Éxodo 35 - Biblia Yanowamö

Täbä nia lä yanöcöono wei tä a̦

¹ Moisesinö Isaeli ebä bluca fa co̦cablamalönö, bä yömölama. —Jeobaanö wamacö nosiemaö ja, abinaja wamacö taamaö bufima.

² Wamacö ojodamou showao däjä, 6 wama tä didi nia tablamaö. Ö̦jö tä fena ja, sábado däjä wamacö ojodamou mlai wamacö nia yanöcöo. Jeobaanö tä mö jalu lä yaimabole, “Ei tä mö li jalu”, wama tä nofi nia jalu tabou. Wamacö yanöcöobä tä mö jalu ja, ai a ojodamou fe yadio ja, a nia nomamaöje.

³ Wamacö yanöcöobä tä mö jalu ja, cafä wamacö yanobö bluca jamö, cowa wama wacöbä nia ca̦i jolaimi, Jeobaa a cuma. Einaja Moisesinö bä yömölaö ja a cuma.

Jeobaa e yano tablamabä Moisesi a lä nacono wei tä a̦

⁴ Cama Isaeli ebä bluca nija abinaja Moisesi a cuma. —Cafä wamacö nija Jeobaanö tä taamaö lä bufii wei, ei tä a̦.

⁵ Cama Jeobaa wama a dobäbä, wama etäbä nia madofi jöbäö. Wama täbä noshi lä ö̦jödabou wei wamacö lä cuinö, äyämö wama täbä ca̦i nia waloo. Olo bä ma cui, blada bä ma cui, wama bä nia jöbäö. Duo shibä ca̦i.

⁶ ’Camishi bä diyäblamobä, wama ubä nia ca̦i jöbäö —a cuma—. Shi de̦lelewä ubä ma cui, ushi wacäjäwä ubä ma cui, wacä ubä ma cui, wama ubä nia ca̦i jöbäö. Camishi shuducaje bä au lä dodijidai bä ca̦i. Shibo co̦ibä ja ubä lä juducano wejei ubä ca̦i.

⁷ Yalo sibä ca̦i. Oweja wa̦lo bä bada lä cui, ö̦jö sibä lä dodijamaö wejei sibä ma cui, ai sibä ca̦i yalo lä dodijidai sibä ma cui, wama sibä nia jöbäö. Defi liyäjäwä lä jifui defibä ca̦i acadafu.

⁸ ’Cowa wacö shi̦i befi, dabö dabö wama toubä ca̦i nia jöbäö —a cuma—. Täbä lä jölöcamou wei toubä dabö ja, täbä ni cle̦deli coyocoblabeje täbä ca̦i. Täbä wa̦queshi ni cle̦deli lä u̦cucamou wei täbä ma cui ja, ö̦ja täbä ni cle̦deli ca̦i coyocoblaö mö feduobeje.

⁹ ’Maa mabä oni lä liyäjäi mabä ma cui, ai mabä showadi mabä wai lä shadimabou wejei mabä ma cui, wama mabä nia jöbäö, mabä wai nowa lä bluca wei mabä lä cui. Nofi bäyäalewä a nö bada ö̦jöböamobä, cäcö lä jalebole ecö ma cui ja, ai mabä shadidiobä. Ö̦jamö lä cäcö lä sudile ecö wai ja, ai mabä shadidio mö feduobä —Moisesi a cuma.

Madofi bä tablamaö lä bufino wei tä a̦

¹⁰ Abinaja Moisesi a cuu co̦oma. —Wamacö bufi lä dao wei wamacö lä cui, wamacö fa juimanö, Jeobaanö täbä tamaö lä bufii wei, wama täbä tablabä.

¹¹ Cama Jeobaa e yano ma cui, ö̦jamö täbä nia madofi bluca lä cuo wei täbä ma cui, wama täbä nia bluca taö. ¿Ö̦jö tawä? Yalo sibä nia lä lelemaö wejei sibä ma cui, wama sibä ca̦i nia taö. Sibä lucäcamobä, je̦fa bä ola jamö, shoquedewä täbä nia wai lä yädäblamou wei wama täbä ca̦i nia taö. Defibä nia lä i̦tao wei defibä ma cui, defibä nia lä blilio wei defibä ma cui, je̦fa bä ma cui, ö̦jö wama täbä bluca nia taö. Fibä colo didiobä täbä ca̦i.

¹² ’Jeobaa a wa̦no oni didiobä defi ca ma cui, ö̦jö defi ca bälabeje deficö nia lä lucäo wei deficö ma cui, ö̦jö defi ca fe laobä tä ma cui, wama täbä nia bluca tablaö —a cuma—. Jeobaa e yano jamö camishi acadafu cäcö nia lä läo wei cäcö ca̦i, e yano yai nowamaö lä dodijio wejei jamö.

¹³ Nii bä maqueobä täcö ma cui, ö̦jö täcö bälabeje, deficö nia lä lucäo wei deficö ma cui, ö̦jamö bä madofi ca̦i nia lä cuo wei bä ma cui, wama täbä bluca nia taö. Jeobaa nija nii bä nia lä dodobou wejei bä ma cui, wama bä ca̦i nia taö.

¹⁴ ’Cowa wacöbä shi̦i cublamobä wama tä ca̦i nia tablaö, tä wacacaobä —a cuma—. Ö̦jamö täbä madofi nia lä cuo wei täbä ma cui, dabö dabö toubä nia lä babou wejei tä cabä befi ma cui, wacö ömöobä dabö dabö toubä ma cui, ö̦jö wama bä bluca nia taö.

¹⁵ Täbä wa̦queshi ni cle̦deli lä u̦cucamou wei täbä maqueblamobä, ö̦jö wama täcö ca̦i nia taö, täcö bälabeje deficö lucäobä deficö ca̦i. Täbä lä jölöcamou wei toubä dabö ma cui, ö̦jö wama toubä ca̦i nia taö. Täbä wa̦queshi ni cle̦deli lä u̦cucamou wei täbä ca̦i. Jeobaa e yano jamö yoca lä cui jamö, cäcö nia lä läo wei cäcö acadafu ma cui, ö̦jö wama cäcö ca̦i nia tablaö.

¹⁶ ’Yalo bä nia lä dodoblaamou wei bä maqueblamobä wama täcö ca̦i nia tablaö —a cuma—. Feyaca ja, matacali wama cäcö ca̦i nia tablaö, yalo bä maquequebobeje. Duo shibänö ö̦jö wama cäcö nia matacali tablaö. Täcö bälabeje, deficö nia lä lucäo wei deficö ma cui, ö̦jamö täbä nia madofi bluca lä cuo wei täbä ma cui, wama täbä ca̦i nia taö. Bä imicö ya̦lömoblaabä, bä mamicö ya̦lömoblaabä, mau ubä babobeje wama tä ca̦i nia taö, tä nia lä döcläo wei tä ca̦i lä cui.

¹⁷ ’Jeobaa e yano sibo ji̦coloblabeje, camishi acadafu wama bä ca̦i nia taö —a cuma—. Bä cadömabobeje, je̦fa bä nia lä i̦tamaö wejei bä ca̦i. Je̦fa bä colo didiobä täbä ca̦i. Jeobaa e yano sibo nia lä ji̦coloblaö wejei yoca lä cui jamö, cäcö nia lä läo wei cäcö ca̦i.

¹⁸ Jeobaa e yano feyaca jamö bä nia camishi lä yojoo wei cäcö ola befi ca̦i lojodoblamobä wama täbä ca̦i nia madofi tablaö. Sibo jamö bä nia läo fe lä fa̦yoo wei bä ca̦i lojodoo mö feduobä, wama täbä madofi ca̦i nia taö. Ö̦jö bä o̦cablamobä too totobä showawä ma cui, wama totobä nia ca̦i taö.

¹⁹ ’Nofi bäyäalewä bä didiobä, wama bä camishi nia ca̦i diyäblaö, bä yai lä dodijidai —a cuma—. Jeobaa e yano lä nowamaö wejei e yano ja bä läo däjä, ö̦jö bä ja bä didiobä, bä nia camishi yaio. Nofi bäyäalewä Aaloni a lä cui, cama ebä yai ja, a nia didio. Bä ijilubö ebä ma cui, täbä nofi bäyäaöje däjä, cama bä camishibö nija bä nia didio mö feduo —Moisesi a cuma.

Bä shi lä ö̦jödaono wei tä a̦

²⁰ Ö̦jö däjä, Moisesinö bä yömölaö fa jödödöblalunö, Isaeli ebä bluca faa co̦layofälöma.

²¹ Bä faa fa co̦lalufälönö, Jeobaa a dobäö bufi lä doblaono wejei bä ma cui, täbä madofi jöbäbeje bä shi lä jalimono wei bä ma cui, ö̦jö bä bluca waloa co̦quema. Jeobaa e yano tablabeje täbä ca̦i madofi waloa co̦beyolumaje. Ö̦jamö täbä madofi nia lä taano wejei täbä tablabeje täbä ca̦i. Camishi bä nia lä yaio wei bä ca̦i diyäblabeje, täbä ca̦i.

²² Wa̦lo bä ma cui, suwä bä ma cui, bä shi lä ö̦jödaono wei bä bluca lä cui, bä waloa co̦quema. Baushi bä lä shadimabou wejei bä ma cui, bä lä juubou wejei bä ma cui, bä lä ya̦bou wejei bä ma cui, bä lä jalebou wejei bä ma cui, jödödöwä bä ca̦i bluca baushi waloa co̦quemaje. ¿Ö̦jö tawä? Olo bä ja, bä bluca lä tablamono wei bä ca̦i waloa fa co̦icujenö, bä bufi doblalolanö Jeobaa a dobämaje.

²³ Ubä tabou lä bädaono wejei bä ma cuinö, ubä ca̦i waloquemaje. Shi de̦lelewä ubä ma cui, ushi wacäjäwä ubä ma cui, wacä ubä ma cui, ubä ca̦i bluca waloquemaje. Camishi shuducaje au bä acadafu lä dodijidai bä ca̦i. Shibo co̦i bä ja ubä lä juducano wejei ubä ca̦i. Yalo sibä ca̦i. Oweja bä bada wa̦lo lä cui, ö̦jö sibä lä dodijamaö wejei ma cui, ai sibä ca̦i yalo lä dodijidai sibä ma cui, sibä ca̦i bluca waloquemaje.

²⁴ Jeobaa nija bä jöböabeje, blada bä tabou lä bädaono wejei bä lä cuinö, bä ca̦i waloquemaje. Inaja showawä, duo shibä tabou lä bädaono wejei bä lä cuinö, ö̦jö shibä ca̦i waloquemaje. Defi liyäjäwä lä jifui defibä ca̦i acadafu tabou lä bädaono wejei bä lä cuinö, “Ei defibä acadafu ja, täbä madofi tablamobä daanö”, bä bufi lä cuno wei bä lä cuinö, defibä ca̦i waloquemaje.

²⁵ Ubä juducaö lä daö wejei bä suwä lä cuinö, ubä fa juduculalöjenö ubä ca̦i waloquemaje. Shi de̦lelewä ubä ma cui, ushi wacäjäwä ubä ma cui, wacä ubä ma cui, ubä ca̦i waloquemaje. Shuducaje au ubä lä dodijidai ubä ca̦i.

²⁶ Bä bufi lä dao wei bä suwänö, shibo co̦ibä ca̦i juducamaje.

²⁷ Isaeli ebä bada lä cuinö, maa mabä oni lä liyäjäi mabä ma cui, ai mabä showadi lä shadio wei mabä ma cui, ö̦jö mabä wai nowa lä bluca wei mabä ca̦i waloquemaje. Nofi bäyäalewä a nö bada ö̦jöböamobä, cäcö lä jalebole ecö ma cui ja, ai mabä shadidiobä. Ö̦ja ai cäcö lä sudile ecö wai ja, ai mabä shadidio mö feduobä.

²⁸ Cowa wacö shi̦i cublamobä, dabö dabö toubä ca̦i waloquemaje. Täbä lä jölöcamou wei toubä dabö ja, täbä ni cle̦deli coyocoblabeje täbä ca̦i. Täbä wa̦queshi ni cle̦deli u̦cucamobä täbä ma cui ja, ö̦ja ma cui täbä ni cle̦deli ca̦i coyocoblaö mö feduobeje.

²⁹ Isaeli ebä lä cuinö, Jeobaa nija täbä madofi dodobou bufi lä doblaono wejei bä bluca lä cuinö, täbä ca̦i waloquemaje. Wa̦lo bä ma cuinö, suwä bä ma cuinö, Moisesi nija Jeobaanö tä tamaö lä bufino wei tä tabeje, täbä ca̦i waloquemaje. Jeobaa a dobäbeje, no mlai ja täbä jöbämaje.

Jeobaa e yano tabeje jamö cäcöbö lä lämabono wei tä a̦

³⁰ Isaeli ebä nija abinaja Moisesi a cuma. —Bei. Jeobaanö Besalelo a yaiaö waiquia lä cule, Judawä nodiwä e lä cui. Ö̦jö a Besalelo lä cui, Uli bei ijilubö e. Uli a lä cuinö, a nofi lä fääshämaö wei a Besalelo lä cui.

³¹ Jeobaanö täbä tamaö lä bufii wei täbä tabä, cama a lojodenö a bufi moyawämabou waiquia. A dodijabä, a bayelibou. Bufi jaducuwä a tamabou. Täbä madofi bluca dodijidablabä a ca̦i cua waiquia lä cule,

³² bufi dao a cuobä. Täbä madofi liyäjäblabä. Olo bä ma cui ja, blada bä ma cui ja, täbä nia madofi taö. Duo shibä ma cui ja, bä ca̦i nia madofi taö.

³³ Maa mabä wai lä dodijidai, mabä wai nowa lä bluca wei mabä fa cobemanö, mabä ca̦i nia shadidamaö. Fii fibä ma cui ja täbä ca̦i nia madofi taö. Täbä lä taö wei täbä nia bluca liyäjäblaö.

³⁴ ’Ai wamacö damaö mö feduobä, Jeobaanö a ojodamabou waiquia lä cule. ¿Ö̦jö tawä? —a cuma—. Besalelo a ma cuinö, Aoliaba a ma cuinö, wamacö nia damaböö mö feduo. Ö̦jö Aoliaba a lä cui, Dani nodiwä a, Aisamaco bei ijilubö e lä cui.

³⁵ A bufi lä dao wei a lä cuinö täbä madofi taö ja, täbä liyäjäblaö lä culenaja, inaja showawä cäcöbö cuaaö mö feduobä, Jeobaanö cäcöbö bayelibou fe balojoa waiquia lä cule. Camishi shi de̦lelewä bä ma cui, ushi wacäjäwä bä ma cui, wacä bä ma cui, bä yai lä dodijidai bä tablaböbä. Shuducaje au bä lä dodijidai bä ca̦i. ’¿Ö̦jö tawä? —a cuma—. Bä bufi lä dao wei bänö, ubä ma juducaö wejei ma cui, camishi bä ma diyäblaö wejei ma cui, bä dodijaö. Fii acadafu fibä ma cui ja, duo shibä ma cui ja, bä nia dodijidawä ojodamou. Bä bufi dao. Tä nia lä tablaö wejei tä nia liyäjäblaöje. Inaja showawä ei cäcöbö nia dodijaö cuaaö mö feduo —Moisesi a cuma.