Éxodo 32 - Biblia Yanowamö

Baca a nö idubö ja bä lä yabäcamono wei tä a̦

¹ Bei macö jamö Moisesi a lä alayono wei jamö a nö dedeaö ja, Aaloni nija täbä toujou juoma. Abinaja a nowa tamaje. —Bei. Yama täbä bufiblabä, täbä nö idubö da tablalö. Ö̦jö bä nija yamacö yai lulumamobä. Ö̦jö Moisesi a lä cui, Ejido jamö yamalecö lä co̦leno wei a lä cui, “Ö̦ja lä a cule daanö”, yamacö bufi cuimi —bä cuma.

² Abinaja Aaloni a cuma, cama bä nija. —Ja̦o. Baushi bä lä juubou wejei bä bluca doaö da cuaaje, olo bä ja bä baushi lä tablamou wei bä lä cui. Suwäböfä bä ma cui nija, ijilufä bä ma cui nija, tääfä bä ma cui nija, ö̦jö wama bä baushi fa jucäalalönö, camiyä nija bä ca̦i da juimaje —a cuma.

³ Ö̦jö cudeenö, baushi bä lä jubono wejei bä blucanö, bä baushi ucälalemaje, olo bä ja bä lä tablamono wei. Aaloni nijamö bä ca̦i jumaje.

⁴ Ö̦jö bä baushi lä dodobono wejei, Aaloninö bä däalalema. Bä fa däalalönö, cowa wacö ja bä äbäjäa fa balömalalönö, bä co̦cablalema. Ö̦jö däjä, madofi anö, baca a nö idubö tablalema. Baca wa̦lo a lä cui, a nö ocalo idubö cuoma. Ö̦jö a fa dalalöjenö, abinaja bä nowa tayoma. —Camiyä Isaeli bäma ecö lä cuinö, ei showadi bäma a bufiblabä, ¡ei a nö idubö waiquiwä! Ejido jamö bämalecö lä co̦leno wei, ¡ö̦jö ei a nö yai idubö dodijiwä! —bä nowa tayoma.

⁵ Aaloninö bä shi jalimou fa dalalönö, baca a nö idubö lä cule tä ajede jamö, maa mabä yododomaquema, yalo bä ö̦shö dodobobeje. Ö̦jö däjä, a wa̦ falayoma. —Fena ja, Jeobaa bäma a nofi nia co̦camoaö, bämacö iyabä —a cuma.

⁶ Ö̦jö tä fena ja, yalo bä ö̦shö dodobou fenaobeje bä ca̦i waloomaje. Ai bä yalo lä cui bä nia comi ö̦shö dodobomaje. Ai bä yalo mö feduwä lä cui ja, bä comi ö̦shömaö mlajei, ai ya̦ji bä nia mashi wamaje. Ö̦jö däjä, bä iyabä, bä loquema. Bä fa iyalönö, bä shi jalimolanö, bä i̦liyamobä bä jocäcälaliyoma.

Jeobaa a lä jushudaliyono wei tä a̦

⁷ Abinaja Jeobaanö Moisesi a nowa tadayoma. —Bei, bei. A itoa da co̦lufälö. Afä Ejido jamö wa bä lä co̦leno wei bä lä cui, bä wa̦lidiamayou jäa lä cuboquilii.

⁸ Ya bä nowa lä tano wei tä ja, bä cadidou mlai ja, lobe shomi tä ja bä yabäcamou waiquia lä cule. Olo bä ja, yalo a nö idubö tablalemaje. A wa̦fa bada doblao tabeje, bä möfe boolaliyoma. Yalo bä ö̦shö ca̦i dodobomaje, ö̦jö a ja. Abinaja bä nowa ca̦i tayoma. “Camiyä Isaeli bäma ecö lä cuinö, ei showadi bäma tä bufiblabä, ¡ei tä nö idubö waiquiwä! Ejido jamö bämalecö lä co̦leno wei, ¡ö̦jö ei a nö yai idubö dodijiwä!”, bä nowa tayoma —Jeobaa a cuma.

⁹ Moisesi nija abinaja Jeobaa a cuu co̦oma. —Ei ya bä bufi daö waiquiwä. ¿Ö̦jö tawä? Bä bufi jifuwä dodijiwä.

¹⁰ Bä dobloimi waiquia ja, fei däjä wa wa̦ nia lämou co̦daaimi. Ya jushuo lä, ya bä waicaö showadaobä. Ö̦jö ma cui, cafä bäfä yai bayeliblaö ja, bäfä fa balamalönö, afä ya bä bälöa fa lojodomabonö, bä bälöo yaiobä, afä ya bä nia taamabou —a cuma.

Bä nofi lä bäyäano wei tä a̦

¹¹ Ö̦jö ma cui, Jeobaa a lä bufiblaö wei a wa̦ nia fa oquemanö, abinaja Moisesi a cuma. —Cafä Jeobaa wa nija ya wa̦ faö lä cule. Cafä wa nö wa̦lojaö fa ayaonö, Ejido jamö afä wa bä ma co̦leno wei ma cui, ¿wedi tä tabä wa li jushudou fa nomöjölonö, bei wa bä nia li waicaö nomöjöo? Wa bä co̦aö ja, wa nö wa̦lojaö fa ayaonö, wa lojode damoa waiquilaliyoma.

¹² ¿Wedi tä tabä Ejidoteli wa bä shi li jalimoa nomöjömalei? “Tä ulifi lä jefubö wei jamö bä nabä fa queicunö bä shäbä, nomojoli bä co̦lema. Bä mö watäblaö showadaobä bä li co̦lefälöma”, wa bä nia tamaö dicoo. ¿Ö̦jö tawä? A jushuo dijä. Afä wa bä nö nia lä bleaamaö wei tä ja, a bufi da lädalu.

¹³ ’Ablaamö a ma cui, Isaacö a ma cui, Isaeli a ma cui, ö̦jö bä nija cafä wa jolemou dao lä mlai wa wa̦ nö wäquema —a cuma—. Wa tä a̦ lä wäqueno wei tä a̦ ja, a bufi da jaducuicu. Cafä wa nosie juabeje, afä bä li cuoma. Abinaja wa bä nowa tama. “Cafä nija bä lä nodiblou wei ya bä fa balamalönö, shidicali bä bluca lä culenaja, ya bä nia tablamaö”, wa cuma. “Ei ya tä a̦fa ulifi wäyäö lä balöono wei tä ulifi lä cui, afä bä lä nodiblou wei bä nija ya tä ulifi nia jöböaö juo. Ö̦jö tä nofi ulifi nia tabou shi wa̦liije”, wa cuma —Moisesi a cuma.

¹⁴ Ö̦jö a wa̦nö, cama ebä nö nia bleaamaö lä cuaano weinaja, Jeobaa a bufi lädaliyoma.

Moisesinö maa macö lä wa̦lialeno wei tä a̦

¹⁵ Moisesi a mö yabadou fa co̦lofälönö, bei macö jamö a itoa co̦layofälöma. Jeobaa cama a wa̦ lä oniblamolayono wei macö ca̦i dömöbaliyofälöma. Ö̦jö maa macö lä cui, macö oni mö feduduoma. Ai ma mashi jamö ai tä oni, ai ma mashi jamö ai tä oni, macö cuoma.

¹⁶ Ö̦jö maa macö lä cui, cama Yai Bada tänö macöbö cobeblalema macöbö li cuoma. Cama Yai Bada tä showawänö, jai namo tä cuwä tänö macö oniblalema.

¹⁷ Cäcöbö itou co̦fälöö däjä, Josuénö bä a̦ shi dou fa ji̦lilänö, abinaja a cuma, Moisesi nija. —Bämacö lä bälöle jamö, bä jo̦wa ishou jäa lä cuboquili —a cuma.

¹⁸ Ö̦jä ma cui, abinaja Moisesi a cuu mö feduoma. —Ma. Tä a̦ ji̦limamou shomi. Bä nö wa̦lojaö däjä bä a̦ faö lä culenaja, bä a̦ ji̦limamou cuwämi. Bä nö bleaaö däjä bä a̦ faö lä culenaja tä a̦ ca̦i mlai. Amowa täbä a̦ ja, täbä shi jalimolanö täbä lä cuu weinaja, inaja ya tä a̦ shino ji̦liaö cua —a cuma.

¹⁹ Bä lä bälöle jamö a fa ajedeblalunö, baca ocalo a nö idubö fa dalalöjolonö, bä ca̦i blaöaö fa dalalönö, Moisesi a jushudou dodijilayoma. Maa macö lä bono wei, i̦cali bei macö cotä jamö macö fa shäyäblacönö, macö cobequeblaliyoma.

²⁰ Ö̦jö däjä, baca ocalo a nö idubö fa dälänö, cowa wacö jamö a fa yabanö, a jö̦cölalema. A fa jö̦cölalönö, mau u jamö bä cobe fa jushishiabodunö, Isaeli ebä nija ubä coamalalema.

Aaloni a wa̦fa lä tano wei tä a̦

²¹ Aaloni nija abinaja Moisesi a cuma. —Ei bä lä cui, ¿wedinaja cafä nija bä li fa cuaanö, bei wa bä nö li bleaamaö nomöjöo bufio cule? Wa bä yacläa dicomalema, Jeobaa nija bä doblou mlaobä.

²² Aaloni abinaja a cuu mö feduoma. —A jushuo dijä, cafä bäfä a̦ juabä ya. Ei wa bä malä dale. Showadi wa̦lidiwä tä nofi malä yaibou wejei.

²³ Abinaja wale nowa fa tajenö bä cuma. “Bei. Yama täbä bufiblabä, täbä nö idubö da tablalö. Ö̦jö bä nija yamacö yai lulumamobä”, bä cuma. “Ö̦jö Moisesi a lä cui, Ejido jamö yamalecö lä co̦leno wei a lä cui, ‘Ö̦ja lä a cule daanö’, yamacö bufi cuimi”, bä cuma.

²⁴ ’Abinaja camiyänö ya bä nowa taö mö feduoma. “Ja̦o. Baushi wama bä lä juubodi bä da jayulalöje, olo bä ja bä lä tablamono wei”, ya bä nowa tama. Einaja ya bä nowa fa tanö, bä jöböbeyolumaje. Cowa wacö jamö ya bä shäyäblaa fa bädabanö, baca a nö idubö cublou bälayoma —Aaloni a cuu mö feduoma.

Lewi ebä lä ishono wei tä a̦

²⁵ Aaloninö bä wasöbou fa mlacunö, bä shi lä jalimolayono wei, Moisesinö tä dalalema. Bä nö lä nabämou wei bä nija bä a̦fa wayoamobä tä ca̦i dalalema.

²⁶ Ö̦jö däjä, bä lä joleblou wei jamö a fa ublaicunö, a wa̦ i̦cali Moisesi fama. —Jeobaa wama a nofi lä yaibou wei wamacö lä cui, camiyä nija eja bä da cuiquiyo —a cuma. Inaja a fa cunö, Lewi ebä lä cui, Moisesi nija bä bluca toujuqueyoluma.

²⁷ Ö̦jö bä nija abinaja Moisesi a cuma. —Jeobaa ya wa̦no taö lä cule, Isaeli bäma ecö nija tä lä bufiblamou wei. Bluca wamacö wa̦lo lä cuinö, sibalafä wama bä fa däalalönö wama bä showabobä. Ei bämacö bluca lä bälöle jamö wamacö jublou fa cuaanö, bä nofi lä jushuano wei wama bä nia shäö cuaaö. Cafä wamacö mashi bä ma cui, wama bä lä nofimale bä ma cule, wama bä ca̦i bälöa lä ajedele bä ma cule, bä da shäalalöje —Moisesi a cuma.

²⁸ Inaja a fa cunö, Lewi ebänö Moisesi a wa̦ juaö showadaomaje. Bä lä shäalaleno wejei, bä blucao dodijioma. Jai 3.000 bä shämolayoma.

²⁹ Abinaja Moisesi a cuma, Lewi ebä nija. —Jeobaa nija showadi wamacö nosiemamodibä, fei däjä cafä wamacö yaiblamolayoma. Wama a wa̦ ji̦liaö shalilioma yalo, ijilufä bä ma cui, a̦iyofä bä ma cui, fääshäfä bä ma cui, wamacö bufi lämonomi. Ö̦jö cudeenö, Jeobaanö showadi wamacö nia bayelibou —bä nowa tama.

Moisesinö bä nofi bäyäa lä co̦leno wei tä a̦

³⁰ Ö̦jö tä fena ja, abinaja Moisesi a cuma, Isaeli ebä nija. —Wama tä lä tano wei tä wa̦lidiwä fe balojowä. Jeobaa nijamö fei däjä ya duo co̦ofälöö. Wamacö doblono lä mlai tä nowa ma tabole ma cui, ya wa̦ oquea bämalei fa cui —Moisesi a cuma.

³¹ Jeobaa nija Moisesi a dua fa co̦bofälönö, abinaja a cudayoma. —Cafä nija ya wa̦ nia faö, ¿ö̦jö tawä? Quiji bä lä cui, bä dobloimi fe balojowä. Tä yai lä wa̦lidii tä ja, bä yabäcäo dicooma. A bufiblabeje, yalo a nö idubö tablalemaje, olo bä ja.

³² Ö̦jö ma cui, tä nowa tabo dijä. ¿Ö̦jö tawä? Wa bufi nia asiomi ja, camiyä ya ma cui, wale a̦fa ca̦i wa̦lia da showadaalö, wa bä a̦fa lä onibole sicö jamö —a cuma.

³³ Ö̦jö ma cui, abinaja Jeobaa a cuma, Moisesi nija. —Camiyä wale a̦ juaö lä mlajei bä lä cui, wa̦lidiwä tä taöje ja, ö̦jö ya bä a̦fa nia shino oni wa̦liaö cadidio, ya bä a̦fa lä onibole sicö jamö.

³⁴ ’Bei —a cuu co̦oma—. A itoa da co̦lufälö. Cafä nijamö ya tä a̦fa ulifi da wäyäblei jamö, bä da lulubofälö. ¿Ö̦jö tawä? Iba a̦jele ya fa shömölönö, cafä nija a nia balöo. Ö̦jö ma cui, bä doblou lä mlaono wei tä nowa ja, ya bä nö bleaamaö weicätä. Ya bä nö nia lä bleaamaö wei tä cublou dodijio däjä, ya bä nö nia bleaamaö lä —a Jeobaa cuma.

³⁵ Inaja showawä a cuaama. Yalo a nö idubö lä taamano wejei tä ja, Jeobaanö bä nö bleaamama, Aaloni nija baca ocalo a nö idubö la tablaleno wejei tä nowa ja.