Filipenses 3 - Biblia Yanowamö

Pablonö täbä lä moyawäblamano wei tä a̦

¹ Abenaja ca̦i. Bada wama ecö yalo bä bufi da doblalo, iba wamacö. Ya tä a̦ jaba wäyäö da balöoblei, ö̦jö ya tä a̦ wäyäö co̦a lä cule. Bämacö bufi nia fa jaducämabonö, ya wa̦ modabloimi. Wamacö yaclämaö bufi lä doblao wejei bä lija wamacö nowamöobä, ya wa̦ co̦dawä.

² Abenaja ya cuu lä cule. Bä da moyaweicu. Jai ji̦ima bä wa̦li waiteli läläo lä culenaja bä cuwänö, wamacö nofi lämaöje. Bä wayu. Bä ca̦i dobloimi waiquiwä. Wamacö niniamaö bufi doblao bädaoje.

³ ¿Ö̦jö tawä? Bä mosi sicö joyamou yalo Yai Bada ebä a̦fa ma jilou wei ma cui, ¡ma! Camiyä bejedi bäma ecö li yaiwä. Jesucristo bäma a nofi mölabou yalo, jai bämacö mosi sicö joyamoa waiquilayoma bämalecö nofi tabou malä waiquiladi. Yai Bada tä Bufinö bämalecö fa bayelibonö, cama bäma a yai bufiblabä bämacö. Camiyä bämacö nofi mölamobobä bämacömi. Jesucristo bäma a nofi yai dobobä bämacö.

Pablo a nofi jaba lä mölamobono wei tä a̦

⁴ Camiyä yanowamö bämacö nofi mölamobobä tä cuami waiquiwä. Tä cuo fa cunoja, camiyä ya nofi nö ca̦i mölamobou mö feduobö wei. ¿Ö̦jö tawä? “Ya mölabä lä”, ai täbä jole lä cuu weinaja, camiyä ya nö yai cuu fe balojoobö wei. Abenaja tä malä cule.

⁵ Ya oshe fa wawälönö, 8 ya tä mö didi fa tablamalönö, wale mosi sicö joyalemaje, Moisesinö täbä taamaö lä bufino weinaja showawä. Isaeli nodiwä ya e. Bejamino bä ijilubö ebä nodiwä lija ya cublou nodilayoma. ¿Ö̦jö tawä? Nayä a ma cui, fayä a ma cui, Isaeli yama ecö lä nodiblou wei, ebleo yamacö bluca. Moisesi ya etä a̦ nofi cadidibou bufi fa doblaonö, faliseo bä lija ya co̦cablaliyoma.

⁶ Moisesi ya etä a̦no joyaö nofi fa jalubonö, Jesucristo ebä lä yododaö wei ya ebä nö bleaamaö fe balojooma. Moisesi ya wa̦no cadidibou fa dodijionö, yanowamö täbä lija ya wa̦fa tamobä tä cuo fa mlacunö, ya nofi jole doo balöoma.

Pablo a bufi lä jaducäblaliyono wei tä a̦

⁷ Ya jaba lä mölano wei, “Ö̦jö tänö ya bayeliobä tä dao”, ya bufi ma cuno wei ma cui, ö̦jö tä ja, fei däjä ya mölaimi. Cristo ya yai tabobä, ya bufi jaba lä cuno wei tä lä cui, ya tä joyalema.

⁸ Ö̦jö lä, jödödöwä ya tä nofi jaba lä tabono wei ya tä bluca joyalema. Bada ya tä Jesucristo yai nofiaö fe balojoobä, “Tä nowa cuami waiquiwä”, ya täbä nofi bluca tabou majöa. Jesucristo ya yai tabobä, ai ya tä bluca waia waiquilema. Jai shii bä jilaa tejemi ya tä nofi tabou nomöjöa lä cule. Jesucristo lija ya fa yädäicunö, ya yai bayelio dodijiobä.

⁹ Jesucristo ya e cuo cadidiobä ya tä nofi cadidibou lä cule. Moisesi ya wa̦no lä fuano wei tänö ya dodijidablono malä mlai. Ma, Cristo ya nofi mölabou yalo, Yai Bada tänö wale li dodijidablamalema. Jesucristo lija täbä mölaö ja, dodijidawä täbä nofi tabou malä showadao wei.

¹⁰ Jesucristo ya daö wawädoobä, ö̦jö ya tä bluca joyaö ojodaoma. A demi lä jocädamaleno wei etä lofote showawänö, showadi wale bayelibobä. Jesucristo ya wa̦ lä fuaö wei tä nowa ja, wale nö ma bleaamaö wejei ma cui, Yai Bada lija ya noshi ö̦jödao fe yadiobä. Yai Bada a wa̦ fuama yalo, Jesucristo a nö bleaaö ojodao malä balöono wei. Ya nomabä tä ma cublou däjä ma cui, ya noshi ö̦jödao fe yadiobä. Cama a nomaö malä ojodaono wei.

¹¹ Ya ma nomaö wei ma cui, wale demi jocädamaö co̦obä ya malä mölaö wei.

Pablonö tä naba yai lä cadidono wei tä a̦

¹² Abenaja ya cuimi. “Ya doblou waiquiwä. Jesucristo a dodijaö lä culenaja ya cuwä waiquiwä”, ya cuimi. Ya dobloimi malä showai. Ö̦jö ma cui, Jesucristo a lä culenaja ya cuo fe yadiobä, ya nabä cadidou showao. Cama a lä culenaja ya e cuobä, wale malä yaileno wei.

¹³ Ma, iba wamacö. “Jesucristo a dodijaö lä culenaja ya cuwä”, ya nofi tamobou ma mlai ma cui, abenaja ya cuaaö. Ya jaba lä cuaano wei tä ja, ya mölaimi. Ya tä nofi lä macocobole tä ja ya nö wa̦lojabä, ya yai cadidou.

¹⁴ Jesucristo a lä culenaja ya cuobä, ya bufi macocoa dodijia lä cule. Ö̦jö lija ya yädäquema yalo, Yai Bada tänö wale nia malä co̦aö wei. Ö̦jö lä ya nofi macocobou yalo, ya demöo showao däjä ya bufi nö wa̦lojoobä.

¹⁵ Yai Bada lija bämacö bufi moyawe lä waiquii bämacö lä cui, ya lä cufe tä a̦ ja bämacö bufi bluca shaliliobä. “Inaja lä waiquiwä”, ai wamacö bufi cuimi bädao ja, Yai Bada tänö tä wawämaö weicätä.

¹⁶ Ö̦jö ma cui, Yai Bada tänö tä wawämaö lä waiquile tä ja, ö̦jö tä ja bämacö bluca cadidou da showao.

Bä lä jolemou wei bä lija bä lä moyawäblamano wei tä a̦

¹⁷ Iba wamacö, abenaja ya cuu. Bluca wamacö showawänö wamale da owälä. Camiyä yamacö lä cuaaö weinaja, ai täbä cuaaö mö lä fedui wama bä ca̦i dodijaö fa mönö, ö̦jö bä ca̦i shi̦lo da owämaje.

¹⁸ Bä lä jolemou wei bä malä bluca wei. Yai Bada ebä a̦fa ma jilou wei ma cui, bä lä cuaaö wei tänö bä jolemou dablamou. Yai Bada bäma ecö dodijabä tä ma cuo däjä, bä a̦ läo. Bämacö dodijabä, fii balitama tefi ja Jesucristo a malä shämolayono wei. Ö̦jö ma cui, cama dodijidawä bä cuo bufio fa mlacunö, bä nö nabä. Ö̦jö ya bä a̦fa bluca wäyäö waiquiwä. Ei ya wa̦ lä cui däjä ma cui, ya mabu ubä falanö ya bä a̦fa wäyäö co̦a lä cule.

¹⁹ Yai Bada tänö bä nia waiyamaö. Tä tamaö lä bufii wei tä ja bä cadidou mlai, cama bä cuaaö bufi lä doblao wei tä ja, bä bufi shi̦lo macocoo dicoo. Bä lä cuaaö wei tä ja, “Shädayai”, bä bufi cubä tä ma cule, bä nofi dodijaö doo. Showadi täbä yanowamö bufi lä cuaaö weinaja, bä bufi ca̦i cuaaö dicoo.

²⁰ Ö̦jö ma cui, camiyä bämacö lä cui, feduteli bämacö li waiquiwä. Fedu fedole jamö bämacö cuodayobä bämacö li. Ö̦jamö culanö bämalecö fucäabä, bäma a nö dabou waiquia malä cule, Bada tä Jesucristo lä cui.

²¹ Cama a lofotenö, bei bämacö sicö lä ujudi wei bämacö sicö fa shomiblamalönö, cama sicö dodijidawä lä culenaja, bämacö sicö nia tablamodayou. Cama Jesucristo a lofotenö tä bluca tamobä a malä cui.