Filipenses 1 - Biblia Yanowamö

Pablo a wa̦fa lä wäyämou wei tä a̦

¹ Pablo cä ya. Timoteo sho yafäcö cua lä cule, Jesucristo yafä a wa̦ lä fuaö wei yafäcö lä cui. Jesucristo lija wamacö lä yädäo wei wamacö lija ya si oni shimaö, Filibo jamö Yai Bada wama ecö lä cui lija. Wamacö ca̦i lä yododaö wejei bä bada lä cui lija ya si oni ca̦i shimaö, wamacö lä bayeliblaö wejei bä bada lija ca̦i.

² Bei. Fayä Yai Bada lija wamacö shi̦lo bayeliblamobä, Bada tä Jesucristo lija ca̦i. Wamacö bufi shi̦lo yanöcömaboböbä. Wamacö nofi ca̦i shi̦lo ojodaboböbä.

Pablo a bufi a̦fa doblao lä wäyämou wei tä a̦

³ Showadi bämacö nofi jaducäblaö. Bämacö nofi jaducäbolanö, Yai Bada ya lä bufiblaö wei tä lija ya bufi shi̦lo doblalou talei.

⁴ Yai Bada lija bämacö bluca lä bayelimaö wei däjä, ya bufi doblalolanö showadi ya wa̦ shi̦lo faö.

⁵ Wamale bayeliblaö yalo, Yai Bada lija ya bufi doblalou. Jesucristo tä a̦ dodijidawä wäyämou blaucobä wamale malä bayeliblaö wei. Cafä wamacönö, Jesucristo wama a nofi jaba mölabolanö wamale bayeliblaö lä showaono weinaja, fei däjä ma cui wamacö cuaaö malä showai.

⁶ Ei ya tä daö malä waiquii. Wamacö bufi jaba lä dodijidablamaleno wei a lä cuinö wamacö bufi nia dodijidamabou shi wa̦lii. Jesucristo a itou co̦oyoluu däjä, dodijidawä wamacö tabobä.

⁷ ¿Ö̦jö tawä? ¡Inaja bämacö nofi tabou lä! Bämacö malä bufibole. Yai Bada lija ya ojodamobä ya cuono ma mlai ma cui, wale nofi fa ojodadalönö wale shimöa fe yadilema. Ya lä ojodamou wei jamö, blada bä ja wamale bayeliblaö ja, bämacö bufibou. Fei däjä wale cafe ma quefubolajei ma cui, ya fe lao showaono mlai ja ma cui, showadi wamale bayelibladima. Jesucristo ya wa̦ nofi bäyäbou ma cui, ya wa̦ bayelibou ma cui, wamale bayeliblaö showawä.

⁸ Bejedi lä bämacö bufibou. Jesucristonö wamacö nofimaö fe balojoo lä culenaja, bämacö nofimaö cuwä mö feduwä. Bejedi lä ya wa̦. Yai Bada tänö wale a̦ bejedi daö.

Yai Bada lija Filiboteli bä lä bayelimano wei tä a̦

⁹ Yai Bada lija bämacö bayelimaö däjä, wamacö nofimayou balabä ya wa̦ faö talei. ¿Ö̦jö tawä? Wamacö nofimayou balaa fa dodijilönö, wamacö bufi yai jaducäblobä ya wa̦ faö. Wamacö bufi wedinajamou mlai ja, wamacö bufi shi̦lo yai walalaobä.

¹⁰ Wamacö bufi walalalanö, dodijidawä tä lä cui wama tä yaiabä. Wamacö bufi ca̦i shomitawä coyocoablalou mlai ja, wamacö yai dodijabä. Inaja wamacö cuaalanö, Jesucristo a fuu co̦o däjä wamacö dobloimi jimaö mlaobä.

¹¹ Jesucristonö wamacö fa bayeliblanö, cama etä dodijidawä lä cuinö wamacö yai dodijidawä cuobä. Inaja wamacö cuaalanö, Yai Bada wama a dodijaö dablamabä, a nofi doablabeje.

Pablo a bufi doblao fe lä yadiono wei tä a̦

¹² Iba wamacö, ei wamale a̦ da ji̦lilä. Ei däjä wale cafe lä quefubolajei tä ma cui ja, bämacö bufi yai da doblalo. Ya nö bleaaö yalo, fei däjä Jesucristo etä a̦ dodijidawä yai ji̦limou malä blajaadi.

¹³ ¿Ö̦jö tawä? Eja bada a bälöo lä dodijiinö bä lä lämabole bä bluca moyawäblou waiquia lä cule. Ai bä bluca mö feduwä sho, bä ca̦i moyawe waiquiwä. “Jesucristo etä a̦ wäyäö tä nowa ja, a cafe quefubouje”, wale nofi tabou waiquiaje.

¹⁴ Abenaja ca̦i. Ya cafe quefua ma cule, ya bayeliblamou fe lä yadio wei tänö, Jesucristo ai ebä bufi bluca ca̦i lofotoblou fe balojoa lä cule. Bada tänö bä bufi fa lofotoamanö, fei däjä bä quilii mlai ja, Yai Bada etä a̦ yai wäyäö waiteliaö lä culajei.

¹⁵ Awei, Cristo etä a̦ lä wäyäö wejei bä lija, ai täbä dobloimi coyocowä dicowä. “¡Camiyä yamacö lija bä yömöca daa fa yaiicunö!”, bä bufi cuu fa dicoonö, wale nofi wa̦libou waiquiomaje, ö̦jö bänö. Fei däjä cama bä a̦ nia ji̦lio fa ayaonö, etä a̦ jole wäyäblalaö bädaoje. Ö̦jö ma cui, ai bä mö feduwä lä cui, bä bufi bejedimolanö täbä li yömölaöje.

¹⁶ Ö̦jö bä bufi lä cadidou wei bä lä cuinö wale nofimaöje yalo, ya tä a̦ lä wäyäö wei tä a̦ ja, wale a̦ bayelibouje. Bä moyawe malä waiquii. Eja Jesucristo ya etä a̦ dodijidawä nofi bäyäbobä, Yai Bada tänö wale malä lämabou wei.

¹⁷ Ai bä mö feduwä lä cui bä bufi cadidiwämi. Cama bä a̦ nia shi̦lo ji̦liamou ayao fa dicoonö, Jesucristo etä a̦ jole wäyäblalaö buoje. Ya cafe lä quefule jamö wale bufi nia li fa jalujamajenö, täbä a̦ li bädawä.

¹⁸ Ö̦jö ma cui, ö̦jö bä a̦ ja ya bufi jalujoimi. Jesucristo a wa̦fa malä wäyämou wei. ¡Inaja dodijiwä yai! Ai bä bufi cadidia mlalanö tä a̦ wäyäö ma cujei, ai bä mö feduwä lä cuinö, bufi cadidilanö tä a̦ yai wäyäöje. A wa̦fa wäyämou yalo ya bufi doblao fe yadio.

Jesucristo bäma a dodijidawä lä dablamaö wei tä a̦

¹⁹ ¡Ya bufi doblalobä lä! Abenaja ya bufi malä cuu wei. “Ya nö lä bleaale, cafä wamacönö wamale bayelimaö malä cui. Yai Bada lija wamacö a̦ fa fanö, Jesucristo a Bufinö wale fa bayelibonö, ya bayelio fe yadio weicätä”, ya bufi cuu talei.

²⁰ Inaja ya bufi lofote ca̦i fa cuonö, ya mölaö showawä. Ya bufi nö wa̦lojolanö, ya quilii mlai ja, ya doblao fe yadiobä. Wale shäö ma cadidio wejei ma cui, ya demi ma showai ma cui, inaja ya bufi lofote cuo showaobä ya mölaö showaa lä cule. Ya lä dodijaö wei tänö, ai bä lija Jesucristo ya dodijadawä dablamabä.

²¹ Ya demöo showao däjä, Jesucristo ya dodijidawä dablamabä ya e waiquiwä malä cui. Ya shämou bädao ja, ¡awei, inaja lä yai! Wawädowä ya dabladayobä.

²² ¿Wedi jamö tä lä cui ya tä yai yaiabä da tawä? Äyämö ya demi cuo bufi ca̦i doblao, Yai Bada lija ya ojodamou nö wa̦lojaö showaobä.

²³ Ya tä yaiabä ya tä daimi. Eja ya fa nomalönö, ¿Cristo lija ya yai cuodayobä daanö? Ö̦jö tä shi̦lo yai dodijidawä.

²⁴ Ö̦jö ma cui, cafä wamacö bayeliobä, eja ya demi cuo showaobä ya ca̦i malä cui.

²⁵ Inaja tä cuwä yalo, ya demi nia cuo fe lä yadio wei tä ja, ya bufi shi̦lo cadidio. Jesucristo wama a nofi mölabou balabä, bämacö nia ca̦i bluca cuo showao. Wama a nofi mölabou fa balalönö, wamacö bufi doblalobä.

²⁶ Bämacö fe walou fa co̦onö, camiyä ya demi cua lä showale tä ja, Jesucristo lija wamacö bufi doblalou fe balojoobä. Inaja lä tä cuobä.

Yai Bada etä a̦ lä lofotomabou wei tä a̦

²⁷ Bei tawä. Cristo dodijidawä etä a̦nö wamacö taamaö lä bufii weinaja bä da cuaa. Wamacö cadidoimi fa dicoonö, jai tä a̦ nowa cuami bä bufi tamaö dicoo dijeje. Bämacö möyou co̦obä tä ma cui, bämacö möyou ma mlai ma cui, moli tä ja wamacö bufi bluca lä cadidio wei bämacö wa̦no ji̦liabä. Wamacö fa bayeliblayonö, wamacö nö bluca lä wa̦lojaö wei ya tä a̦ yai ji̦liabä. Jesucristo etä a̦ dodijidawä bufiblamou fe yadiobä.

²⁸ Cafä wamacö lä yabäcaö wejei bä lija wamacö quilii mlai ja, bä nö wa̦lojaö fe da yadio. Wamacö quilibloimi däjä, cama täbä nia lä waiyou wei tä ja, bä bufi nia möblou. Cafä wamacö nia fucäamou lä ayao wei tä ja, bä bufi nia ca̦i möblou. Wamacö bufi nö lä wa̦lojaö wei, Yai Bada tä nö li mayo malä cui.

²⁹ Jesucristo wama a nofi mölabobä, Yai Bada tänö wamacö malä tablamaleno wei. Wama a bejedi bufibou bädaobä mlai, Cristo a nowa ja wamacö nö ca̦i bleaaö mö feduobä wamacö tablamalema malä cui.

³⁰ ¡Bämalecö nö bleaamaöje lä! Wale da yabäcablejei wama tä daö. Wale yabäcaö lä showalajei, wama tä a̦ ca̦i ji̦liaö.