Éxodo 8 - Biblia Yanowamö

Bucu bucumö bä lä shömano wei tä a̦

¹ Ö̦jö däjä, abinaja Jeobaanö Moisesi a nowa tama. —Bada a nija wa fa lucälönö, a da yömöla. “Jeobaa ya wa̦no wäyäö lä cule”, wa nowa taö dodijio. Iba bä shömaö co̦o da bufi, wale nofi co̦camoabeje.

² Bä noshi umabou dicoo ja, ¡bejedi lä ya bä nö nia bleaamaö! Bucu bucumö bänö cama ya ebä ulifibö nia jödödöwä wa̦liamaö cuaaö.

³ ’Bucu bucumö bänö Nilo u fa jödödöblalunö, bä washölöblou fa nomöjölonö, cama nija bä nia yafii. A lä mio wei jamö ma cui, a lä maqueo wei jamö ma cui, bä nia jödödöwä cublou. Cama ebä lä yädämabou wei bä yafibö jamö ma cui, cama ebä nofi bluca lä tabou wei bä yafibö jamö ma cui, nii bä lä löböaö wejei jamö ma cui, nii bä lä taö wejei jamö ma cui,

⁴ bä nia bucu bucumö cuo jödödöblou. Cama nija ma cui, cama ebä lä yädämabou wei bä nija ma cui, cama bluca ebä nofi lä tabou wei bä nija ma cui, bä nia cublamou jödödou. Einaja bada wa nowa tabä —Jeobaanö Moisesi a nowa tama.

⁵ Moisesi nija abinaja Jeobaa a cuu co̦oma. —Bei. Aaloni a da yömöla. Fii wa defi fa dämalänö, bada ubä bada lä cublai jamö ma cui, bocu ubä lä cublai jamö ma cui, wiisibö uca bä wai lä cublai jamö ma cui, fii definö ubä jömaö fa cuaanö, Ejido jamö bucu bucumö bä washölöblamabä —a cuma.

⁶ Einaja a fa cunö, Ejido jamö mau ubä bluca lä cublai Aaloninö ubä jömaö fa cuaanö, bucu bucumö bä washölöblou cuaama. Ejido tä nö ulifi mablalemaje.

⁷ Ö̦jö ma cui, bä jäo lä mlai bä fecula lä cui, inaja cama bä ca̦i cuaaö mö feduo showaoma. Ö̦jö bä feculamou fa showaonö, Ejido jamö ai bä bucu bucumö wawämaö mö feduomaje.

⁸ Ö̦jö däjä bada a lä cuinö, Moisesi, Aaloni sho cäcöbö fa nacamalänö, abinaja cäcöbö nowa tama. —Jeobaa nija yamalecö da bayelimabö. Camiyä nija ma cui, iba ya bä nofi bluca lä tabou wei bä nija ma cui, bucu bucumö bä juu mladobä, cäcöbö a̦ fe da blacäjo. Bä juu fa mladalunö, Jeobaa nija yalo wama bä ö̦shö dodobobä, bämacö shömaö co̦o weicätä —a cuma.

⁹ —Ja̦o —Moisesi a cuma—. Cafä ma cui, afä wa bä lä yädämabou wei bä ma cui, afä bluca wa bä nofi lä tabou wei bä ma cui, Jeobaa nija bämacö bluca bayelimaö wä. Cafä wamacö nija bä bucu bucumö lä cublai bä mö watäblobä, bei wamacö yafibö jamö bä lä lucälaliyono wei bä mö ca̦i watäblobä, ya wa̦ faö wä, Nilo u jamö bä shino feiobä. ¿Wedi däjä ya wa̦ yai fabä, ö̦jö lä?

¹⁰ —Fena ja —bada bei a cuma. —Inaja lä waiquiwä —Moisesi a cuma—. Jeobaa yama a lä bufiblaö wei wa nö lojode ö̦jöböabä, ö̦jö lä. Cama a lä culenaja tä cuwä, ai tä cuami waiquiwä.

¹¹ Cafä wa ma cui nija, wamacö yafibö ma cui nija, afä wa bä lä yädämabou wei bä ma cui nija, afä wa bä nofi bluca lä tabou wei bä ma cui nija, bucu bucumö bä nia juu mladou. Nilo u jamö ö̦jamö bä nia shino feiblou —Moisesi a cuma.

¹² Ö̦jö cudeenö, bada e yafi jamö Moisesi, Aaloni sho cäcöbö faa co̦layofälöma. Jeobaa nija Moisesinö a bayeli nacabä, a wa̦ fama, bada a sho cäcöbö nowa lä tayono weinaja showawä.

¹³ Ö̦jö däjä, Moisesi a lä cuno weinaja, Jeobaa a cuaaö cadidioma. Ejidoteli bä yafibö jamö ma cui, bä je̦fabö jamö ma cui, bä ulifibö jamö ma cui, bucu bucumö bä nomaa jödödölaliyoma.

¹⁴ Bä fa nomalalunö, bä nomawä yododamaö cuaamaje. Ö̦jö bänö, tä ni ulifi ji̦taliblaliyoma.

¹⁵ Ö̦jö ma cui, tä jaba dodijidablou co̦o fa dalalönö, bada a bufi jifudou co̦layoma. Cäcöbö a̦ ji̦lianomi co̦wä, Jeobaa a lä cuno weinaja showawä.

Walaba coshibä lä shömano wei tä a̦

¹⁶ Ö̦jö däjä, Moisesi nija abinaja Jeobaa a cuma. —Bei. Aaloni a da yömöla. Fii wa defi fa dämalänö, mashita jamö bä coshi coshi lä cule bä shämaö da bufi, Ejido tä jödödöwä jamö walaba coshibä cublobä —a nowa tama.

¹⁷ Inaja cäcöbö cuaaö showaoma. Aaloninö defi fa dälänö, mashita jamö bä coshi coshi lä jilao wei bä shäquema. Bä fa shäcönö, yanowamö täbä ma cui nijamö, yalo bä ma cui nijamö, walaba coshibä jödödöwä yädäolaliyoma. Ejido tä jödödöwä jamö ma cui, coshi coshibä bluca lä cublai, walaba coshibä cublaliyoma.

¹⁸ Ejidoteli bä fecula lä cuinö, walaba coshibä wawämaö mö feduobeje, bä ma wabäono wei ma cui, bä doblonomi. Inaja tä fa cublalunö, yanowamö täbä nijamö ma cui, yalo bä nijamö ma cui, walaba coshibä jödödöblaliyoma.

¹⁹ Bada a lä cui nija, cama ebä lä fecula wei bä lä cui, abinaja ebä cuma. —¡Ei Yai Bada tä mayo waiquiwä, ei, ei! —a nowa ma tano wejei ma cui, bada a bufi jifuo fa waiquionö, bä a̦ ji̦lianomi, Jeobaa a lä cuno weinaja showawä.

Blicumö asibä lä shömano wei tä a̦

²⁰ Ö̦jö däjä, Moisesi nija abinaja Jeobaa a cuma. —Wa jocäblou fa fenablalunö, mau u jamö bada a nia lä juu wei jamö a da läicu. A waloquei ja, a da yömöla. “Jeobaa ya wa̦no wäyäö lä cule”, wa nowa taö dodijio. Iba bä shömaö co̦o da bufi, wale nofi co̦camoabeje.

²¹ A ja̦amoimi ja, blicumö ya asibä nia shimocole shömaö, ya bä nö bleaamabä. Cama nijamö ma cui, cama ebä lä yädämabou wei bä nijamö ma cui, cama ebä nofi bluca lä tabou wei bä nijamö ma cui, ya asibä nia shömaö cuaaö. Cama bä yafibö jamö ma cui, Ejidoteli bä bluca yafibö jamö ma cui, asibä nia bluca faö nö jädäblou. Mashita a lä cabaö wejei jamö ma cui, asibä nia jödödöwä shulilou.

²² ’Ö̦jö ma cui, ö̦jö tä cublou däjä, iba ya bä ulifibö nia shino yai nowamöbou, Cosena tä ulifi lä cui. ¿Ö̦jö tawä? —Jeobaa a cuma—. Iba bä nijamö ya asibä nia shimocole shömaimi, wamacö bufi jaimobä. Jödödöwä tä ulifi jamö ma cui, Jeobaa camiyä yami ya Bada cua.

²³ Inaja ya cuaaö ja, iba ya bä fa yailönö, ya bä nia nowamöbou. Cama ya ebä nö nia shino bleaamaö. Bada anö, fena ja tä möbä, ö̦jö lä, wale lojode dablabä. Einaja bada wa nowa tabä —a cuma.

²⁴ Inaja Jeobaa a cuaaö showaoma. Bada a yafibö ma cui jamö, cama ebä lä yädämabono wei bä yafibö ma cui jamö, asibä bluca shimocole fablou nö quiliama. Ejido jödödöwä tä ulifi jamö ma cui, blicumö asibänö, tä ulifi wa̦lidiblaliyoma.

²⁵ Ö̦jö däjä, bada anö, Moisesi, Aaloni sho cäcöbö nacaa fa co̦malönö, abinaja cäcöbö nowa tama. —Yai Bada wama tä lä bufiblaö wei tä nija, yalo wama a ö̦shö dodobobä bä da alufälö. Eja, Ejido jamö showawä, wama tä nofi co̦camoabä —a cuma ma cui,

²⁶ Moisesi a wa̦ läoma. —Ma —a cuma— Tä doemi. Jeobaa yama a lä bufiblaö wei nija, yama bä yalo ö̦shö dodobobä bä yalo lä cui, Ejidoteli bänö bä yalo malä nowamaö wejei. Bä shäö nofi wa̦libouje yalo, cama bä mamo mötale ja yama bä yalo shäö ja, maa ma bänö, yamalecö nia shäyälaleije.

²⁷ Ma, ulifi bloque jamö yamacö nia shino juu. Bolacabö yamacö fa miicufälönö, yamacö weyade waloquei. Ö̦jamö lä, Jeobaa yama a lä bufiblaö wei nija, yalo yama bä ö̦shö nia dodobodayou, camanö tä tamaö lä bufii weinaja showawä —a cuma.

²⁸ Ö̦jö cudeenö, abinaja bada a cuma. —Inaja wa cuu ja, ulifi bloque jamö bämacö shömaö weicätä, Jeobaa wama a lä bufiblaö wei nija, yalo wama bä ö̦shö dodobobä. Ö̦jö ma cui, wamacö nia blajaimi. Bei. Jeobaa nija wale da bayelima —a bada cuma.

²⁹ Ö̦jö däjä, Moisesi a wa̦ falayoma. —Bei. Ya co̦o a lä cule. Jeobaa nija ya nacou weicätä. Fena ja showadawä, cafä wamacö nija asibä blicumö shimocole lä yäö wei asibä mladou showadaobä, ya wa̦ nia faö. Cafä wa ma cui nija, afä wa bä lä yädämabou wei bä ma cui nija, afä bluca wa bä nofi lä tabou wei bä ma cui nija, asibä mladamabä, ya wa̦ nia faö. Ya wa̦ nia faö lä ma cui, wale a̦ da ji̦lilä. Jeobaa nija yalo bä ö̦shö dodobobeje wa bä nia lä shömaö wei tä ja, a jolemou co̦daa dijä, ö̦jö lä —a Moisesi cuma.

³⁰ Einaja a fa cunö, bada e yafi jamö Moisesi a faa fa co̦lufälönö, Jeobaa nija a nö bayeli nacama.

³¹ Moisesi a nacou ja, Jeobaanö a wa̦ julema. Bada a ma cui nija, cama ebä lä yädämabono wei bä ma cui nija, cama bluca ebä nofi lä tabono wei bä ma cui nija, blicumö asibä shimocole lä yäaano wei asibä mladamalema. Moli ma cui, asi feiblonomi.

³² Ö̦jö ma cui, bada a bufi jifudou fa co̦lonö, Isaeli ebä shömanomi co̦wä.