Éxodo 6 - Biblia Yanowamö

¹ Inaja Moisesi a ma cuno wei ma cui, abinaja Jeobaa a cuu mö feduoma. —Fei däjä bada ya nia lä yabäcaö wei wa tä möbä, ö̦jö lä. Tä yai lä lojode wei tä nija a fa quililalunö, bä nia shömaö malä co̦o wei. ¿Ö̦jö tawä? Tä yai lä lojode wei tä nö quiliaö cudeenö, lobe bä nia shömaö co̦o showadao —a cuma.

Moisesi a shömaö lä co̦ono wei tä a̦

² Moisesi nija abinaja Yai Bada a cuma. —Camiyä Jeobaa que ya.

³ Ablaamö a ma cui nija, Isaacö a ma cui nija, Jacobo a ma cui nija, ya jaba wawälayoma. “Yai Bada tä nö lä wa̦lojaö wei cätä”, wale nofi tabobeje, ya jaba wawälayoma. Ö̦jö ma cui, Jeobaa ya wa̦fa yai wäamamonomi.

⁴ Ö̦jö bä nija Canaana ya tä ulifi jöbäabä, ya wa̦ nö ca̦i wäo balöoma, bä bälöblao lä buono wei tä ulifi showawä lä cui. Ö̦jö ya bä nowa taö wawädoo showaoma.

⁵ ’Abinaja ca̦i —a cuma—. Ö̦jö Isaeli ebä lä cui, Ejidoteli bänö bä nö lä bleaamale bä lä cui, ya bä a̦ nö bleaaö ji̦liaö waiquia lä cule. Bä nö badabö nija ya wa̦ nö lä wäqueno wei, ya tä a̦ nofi ca̦i jaducubou showaa lä cule.

⁶ Ö̦jö cudeenö, ei ya wa̦ lä cui, Isaeli ebä nija wale a̦no wäyäö cadidio showaobä. Camiyä Jeobaa que ya. Ejidoteli bänö bä nosiemaö fe blacäjouje ja, bä nö ma bleaamaö wejei ma cui, ya bä nia luluaö co̦o fe yadiofälöö. Bä shi ma wa̦limabolajei ma cui, ya bä nia jucäaö co̦o. Ya ishou nö quiliaö ja, ya lojode fa damolalunö, ya bä nia co̦lei.

⁷ ’Ya bä fa co̦länö, iba ya bä nia tabou showao. Camiyä wale bufiblabeje, cama ya e nia cuo dodijio. Ö̦jö däjä, wale nö nia Bada ö̦jöböaöje. “Ejidoteli bänö bämalecö nö ma bleaamano wejei ma cui, ö̦jö Jeobaa a lä cuinö bämalecö co̦a co̦lema. Ö̦jö bäma a bufiblabä a li dodijiwä”, ya nofi nia tamamou.

⁸ Ablaamö a ma cui nija, Isaacö a ma cui nija, Jacobo a ma cui nija, ö̦jö bä nija ya tä a̦fa ulifi lä wäqueno wei jamö ya bä lulubofälöö wä. Ö̦jö tä ulifi ja bä bälöo shi wa̦liobä, ya tä ulifi nia jöbäaö showadao. Ei ya wa̦ lä cui, Jeobaa cä ya wa̦. Inaja wa bä nowa tabä —Moisesi nija a Jeobaa cuma.

⁹ Inaja showawä, Isaeli ebä nija Moisesi a ma cuno wei ma cui, bä bufi doblaonomi waiquiwä cudeenö, a wa̦ ca̦i ji̦liblanomije. Bä shi lä wa̦limabono wejei jamö bä nö bleaamaö fe balojoomaje cudeenö, a wa̦ ma faö wei, a wa̦ ji̦liblanomije.

Moisesi a wa̦ läo lä co̦layono wei tä a̦

¹⁰ Moisesi nija Jeobaa a wa̦ faö co̦oma.

¹¹ —Bei. Ejidoteli bada nijamö a lucäa da co̦lufälö. Isaeli ebä shömaö co̦o da bufi, Ejido tä ulifi jamö bä faö co̦ofälöbä —a cuma ma cui,

¹² abinaja Moisesi e cuu dicooma. —Shädayai. Ya aca jayumi waiquiwä. Isaeli ebä lä cuinö wale a̦ ji̦liaimi waiquiaje yalo, ö̦jö bada a lä cuinö bei yale a̦ ji̦liblaimi yaiquei —a cuma.

¹³ Ö̦jö ma cui, Moisesi nija, Aaloni nija, Jeobaa a wa̦no wäyämamou bufio fe yadioma. Ejido jamö Isaeli ebä nia co̦aö fe yadioma cudeenö, ö̦jö bä ma cui, Ejidoteli a bada ma cui, ö̦jö bä bluca yömölaböö fe yadiobä, Jeobaa a wa̦ fe blacäjoma.

Moisesi a wa̦no wäyäö fe dolemobä Aaloni a lä lämabono wei tä a̦

²⁸ Ejido jamö Jeobaanö Moisesi a lä yömölaleno wei däjä,

²⁹ abinaja Moisesi nija a Jeobaa cuma. —Camiyä Jeobaa que ya. Ejidoteli bada a lä cui nija wale a̦no bluca da wäyä —a cuma.

³⁰ Einaja a cuma ma cui, abinaja Jeobaa nija Moisesi a cuma. —Shädayai. Ya aca jayumi waiquiwä. Ö̦jö bada a lä cuinö yale a̦ ji̦liabä yami.