Éxodo 31 - Biblia Yanowamö

Täbä madofi dodijidablabä tä a̦

¹ Sinai cäcö jamö cäcöbö a̦ wayou showao däjä, abinaja Jeobaa a ca̦i cuma, Moisesi nija.

² —Bei. Camiyänö ya täbä tamaö lä bufino wei täbä tablabä, Uli bei ijilubö Besalelo a, Judawä nodiwä e lä cui. Ö̦jö Uli a lä cui, Ulunö a lä taqueno wei, ö̦jö a. Ö̦jö a Besalelo lä cui, ya nofi macocobou lä cule.

³ Ya täbä tamaö lä bufii wei täbä tabä, camiyä ya lojodenö ya bufi moyawämabou waiquia. A dodijabä, ya bayelibou. Bufi jaducuwä ya tamabou. Täbä madofi bluca dodijidablabä ya ca̦i cua waiquia lä cule.

⁴ ’Ya bayelibou waiquia yalo, a bufi dao —a cuma—. Täbä nia lä tablaö wei täbä nia liyäjäblaö. Olo bä ma cui ja, blada bä ma cui ja, bä nia madofi taö. Duo shibä ma cui ja, bä ca̦i nia madofi taö.

⁵ Maa mabä wai lä dodijidai, mabä wai nowa lä bluca wei mabä fa cobemanö, mabä ca̦i nia shadidamaö. Fii fibä ma cui ja täbä ca̦i nia madofi taö. Jödödöwä ya täbä tamaö lä bufii wei täbä ma cui ja, a nia dodijaö.

⁶ ’¿Ö̦jö tawä? —a cuma—. Abinaja ca̦i, Dani nodiwä a Aoliaba lä cuinö, Besalelo a nia bayeliblaö, Aisamaco bei ijilubö e lä cuinö. A bayeliblabä, camiyänö ya tablamaö waiquia lä cule. ¿Ö̦jö tawä? Madofi täbä ja bä lä dodijaö wei bä bluca ma cui, camiyänö ya bä bluca bayelibou waiquia, cafä nija ya täbä bluca tablamaö lä bufino wei täbä tabeje.

⁷ ’Iba yano ma cui, a nia taöje —a cuma—. Ya wa̦no oni didiobä defi ca ma cui, defi ca ca̦i nia tablaöje. Ö̦jö defi ca fe laobä tä ma cui, tä nia taöje. Ö̦jö a yano jamö cäbä madofi nia bluca lä cuo wei bä ma cui, bä nia bluca taöje.

⁸ Nii bä maqueobä täcö ma cui, ö̦jö täcö jamö täbä madofi nia lä cuo wei täbä ma cui, täbä nia ca̦i taöje. Cowa wacöbä shi̦i cublamobä tä ca̦i nia taöje, olo bä ja a nia lä tablamou wei a lä cui. Ö̦jamö täbä madofi ca̦i nia lä cuo wei täbä ca̦i. Täbä wa̦queshi ni cle̦deli lä u̦cucamou wei täbä maqueobä täcö ma cui, täcö ca̦i nia taöje.

⁹ Yalo bä lä dodoblamou wei bä maqueblamobä täcö ma cui, ö̦jamö täbä madofi ca̦i nia lä cuo wei täbä bluca ma cui, täbä nia taöje. Mau ubä babobeje tä ma cui, ö̦jö tä nia lä döcäo wei tä ma cui, ö̦jö täbä nia taöje.

¹⁰ Camishi bä yai lä dodijidai bä ca̦i nia diyäblaöje. Nofi bäyäalewä bä didiobä, bä nia yaio. Aaloni a ma cuinö, bei ijilubö ebä ma cuinö, täbä nofi bäyäbobeje jamö, ö̦jö bä ja bä nia didio.

¹¹ ’Täbä lä jölöcamou wei toubä dabö ma cui, täbä wa̦queshi ni cle̦deli nia lä u̦cucamou wei täbä ma cui, ö̦jö täbä ca̦i nia bluca taöje —a cuma—. Täbä bluca fa tablalöjenö, iba yano jamö täbä bluca nia cuo, iba yano lä nowamaö wejei jamö. Cafä nija ya täbä tamaö bufii ja, ya lä cufenaja showawä, täbä bluca nia taöje.

Täbä yanöcöobä tä a̦

¹² Abinaja Jeobaa a cuma, Moisesi nija.

¹³ —Ei ya wa̦ lä cui, Isaeli ebä nija wale a̦no da wäyä. Wamacö yanöcöobä tä mö jalu sábado lä cui, wama tä nofi nia jalu jaducubou, camiyä ya ojodamou lä yanöcöqueno weinaja, wamacö cuaaö nomöjöobä. Iba wamacö nö ö̦jöböamobä tä malä cui. Obi ma cui, “Cama dodijidawä bäma ecö cuobä, Jeobaanö bämalecö yailema”, wamale nofi tabou nodiablalobä.

¹⁴ ’¿Ö̦jö tawä? —a cuma—. Wamacö yanöcöobä tä mö jalu lä cui, wama tä nofi nia jalu jaducubou. Ö̦jö sábado wama tä nofi jalu jaducubobä tä yaia. Tä mö nofi jalu jaducubou lä mlai a nia nomamaöje. Ö̦jö tä mö jalu ma cui ja, ai a ojodamou fe yadio ja, cama ebä nija a nia demi cuomi.

¹⁵ Wamacö ojodamou showao däjä, 6 wama tä nia didi tablamaö. Ö̦jö däjä, wamacö yanöcöobä tä mö jalu lä cublou wei däjä, wamacö ojodamou mlai ja, wamacö nia yanöcöo. “Jeobaanö ei tä mö jalu yaimabou lä cule”, wama tä nofi nia jalu tabou. Wamacö yanöcöobä tä mö jalu sábado ja, ai a ojodamou fe yadio ja, a nia nomamaöje.

¹⁶ ’Ö̦jö cudeenö Isaeli wama ecö lä cuinö, wamacö yanöcöobä wama tä nofi nia jalu jaducubou —a cuma—. Sábado däjä, showadi wamacö nia yanöcöblou. Cafä inaja wamacö showadi cuaaö fa balöonö, wamacö nia owämaö nodiablalouje. Bämacö nowa lä tano wei, showadi wamacö cuaabä cätä.

¹⁷ Camiyä ya lä cuaano wei wama tä nofi jaducubobä, Isaeli wama ecö lä cuinö, wamacö yanöcöobä wama tä nofi nia jalu jaducubou shi wa̦lii. 7 tä mö jalu cubloimi showao däjä, judu möso lä cui, bita a ca̦i lä cui, ya tä bluca tablalema. Ö̦jö 7 tä mö jalu ja, ya ojodamou fa waiconö, ya yanöcöblaliyoma —a Jeobaa cuma.

¹⁸ Sinai cäcö jamö, Moisesi nija Jeobaa a wa̦ wayou fa waiconö, cama a wa̦ lä oniblamolayono wei, maa acadafu macö jöböquema, tä a̦ nofi jaducubobeje. Cama Yai Bada tä showawänö macö oniblalema.