Éxodo 20 - Biblia Yanowamö

10 täbä a̦ lojode lä wäyäno wei tä a̦

¹ Bei. Yai Bada a lä cuinö, ei tä a̦ bluca wäyäö ja abinaja a cuma.

² —Cafä wamacö nija ya bufiblamobä, camiyä bei ya Jeobaa. Ejido jamö wamacö nö lä bleaamano wejei däjä, bämacö lä co̦leno wei, ö̦jö ya.

³ ’Camiyä ya nia shino yai bufiblamou ayao —a cuma—. Ai wama täbä bufiblabä wama täbä ca̦i nia lämaboimi.

⁴ ’Ö̦jö täbä ja wamacö nö bayeli nacaobä, wama täbä nö nia ca̦i idubö taimi. Judu mösö jamö täbä lä culadi täbä ma cui, wama täbä nö nia idubö taimi. Bita jamö täbä lä cublai täbä ma cui, co̦jomo jamö täbä lä cule täbä ma cui, mau u jamö täbä lä cubodi täbä ma cui, wama täbä nö nia idubö taimi.

⁵ Ö̦jö täbä nö idubö ja wamacö möfe nia deiomi. Wama täbä a̦fa nia bada doblao taimi. ’Camiyä Jeobaa ya lä cui, cafä wamacö nija ya bufiblamobä ya. Ya bufi lä jaluo wei, ö̦jö ya. Wale a̦ ji̦liblaimije ja, wale nofi lä wa̦libou wejei täbä nija showadi ya nö yuo. Cama bä ma cui nija, bei ijilubö ebä ma cui nija, bä fääshä ebä ma cui nija, ö̦jö cama bei ijilubö ebä mö feduwä bä ma cui nija, ya nö yuo nodiablalou showao.

⁶ Ö̦jö ma cui, wale lä nofimaö wejei, showadi ö̦jö ya bä nia shino nofimadii, ya tä tamaö lä bufii wei tä a̦ nofi lä cadidibou wejei bä lä cui. Ya bufi nia mladoimi. Cama bä ma cui, bei ijilubö ebä ma cui, cama nija bä bluca lä nodiblou wei bä ma cui, ya bä nia nofimaö feiablalou.

⁷ ’Camiyä Jeobaa ya, cafä wamacö nija ya bufiblamobä ya lä cui. Wamale a̦fa nia jole jole jayumaö buomi. ¿Ö̦jö tawä? Wale a̦fa jole jole jayumaö lä buo wejei bä nija, camiyä Jeobaa ya nö yulayou.

⁸ ’Wamacö yanöcöobä tä mö jalu sábado lä cui, wama tä nofi nia jalu jaducubou, ö̦jö tä mö li jalu yaiobä —a cuma—.

⁹ Showadi wamacö lä ojodamou wei wama tä taö showao däjä, 6 wama tä mö nia didi tablamaö.

¹⁰ Ö̦jö ma cui, wamacö yanöcöobä tä mö jalu lä cublou wei däjä, wamacö nia ojodamoimi. Camiyä Jeobaa ya lä cui, cafä wamacö nija ya bufiblamobä ya. Sábado tä lä cui, camiyä wamale nofi yai jaducubou yanöcöobä, ö̦jö bei tä mö nia jalu yaio. Ö̦jö lä däjä, cafä wamacö ma cui, ijilufä bä ma cui, tääfä bä ma cui, wamacö nia ojodamoimi. Wamacö nosie juamobä wama bä wa̦lo lä tabou wei bä ma cui, wama bä suwä lä tabou wei bä ma cui, ö̦jö bä nia ca̦i ojodamoimi. Cafä wamacö nija a coyocoo lä bädao wei a ma cui, a nia ca̦i ojodamoimi. Wamacö yalobö ma cui, wama bä nia ojodamomaimi.

¹¹ ’Jeobaa ya lä cuinö, 6 ya tä mö didi tablamalanö, ya täbä bluca malä tablaleno wei. Judu mösö ma cui, bita a ma cui, ö̦jamö täbä bluca lä cublai täbä ma cui, ya täbä bluca tablalema. Modu ubä ma cui, ö̦jamö täbä lä cubodi täbä ma cui, ö̦jö täbä ca̦i showawä. 7 tä mö jalu ja, ya ojodamou yanöcöblaliyoma. Ö̦jö cudeenö, wamacö yanöcöobä tä mö jalu lä cui, ya tä a̦fa jalu shomi wäa showadaquema, tä mö jalu yaiobä.

¹² ’Faafä a ma cui, naafä a ma cui, dodijidawä wama bä ca̦i fa cuonö, wama bä a̦ nia juaö, ya tä ulifi lä jöböaö wei jamö wamacö demi cudiobä —a cuma—. Camiyä Jeobaa ya lä cui, cafä wamacö nija ya bufiblamobä ya.

¹³ ’Yanowamö wama täbä nia shäimi.

¹⁴ ’Wamacö nia joleblaloimi.

¹⁵ ’Wamacö nia tomömoimi.

¹⁶ ’Aifä wama täbä a̦fa nia jole jole wäyäimi.

¹⁷ ’Ai a yanobö ja, wamacö bufi nia waiyoimi. Ai a suwäbö ma cui nija wamacö bufi nia ca̦i waiyoimi. Ai a nosie juamobä bä wa̦lo lä tabou wei bä ma cui nija, bä suwä lä tabou wei bä ma cui nija, wamacö bufi nia ca̦i waiyoimi. Ai a yalobö ma cui ja, wamacö bufi nia ca̦i waiyoimi. Baca ebä ma cui ja, bulo ebä ma cui ja, wamacö bufi nia waiyoimi. Tä tabou lä bädao wei tä ma cui ja, wamacö bufi nia waiyoimi waiquiwä —a Jeobaa cuma.

Jeobaa nija bä ajedou lä quilino wei tä a̦

¹⁸ Bei. Cama bä mamo mötale däjä tä nö bluca fa quilijiblalunö, bä quilii fe balojooma. Bä quilili blösö blosöblaloma. Ya̦lu a wa̦ bada tai taimoma. Madula a wacö blalöloma. Tä madofi lä jolamou wei tä a̦ nacläama. Bei macö jamö wa̦queshi bä bada tolucublamoma. Bayäcäwä bä fa ublaalunö,

¹⁹ Moisesi nija bä quililanö bä a̦ fama. —Cafänö yamalecö shino yai da yömöla, cafänö. Bäfä a̦ ji̦liaö weicätä. Camiyä yamacö nija Yai Bada wa wa̦ famabä mlai, ö̦jö a wa̦nö yamacö nomaa dicolalu —bei bä cuma.

²⁰ —Bä quili dijä —Moisesinö bä nowa tama—. Wamacö cadidou wababä, Yai Bada a malä waloicufe. Wamacö fa quilinö, wama a wa̦ yai ji̦liaö shaliliobä. Wamacö dobloimi majöo mlaobä —bä nowa tama.

²¹ ¿Ö̦jö tawä? Cama bä ublaa ma bayäcäodayou däjä ma cui, Yai Bada a lä cule jamö Moisesi a shino blacätejelayoma, tä mö didi lä sublaono wei jamö.