Éxodo 7 - Biblia Yanowamö

¹ Moisesi nija abinaja Jeobaa a cuma. —Bei. Camiyä ya nö quili tamou lä culenaja, bada anö wa nö quili taö cuobä, bäfä tablamaö lä cule. Cafä wa wa̦no wäyäö fe dolemobä, a̦iyofä Aaloni a cuo mö feduo wä.

² Cafä nija ya tä tamaö lä bufii wei, a̦iyofä nija wa tä a̦ nia bluca wäaö nomöjöo. Ö̦jönö, bada a nija tä a̦ wäyäö ja, wale a̦no taö fe dolemou wä. Cama a ulifibö jamö Isaeli ebä shi ma wa̦limabole ma cui, bä shömaö co̦obä, a wa̦ nia faö ma cui

³ bada a lä cui ya bufi nia jifumabou. ’Ö̦jö däjä, Ejido tä ulifi jamö ya lojode dablamobä, bluca ya nö nia ma quiliaö wei ma cui,

⁴ wafäcö a̦ nia ji̦liblaimi, bada anö. Wafäcö a̦ ji̦liblaimi cudeenö, ya̦cumö, Ejidoteli bä nija ya nia ishou. Ö̦jö däjä, iba bä lä bälöblai ya bä bluca fa toujublamalönö, ya bä bluca nia co̦aö, Isaeli ebä lä cui. Ya bä nö nia lä yuale däjä, ya waitelimou nö fa quilianö, Ejido jamö iba ya bä nia bluca co̦aö showadao.

⁵ Ejido jamö ya lä ishole däjä, cama bä nija iba ya bä co̦aö fe yadio ja, ö̦jö lä däjä Ejidoteli bä lä cuinö, Jeobaa wale nö nia Bada ö̦jöböaöje —Jeobaa a cuma.

⁶ Inaja cäcöbö cuaaö showaoma. Moisesi, Aaloni cäcöbö nowa taö ja, Jeobaa a lä cuno weinaja, inaja showawä cäcöbö cuu cadidio showaoma.

⁷ ¿Ö̦jö tawä? Bada nija cäcöbö a̦ lä fano wei däjä, bada cäcöbö cuo waiquioma. Moisesinö lasha 80 a famaö waiquiono wei ja, Aaloninö lasha 83 a famaö waiquio mö feduono wei ja, cäcöbö icuquema.

Olu cäcö cublobä defi nabä lä shömano wei tä a̦

⁸ Moisesi, Aaloni cäcöbö nija abinaja Jeobaa a cuma.

⁹ —Bada anö wafäcö bejedimou wabaö däjä, “Jeobaa a lojode da dabömalalö”, a cuu däjä, a̦iyofä Aaloni nija cafä wa wa̦ nia faö. Abinaja wa e nia cuu. “Afä fii wa fi fa dälönö, bada a nija fi da shäyäblacö, olu cäcö cublobä”, wa e nia cuu —Moisesi a nowa tama.

¹⁰ Ö̦jö cudeenö, bada a nija, Moisesi, Aaloni sho cäcöbö icua fa co̦icunö, Jeobaanö cäcöbö nowa taö ja, a lä cuno weinaja cäcöbö cuaaö showaoma. Bada a ma cui, cama ebä lä yädämabono wei bä ma cui, ö̦jö bä lä cule jamö Aaloninö fii efi fa shäyäblacönö, olu cäcö cublaliyoma.

¹¹ Ö̦jö däjä, bada a lä cuinö, cama ebä bufi lä dao wei bä ma cui, bä lä fecula wei bä ma cui, ö̦jö bä nacaamalema. Ö̦jö Ejidoteli bä jäo lä mlai bä fecula lä cui, bä feculamou fa showaonö, Aaloni a lä cuaano weinaja, cama bä ma cui, bä cuaaö mö feduo showaoma.

¹² Ö̦jö bä bluca lä cuinö, fii efibä fa shäyäblacöjenö, olu bä bluca cublou mö fedua showalayoma. Ö̦jö ma cui, Aaloni e definö, ö̦jö cäcö olu lä cuinö, ai bä li olu sufaaquema.

¹³ Inaja tä ma cuono wei ma cui, bada a bufi lojodoo fa waiquionö, cäcöbö a̦ ji̦liaö bufionomi, Jeobaa a lä cuno weinaja showawä.

Jeobaanö Nilo u lä i̦yäblamaleno wei tä a̦

¹⁴ Ö̦jö däjä, abinaja Jeobaa a cuma, Moisesi nija. —Bada a bufi lojode waiquia. Isaeli ebä shömaö co̦o mlaobä, a bufi läa.

¹⁵ Fena däjä, mau u jamö bada a juu lä fenao wei däjä, bei u casö jamö a da läicu. Olu cäcö lä cublaliyono wei defi lä cui, defi da däläfälö.

¹⁶ Bada wa nowa nia taö. Ebleo wamacö nija ya lä bufiblamou wei ya Jeobaa lä cuinö, cama nija bäfä shömölema, wale a̦no wäyäbä. Iba bä shömaö co̦obä, ya wa̦ fama, ulifi bloque jamö wale nofi co̦camoabeje. Ya wa̦ ma fano wei ma cui wale a̦ ji̦liblaimi showawä.

¹⁷ ’Jeobaa ei ya wa̦ lä cui, wale a̦no nia wäyäö co̦o. Cama nija, Jeobaa ya nö Bada ö̦jöböamobä ya nö nia quiliaö. Tä möbä, ö̦jö lä. Wa defi lä bole definö, Nilo u jamö mau wa u nia shäaö. Wa u fa shäcönö, u nia i̦yäblou.

¹⁸ Nilo u jamö bä yuli bluca lä cule, bä nia bluca nomablou. U ni nia ji̦taliblou. Bä nö suflaö cudaliyobö yalo, Ejidoteli bänö u nia coaimije. Einaja bada wa nowa tabä —a cuma.

¹⁹ Moisesi nija abinaja Jeobaa a cuu co̦oma. —Aaloni nija wa wa̦ fa fanö, fii defi da dämalä. Ejido jamö mau ubä lä cublai jamö, ö̦jö definö ubä jömaö da bufi. Bada ubä jamö ma cui, bocu ubä jamö ma cui, ubä lä monoböblai jamö ma cui, wiisibö uca bä lä cublai ubä jamö ma cui, ubä bluca i̦yäblou showadaobä. Fii fica jamö ubä ma bao wei ma cui, maa mabä ja täbä madofi lä tablano wejei jamö ubä ma bao wei ma cui, Ejido tä jödödö jamö ma cui, ubä bluca i̦yäblobä —a cuma.

²⁰ Jeobaanö cäcöbö nowa lä tano weinaja, inaja showawä Moisesi, Aaloni sho cäcöbö cuaama. Bada a mamo showao däjä, cama ebä lä yädämabono wei ebä mamo ca̦i showao däjä, fii defi fa yalejedalönö, Nilo u shäquema. Nilo bluca ubä lä cublai, ubä i̦yäo showaolaliyoma.

²¹ Nilo u jamö bä yuli bluca lä juno wei, bä nomalaliyoma. Ubä ni ji̦talio fa showaomobodunö, Ejidoteli bä amishi co̦o doblonomi. Ejido tä ulifi jödödöwä jamö mau ubä i̦yäo showaolaliyoma.

²² Ö̦jö ma cui, Ejidoteli bä jäo lä mlai bä fecula lä cui, inaja cama bä ca̦i cuaaö mö feduo showaoma. Ö̦jö cudeenö, bada a lä cui, cama ebä bada lä fecula wei ebä lojode dablamou mö feduoma yalo, a quiliblonomi. A bufi jifuo fe yadio showaoma. Cäcöbö a̦ ji̦lianomi dodijiwä, Jeobaa a lä cuno weinaja showawä.

²³ A mö yabadou fa co̦lofälönö, cama e yafi jamö bada a lucäa co̦layoma. Jeobaa a lojode lä dabömalaleno wei tä ma cui ja, a bufi ca̦i dayäo buonomi.

²⁴ Ejidoteli bä lä cui, Nilo u yai ja bä amishi co̦o dobloimi ja, ö̦jö u casö jamö täbä diyäö cuaamaje.

²⁵ Jeobaanö Nilo u fa wa̦lidiblamalönö, u wa̦lidio showao däjä, 7 tä mö dödölayoma.