Éxodo 40 - Biblia Yanowamö

E yano i̦tamaö lä bufino wei tä a̦

¹ Moisesi nija abinaja Jeobaa a cuma.

² —Jaba a belibo ja, tä mö jaba lä jalule däjä, iba wa nia yano i̦tamaö.

³ Ö̦jamö camiyä ya wa̦no oni didiobä defi ca lä cui, wa defi ca nia lucämaö, wamale a̦ nofi jaducubobä defi ca lä cui. U̦eshi jamö defi ca cuobä, camishi wa cö acadafu nia läaö.

⁴ Nii bä maqueobä täcö lä cui, wa täcö ca̦i nia lucämaö. Ö̦jamö täbä nia lä maqueo wei wa täbä nia ca̦i cadejeblaö. Cowa wacöbä shi̦i cublamobä, wa tä ca̦i nia i̦taaö. Bä shi̦i cublamobä, dabö dabö toubä nia lä bablamou wei wa tä cabä cadejeblaö showaobä.

⁵ ’Täbä wa̦queshi ni cle̦deli lä u̦cucamou wei täbä maqueobä wa täcö ca̦i nia lucämaö, olo bä ja täcö lä tablamono wei —a cuma—. Ya wa̦no oni didiobä defi ca leboco jamö wa täcö nia i̦taaö. Ö̦jö däjä, iba yano jamö yoca lä cui jamö, camishi wa cö nia läaö.

⁶ Yalo bä lä dodoblamou wei bä maqueblamobä, wa täcö ca̦i nia i̦taaö. Iba tä yano sibo jamö tä nia cuo. Täbä nia lä faö wei yoca lä jolele jamö wa täcö i̦tabobä.

⁷ ’Ö̦jö täcö möamo jamö, iba yano möamo mö feduwä jamö, bä imicö ya̦lömoblaabä, bä mamicö ya̦lömoblaabä, wa tä nia i̦taaö möamöo mö feduo —a cuma—. Ö̦jamö mau ubä nia lä babou wejei, wa tä fa möamoblalönö, mau wa ubä nia löaö.

⁸ Wa tä yano sibo ji̦coloblabä, wa täbä nia i̦taaö fe fa̦yoaö. Bei yoca jamö wa cö nia läaö.

Jeobaa etäbä lä yaimaqueno wei tä a̦

⁹ Moisesi a nosiemaö showao ja, abinaja Jeobaa a cuu nomöjöoma. —Ö̦jö däjä, täbä lä jölöcamou wei wa toubä dabö fa dälönö, iba yano a ma cui ja, ö̦jamö lä täbä madofi nia lä cuo wei täbä ma cui ja, wa täbä jölöcödaö cuaabä. Inaja wa cuaalanö, iba täbä nia madofi yaio. Iba täbä li cuobä, täbä nia yaio.

¹⁰ Yalo bä lä dodoblamou wei bä maqueblamobä täcö ma cui, wa täcö ca̦i nia jölöcaö. Ö̦jamö täbä madofi ca̦i nia lä cuo wei täbä ma cui, wa täbä ca̦i nia jölöcödaö. Inaja wa cuaalanö, iba täbä nia yaio. Ö̦jö yalo bä maqueblamobä täcö ma cui, täcö nia yaio dodijio.

¹¹ Bä imicö ya̦lömoblaabä, bä mamicö ya̦lömoblaabä, mau ubä babobeje tä ma cui, wa tä ca̦i nia jölöcaö. Tä döcäobä tä ma cui, wa tä ca̦i nia jölöcaö. Iba tä li cuobä, wa tä nia yaimabou.

¹² ’Ö̦jö däjä, iba yano jamö yoca lä cui jamö, Aaloni a ma cui, bei ijilubö ebä ma cui, wa bä nia ajemaö —a cuma—. Ö̦jamö mau ubänö wa bä fa yalulunö,

¹³ camishi bä lä yaio wei bä ja, Aaloni wa nia lucämaö, nofi bäyäalewä ebä lä yaile bä ja. Ö̦jö däjä, täbä lä jölöcamou wei toubä dabönö, wa nia jölöcaö. Inaja wa lä cuaaö wei tänö, iba wa nia yaiamaö. Camiyä nija a ojodamou ja, täbä nofi nia bäyäbou.

¹⁴ ’Aaloni bei ijilubö wa ebä nacaö fa showaonö, camishi labe bä lä cui ja, wa bä nia lucämaö —a cuma—.

¹⁵ Täbä lä jölöcamou wei toubä dabönö, bä fö̦ö wa e jölöcöa lä tadalöfenaja, inaja showawä bei ijilubö ebä ma cui, wa ebä nia ca̦i taamaö. Camiyä nija bä ojodamou ja, täbä nofi nia bäyäbouje. Ö̦jö toubä dabönö, bä lä jölöcödamou wei tänö, cama ebä lä nodiblou wei bä ma cui, camiyä nija showadi bä nia ojodamou nodiablalou showao, täbä nofi bäyäbobeje —a Jeobaa cuma.

Jeobaa e yano lä i̦tamano wei tä a̦

¹⁶ Inaja Moisesi a cuaaö cadidioma, Jeobaanö a nosiemaö ja a lä cuno weinaja showawä.

¹⁷ Ejido tä ulifi tabi lä feiqueno wejei däjä, bä juu showai ja, ö̦jö lasha a waicoma. Ai a lasha faö co̦o däjä, jaba a belibo lä cublole däjä, tä mö jaba jalu cublou däjä, ö̦jö lä tä jalu dodijiwä ja, Jeobaa e yano i̦taquema.

¹⁸ Moisesinö Jeobaa e yano i̦taquema. Fibä colo didiobä täbä fa taabodunö, je̦fa bä i̦taa nomöjöabodayoma. Ai defibä bluca i̦taaö cuaaö fe fa fa̦yoblalönö, defibä lojodoobä, ai defibä blilia nomöjöabodayoma.

¹⁹ Ö̦jö däjä, shibo co̦i bänö bä lä diyäblamono wei bä lä cui, Jeobaa e yano feyaca jamö bä yojoquema. Ö̦jö bä feyaca jamö, yalo sibä yojoa feyacaa nomöjölema, Jeobaanö Moisesi a nowa lä tano weinaja showawä.

²⁰ Jeobaa a wa̦no oni lä cuono wei macö lä cui, macö didiobä defi ca jamö macö didiquema. Defi ca bälabeje deficö lä cui, deficö lucäa nomöjömalema. Ö̦jö defi ca fe lao nomöjöobä, tä feyaca fa dälönö, defi ca fe laquema.

²¹ Ö̦jö däjä, Jeobaa a wa̦no oni didiobä defi ca lä cui, cama e yano jamö defi ca lucämalema. Ö̦jö defi ca lä i̦taono wei jamö, camishi acadafu cäcö läa showadaquema, Jeobaanö Moisesi a nowa lä tano weinaja showawä.

²² Ö̦jö däjä, nii bä maqueobä täcö lä cui, Jeobaa e yano jamö täcö lucämalema. Colo yano jamö, a yano lä nowamano wejei jamö, täcö i̦taquema, acadafu cäcö lä läono wei tä ola jamö. Tä motoca faö cuaaö lä mlai jamö, täcö i̦taquema.

²³ Ö̦jö däjä, Jeobaa nija bä dodoobä, nii bä dodijidawä maqueaquema, Jeobaanö Moisesi a nowa lä tano weinaja showawä.

²⁴ Jeobaa e yano jamö, cowa wacöbä shi̦i cublamobä tä ca̦i lucämalema. Nii bä lä maqueo wei tä mashi jamö a i̦taquema, tä mö weyaö cuaaö lä mlai tä mashi jamö.

²⁵ Ö̦jö däjä, Jeobaa a lä cule jamö, cowa wacöbä shi̦i cublamobä, dabö dabö toubä baobä tä cabä cadejeblalema, Jeobaanö Moisesi a nowa lä tano weinaja showawä.

²⁶ Ö̦jö däjä, täbä wa̦queshi ni cle̦deli u̦cucamobä täbä maqueobä, täcö lucäa nomöjömalema, Jeobaa e yano jamö. Olo bänö tä lä jo̦yablaleno wejei täcö lä cui. Acadafu cäcö lä läono wei tä lu̦locu jamö täcö i̦taquema.

²⁷ Ö̦jö däjä, täbä wa̦queshi ni cle̦deli u̦cucamobä wacö ömömaquema, Jeobaanö Moisesi a nowa lä tano weinaja showawä.

²⁸ Ö̦jö däjä, Jeobaa e yano jamö, acadafu ai cäcö läa nomöjömaquema, bä lä faö wei yoca jamö.

²⁹ Yalo bä lä dodoblamou wei bä maqueblamobä täcö lucäa nomöjömalema, Jeobaa e yano sibo jamö. ¿Ö̦jö tawä? Bä nö bayeli nacaobä, bä lä fablaaö wei yoca lä cule jamö, täcö i̦taquema. Ö̦jö täcö jamö, yalo bä ö̦shö ma cui, nii bä ma cui, bä dodobou showadaoma, Jeobaanö Moisesi a nowa lä tano weinaja showawä.

³⁰ Bä imicö ya̦lömoblaabä, bä mamicö ya̦lömoblaabä, ubä nia lä babou wejei tä lucäa nomöjömalema. Yalo bä lä dodoblamou wei bä maqueblamobä täcö jamö, Jeobaa e yano möamo jamö, tä möamoblalema. Bä imicö ya̦lömoblaabä, bä mamicö ya̦lömoblaabä, mau ubä löa showaquema.

³¹ Ö̦jö ubä ja, Moisesi a ma cui, Aaloni a ma cui, Aaloni bei ijilubö ebä ma cui, ö̦jamö showadi bä imicö ya̦lömoma, bä mamicö ca̦i.

³² Jeobaa e yano jamö bä lä lucäblaano wei däjä ma cui, yalo bä lä dodoblamou wei bä maqueblamobä täcö ja bä lä icuono wei däjä ma cui, ö̦jamö showadi bä imicö ya̦lömou yaimoma, bä mamicö ca̦i, Jeobaanö Moisesi a nowa lä tano weinaja showawä.

³³ A yano sibo ji̦coloobä, täcö läa fe fa̦yoa nomöjömalema. Fibä i̦tao fe lä fa̦yoono wei jamö, Jeobaa a yano möamoblaliyoma. Yalo bä lä dodoblamou wei bä maqueblamobä täcö ma cui, ö̦jö täcö ca̦i möamoblaliyoma. Täbä nia lä faö wei yoca jamö, acadafu cäcö läquema. Inaja a fa cuaanö, Jeobaanö a nosiemaö ja, a lä cuno weinaja, Moisesinö tä jödödöblalema.

Ölajashi ajamö Jeobaa a culanö bä ca̦i bälödou lä cuaafälöno wei tä a̦

³⁴ Tä lä jödödöblaleno wei däjä, ölajashi a sublenö Jeobaa e yano fe yojoblaliyoma. Jeobaa a shi̦inö a yano comablaliyoma.

³⁵ Ö̦jö cudeenö, ö̦jamö ölajashi a cua yalo, Jeobaa e yano jamö Moisesi a lucäö doblonomi. Ö̦jö lä e yano jamö, cama etä shi̦i fa jödödöonö, a lucäö doblonomi.

³⁶ Showadi bä bälödou lä cuaafälöno wei däjä, abinaja bä cuaama. Jeobaa a yano feyaca jamö, ölajashi a ösöa lä co̦maleno wei däjä, Isaeli ebä jocäa co̦layofälöma.

³⁷ Ö̦jö ma cui, ölajashi a ösömaö lä mlaono wei däjä, bä junomi. A nö ösöö dabou fa balöojenö, a ösöö co̦ofälöö däjä, bä shino jocäö co̦fälöma.

³⁸ Bä jocädou lä cuaafälöno wei däjä, Jeobaanö bä ca̦i cudou malä cuaafälöno wei. Jalu däjä ma cui, cama Jeobaa e yano feyaca jamö, ölajashi a bada feyacaoma. Didi däjä ma cui, ölajashi jamö cowa wacö shi̦i cudio fe fa jaludinö, Isaeli bluca ebä nija showadi tä dablamodima.