Éxodo 5 - Biblia Yanowamö

Bada a nija Moisesi a jaba lä icuqueno wei tä a̦

¹ Ö̦jö tä cublou waiquilayono wei ja, bada a lä cui nija, Moisesi, Aaloni sho cäcöbö fa icuicunö, abinaja a nowa taböma. —Jeobaa yafä a wa̦no wäyäö lä cule, Isaeli yama ecö nija a lä bufiblamou wei a lä cui. Ulifi bloque jamö cama nija bä iyaö ca̦i co̦camobä, ebä shömöa da co̦lu —a nowa taböma.

² Ö̦jö ma cui, bada a wa̦ läoma. —¿Wedi bei tä li Jeobaa, ya wa̦ li ji̦liabä? ¿Wedi tä li Jeobaanö, Isaeli bei ebä li shömaö co̦o bufii cufe? Jeobaa ya tä daimi. ¿Ö̦jö tawä? Isaeli ya ebä nia shömaö co̦omi waiquiwä —a cuma.

³ Abinaja cäcöbö cuu nomöjöoma. —Ebleo yamacö nija tä lä bufiblamou wei tä Yai Bada lä cui, camiyä yamacö nija tä wawälayoyoluma. Yamalecö shömöa da co̦lu, ¿ö̦jö tawä? Ulifi bloque jamö yamacö jubä. Bolacabö yamacö fa miicufälönö, yamacö weyade nia waloo. Ö̦jamö lä, Jeobaa yama a lä bufiblaö wei a nija, yalo yama bä ö̦shö nia dodobodayou, shawala tänö yamalecö nö bleaamaö mlaobä. Ishou tänö yamalecö nö bleaamaö mlaobä —cäcöbö cuma ma cui

⁴ Ejidoteli bada a lä cuinö, abinaja cäcöbö nowa taö dicooma. —¡Uo! Moisesi, Aaloni. Bä ojodamobä tä ma cule, ¿wedi tä tabä, bei wafä bä li nacaö co̦a bashia cuboyoi? Bei. Bä ojodamobä jamö bä yai queo co̦obä —a cuma.

⁵ Abinaja cäcöbö nowa ca̦i tama. —Fei däjä Isaeli ebä bluca cudeenö, bä yai ojodamobä tä ma cule, ¿wedi tabä wafä bä li yabäcaö? —a cuma.

⁶ Ö̦jö däjä showawä, Isaeli ebä ojodamobä jamö bä lä lämabono wei bä lä cui, bada anö bä nosiemama. Ejidoteli bada bä lä lämabono wei bä ma cui, cama Isaeli ebä läo mö lä feduono wei bä ma cui, bä nosiemaö ja, abinaja bä nowa tama.

⁷ —Bei. Isaeli ebä lä cuinö, mashita bä jamö bölösö bä coyocabeje, bä bölösö jöbäaö co̦daa dijeje. Wama bä jaba lä taamano weinaja, bä cuaaö co̦daa dijä. Cama bänö bölösö bä daei fa cuaajenö, bä däabeje.

⁸ Ö̦jö ma cui, mashita bä jaba taöje ja, bä bluca tablaö lä cuono weinaja, wama bä tamaö cuo showaobä, bolacadabö nomöjöwä mlai ja. ’Tä tabeje tä cuami waiquiwä cudeenö, bä a̦ shomiablalou waiquiwä malä cui. Tä lä bufiblaö wejei tä nija, yalo bä ö̦shö dodobou bufi fa doblaojenö, bä a̦ malä nacläaö wei.

⁹ Bä yai da ojodamomaje, ö̦jö lä. Bä fe da blacäjamaje, ei cäcöbö a̦ ja, bä yabäcamou co̦daaö mlaobä. Cäcöbö malä jolemou wei —Ejidoteli bada a cuma.

Isaeli ebä nö yai bleaamaö lä nomöjöono wejei tä a̦

¹⁰ Ö̦jö cudeenö, bada a wa̦ fa ji̦liläjenö, bä bluca faa co̦layofälöma. Ejidoteli bada bä lä läono wei bä ma cui, cama Isaeli ebä läo mö lä feduono wei bä ma cui, bä bluca faa fa co̦lufälönö, Isaeli ebä yömölalemaje. Abinaja bä cuma. —Bada a lä cui yama a wa̦no taö lä cule. Cafä wamacö nija bölösö bä nia jo̦wa jöbämaö co̦daaimije.

¹¹ Cafä wamacö yainö bölösö wama bä däabä, wamacö nia jufälöö. Bölösö wama bä dayäaö fa cuaafälönö, wama bä dablaö ja wama bä yefibou showadaimabä. Ö̦jö ma cui, blajai jamö bölösö bä ma doamou wei ma cui, mashita wama bä jaba bluca tadaö lä cuono weinaja, inaja showawä wama bä ca̦i nia tadaö cuo fe yadio. Bolacabö wama bä nia tablaö majöomi —bä nowa tamaje.

¹² Ö̦jö cudeenö, bölösö bä daei cuaabeje, Ejido tä jödödöwä jamö bä shedequeomobodayoma.

¹³ Ejidoteli bada bä lä läono wei bänö, bä fe blacäjamamaje. Abinaja bä nowa tamaje. —¡Ö̦jö ma cui! Jaba däjä mashita bluca wama bä tablaö lä cuono weinaja, wama bä tablaö cuo fe yadio showaobä. Bölösö bä lä jöböblejei däjä, mashita wama bä showadi omaö lä cuono weinaja, inaja wama bä bluca taö cuo showao fe yadiobä —bä nowa taö fe blacäjomaje.

¹⁴ Bada tänö Ejidoteli bä bada lä lämabono wei bä lä cui, bä ca̦i ishou dicooma. Isaeli ebä ojodamobä jamö cama ebä bada lämabou mö lä feduono wejei, bä nabä queomaje. —¿Wedi tä tabä wama bä jaba mashita bluca tablamaö da cuobleinaja, fei däjä wama bä li tablamaö cuomi dicowä? —bä nowa talajenö bä si yafelimamaje.

Bada a nija Isaeli bada ebä a̦ lä fano wei tä a̦

¹⁵ Ö̦jö däjä, cama Isaeli ebä bada läo mö lä feduono wei bä lä cui, Ejidoteli bada nija bä fa icuicunö, bä nofi nia ojode fa tablamonö, bä a̦ fama. —Cafä bäfä nosie juabä yamacö ma cui, ¿wedi tabä inaja yamalecö li taamaö dicoo?

¹⁶ Bäfä nosie juabä yamacö lä cui nija, bölösö bä jöbäaö ma mlajei ja ma cui, mashita bei bä li tamaö bufii fe yadio showaoje. ¿Ö̦jö tawä? Camiyä yamalecö si ma yafelimaö wejei ma cui, camiyä yamacö moji tänö mlai ja. Cama bä mayo. Afä bä lä cuinö, bölösö bä jöbäaö fa mlacujenö yama bä mashita li omaimi —bä cuma.

¹⁷ Ö̦jö ma cui, abinaja bada anö bä nowa tama. —Ma. Wamacö ojodamou bufiomi waiquiwä. Ö̦jö cudeenö, Jeobaa nija wama bä jo̦wa yalo ö̦shö dodobou bufi doblao dicoo talei.

¹⁸ Bä aa da co̦lufälö. Bä da ojodamo. Cafä wamacö nija bä bölösö jöbäamou mlaicätä. Bä nia jöbäamou ma mlai ma cui, mashita wama bä jaba omaö da cuobleinaja, inaja showawä wama bä omaö cuo fe yadiobä —bä nowa tama.

¹⁹ Mashita bä bluca jaba omaö lä cuono wejeinaja, bä omaö cuo fe yadio fa bufinö, Isaeli ebä bada lä cui, bä bufi möblaliyoma. Ö̦jö däjä, “Bämacö nö bayeliblamobimi waiquiwä”, bä bufi cudaliyoma.

²⁰ Bada e yafi jamö bä faa fa co̦lufälönö, Moisesi, Aaloni sho cäcöbö nö daobä jamö bä icua showaquema.

²¹ Abinaja cäcöbö nowa tamaje. —Cafä wafäcö a̦ ja, yamalecö nö bleaamaö lä culajei. Jeobaa a lä cuinö wafäcö dobloimi dablabä, ö̦jö lä, cafä wafäcö nö bleaamaö nomöjöobä. Bada a ma cuinö, cama ebä lä yädämabou wei bä ma cuinö, yamalecö nofi bluca wa̦libou waiquiweje. Cafä wafäcö a̦nö, cama bä nija yamalecö nia shäablamaö —cäcöbö nowa tamaje.

Moisesi a lä wajäano wei tä a̦

²² Ö̦jö däjä, Moisesinö Jeobaa a fa bufiblalönö, a nö bayeli nacao co̦oma. —Jeobaa wa lä cuinö, ¿wedi tabä inaja wa li fa cuaanö, ei wa bä nö li bleaamaö dicoa cule? ¿Wedinaja wa bufi li fa cunö, eja wale li shömöa bälema?

²³ Cafä wa wa̦nö, bada a nija ya fa icuicunö, ei bä lä cui, bä co̦amaö mlai ja, bä nö yai bleaamaö fe balojoa dicoa lä cule. Cafä wa ma cuinö, afä wa bä ca̦i co̦aimi waiquiwä —a cuma.