Éxodo 24 - Biblia Yanowamö

Jeobaa nija Isaeli ebä a̦ juo lä co̦ono wei tä a̦

¹ Moisesi nija abinaja Jeobaa a cuma. —Camiyä Jeobaa ya nija a dua da co̦bo. Aaloni a ma cui, ö̦jö bei ijilubö ecöbö Nadaba a ma cui, Abiu a ma cui, ö̦jö bä ca̦i da dolequebo. Isaeli ebä bada lä cui bä nija, 70 wa bä fa yaialalönö, ö̦jö wa bä ca̦i bluca dolecoimabä. Bayäcäwä wamacö yanöcölanö, wamale a̦fa Bada doblao tabä, wamacö möfe nia deio.

² Ö̦jö däjä, wa bä lä nocamabole bä bayäcäo showao däjä, camiyä nija cafä wa nia shino ajedou. Ai täbä bluca lä jilale, wa bä nia dolecamaimi —a Jeobaa cuma.

³ Ö̦jö däjä, Moisesi a aa fa co̦lufälönö, Jeobaa a wa̦no bluca wäyäjäloma. Cama bä nija tä tamaö lä bufino wei tä ja, bä yömölalema. Ö̦jö tä a̦ fa ji̦liläjenö, bä a̦ bluca juo showadaoma. —Jeobaa yama a wa̦no lä ji̦liläfe, tä tamaö lä bufii wei, yama tä bluca taö wä —bä cuma.

⁴ Ö̦jö däjä, Jeobaanö tä a̦ bluca lä wäyäno wei, Moisesinö tä a̦ bluca oniblalema. Ö̦jö tä fena ja, a jocädou fa fenablalonö, yalo bä lä dodoblamou wei bä maqueblamobä täcö i̦taa fenablaquema. Bei macö bäfätä jamö täcö i̦taquema. Isaeli bei ijilubö 12 ebä jaba lä cudaono weinaja bä cuwä, maa 12 mabä ca̦i i̦taquema.

⁵ Isaeli ai ebä fiya nija, yalo baca bä nabä fa shömöcönö, Jeobaa nija ai bä yalo lä cui bä comi ö̦shö dodobomaje. Ai bä yalo mö feduwä lä cui ja, bä comi ö̦shömaö mlajei, ai ya̦ji bä mashi waö ayaomaje, Jeobaa a wa̦ oquemabeje, bä showadi lä cuaaö weinaja showawä.

⁶ Ö̦jö bä yalo lä shäno wejei, Moisesinö i̦yäbö fa dälänö, ai bei i̦yä i̦yä mashi baboma. Ai bä mashi i̦yä i̦yä mö fedua lä cui, bä yalo lä dodoblamou wei bä maqueblamobä täcö jamö, i̦yäbö yomösama.

⁷ Ö̦jö däjä, Moisesinö Jeobaa a wa̦ oniblaö lä waiquilayono wei tä a̦ oni fa dälänö, bä bluca yömöca dao däjä, tä a̦ doama, bä nowa tamaö lä bufino wei tä a̦ lä cui. Ö̦jö tä a̦ fa ji̦liläjenö, bä a̦ juoma. —Jeobaa yama a wa̦no lä ji̦liläfe, tä tamaö lä bufii wei, yama tä bluca taö wä. Yama a wa̦ juaö wä —bä cuma.

⁸ Ö̦jö däjä, i̦yä i̦yä bä lä babono wei, Moisesinö bä däa fa co̦lunö, yanowamö täbä bluca yomösaö cuaaö nomöjöoma. Abinaja bä nowa tama. —Bei. Jeobaanö wamacö nowa lä tano wei, wama tä a̦ malä ji̦liläfe. Wama a wa̦ nia ca̦i malä juaö wei. Inaja lä tä cuo dodijiobä. Ö̦jö cudeenö, ei i̦yä i̦yä bänö bämacö yomösaö lä cule —bä nowa tama.

⁹ Ö̦jö däjä, Aaloni a ma cui, bei ijilubö ecöbö Nadaba a ma cui, Abiu a ma cui, Isaeli ebä ca̦i bada 70 ma cui, Moisesinö ö̦jö bä ca̦i bluca dolequebefälöma.

¹⁰ Bä ca̦i fa dolequebofälönö, Yai Bada bei tä dalalejelayomaje, Isaeli ebä nija a lä bufiblamou wei a lä cui. Jai maa ma si cobejewä cuwä, tä mömou shi de̦lelewä tä ja, bei a ublaa dalalemaje, judu mösö mömou walalawä lä culenaja showawä tä jamö.

¹¹ ¿Ö̦jö tawä? Yai Bada tänö dodijidawä Isaeli ebä bada ca̦i cuodayoma. Bä yabäcanomi. ¿Ö̦jö tawä? Yai Bada a lä cui, a möö wawädomaje. Camanö bä ca̦i lä cuono wei jamö bä iyama.

Moisesinö 40 tä mö didi lä tablamaledayono wei tä a̦

¹² Abinaja Jeobaa a cuma, Moisesi nija. —Ei bei macö jamö wa duo fa co̦imanö, camiyä nija a da cuboyo. Maa bolacabö macöbö oni ja, bäfä nia dobäö. Ya tä tamaö lä bufii wei, ö̦jö maa macö ja ya tä a̦ bluca oniblaö waiquia lä cule. Ö̦jö tä a̦ ja bä moyawäobä, ya tä a̦ oniblalema —a cuma.

¹³ Ö̦jö cudeenö, Josué a fa nacalänö, Yai Bada etä balöcö jamö Moisesi a dua co̦befälöma. Moisesi a bayeliblabä e li Josué cuoma.

¹⁴ Abinaja bada täbä nija Moisesi a cuu balöoma. —Yafäcö itou showao mlao däjä, eja yafälecö nö daa da jäcöje. ¿Ö̦jö tawä? Eja cafä wamacö nija, Aaloni, Ulu cäcöbö malä cule. Ai bä a̦fa tayou bädao ja, ö̦jö cäcöbö nija bä a̦ nö fa wäonö, tä cadejeblaböö juobä —a cuma.

¹⁵ Ö̦jö däjä, bei macö jamö Moisesi a dolequea co̦befälöma. Ölajashi anö macö fe ola yojoblaliyoma.

¹⁶ Ö̦jamö Jeobaa a shi̦i fa itolunö, Sinai cäcö jamö tä shi̦i yanöcöquema. 6 tä mö didi ma cublaliyono wei ma cui, tä shi̦i yanöcöo showaoma. Ö̦jö däjä, täbä yanöcöobä tä mö jalu lä cublole däjä, ölajashi a möamo jamö Jeobaa a culanö, a wa̦ bädaliyoma. Moisesi nija a wa̦ fama.

¹⁷ Bäfätä jamö bä culanö, Isaeli ebä lä cuinö Jeobaa a shi̦i dalalemaje, bei macö bololo jamö. Jai cowa wacö bada jululou lä culenaja tä shi̦i mömou cuoma.

¹⁸ Ölajashi jamö Moisesi a fa lucäludunö, bei macö jamö a mö dolquea co̦befälöma. Ö̦jö cäcö jamö a cua showalanö, 40 tä mö didi tablamaledayoma.