Éxodo 25 - Biblia Yanowamö

Jeobaa e yano tablamobä tä a̦

¹ Jeobaa abinaja Moisesi a nowa taö ja a cuma.

² —Isaeli ebä da yömöla. Camiyä nija täbä madofi jöböabeje, a wa̦ da fa. Täbä jöböaö bufi lä doblao wejei bä nija wa täbä nia madofi doaö.

³ Wa täbä doabä, ei täbä madofi lä cui täbä ja, wa nia nacou, olo bä ma cui ja, blada bä ma cui ja, wa nia nacou. Duo shibä ma cui ja, wa nia ca̦i nacou.

⁴ Camishi bä nia lä diyäblamou wei, wa ubä nia ca̦i nacaö. Shi de̦lelewä ubä ma cui, ushi wacäjäwä ubä ma cui, wacä ubä ma cui, wa ubä nia nacaö. Camishi shuducaje dodijidawä au bä ca̦i acadafu. Shibo co̦i bä ja, ubä lä juducano wejei ubä ca̦i.

⁵ ’Yalo wa sibä nia ca̦i nacaö —a cuma—. Oweja wa̦lo bä bada lä cui, ö̦jö sibä lä dodijamaö wejei sibä ma cui, ai sibä yalo lä dodijidai sibä ma cui, wa sibä nia nacaö. Defi liyäjäwä lä jifui wa fibä ca̦i nia acadafu nacaö.

⁶ Cowa wacö shi̦i befi, dabö dabö wa toubä nia ca̦i nacaö. Täbä lä jölöcamou wei toubä dabö ja, täbä ni cle̦deli coyocoblabeje, wama täbä ca̦i nia nacaö. Täbä wa̦queshi ni cle̦deli lä u̦cucamou wei täbä ma cui ja, ö̦ja täbä ni cle̦deli ca̦i coyocoblaö mö feduobeje.

⁷ ’Maa mabä oni lä liyäjäi mabä ma cui, ai mabä showadi mabä wai lä shadimabou wejei mabä ma cui, wa mabä nia nacaö, mabä nowa lä bluca wei mabä wai lä cui —a cuma—. Nofi bäyäalewä a nö bada ö̦jöböamobä, cäcö lä jalebou wei cäcö ma cui ja, ai mabä shadidiobä. Ö̦jamö lä, ai cäcö lä sudile cäcö wai ja, ai mabä shadidio mö feduobä.

⁸ Ö̦jö däjä, iba yano a tamaö da bufi. Iba ya bä ca̦i cuobä.

⁹ Iba a yano ma cui, ö̦jamö täbä madofi didiobä täbä bluca ma cui, ya täbä tablamaö lä bufii weinaja, inaja showawä wa täbä bluca nia tablamaö —Jeobaa a cuma.

Defi ca tablamobä tä a̦

¹⁰ Jeobaanö, abinaja Moisesi a nowa ca̦i tama. —Fii wa defi ca nia tablamaö, ya wa̦no oni didiobä. Defi liyäjäwä lä jifui defibä acadafu ja, defi ca nia tablamou. Abinaja defi ca blewä cuwä, wa defi ca tablamabä. Defi ca nia labe lä wädöo weinaja, moli wa mata lä quedou weinaja, wa defi fe nia ijede dolejeblamaö. Defi ca nia faujuwä lä wädöo weinaja, moli wa mata lä quedou weinaja defi nia ijede jawäo. Defi ca faujuwä cuobänaja, defi ca nia ösöwä cuo mö feduo.

¹¹ ’Olo bä ja, wa defi ca nia möamoblamaö nomöjöo. Ö̦jö olo bä ja, shomi wa tä nia coyocomaboimi. Sibo defi ca ma cui, u̦eshi defi ca ma cui, olo cama bä shino ja, wa defi ca nia möamoblamaö. Wa defi ca nia casö baushiblamaö fe fa̦yoo nomöjöo, olo bä showawänö —Jeobaanö a nowa tama.

Defi ca fe laobä tä a̦

¹⁷ Jeobaanö Moisesi a nowa taö ja abinaja a cuma. —Ya wa̦no oni didiobä defi ca fe laobä, feyaca wa tä nia tablamaö nomöjöo. Ö̦jö tä feyaca lä cui, olo bä ja, wa tä nia tablamaö. Ö̦jö olo bä ja, shomi wa tä coyocomabou mlai ja, ö̦jö olo cama bä shinonö wa tä nia tablamaö. Tä nia labe lä wädöo weinaja, moli wa mata lä quedou weinaja wa tä fe nia ijede dolejeblamaö. Tä nia faujuwä lä wädöo weinaja, moli wa mata lä quedou weinaja tä nia ijede jawäo.

¹⁸ ’Ö̦jö tä feyaca lä cui ja, yai waiteli wa täcöbö nö nia idubö basuamaö, täcöbö majecö lä cule —a cuma—. Ö̦jö bä olo showawä ja täcöbö nia tablamou. Feyaca colo tä jamö, ai cätä. Ola tä jamö, ai cätä.

¹⁹ ¿Ö̦jö tawä? Feyaca colo tä jamö, yai waiteli tä nö idubö da basumacö. Ola tä ja, ai cätä. Olo moli bä showawä ja, wa täcöbö nö idubö befi ca̦i nia tablamaö.

²⁰ Ö̦jö yai waiteli täcöbö nö idubö lä cui, bei täcöbö majecö fa leleicunö, jai defi ca nowamöboböö täcöbö majecö nia cuo. Ö̦jamö täcöbö mö yailanö, täcöbö möfe nia boo.

²¹ ’Ö̦jö defi ca jamö, maa ya macö lä oniblaleno wei wa macö nia didiaö —a cuma—. Ö̦jö ya macö nia lä jöbäaö wei, wa macö fa didiacönö, feyaca tänö wa defi ca fe nia laaö.

²² Ö̦jamö bäfäcö a̦ wayobä, ya nia cuo showao. Ya wa̦no oni didiobä defi ca tä feyaca lä cui, ö̦jö tä feyaca fedu jamö ya culanö, ya wa̦ nia faö, yai waiteli täcöbö majecö lä döbädäle tä möamo jamö. Isaeli ya ebä taamaö lä bufii wei tä ja, cafä bäfä nia yömölaö, cama bä nija wale a̦no wäyäö nomöjöobä.

Nii bä maqueobä tä a̦

²³ Jeobaanö, abinaja Moisesi a nowa ca̦i tama. —Nii bä maqueobä, wa tä nia ca̦i tablamaö, defi liyäjäwä lä jifui defibä acadafu ja. Tä nia labe lä wädöo weinaja, moli wa mata blajawä lä quedou weinaja wa tä nia jawädamaö cuo. Tä nia faujuwä lä wädöo weinaja, wa mamicö quedou lä ajededou wei tä jamö tä nia ijede jawäo. Tä nia i̦tao ösöo lä cuo weinaja, moli wa mata quedou lä ajedeo weinaja wa tä fe nia dolejedamaö —a nowa tama.

³⁰ —Camiyä nija nii bä nia lä dodobou wejei bä nii lä cui, camiyä ya lä cule jamö, showadi wa bä nia bamabou —a Jeobaa cuma. Abinaja Jeobaa a cuma, Moisesi nija.

Cowa wacöbä shi̦i cublamobä tä a̦

³¹ —Cowa wacöbä shi̦i cublamobä, wa tä ca̦i nia tablamaö. Olo bä ja, shomi wa tä coyocomabou mlai ja, cama olo bä shinonö tä nia tablamou. Colo tä ma cui, tä lä i̦tao wei tä ma cui, olo bä showawänö, tä nia basuo. Dabö dabö toubä nia lä babou wejei tä cabä ma cui, ö̦jamö lä jole jole bä nö idubö ma cui, ö̦jö täcö ca̦i jole jole sibo showawä ma cui, ö̦jö moli cama olo bä showawänö wa bä nia bluca tablamaö.

³² ¿Ö̦jö tawä? Cowa wacöbä shi̦i cublamobä, jai fii 6 fibä nia boco cublamou. Ai tä mashi jamö 3 defibä boco nia cuo. Ai tä mashi mö feduwä jamö, inaja showawä.