Éxodo 34 - Biblia Yanowamö

Moisesinö ai maa macö bashäblaö lä co̦layono wei tä a̦

¹ Moisesi nija abinaja Jeobaa a cuma. —Maa jaba macö da cuobleinaja macö cuwä, wa macö nia bashäblaö co̦o. Wa macö bashäblaö fa co̦lonö, jaba wa macö lä shäyäqueno wei macö jamö, tä oni jaba da cuoblei, ö̦ja ya tä oni nia tablaö co̦o.

² Fena däjä wa nö daobä. Äyämö, Sinai cäcö jamö wa dolecou co̦o fenaimabä. Feyaca cäcö jamö camiyä nija wa icuobä.

³ Wa duoimaö däjä, ai wa tä nia nocamaboimi. Ei macö jamö, moli ma cui a ca̦i nia dablamou buomi. Yalo bä ma cui, bä nia ajedoimi. Oweja bä ma cui, shibo bä ma cui, baca bä ma cui, ei macö colo jamö ma cui, bä nia iyaö cuaaimi —Jeobaa a cuma.

⁴ Ö̦jö cudeenö, maa jaba macö lä cuono weinaja macö cuwä, Moisesinö macö bashäblaö co̦layoma. Ö̦jö däjä, a jocädou fa fenalonö, Sinai cäcö jamö a dua fenablabefälöma, Jeobaanö a nowa lä tano weinaja showawä. Maa macö däbole a dubefälöma.

Moisesi nija Jeobaa a lä mömono wei tä a̦

⁵ Ölajashi a jamö Jeobaa a fa itolunö, Moisesi a lä ublale jamö a ublaa yädäaliyoma. Ö̦jamö a fa ublaicunö, cama Jeobaa i̦cali a wa̦fa wäamou cadidioma.

⁶ Moisesi nija Jeobaa a jayualanö, a wa̦ falayoma. —Camiyä Jeobaa ei ya. Yai Bada ya lä bufiblamou wei ya lä cui, ya bufi asio talei. Ya bä nofi ca̦i ojodabou. Ya jushudou si ijejewämi. Ya bä lä nofimaö wei, ya bä ca̦i lä bayeliblaö wei, showadi ö̦jö tä nia shino bluca wawäö.

⁷ Obi, yedu jamö ma cui, ya bä nia bluca nofimaö showao. Bä cadidou ma mlai ma cui, bä nofi ma jushuaö wei ma cui, bä doblou ma mlai ma cui, ya bufi nia asio —a cuma—. Ö̦jö ma cui, ya tä nowa tabobä tä cua ja, ya bufi nia lämoimi. Cama bä ma cui nija, bä ijilubö ebä ma cui nija, bä fääshä ebä ma cui nija, ö̦jö bä ijilubö ebä ma cui nija, ö̦jö bä ma cui nija ya tä nowa nia tabou nodiablalou showao —Jeobaa a cuma.

⁸ Lobe, mashita ajamö Moisesi a möfe fa boblaicunö, a wa̦fa Bada doblao tama.

⁹ Abinaja a cuma. —Bada tä. Bäfä bufi doblamabou waiquia ja, cafä Jeobaa wanö yamalecö ca̦i jubä, ¿ö̦jö tawä? Täbä bufi ma jifui ma cui, cafä Bada wanö yamalecö ca̦i jubä. Yamacö cadidou ma mlai ma cui, yamacö doblou ma mlai ma cui, ö̦jö tä nowa ma cule ma cui, tä nowa tabo dijä. “Iba bä li waiquiwä”, yamalecö nofi shino yai da tabo —a cuma.

Maa dude macö jamö tä a̦ oniblaö lä co̦layono wei tä a̦

¹⁰ Moisesi nija Jeobaa abinaja a cuma. —Bei. Wamale a̦ da ji̦lilä. Ya wa̦ nö nia wäo. Afä bä mamo mötale ja, tä nö lä quilijii ya tä nia bluca wawämaö. Eja ma cui, shomi ja ma cui, bluca bä bälöblawä lä yaiblai bä lä bälöle jamö ma cui, tä jaba dablamono ma mlai ma cui, Jeobaa ya lä cuinö, ö̦jö ya tä nia dablamaö. Cafä wamacö ma cuinö, bä bälöa lä ajedele bä ma cuinö, cafä bluca wamacönö Jeobaa wamale nia lojode dablaö. Bämacö bayeliblafälöbä, bejedi ya nö nia quiliaö.

¹¹ Ei ya wa̦ lä cui, wamale a̦ nofi fa jaducubonö, wamale nosie nia shino juaö. ’¿Ö̦jö tawä? —a cuma—. Amoleo bä ma cui, Canaanateli bä ma cui, idida bä ma cui, feleseo bä ma cui, ebeo bä ma cui, jebuseo bä ma cui, cafä wamacö bälöo nomöjöobä, ya bä nia bluca yashublaö.

¹² Wamacö nia lä jufälöö wei jamö bä da moyawäafälö. Ö̦jamö bä lä bälöblai bänö wamacö yacläa fa dicomalöjenö, wamacö dobloimi majöa dicoicu. Ö̦jö bä sho wamacö nofi tamayobä bämi.

¹³ ’Abinaja wamacö nia yai cuaaö —a cuma—. Cama etä ja, bä yalo lä dodoblamou wei bä maqueblamobä etäbä lä cui, wama täbä nia wa̦liaö showadao. Maa mabä lä i̦tabou wejei, wama mabä nia cobeblamaö. Fii fibä ca̦i lä i̦tabou wejei wama fibä nia bafedimaö.

¹⁴ Ai tä lä bufiblamou wei tä lä cui, wama tä nia lämaboimi. Ö̦jö wama tä a̦fa bada doblao tabä, wamacö möfe nia boomi. Ai ya tä nia bufiblamaö malä mlai. Camiyä ya bufiblamobä ya Jeobaa lä cui, ya bufi jaluo.

¹⁵ ’¿Ö̦jö tawä? —a cuma—. Ö̦jamö bä lä bälöblai bä sho, wamacö nofi nia lä tamayou wei bämi. Camiyä Jeobaa ya cua ma cule, shomi tä bufiblabeje tä lämabou waiquiweje ja, cama bä bufi yabäcäblou waiquilayoma cäbä. Ö̦jö bä nija wamacö lulou mlaobä, bä da moyaweicu. Cama etä nija bä yalo dodoblaöje däjä, wamacö fa nacajenö, wamacö nalemou dicoo wei.

¹⁶ Ijilufä bä nija, ö̦jö wama bä tääbö ca̦i däamaö dicoo mlaobä. ¿Ö̦jö tawä? Inaja wamacö cuaaö dicoo ja, ö̦jö bä suwänö ijilufä bä nia yaclämaöje. Tä bufiblabeje, shomi tä lä lämabolajei tä nija, cama suwä bä bufi yabäcäo lä culenaja, ijilufä bä nia yabäcamaö mö feduo dicooje.

¹⁷ Ö̦jö bä nija wamacö nö bayeli nacaobä, ai täbä madofi bädawä ma cui ja, wama täbä nö ca̦i nia idubö taimi.

¹⁸ ’Bei —a cuma—. Abibi a belibo cublou co̦o däjä, abinaja wamacö nia shino cuaaö, nii bä juluno lä mlai bä ja, showadi wamacö nia iyaö ca̦i lä co̦camou wei tä lä cui, wama tä nofi nia shino jaducubou. Ö̦jö bä ja, wamacö iyaö showao däjä, 7 wama tä mö nia jalu tablamaö, bämacö nowa lä tano weinaja showawä. Abibi a belibo lä cui däjä, tä yai lä cublole däjä, wamacö nia iyaö ca̦i co̦camou. ¿Ö̦jö tawä? Abibi a belibo däjä, Ejido jamö wamacö malä julayofälöno wei.

¹⁹ ’Bä ijilu cublou lä balöo wei bä lä cui, iba bä li cuobä —a cuma—. Baca bä ma cui nija, oweja bä ma cui nija, bei ijilubö jaba wa̦lo lä cui, camiyä nija bä dodomamobä, bä nia yaio.

²⁰ Bulo bä nija bä jaba lä cublai, bä nomabä tä ma cule ma cui, oweja ocalo bä nia shämou läo. ¿Ö̦jö tawä? Oweja ocalo bä ja, bulo bä nowa nia co̦amamou. Oweja wama bä shäö läo bufiomi ja, cama bulo wama bä olafi nia cäblaö. Yanowamö wamacö ijilubö jaba lä cublou wei bä lä cui, bä shämou mlai ja, showadi yalo bä ja, bä nowa nia shino co̦amamou. Ai a bädawä lä cui, yalo a dodobou mlalanö, camiyä nija shinoco a nia icuomi.

²¹ ’Wamacö ojodamobä, 6 tä mö nia didi cuo —a cuma—. Ö̦jö tä fena ja, sábado däjä wamacö nia yanöcöo. Ö̦jö däjä, nii bä döamobä tä ma cule, nii bä tamobä tä ca̦i ma cule, wamacö nia yanöcöo fe yadio.

²² ’Maa a jaba quei lä mlai däjä, showadi camiyä nija wamacö nia iyaö ca̦i lä co̦camou wei, wama tä nofi nia jaducubou. ¿Ö̦jö tawä? —a cuma—. Nii wama mobä jaba lä taö wei mobä ja wamacö nia iyaö. Maa a jaba quei däjä, nii bä lalou däjä, showadi camiyä nija wamacö nia iyaö ca̦i lä co̦camou wei, ö̦jö wama tä nofi ca̦i nia jaducubou.

²³ Ai a lasha faö showao mlao däjä, cafä wa̦lo wamacö bluca lä cuinö, 3 wamale nofi nia shino co̦camoaö. Jeobaa ya lä cui, Isaeli wama ecö nija ya bufiblamobä ya lä cui, showadi wamale nofi nia co̦camoaö.

²⁴ ’Cafä wamacö ulifibö cublou nomöjöobä, bä bälöjöwä lä yaiblai ya bä nia bluca yashublaö —a cuma—. Ö̦jamö bämacö nia bälöa blaucublamaö. Abinaja ca̦i. Ö̦jamö wamacö culanö, lasha a faö showao mlao däjä, Jeobaa 3 wamale nofi nia co̦camoaö, cafä wamacö nija ya lä bufiblamou wei ya lä cui. Ö̦jö ma cui, wamacö nia ma dolequeblaayoluu wei ma cui, cafä wamacö ulifibö ja, bä bufi nia waiyou juo co̦omi.

²⁵ ’Camiyä nija yalo wama bä dodobou däjä, nii bä lä juluno wei wama bä nia dodobou coyocoomi —a cuma—. Abinaja ca̦i. Camiyä ya waiteli lä jayuano wei wama tä nofi jaducubobä wamacö iyaö däjä, ö̦jö tä fena ja wama bä waö co̦obä, wama bä nia feiboimi.

²⁶ ’Döano sibä ja bä nii jaba lä lalou wei, iba yano jamö ö̦jö wama bä ca̦i nia shino juu. Cafä wamacö nija ya bufiblamobä ya Jeobaa. ’Shibo wama a ijilubö jaliaö däjä, bei bä nöö suju e ubä ja, wama a nia jaliaimi —a cuma.

²⁷ Ö̦jö däjä, Moisesi nija abinaja Jeobaa a cuma. —Ei ya wa̦ lä cui, wale a̦no oniabä. Ya lä cufenaja tä cuobä, ya wa̦ nö wäo. Cafä wa ma cuinö, Isaeli ai wama ecö ma cuinö, bluca wamacönö wamale a̦ ji̦liabä, ya wa̦ nö wäo lä cufe —a Jeobaa cuma.

²⁸ Sinai cäcö jamö Jeobaa nija a cua showalanö, Moisesinö 40 tä mö didi tablamalejelayoma. Mau ubä ca̦i coanomi. Nii bä ja, a ca̦i iyanomi. ¿Ö̦jö tawä? Jeobaanö bä nowa tamaö lä bufino wei, Moisesinö tä a̦ onimaö nocamoma, maa macö ja. Tä tamaö lä bufino wei, 10 täbä a̦ lojode jibämoquema.

Moisesi wäyäcu shi̦i lä wacalamiono wei tä a̦

²⁹ Sinai cäcö ja Moisesi a itoa lä co̦layofälöno wei däjä, maa macö ja Jeobaa a wa̦no oni lä cuono wei macö däbolanö, a dömöa co̦baliyofälöma. Yai Bada tä sho cäcöbö a̦ wayomayou ajedeoma cudeenö, bei wäyäcu jamö etä shi̦i cuo ja̦tooma.

³⁰ Aaloni a ma cuinö, Isaeli ebä bluca ma cuinö, Moisesi wäyäcu jamö etä shi̦i fa dalalöjenö, bä ajedou quilima.

³¹ Ö̦jö ma cui, Moisesinö bä nacaa fa co̦länö, Aaloni a ma cui, Isaeli ebä bada ma cui, bä waloa co̦quema. Bä waloa fa co̦icunö, Moisesinö bä a̦ wayomama.

³² Ya̦cumö, cama bä quilii fa mlalalunö, Isaeli bluca ebä ma cui, bä waloa nomöjöquema. Ö̦jö däjä, Jeobaanö tä tamaö lä bufino wei tä ja, bä yömölalema. Sinai cäcö jamö Jeobaanö Moisesi a nosiemaö lä cuaano weinaja, cama bä nosiemaö cuaaö nomöjöoma.

³³ Moisesinö bä a̦ wayomaö lä waicono wei däjä, camishi acadafu cäcönö wäyäcu jo̦yaoma.

³⁴ Ö̦jö ma cui, Jeobaa a wa̦ wayomabä a lucäö co̦o däjä, showadi cäcö shino jayudaö co̦oma. Ö̦jamö a culanö, wäyäcu shino wawäoma. ¿Ö̦jö tawä? A faö lä co̦o wei däjä, Jeobaanö Isaeli ebä taamaö lä bufino wei tä ja, bä fa yömölanö,

³⁵ Moisesi wäyäcu jamö tä shi̦i lä cuono wei etä shi̦i dablamaje. Ö̦jö däjä, Moisesi showadi wäyäcu jo̦yao co̦oma, acadafu cäcönö. Jeobaa a wa̦ wayomabä a lucäö showao mlao däjä, showadi wäyäcu shino jo̦yadaama.