Filemón 1 - Biblia Yanowamö

Pablo a wa̦fa lä wäyämou wei tä a̦

¹ Camiyä Pablo ei ya, Jesucristo ya wa̦fa wäyäö nofi jushuaö ja, wale fe lä labolajei. Camiyä bämacö ai a Timoteo lä cui sho, yafäcö cua lä cule. Yai Bada lija cafä Filemono wa ojodamou mö lä fedule wa lä cui lija, ei ya tä a̦ oni shimaö, bä lä nofimale wa lä cui lija.

² Abia a ca̦i lija, Jesucristo a bufii mö lä feduo wei a suwä lä cui. Aquibo a ca̦i lija, Yai Bada lija a ojodamou nö wa̦lojaö mö lä feduo wei a lä cui. Ö̦jö tawä? Afä yafi jamö, Jesucristo wa ebä ca̦i lä yododaö wei bä ca̦i bluca lija.

³ Fayä Yai Bada lija bä nö bayeli nacaö talei, Bada tä Jesucristo lija ca̦i, wa nofi ojodaboböbä. Wa bufi ca̦i yanöcömaboböbä. ¿Ö̦jö tawä? Inaja lä tä cuobä.

⁴ Cafä bä nö bayeli nacaö däjä, showadi ya bufi a̦fa doblalou wäyämou talei, Yai Bada ya lä bufiblaö wei a lä cui lija.

⁵ Bada tä Jesucristo wa nofi lä mölabou wei, bä a̦fa ji̦libou talei. Jesucristo wa ebä jo̦wa bluca ca̦i nofimaö. Ö̦jö cudeenö bä bayelimaö.

⁶ Cristo lija bämacö yädäa yalo, ¡bejedi bämalecö bayelibou! Bämalecö lä bayelibou wei tä jamö wa bufi yai jaducäafälöbä, bä nö bayeli nacaö talei, afä wa bä bufi jaducäblamaö mö feduo showaobä.

⁷ ¿Ö̦jö tawä, U̦asi? Wa bufi lä nofio wei tä ja, ya bufi shi̦lo yai doblalou talei. Showadi ya bufi ca̦i dobladou. Jesucristo wa ebä bufi shi̦lo lofotoaamaö malä cui.

Dodijidawä Onesimo a taamaö lä bufino wei tä a̦

^8-9 Cristo ya wa̦no wäyäbä wale shimölema yalo, bä nosiemabä ya waiquiwä ma cui, wa bufi lä nofio wei ya tä daö cudeenö, ya wa̦ yai oquewä faö, bä bufi taamabä. ¿Ö̦jö tawä? Camiyä Pablo ya wa̦, Cristo ya wa̦no wäyäbä ya lä cui. Jesucristo ya wa̦no wäyäö ja, wale fe lä labolajei ya showawä lä cui.

¹⁰ U̦asimi Onesimo ya nofi nia fa bäyäanö, ei ya wa̦. ¿Ö̦jö tawä? Eja wale fe lä labolajei jamö culanö, Jesucristo ya fa bufiblamalönö wale nofi fö̦a majölei lä cufe. Ö̦jö a lä cui, dodijidawä wa yai taamabä, ¿ö̦jö tawä?

¹¹ Wa bayeliblamobä wa ma tabono wei ma cui, a doblonomi. Bejedi lä wa bayeliblanomi. Ö̦jö ma cui, cafä wa ma cui, camiyä ya ma cui, bäfäcö nia yai lä bayeliblamou wei fei däjä bei a yai cublaliyou lä cufe.

¹² Ya bufi nö bleaalanö, cafä lija u̦asimi Onesimo ya shimaö co̦a lä cule.

¹³ Jesucristo tä a̦ nowa ja, eja wale fe lä labolajei jamö ya tabou bufi ma doblale ma cui, ya shimaö lä cule. ¿Ö̦jö tawä? Cafä wa bälöa blajawä cudeenö, wale bayelia doblaimi ma cui, Onesimo a lä cui, eja afä ya tabou fa cunoja, jai cafänö wale bayeliblaö, tä nö cuobö wei.

¹⁴ Ö̦jö ma cui, cafä bä a̦ nia ji̦liamaö fa balöonö, ya shimaö co̦a lä cule. Camiyä lija wa shimaö ojode ja, wa shimabä, ö̦jö lä. Wa nia lä dodijaö wei, camiyä ya wa̦nö mlai, cafä inaja wa cuaaö bufi fa doblaonö, wa yai cuaabä.

¹⁵ Cafä wa wa̦ fuamobä wa ma tabono wei ma cui, a fa doculunö wa taboimi majöwä. Ö̦jö ma cui fei däjä, afä wa nofi nia yai tabou shi wa̦lii. Cuwi. Yai Badanö, inaja a nia taamaö fa showadaonö a docua ja̦tomalema fa cui, wa ca̦i shi̦lo dodijidawä cudio majöobä.

¹⁶ Wa wa̦ fuamou buobä mlai, fei däjä Jesucristo e yai cublaliyoma yalo, wa nia yai nofimaö. Wa nofi nia yai tabou. ¿Ö̦jö tawä? Camiyänö ya nofi tabou ma cui, cafänö wa nofi tabobä wa yai. Afä wa tabou malä balöono wei. Fei däjä Bada a lija a bufi cuquema yalo, wa nofi nia yai tabou majöo.

¹⁷ “Yai Bada lija, Pablo sho yafäcö ojodamobä yafäcö”, wale nofi tabou waiquia ja, camiyä dodijidawä wale nö waloa lä tamaquebö weinaja, Onesimo a ma cui, wa nia dodijidawä waloamaö cuo mö feduo. ¿Ö̦jö tawä?

¹⁸ Cafä lija a cuaaö lä bädaono wei etä ma cui ja, ya etä nowa nia co̦amaö. Blada a ca̦i co̦amabä tä ca̦i tabou ja, ö̦jö ya etä nia ca̦i jibäaö. ¿Ö̦jö tawä?

¹⁹ Camiyä Pablo ei ya imicö showawänö, ya tä a̦ oniblaö lä cule. Ya etä nowa co̦amaö weicätä. ¿Ö̦jö tawä? Ya etä nowa co̦amaö ma cui, cafänö wa tä nowa co̦amaö mö feduobä ya tä ca̦i tabou mö fedua lä cule. Fei däjä wa bufi demi lä cule, camiyä ya wa̦nö wa bufi demiblaliyoma malä cui. Ö̦jö ma cui, inaja ya nia cuu fe balojoomi. Wa bufi jaducäblobä ya wa̦.

²⁰ Awei. Inaja ya cuu, U̦asi. Onesimo ya wa̦fa lä bole tä ja, wale da bayelibla, ö̦jö lä. Bada tä lija cafä sho bäfäcö malä cule. Cristo lija cafä sho bäfäcö yädäa yalo, ö̦jö tänö wale bufi yai da lofotoama.

²¹ Wale a̦ nia lä fuaö wei tä ja ya mölaö waiquia yalo, ei ya tä a̦ oni shimaö lä cule. Ya lä cuu weinaja bädawä mlai, wale nia bayeliblaö lä biyäjäo wei, ya tä daö waiquia.

²² Abenaja ca̦i. Ya fama nia lä bälöo wei, a yano ca̦i da dodijidablalö. Wale nö bayeli nacaö yalo, cafä bä fe nia lä waloo wei, Yai Bada lija ya mölaö waiquia.

²³ Jesucristo yafä etä a̦ wäyäö tä nowa ja, yafälecö fe lä labolajei a Ebafla lä cui, cafä wamacö lija a wa̦fa wäamamou bufi ca̦i doblaa lä cule.

²⁴ Marcos a ma cui, Alidaco a ma cui, Dema a ma cui, Luca a ma cui, inaja showawä ö̦jö bä a̦fa bluca wäamou bufi ca̦i doblaa lä cule, Jesucristo lija yamacö bluca lä ojodamou wei bä bluca lä cui.

²⁵ Bei. Bada tä Jesucristonö, showadi wamacö bufi bayeliblabä. Wamacö nofi shi̦lo ojodabobä.