Éxodo 30 - Biblia Yanowamö

Täbä wa̦queshi ni cle̦deli u̦cucamamobä tä a̦

¹ Abinaja Jeobaa a ca̦i cuma, Moisesi nija. —Täbä wa̦queshi ni cle̦deli lä u̦cucamou wei täbä maqueobä, wa täcö nia tablamaö. Defi liyäjäwä lä jifui deficö acadafu ja, täcö nia tablamou.

² Täcö fe labe nia lä wädöo weinaja, moli wa mata quedou lä ajedeo weinaja, täcö fe nia wädöo. Inaja showawä täcö nia faujuwä cuo. ’¿Ö̦jö tawä? —a cuma—. Täcö labe cuobänaja, täcö nia faujuwä cuo mö feduo. Täcö nia i̦tao ösöo lä cuo weinaja, moli wa mata lä quedou weinaja täcö nia ijede jawäo. Ola tä jamö, täcö lä sha̦clodole jamö, jai yalo yo̦labä cuwä wa täbä nia taaö. Ö̦jö jai yo̦labä cuwä wa täbä döcömabou mlai, moli defi comi acadafu showawänö, täcö nia bluca tablamou.

³ ’Ö̦jö däjä, olo bänö wa täcö nia möamoblamaö —a cuma—. Olo bä ja, shomi wa tä coyocomabou mlai ja, cama olo bä shinonö wa täcö nia oloblamaö. Feyaca tä ma cui, sibo tä ma cui, jai yalo yo̦labä cuwä täbä lä cublai täbä ma cui, olo bänö wa täcö nia bluca möamoblamaö. Wa täcö nia casö baushiblamaö fe fa̦yoo nomöjöo, olo bä showawänö.

Nofi bäyäalewä bä ya̦lömou yaimobä tä a̦

¹⁷ Abinaja Jeobaa a ca̦i cuma, Moisesi nija.

¹⁸ —Nofi bäyäalewä bä imicö ya̦lömoblaabä, bä mamicö ya̦lömoblaabä, mau ubä babobeje wa tä ca̦i nia tablamaö. Duo shibänö wa tä nia tablamaö. Tä nia lä döcäo wei tä ma cui, duo shibä showawänö tä nia tablamou. Iba yano jamö, yalo bä nia lä dodoblamou täcö möamo ja, wa tä nia i̦taamaö. Ö̦jamö lä mau wa ubä nia löamaö.

¹⁹ Ö̦jamö Aaloni a ma cui, bei ijilubö ebä ma cui, ö̦jamö bei bä imicö ya̦lömoblaabä. Bei bä mamicö ca̦i ya̦lömoblaabä —a cuma.