Filipenses 4 - Biblia Yanowamö

Bä dodijabä Pablonö bä lä yömölano wei tä a̦

¹ Iba bämacö lä nofimaö wei wamacö. Bämacö bufibou. Ya bufi doblalobä cafä bei wamacö. Yai Bada lija wamacö lä dodijaö wei tänö, jai ya nowa co̦amamou ya tä nofi tabou waiquiwä. Bämacö lä nofimaö wei wamacö. Ei ya tä a̦ bluca lä onicöfe wama tä a̦ fa cadidibonö, Bada a nofi mölabou fe da yadioje.

² Miji suwä cäcöbä a̦fa lä tayou wei cäcöbä lija ya wa̦ faö. Ebodia a lä cui, Sidique a ca̦i lä cui, moli tä ja cäcöbä bufi shaliliobä, ya wa̦ fe blacäjou. Bada tä Jesucristo ecöbä malä cui.

³ Cafä lija ya wa̦ ca̦i faö lä cule, cafä sho dodijidawä bäfäcö shi̦lo lä ojodamou wei wa lä cui lija. Ei ya cöbä a̦fa suwä lä jayumafe cäcöbä nofimayou co̦obä, wa cöbä cadidamabä, ö̦jö lä. Dodijidawä wale mada bayeliblaböblei. Jesucristo yama etä a̦ dodijidawä wäyäö fe yadiobä, cäcöbä nö mada wa̦lojablei. Clemede sho, iba ai bä ca̦i bluca lä yädäono wei bä sho, bäma tä a̦ wäyäö fe lä yadiono wei däjä, cäcöbä nö suwä mada wa̦lojablei. Täbä nia lä ba̦limiodayou wei täbä a̦fa lä onibole sibä ja, Bada tänö täbä a̦fa bluca malä oniboladi.

⁴ Bada tä Jesucristo wama ecö yalo, bä bufi shi̦lo da doblaicu. ¿Ö̦jö tawä? ¡Bä bufi da doblalo!

⁵ Dodijidawä bä ca̦i da cuoje. Showadi wamacö a̦ lä oquedio wei tä dablamobä. Bada a fuu malä ajedei.

⁶ Bä bufi jalujou dodijio dijä. Tä bluca cublou lä bädao wei tä ma cui ja, wamacö bufi jalujou mlai, Yai Bada a shi̦lo yai da wa̦lije. Bä nacou nosi da blacäco. Cama lija wamacö bufi a̦fa doblalou fa wäyämonö, bä nö shi̦lo bayeli da nacao.

⁷ Inaja wamacö cuaaö ja, Yai Bada tänö wamacö bufi wasöbou fe yadiquei. Jesucristo wama a nofi mölabou yalo, wamacö bayeliblaö cuquei. Wamacö bufi dodijidablou co̦obä tä nö cuobö ma mlai, wamacö bufi yanöcömabou fe balojoquei.

⁸ Abenaja co̦wä, iba wamacö. Dodijidawä wamacö cuobä, abenaja wamacö bufi shi̦lo yai daeo cuaabä. Tä lä bejedi wei tä ja, täbä yai lä dodijidamabou wei tä ja, wamacö bufi yai daeobä, tä lä dodijidai tä ca̦i ja. Tä a̦ shomitawä coyocowä ja, ö̦jö tä ja wamacö bufi daeo mlai. Täbä bufi lä doblalamaö wei tä ja, wamacö bufi yai daeobä. “¡Inaja dodijiwä!”, täbä bufi taamabä tä cua ja, ö̦jö tä ja, wamacö bufi shi̦lo yai daeobä. Tä nofi doamamobä tä cua ja, ö̦jö tä ja wamacö bufi ca̦i daeobä. ¿Ö̦jö tawä?

⁹ Wamale da owälä. Showadi ya lä cuaaö wei tä ja, wamacö moyawe waiquiwä. Ya täbä damaö lä cuaaö wei, wama tä daö. Wama tä a̦ däabä, cafä wamacö lija ya tä a̦ da wäyäblei däjä wamale a̦ ji̦lilema. Wamale ca̦i möma. Wamale fa owälänö, Yai Badanö wamacö bayelibou cuquei, täbä bufi shi̦lo lä yanöcömabou wei a lä cuinö.

A bayeliblaöje ja Pablo a bufi lä ayäyaimono wei tä a̦

¹⁰ Ya̦cumö wamale bayeliblaö co̦a yalo, Bada tä lija ya bufi doblalou. ¡Ya bufi doblalou fe balojoo! Wamale dobäö bufi doblao ma showaono wei ma cui, wama tä shimabä tä cuonomi.

¹¹ “A bufi jalujublalou yalo a wa̦ daanö”, wamale nofi tabou dicoa lä mlale. Ya ma fo̦li wei ma cui, ya ca̦i fo̦li ma mlai ma cui, ö̦jö ma cui ya bufi doblao fe yadiobä ya malä dalaliyono wei.

¹² Ya ma fo̦li wei ma cui, dodijidawä ya ma bälöo wei ma cui, ya bufi doblao fe yadio. Tä cublou lä bädao wei tä bluca ma cui ja, dodijidawä ya cuo fe yadio. Nii ya bä ma tabou wei ma cui, ya ma ofäö wei ma cui, ya nö ma madofiböo wei ma cui, ya ma fo̦li wei ma cui, dodijidawä ya cuo fe yadiobä, Yai Bada tänö wale bufi daamaö.

¹³ Tä cublou lä bädao wei tä ma cui ja, Jesucristonö wale nö wa̦lojomabou yalo, ya doblou fe yadio.

¹⁴ Ö̦jö ma cui, ya dodijaö ma waiquio däjä ma cui, wamale lä bayeliblano wei tä ja, wamale bufi doblalamaö dodijioma.

¹⁵ Showadi inaja wamacö mada cuaablei. Cafä Filiboteli wamacönö, ö̦jö wama tä daö malä waiquile. Mijamö Masedonia ulufi jamö bämacö jaba da yömölablei däjä, bämacö ulufibö daa fa nomöjöcöfälönö, ai täbänö wale bayeliblanomije. Ai ya täbä yömölaö cuaaö majöobä, wale dobänomije. Ö̦jö däjä cafä wamacönö wamale nö shi̦lo bayeli shimama.

¹⁶ Ö̦jamö lä showawä, Desalonicateli bä lija ya lä cuono wei däjä ma cui, wamale nö bayeli shimaö mada bolacaoblei.

¹⁷ ¿Ö̦jö tawä? Camiyä ya bayeliobä ya wa̦mi. Cafä wamacö li bayeliobä ya wa̦. Camiyä wamale bayeliblaö tä nowa ja, Yai Bada tänö wamacö bayeliblaö mö lä feduo wei, ö̦jö ya tä nofi cadidibou lä cule. ¿Ö̦jö tawä?

¹⁸ Wamale bayeliblabä, aifä Ebaflodi lija wama bä lä shimöbeno wei ya bä dälema. Ai wama bä yädäamaö co̦oma yalo, wamale a̦ fejelaamaö dodijioma. Fei däjä ya fo̦lia mlaa lä cule. Fei däjä dodijidawä ya cuobä, ya tä bluca tabou. Abenaja ca̦i. Wamale nö bayeli lä shimaö wei, ö̦jö tänö Yai Bada wama a bufi ca̦i doblalamaö. Jai Yai Bada cama a dobämou bei tä cuwä. Jai Yai Bada lija, toubä ni cle̦deli liyäyaö lä cuaaö wejeinaja, inaja showawä tä nofi tabou lä culadi.

¹⁹ Abenaja ca̦i. Yai Bada ya lä bufiblaö wei a lä cuinö, cafä wamacö ca̦i nia bayeliblaö mö feduo, wamacö nö bleaaö mlaobä. Jesucristo lija wamacö yädäa yalo, wamacö nia dobäö fe balojoo.

²⁰ Ö̦jö Yai Bada bäma a lä bufiblaö wei, bämacö lä Fö̦ömole, ö̦jö tä nofi doablamou shi wa̦libä. Inaja lä tä cuobä.

Jödödö tä a̦

²¹ Mija Yai Bada ebä bluca lä cule, Jesucristo a nofi lä mölabou wejei bä lija wamale a̦fa da wäyä. Camiyänö Jesucristo ya ebä ca̦i lä cule, bä a̦fa ca̦i wäyämamou bufio lä cule.

²² Eja Yai Bada ebä bluca lä cule, cafä wamacö lija bä a̦fa wäyämamou bufi ma doblao wei ma cui, Lomateli bada a lä cui e yafi jamö bä lä cule, ö̦jö bä a̦fa shi̦lo yai wäyämamou bufi doblaa dodijia lä cule. ¿Ö̦jö tawä?

²³ Bei. Bada tä Jesucristo lija, showadi wamacö bufi bayeliblamobä. Wamacö nofi shi̦lo ojodabobä. Inaja lä tä cuobä.