Éxodo 33 - Biblia Yanowamö

Olebe cäcö lä dacöfälöno wejei tä a̦

¹ Moisesi nija abinaja Jeobaa a cuma. —A da alufälö. Ejido jamö wa bä lä co̦leno wei bä lä cui, bä ca̦i bluca juu da showadaofälö. Wamacö nö badabö nija ya tä a̦fa ulifi lä wäqueno wei jamö wa bä ca̦i jubä. Ablaamö a ma cui nija, Isaacö a ma cui nija, Jacobo a ma cui nija, ö̦jö bä nija ya wa̦ nö wäo ja, ya bä nowa tama. “Afä bä nodiwä nija ya tä ulifi jöböaö wä”, ya bä nowa tama.

² ’Ja̦o. Camiyänö, a̦jele ya shömaö wä, a balöobä —a cuma—. Ö̦jamö bä lä bälöblai ya bä nia yashublaö cuaaö. Canaanateli bä ma cui, amoleo bä ma cui, idida bä ma cui, feleseo bä ma cui, ebeo bä ma cui, jebuseo bä ma cui, ya bä nia bluca yashublaö cuaaö.

³ Tä ulifi nö lä niji wei jamö wa bä ca̦i nia juu, tä nö ofi lä mlai jamö. Ö̦jö ma cui, camiyä ya yainö, bämacö ca̦i nia juimi, bämacö mö bluca watäa dicolufälö. Wamacö bufi jifuwä malä waiquii —Jeobaa a cuma.

⁴ Jeobaa a lä cuno wei tä a̦ fa ji̦liläjenö, bä mö ö̦cöma. Bä ca̦i baushimou mlaa showalayoma.

⁵ Moisesi nija abinaja Jeobaa a cuu malä waiquiono wei. —Isaeli ebä nija ei ya wa̦ lä fale, tä a̦ da wäyä. Ö̦jö bä lä cui bä bufi jifuwä. Ö̦jamö lä camiyänö moli ya bä nofi tadaö fa cunoja, yedu ya bä mö nö watäblalebö wei. ¿Ö̦jö tawä? Fei däjä, baushi bä nia joyaöje, ya nia lä cuaaö wei tä ja, ya bufi dayäo balöobä —a Jeobaa cuu waiquioma.

⁶ Inaja a cuu fa ji̦liläjenö, bä baushimou mladou fa showadalonö, Olebe cäcö fa dacöfälöjenö, bä ma blajalayono wei ma cui, bä baushimou co̦daanomi.

Jeobaa e yano tadaö lä cuaafälöno wei tä a̦

⁷ Bei. Bä lä bälöblaono wei tä sibo jamö, Moisesinö showadi ai a yano tadaö cuaafälöma. A wa̦fa yano jilabou ja, “Jeobaa nija bämacö nö bayeli nacaobä yano”, a cuma. Bä lä bälöono wei tä ajede jamö mlai, bayäcäwä a yano tadaö cuaafälöma. Jeobaa nija bä nö bayeli nacao lä bufiono wei bä lä cui, ö̦jamö lä, bä lä jilaono wei tä sibo jamö, showadi bä shino jublaama.

⁸ Jeobaa e yano jamö Moisesi a juu däjä, showadi a nö daaö yauamaje. Cama bä yanobö yoca lä cui jamö culanö bä bluca ublao fa juonö, a lucäö showao mlao däjä, a shino mömaje.

⁹ Ö̦jamö Moisesi a lucäö däjä, ölajashi a bada comadiwä lä cui, showadi a itou mö baama. Ö̦jamö bä lä fablaaö wei yoca lä cui jamö a fa ublaicunö, Jeobaa a lä cuinö, Moisesi a wa̦ wayoblaamama.

¹⁰ Jeobaa e yano ja bä lä fablaaö wei jamö ölajashi a bada comadiwä fa möjenö, cama bä yanobö jamö culanö bä möfe showadi deioma, a wa̦fa Bada doblao tabeje.

¹¹ Inaja showadi tä fa cuonö, Jeobaanö Moisesi a wa̦ wayoblaamama. Bä lä nofimayou wei bä a̦ wawädowä wayomayou lä cuaaö weinaja, inaja showawä Jeobaanö Moisesi a wa̦ wawädowä wayomaö cuaama. Ö̦jö däjä, bä lä bälöle bä nijamö Moisesi a shino jublaadima ma cui, a lä bayeliblano wei a fiya lä cui, Josué a lä cui, ö̦jamö lä bei a showadio juoma. Ö̦jö Josué a lä cui, Nuni bei ijilubö e cuoma.

Jeobaanö Moisesi a bufi shi jalijiblamaö lä co̦ono wei tä a̦

¹² Ö̦jö däjä, Jeobaa nija Moisesi a wa̦ falayoma. —Bei. Cafänö abinaja wale nowa tama. “Ei bä lä cui, wa bä ca̦i juu co̦ofälöbä”, wa ma cuno wei ma cui, ya bufi wedinajamou showawä. “¿Wedi jamö a lä cuinö yamalecö ca̦i li jufälöbä?”, ya bufi cuu. Ö̦jö ma cui, abinaja wa ca̦i cuma, cafä. “Cafä bäfä li daö waiquiwä. Wale bufi doblamabou waiquiwä”, wa cuma.

¹³ ¿Ö̦jö tawä? Bäfä bufi doblamabou waiquiwä ja lä, wale yömölaö da cadidio. Yamalecö nia lä taamaö weinaja, wale yömölaö fa cadidionö, camiyänö cafä bäfä li daö mö feduobä. Bäfä a̦ ji̦liaö fa shalilionö, bäfä bufi doblamabou showaobä. Ei bä bluca lä cui, “Iba ya bä lä yaileno wei bä li waiquiwä”, bä nofi da tabo —Moisesi a cuma.

¹⁴ —Ja̦o —Jeobaa a cuma— Camiyänö bäfä ca̦i juu weicätä. Bäfä bufi ca̦i yanöcömabofälöö weicätä —a cuma.

¹⁵ Abinaja Moisesi a cuma. —Cafänö yamalecö ca̦i nia juimi ja, yamalecö shömaö fe yadio dijä. ¿Ö̦jö tawä?

¹⁶ Cafänö yamalecö ca̦i juimi ja, bäfä bufi lä doblamabou wei tä nia dablamou malä mlai. Camiyä ya ma cuinö, afä yamacö bluca ma cuinö, bäfä bufi doblamabou malä waiquii. ¿Ö̦jö tawä? Jödödöwä tä ulifi jamö, bluca täbä ma bälöblai ma cui, ö̦jö bä li shomi. Ö̦jö wa bä ca̦i juimi waiquiwä. Camiyä yamalecö ca̦i lä juu wei tänö, afä yamacö nö nia yai ö̦jöböamou —Moisesi a cuma.

¹⁷ Abinaja Jeobaa a cuma, Moisesi nija. —Wa lä cufenaja, ya cuaaö weicätä. Wale bufi malä doblamabole. Cafä bäfä li daö malä waiquile —a Jeobaa cuma.

Moisesinö Jeobaa a möö bufi lä doblaono wei tä a̦

¹⁸ Jeobaa nija abinaja Moisesi a cuma. —Cafänö tä shi̦i ca̦i da wawälö, ¿ö̦jö tawä? Camiyä nija a da mömo —a cuma.

¹⁹ Jeobaa, abinaja Moisesi nija a cuma. —Cafä wa mö lä yaile jamö, iba tä lä dodijidai, ya tä nia jayuamaö. Ö̦jö däjä, camiyä Jeobaa ya wa̦fa nia wäamou cadidio showao. Camiyänö ya nofi ojodabou bufi lä doblao wei, ya nofi ojodabou cuquei. Ya nofi asibou bufi lä doblao wei, ya nofi nia ca̦i asibou.

²⁰ Öjö ma cui, camiyä wawädowä wale wäyäcu nia möimi. Yanowamö a lä cuinö, wawädöwä wale wäyäcu möö ja, a nia demöo malä mlai —a cuma.

²¹ Jeobaa abinaja a cuu co̦oma. —Bei. Camiyä nijamö wa ublao ajedeoyolubä. Eja, maa ma jamö, lojode wa nia ublao.

²² Camiyänö ya tä shi̦i ca̦i jayuo däjä, maa ma ca lä yacläle jamö, bäfä nia jo̦yamabou. Ya jayuo showao mlao däjä, wale möö mlaobä, cafä nija ya imicö nia läo.

²³ Ö̦jö däjä, ya jayuo däjä ya imicö fa jujeblalunö, bei wale jumabö shino möö ma cule, bei wale wäyäcu nia shino dablaimi —a Jeobaa cuma.