lä, —bei ebä cuu mö feduoma. Ö̦jö däjä, Labano bä tää e juu fa dalalöjenö, a jömamaje. —Quiji a, ö̦jö a tääbö, Laquela a wa̦fa lä cule. Bä fö̦ö oweja ebä ca̦i blacäö lä cuimi —bei a nowa tamaje.

⁷ Abinaja Jacobonö bä nowa tama. —Bei. Motoca a ösöwä showawä. Yalo bä ji̦coloobä, fei däjä tämi. Bä amishi coamaö da jaödaoje. Wama bä amishi coamaö fa balöonö, wama bä lulubou co̦ofälöbä, bä iyabä —bä nowa tama.

⁸ Ö̦jö ma cui, ai bä a̦ läoma. —Ma. Feinaja yalo bä bolacamio cuo däjä, yama bä amishi coamaö balöomi. Bluca yama bä co̦camomaö fa balöonö, ö̦jö däjä, maa yama ma fa jilulanö, yama bä amishi coamaö talei —Jacobo nija bei bä cuu mö feduoma.

⁹ Jacobonö bä a̦ wayomaö showao däjä, Labano bä tää e lä cuinö, oweja ebä ca̦i walobaleyoluma. Showadi ebä nowamadibä a cuoma yalo, bä ca̦i blacälayoma.

¹⁰ Jacobonö Laquela a lä dalaleno wei däjä, abinaja a bufi cudaliyoma. “Ei a suwä lä cui, ¡nayä e lä a̦imole a tääbö dodijiwä!” a bufi cudaliyoma. Oweja bä lä dalaleno wei däjä, “¡Showayä ebä nofi cuo nö cufai!” a bufi cuma yalo, a icua showadaquema. Maa ma bada jilulublalema. Bä shö̦ö oweja ebä amishi bluca coamaö showadaoma.

¹¹ Ö̦jö däjä, a fa wajäblalunö, a ö̦cöma. Laquela a fa̦localanö, a nomöa boma.

¹² A wa̦fa wämoa showaquema. —Fafä a lä yaömole a lä cui, Lebeca a wa̦fa lä cule, ö̦jö bei ijilubö ya e —a cuma. Suwä a lä cui, inaja a lä cuu wei a wa̦ fa ji̦lilänö, a fa lälälönö, bä fö̦ö nija a fa co̦blalunö, a wa̦no wäyäjäloma.

¹³ Labanonö a lä yaömole bei ijilubö a wa̦fa fa ji̦lilänö, a läläaö mö baimama. A fa̦locaö mö baoma. A fa̦localanö, a yai judädäboma. Cama e yafi jamö a lulua showalefälöma. Ö̦jamö, Jacobonö bä shö̦ö a yömölaa fa jödödöblalönö,

¹⁴ abinaja Labano e cuma. —Cafä wa lä cui, ¡fecamayä wa dodijiwä! Einaja a nowa fa tanö, bä shö̦önö a fa bälöamalönö, belibo moli a mladamalema.

Jacobonö bei suwäbö a wa̦fa lä bono wei tä a̦

¹⁵ Ö̦jö däjä, Labanonö abinaja Jacobo a nowa tama. —U̦asi. Fecamayä wa cudeenö, ¿no mlai wa nia ojodamou daanö? Ma, inaja bäfä nofi taboimi. Wa tä lä bufii wei, tä a̦fa yubou da showao —a cuma.

¹⁶ Bei. Labano bä tää bolacabö ecöbä cuoma. Leami a lä cui, bada e cuoma. Bei fääshä e lä cui, Laquela a wa̦fa cuoma.

¹⁷ Leami a lä cui, mamocu ma doblaono wei ma cui, Laquela a lä cui, a shino liyäjäo dodijioma.

¹⁸ Ö̦jö Laquela a lä cui nija, Jacobo a bufi fa cuicunö, abinaja bä shö̦ö nija a cuma. —Tääfä Laquela a nowa ja, ya ojodamou weicätä. Ö̦jö oshe a lä cui wa jöbäaö ja, ya ojodamou showao däjä, lasha 7 ya nia famaö —a cuma.

¹⁹ —Jo —Labano a cuma—. Wa däabä lä. ¿Wedi tä tabä, shomi bä nija, ya li jöbäquei? Inaja wa cuu ja, fäyämö a bälöa da showaalu —Jacobo a nowa tama.

²⁰ Einaja a nowa fa tanö, Jacobo a ojodamoma. Laquela a nowa ja, a sioflamou showao däjä, lasha 7 a famalema. Lasha 7 a ma famaleno wei ma cui, a nofimaö dodijioma yalo, bufi doblalanö a fa ojodamonö, a modanomi.

Bä shö̦önö a lä mölamano wei tä a̦

²¹ Ö̦jö däjä, bä suwäbö e däabä, bä shö̦ö Labano nija a wa̦ fama. —Bei, showabe. Fei däjä, inaja lä waiquiwä. Tääfä a jöböa da showaba —Labano a nowa tama.

²² A nowa taö ja, ö̦ja bä bluca lä bälöle Labanonö bä co̦camomalema, bä iyabä. Jacobo a nofi fa co̦camoalöjenö, bei suwäbö e nia jöböama.

²³ Inaja bä yododoo cuo showao däjä, tä mö dödölayoma. Tä mö fa dödölönö, bä tää bada e lä cui, Leami e a̦fa lä cule, Jacobo nija a jöböa yacläquema. A jöbäa fa yacläcönö, ö̦jö a yacabou fe jaluu ja̦tooma.

²⁴ Labano a lä cuinö, bä tää Leami a ca̦i dobäa showalema. Cama Labano a nosie juamobä, ai e suwä lä cui, Leami e nia fa tablamanö, a suwä jöbäquema. Siliba a wa̦fa suwä cuoma.

²⁵ Tä mö fa jalulunö, Jacobonö cama bei suwäbö a möma. ¡Leami a nofi dicowä lä cui! Bä shö̦ö nijamö a fa icuicunö, a nowa tama. —Showabe. ¿Wedinaja wale nofi fa tabonö, wale li mölaa dicomalema? Tääfä Laquela a yai nija, ya shino yai ojodamoma —a cuma.

²⁶ Labano a wa̦ läoma. —Ma, U̦asi. Fäyämö, inaja yamacö cuaaö daomi. Jaba a lä cui, a shinoco cuo ma showaocu däjä ma cui, ¿wedi tä tabä oshe yama a li jöböa balöquei? —bei fecamabö e nowa tama—.

²⁷ Bada a lä cui wa tabou malä waiquile. Bämacö co̦camou showalanö, 7 bäma tä mö didi mladamaö fa balöonö, afä wa li ajedebobä. Ö̦jö däjä, bei fääshä yama e yädäamaö co̦o wä. Ö̦jö oshe a nowa ja, camiyä nija wa ojodamolanö, lasha 7 wa famaö co̦obä —bei fecamabö e nowa tama.

²⁸ Jacobonö bä shö̦ö e a̦ fa ji̦lilänö, inaja showawä a cuaama. Leami a ajedebou waiquilanö, bä yododaö showao däjä, 7 tä mö didi cublaliyoma. Ö̦jö däjä, Labanonö, bä tää Laquela e jöböa nomöjöquema, Jacobo nija.

²⁹ A ca̦i dobäa showalema. Labano a nosie juamobä, ai e suwä lä tabono wei a lä cui, Laquela nija a jöbäquema, a bayeliblabä. Bila a wa̦fa suwä cuoma.

³⁰ Inaja tä fa cublalunö, Jacobonö Laquela a fa yädämalänö, ö̦jö a yai ajedea nomöjömalema. Leami a ma nofimaö däjä, Laquela a yai shino nofimaö fe balojooma. Ö̦jö a nowa ja, bä shö̦ö Labano nija a ojodamou däjä, lasha 7 a waicou co̦oma.

Leami nija, ijilu bä lä taqueno wei tä a̦

³¹ Jeobaanö Leami a nofi wa̦libou fa dalalönö, a shibönabö jaödaobä, a bayeliblalema. Ö̦jö a ma bayeliblaleno wei ma cui, Laquela a ijilubö cuonomi showawä.

³² Leami a fa shibönabölönö, bei ijilubö e tablalema. Jeobaa nija a bayeliblamoma cudeenö, Lubeni a wa̦fa jilaquema. Abinaja a cuma. —Ya nö ma bleaano wei ma cui, Jeobaanö wale nofi fa ojodadalönö, fei däjä iba wa̦lonö wale nia yai nofimaö dodijio —a cuma.

³³ A shibönaböa fa co̦lunö, Leaminö ai a ijilu tablaö co̦layoma. Ö̦jö a ijilu fa tablalönö, Jeobaa nija a bayeliblamoa co̦layoma yalo, Simeoni a wa̦fa jilaquema. Abinaja a cudaliyoma. —Wale nofi lä wa̦libole Jeobaanö tä a̦ fa ji̦lilänö, ijilu a ja, wale bayeliblaö co̦layoma —a cuma.

³⁴ A shibönaböa fa co̦lunö, ijilu ai e tablaö co̦layoma. A fa tablalönö, Leami a wa̦ faö co̦oma. —Fei däjä camiyä wale yai nia nofiaö. Camiyä nija bei ijilubö 3 ebä malä cule —a cuma. Inaja a cuma yalo, Lewi e a̦fa jilaquema.

³⁵ A shibönaböa fa co̦lunö, ai a ijilu tablaö co̦layoma. A tablaö fa co̦lonö, abinaja a cudaliyoma. —Fei däjä, Jeobaa ya nofi nia doablaö—a fa cudalunö, bei ijilubö Judawä e a̦fa jilaquema. Ö̦jö däjä, a shibönabö jaöo co̦daanomi.