Éxodo 9 - Biblia Yanowamö

Ejidoteli bä yalobö lä nomamalaleno wei tä a̦

¹ Ö̦jö däjä, Moisesi nija abinaja Jeobaa a cuma. —Bada a lä cui nijamö wa lucäa fa co̦lunö, a da yömöla. Abinaja wa nowa tabä. “Ebleo yamacönö yama tä Jeobaa lä bufiblaö wei, ö̦jö ya wa̦no wäyäö lä cule”, wa nowa taö dodijio. Iba bä shömaö co̦o da bufi, wale nofi co̦camoabeje.

² Bä noshi umabou dicoo ja, bä shi wa̦limabou dicoo ja,

³ camiyä Jeobaa ya lä cuinö, cama yalo ya ebä nö bleaamaö dodijio wä. Tä möbä, ö̦jö lä. Shawala a nö yai lä quiliaö wei tänö, sibo jamö ebä yalo lä cublai ya ebä nö nia bluca bleaamaö. Cabayo ebä ma cui, bulo ebä ma cui, cameyo ebä ma cui, baca ebä ma cui, oweja ebä ma cui, ya ebä nö nia bluca bleaamaö.

⁴ ’Ö̦jö ma cui, Ejidoteli bä yalobö nia ma nomablou wei ma cui, Jeobaa ya lä cuinö, Isaeli ya ebä yalobö nia shino nowamöbou. Cama ya bä yalobö bluca ayablamaö fa showadalonö, moli ma cui a ca̦i nia nomaö buomi. Einaja bada wa nowa tabä —a cuma.

⁵ Bä yalobö nia lä waicano wei tä ja, Jeobaa a wa̦ wawädoa showaquema. —Jeobaa ya lä cuinö, ya tä nia ulifi lä wa̦lidiblamaö wei, fena ja ya tä nia taö showadao —a cuma.

⁶ Inaja Jeobaa a cuma yalo, ö̦jö tä fena ja, tä taö showadaoma. Ejidoteli bä yalobö bluca nomalaliyoma. Ö̦jö ma cui, Isaeli ebä yalobö demöo showao fe yadioma. Moli ma cui, a ca̦i yalo nomaö buonomi.

⁷ Ö̦jö däjä, Isaeli ebä yalobö nomaö möbä, bada anö cama ebä fa shömölönö, bä mööje ja, bä yalo jo̦wa demi nö mlao showaoma. Moli ma cui, a jo̦wa nomaö buonomi. Ö̦jö ma cui, bada a bufi fa lojododamanö, Isaeli ebä shömanomi.

Bale bä wayunö bä nö lä bleaamano wei tä a̦

⁸ Abinaja Jeobaa a cuma, Moisesi, Aaloni cäcöbö nija. —Cowa wacöbä lä yäo wei jamö yubu wafä ushibö fa maolönö, bada a mamo showao däjä, Moisesinö ushibö shäyäö mö nonoobä.

⁹ Ö̦jö ushibö lä shäyäle ushibö lä cui, Ejido tä ulifi jamö ushibö coshi coshi nia wai jödödöblou. Ushibö fa jödödöblalunö, yanowamö täbä ma cui nijamö, yalo bä ma cui nijamö, yuu bä fa cublalunö, täbä nia bluca baleböö nomöjöo —a Jeobaa cuma.

¹⁰ Ö̦jö cudeenö, bä niibö lä löböono wei jamö yubu ushibö fa maoböalalönö, bada a nija ushibö ca̦i icuböquema. Moisesi a lä cuinö ushibö shäyäa mö fa nonolunö, ushibö shuliloma. Ushibö fa shulilonö, yanowamö täbä ma cui, yalo ebä ma cui, bä yuubölaliyoma. Yuu bä jaba fa cublalunö, ö̦jö däjä bale bä cublou majöa showalayoma.

¹¹ Bada bä fecula lä cui, bä nö yuubö fa blelalönö, Moisesi nija bä icuo doblonomi. Ö̦jö bada bä fecula ma cui, Ejidoteli jödödöwä bä ma cui, bä malä yuubölaliyono wei.

¹² Ö̦jö ma cui, Jeobaanö, bada a lä cui a bufi fa lojododamanö, cäcöbö a̦ ji̦lianomi, Moisesi nija a lä cuno weinaja showawä.

Bleyula bänö bä nö lä bleaamano wei tä a̦

¹³ Ö̦jö däjä, abinaja Moisesi nija Jeobaa a cuma. —Wa jocäblou fa fenablalonö, bada a nija wa fa icuicunö, abinaja wa nowa tabä. “Ebleo yamacönö yama a Jeobaa lä bufiblaö wei, ö̦jö ya wa̦no wäyäö lä cule”, wa nowa taö dodijio. Iba bä shömaö co̦o da bufi, wale nofi co̦camoabeje.

¹⁴ Fei däjä, ya nö lä quiliaö wei täbä blucanö, ¡bejedi lä ya bä bufi nö nia malä bleaamaö wei! Cama a ma cui, cama ebä lä yädämabou wei bä ma cui, ebä nofi bluca lä tabou wei bä ma cui, ya bä bufi nö nia bleaamaö fe balojoo. Jödödöwä tä ma cui jamö, camiyä Jeobaa ya lä culenaja tä cuwä, tä cuami waiquiwä. Wale nö Bada ö̦jöböabeje, ya nö nia quiliaö.

¹⁵ ’¿Ö̦jö tawä? —a cuma—. Ya bluca lä cuaano wei däjä, ya boco yai yalejedou showadao fa cunoja, cama a ma cui, cama ebä nofi bluca lä tabou wei bä ma cui, shawala tänö yedu ya bä nö shäalalebö wei. Ei däjä bä nö cuobö mlai.

¹⁶ Ö̦jö ma cui, cama nija ya lojode nia fa dablamonö, ya li shäö showadaonomi. Ya lojode fa damolalunö, jödödöwä täbä lä bälöblai bä nijamö wale a̦fa wäyäö blaucobeje, ya li demimabou showaa bäa lä cule.

¹⁷ ’Isaeli ebä lä cui, iba bä ma cui, bä noshi umabou ja, a läo. Bä shömaö co̦omi showawä.

¹⁸ Fena ja, einaja tä cuo däjä, tä möbä, ö̦jö lä. Bleyula ya bä nia bada shi̦co blälämaö. ¿Ö̦jö tawä? Ejido tä ulifi jamö, jaba bä bleyula bada dablano ma mlajei ma cui, bä bada dablaimi ma showalajei ma cui, fei däjä bleyula ya bä nia bada dablamaö nö quiliaö.

¹⁹ ¿Ö̦jö tawä? Cama bä yalobö co̦amaö da bufi. Sibo jamö ebä bluca lä tabole bä co̦ablaö fa cuaanö, bä lä wejeo wei jamö bä nofi bäyäbobeje. Sibo jamö bä lä tabodi, yanowamö täbä ma cui, yalo bä ma cui, ebä co̦aimi ja, bleyula bä badanö, bä nia nomablou. Einaja bada a nija wa cubä —a cuma.

²⁰ Ö̦jö däjä, bada a nija bä lä yädäono wei, ai ebä quililaliyoma. Jeobaa a wa̦ ja, bä quilii dodijioma. Cama bä yalobö ma cui, cama bä nosie juamobä bä lä tabono wejei bä ma cui, bä bluca fa co̦alalöjenö, yafi bä jamö bä nofi yashubomaje.

²¹ Ö̦jö ma cui, Jeobaa a wa̦ ji̦liano lä mlajei bänö, cama ebä co̦ablanomije. Cama bä yalobö ma cui, bä nosie juamobä bä lä tabono wejei bä ma cui, sibo jamö bä daabodayomaje.

²² Moisesi nija Jeobaa a wa̦ falayoma. —Bei. Boco da yalejedalu, Ejido jödödöwä jamö bleyula bä wa̦limou showadaobä. Yanowamö täbä lä cule jamö ma cui, yalo bä lä cule jamö ma cui, bä bluca lä cauu wei jamö ma cui, ö̦jamö lä, Ejido jödödöwä jamö bä bluca bleyula bläläö showaobä —a cuma.

²³ Ö̦jö däjä, Moisesinö defi fa yalejedalönö, Jeobaanö bleyula bä fa blälämalalönö, ya̦lu a wa̦ ca̦i bada tai taimou nö quiliama. Madula a wacö blalölou nö ca̦i quiliaö mö feduo showaoma. Inaja a fa cuaanö, Ejido jamö Jeobaanö bleyula a blälämaö dodijioma.

²⁴ Bejedi lä bleyula a wa̦limoma. A lä bläläö wei jamö, madula a wacö blalölou nö quiliadima. ¡Bä bleyula bada judäo fe balojooma! Cama Ejidoteli bä jaba lä bälöblaono wei däjä, tä dablaö fa mlacujenö, tä danomi showaweje.

²⁵ Bleyula bänö, Ejido tä jödödöwä jamö ma cui, sibo jamö bä bluca lä cublamono wei bä wa̦lialema. Yanowamö täbä ma cui, yalo bä ma cui, bleyula bänö bä shäabodayoma. Bä bluca lä cauno wei bä ma cui, fii jödödöwä fibä ma cui, bä bluca wa̦lia showalema.

²⁶ Cosena tä ulifi jamö, Isaeli ebä lä bälöono wei jamö, ö̦jö bä nija bleyula a shino quenomi.

²⁷ Ö̦jö däjä, bada a lä cuinö, Moisesi, Aaloni sho cäcöbö fa nacamalänö, abinaja cäcöbö nowa tama. —Bejedi lä, ya doblonomi dicowä. Jeobaa a shino bejedi. Iba ya bä ca̦i lä cule, ya bä ca̦i li dobloimi.

²⁸ Jeobaa nija yamalecö bayeliblamaö da bufibö. Ei ya̦lu a wa̦ lä cui, bleyula bä lä cui, ¡inaja lä waiquiwä! Bämacö shömaö co̦o weicätä. Eja wamacö nia bälöomi —a cuma.

²⁹ Abinaja Moisesi a cuu nomöjöoma. —Ei bä yafi lä cule jamö ya fa jayublalunö, Jeobaa nija ya bococu fa yalejeicunö, ya̦lu a wa̦ nia waidou. Bleyula bä nia mladou. Wa bufi jaducublobä ya wa̦. Bita jamö a nosiemobä, Jeobaa a shino cua ayaa.

³⁰ Ö̦jö ma cui, cafä wa lä cui, afä wa bä lä yädämabou wei bä ca̦i lä cui, bämacö daö waiquiwä. Yai Bada wama a nö quili taimi showawä, Jeobaa a lä cui —a cuma.

³¹ ¿Ö̦jö tawä? Camishi bä diyäblamobä sibä lä döbono wejei bei sibä ma cui, sibä bluca badiquilaliyoma. Nii bä tamobä, ai sibä ca̦i döbou mö lä feduono wejei sibä ma cui, ö̦jö sibä ca̦i bluca wa̦liolaliyoma.

³² Ö̦jö ma cui, nii ai bä tamobä sibä mö feduwä lä cui, sibä faö nodio cudeenö, sibä shino wa̦lionomi.

³³ Ö̦jö cudeenö, bada e yafi jamö Moisesi a faa fa co̦lufälönö, ai bä yafi lä cule bä fa jayudalönö, Jeobaa nija bococu yalejedaliyoma. Bococu fa yalejedalunö, a wa̦ ya̦lu waidaliyoma. Bleyula bä ca̦i mladaliyoma. Maa a ca̦i mladou showalayoma.

³⁴ Ö̦jö ma cui, bada a lä cuinö maa a blalalablou fa dalalönö, bleyula a waicou fa dalalönö, ya̦lu a wa̦ ji̦lio fa mladalunö, a doblonomi co̦wä. A bufi jifudou co̦layoma. Cama a ma cui, cama ebä lä yädämabono wei bä ma cui, inaja showawä bä bufi bluca lojode cublou co̦layoma.

³⁵ Ö̦jö cudeenö, bada a lä cui a bufi fa lojododonö, Isaeli ebä shömaö co̦onomi. Moisesi nija Jeobaa a lä cuno weinaja showawä.